【龔成問答信箱】（Q15341-Q15360）
Q15341：
你好呀，想請教你關於00823領展
本人於上市時抽中幾首，現在想再吸纳。
但有些問題想不通
如現階段吸納，豈不是把平均買入價扯高？
1.我應該是先沽手上貨賺錢離場後再重新再買？
2.定係手上唔沽，現價吸入呢？
希望你能有空解答，謝謝你
龔成老師：
其實好多散戶同你一樣，都有這類問題。
其實，你地太著重「買入價」，被這個價限制左。
我假設你現時財富有$100萬，假設你想增值到$200萬，過往$100萬貨的持貨買入價，與你之後如何增值到$200萬，是完全無關的！（你細心想想）
所以，你「賣手上貨賺錢離場後再重新再買」，這是典型的心理問題，對財富增值完全無作用。
你現價買入，的確會增加平均價，但細心想，如果只要這一次的買入能產生正回報，這次買入的動作就正確！
所以，我地只要考慮，你這刻買入的，是有有質素的股票，現價是否有投資值博率，領展（0823）有質素，這刻合理區中下，可投資。
另外，要同時考慮集中持貨問題，就是你加注後，這股佔你組合的比例，如果過多，就不要投資了。
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
Q15342：
成哥，見巴菲特買左西方石油，令我留意返857中石油，雖然我知佢唔係最優質級別，但見佢估值已係多年低位，想請教成哥現價買值博嗎？thx ，成哥
龔成老師：
中石油（0857）都算有質素，但這始終是商品企業，產品沒有差異性，只能賺取合理的利潤，因此，其實佢不算是最高質的類別。
佢會比較受油價影響，自主能力不強，油價長期仍會向上，而中短期可以較波動。長遠增長力只屬中等，現價合理，小注投資可以。
我相信巴菲特投資企業，會睇質素與平貴。相信佢考慮到質素與值博率因素，先投資西方石油。
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
Q15343：
老師，想問一下現在有強大護城河的行業有哪些?小弟只知道物管股和公路股 還有其他更好的行業投資嗎 如果有 又是哪些龍頭股推介 謝謝老師 辛苦哂
龔成老師：
其實好多公用股都有護城河。
水電煤，同埋一些有牌照的業務，如港交所（0388）、賭業股、港鐵（0066）等，都是好有質素的，這類股經常處貴水平（因為市場認為貴得有道理），所以，有時就算處於合理區，都已經有投資價值。
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
Q15344：
你好老師，小弟今年36，手頭上有50萬流動資金，但本人又怕麻煩，唔想買入太多不同類型股票，只想持有一，兩隻
想問，現價買入9988，1211 ok?
龔成老師：
你集中在1、2隻，會有集中風險，因此不建議。
如果你怕煩，就買入ETF，例如盈富（2800）、領航標普五百（3140），這可以佔你資金較大部分，例如7成。
至於餘下3成，就可以一些個股，例如阿里（9988）、比亞迪（1211），這是較為平衡的做法。
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
Q15345：
你好，龔老师，本人有拜读你的作品。
你的作品入面提到 其中两者公路股 ，1052 同 00548 两个。
由于武汉肺炎的事情， 国家公布由即日起所有高速公路不用收费， 直到 疫情结束为止。 這可能大大打击公路股的收入。
高层都话 2020 年财政年度會有影响。 这类情况你有什么看法呢？
龔成老師：
對，會對佢地的中短期有影響，甚至影響一年的股息。
但我地投資，一定是長期性的，如果能夠放棄一年股息，但股價回落的程度多個過個數目，就值得考慮。佢地仍是有質素的企業，但中短期會弱。
但長期來說，仍是有價值，只要分注投資就得。
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
Q15346：
你好 龔成老師
我主要想找一些高增長股票投資
暫時正在留意01299友邦, 09988阿里, 03690美團, 02007碧桂園
現在投資組合有：
00386中石化@$4.64 x 8000 (原意收息)
003690美團@$103 x 300
請問前景如何！謝謝
龔成老師：
友邦（1299）有質素，絕對可長線投資。
阿里（9988），有質素有潛力，但現價略貴，小注好了。
美團（3690），業務有潛力，但存有不確定性，估值難，這類股有風險有潛力，因此，要自己衡量風險，如小注都可。
碧桂園（2007）雖然有質素，但負債高，風險不少。
至於中石化（0386），質素不差，但不是最高類別的股票，如果注碼不太大，都可以。
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
Q15347：
你好，想徵詢一下理財及投資意見
本人今年28歳，月光族，月入22K
但未有儲蓄及投資習慣，想問一下怎樣可以在4年內達成到人生第一個100萬嗎？
感謝你
正考慮在銀行儲蓄及股票市場兩方面入手
龔成老師：
由於你無本金，所以根本無得錢搵錢。
所以，你第一步要做的，就是盡力增加本金。
如果你每月能儲到$10000-$15000，就有機會達成目標。
你這個年齡，是財富增值的黃金時期，要好好把握，盡你一切的力量去儲蓄、投資、學投資知識。
你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。做月供股票，每月$8000
。
你可以考慮盈富（2800）$4000。
另外再加2隻（每隻$2000）：銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）等，你可以了解下這些股票，然後從中選股。
如果你不懂股，就集中供盈富$8000。
現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。
單靠月供$8000，仍未能達到你的目標，你要同時儲現金，然後把握當大市下跌時的買入時機。
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
Q15348：
成哥，我有兩手騰訊，想在佢升到$4xx 時放左佢，然後等低番再入貨，或者入其他倍升股，請教成哥有什麼股票可考慮？謝謝
龔成老師︰
你要明白無人會知股價之後的升跌，佢可以係升到$4XX當你放左之後，再創新高，到時你就入唔翻貨。所以，我地唔會「估個市的走勢」，只會利用平貴去分析，作為入市策略。
騰訊（0700）發展正面的，我的《50優質潛力股》（新版），都將會加入這股。這股有質素，但市場對佢經常有炒作，因為佢佔恆指比例最大，因此經常成為炒作工具，好多時處貴水平。
只要我地集中在企業的分析，而不是股價上分析，這就可以了。
騰訊有兩大優勢，第一是壟斷式的用戶人數，第二是建立了一個涵蓋網絡遊戲、文學、視頻、音樂、新聞及漫畫的內容的系統圈，令佢可以延伸創造利潤。
此股有長線發展潛力，我建議你長線持有，讓其自己慢慢增值，這個方法對你會最有利。不過，如果你持貨較多，賣部分，是可以的。
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
Q15349：
老師您好～
我睇左你d書+一直都有追你既page, 獲益匪淺，真係好多謝您！！
最近由於個市跌+唔少留意開既唔同行業股都開始落番合理價，甚至有少少平，所以按您一直教既策略，開始慢慢入市+調動定d現金等大手入市既機會。目前情況想您比d意見～～
待入市現金尚有37萬
現持貨市值約23萬
我預會持貨超過3-5年，甚至一直持有及以股代息10-15年先慢慢轉為收息股，持貨情況如下：
(0178) 14000股@1.57
(0285) 1500股@15
(0386) 8000股@4.51
(0590) 2000股@20
(1212) 6000股@7.75
(1257) 2000股@4.2
(1270) 12000股@2.06
(1909) 2000股@4.5
(6869) 1500股@16.6 (忍唔到手入高左...）
1. 我打算以上各股每跌10%就入同等股數既量，跌20%就加注1倍股數，您覺得以上選既股有冇邊d冇增持既價值？
2. 或者冇長期持有既價值，到高少少價位就要放左佢轉入其他？（其他如下）
3. 另外其實一直都仲睇緊以下股票，但覺得佢地目前唔算平所以暫時未下注，有冇邊隻您其實覺得現價已經有較高值搏率，而我可以唔加注以上既股票而入以下邊隻/邊幾隻？
(0868) 現價10.48
(1448)現價6.91
(1830)現價2.84
(3918)現價11.12
(0345)現價32.05
(0152)現價15.76
(0778)現價8.74
4. 另外，我哋夫婦共同供緊月供股票，每月$25000
目前供左2個月，預計只會供5年，但都係會一直以股代息loop約10-15年，想睇睇您對以下既分配有咩更好既建議
2800 $5000
1211 $3000
1177 $3000
0027 $3000
0012 $3000
1038 $2000
0066 $2000
0823 $2000
5. 月供股票部分其實仲想供埋2388，但因為都仲供緊樓，每月儲蓄已經增加唔到...以上有冇邊隻儲既價值比2388低，我地可以儲夠一手就轉供2388呢？
6. 以上首年現金投入股票60萬，月供股票5年共150萬，唔計其他嘢/唔加其他儲蓄，有冇可能10年之後可以有500萬資產呢？
唔好意思我問題有dd多，有興趣既股票又好多...又成日三心兩意...麻煩哂老師撥冗比d意見
龔成老師：
1）方向是可以的，但可以減慢少少入貨的力度。因為市況不穩，你唔好太快用盡資金。
零售股雖然有投資值博率，但始終有風險民唔建議投資太多。反而會建議你加盈富（2800），以及其他更優質的股會更好。同時，見你有好多股票，開始會有點散。
2）我唔建議轉來轉去的策略。
盈富、恆基（0012）、金沙（1928）、港鐵（0066）、太古地產（1972）都可考慮。
3）這些都是有投資價值的，但如果你本身已有貨的股，就未必適合太集中，除非原本貨不多。
置富（0778）、維他奶（0345）、金界（3918）是較優質的。
4）這都是有質素的股票，都可以月供，長線無問題。
5）中銀香港（2388）雖然可以加入月供，但你開始分得太散，如果有資金，可以簡單加盈富金額，最好。
6）我相信有機會的，但好睇這段時間的市況，能否不太貴，比你不斷買平貨，加上到多年後，是否市況理想。
另外，以你的年齡，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。
現時大市處合理區，可以一邊投資一邊留現金，而餘下現金的運用，就是等大跌市時出手（因為現時大市只處合理區，未到平宜區，現時，分注入，加上留現金等機會，是最好方法），如果你能在這段時間學好選股等技巧，到大跌市時就能把握機會，財富增值會更明顯。
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
Q15350：
龔Sir你好，我是進階班的學生，多謝你悉心設計課程，讓我們獲益良多。
課堂最尾你分享訓街的往事，定立目標去努力實踐，你個人成長的分享，可鼓勵我繼續向目標前行，真的十分多謝你！
最後，祝你生活愉快，身體健康！
龔成老師：
我希望用訓街的故事，教大家「決心」，我好相信，我地可以完成好多野，但一般人唔會逼自己去做，但如果肯去做，好多野都會唔同。
我相信你都有自己的目標、夢想，比D信心完成佢，想信自己！
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
Q15351：
龔成老師，你好 ! 我今年27歲 ! 我是月供股票的新手，我目標希望在5年內草到100萬
暫時月供$5000 ( $3000 盈富 + $2000 金沙 ) , 這個組合有機會達成目標嗎?
另我每月可調動 $5000進行月供 , 總共$10000
可以如何分配呢 ? 謝謝你
龔成老師：
我會建議你這刻，月供$8000，同時儲現金$3000以上。$5000 盈富（2800） + $2000 金沙（1928）。
由於你是初階投資者，暫時集中月供，唔好用一手手的模式進行，不過，你要在這刻開始學投資，希望半年內有基本功，加上到時有一定的現金，就可以有效運用。
如果單靠月供，較難做到5年$100萬。你一定要同時懂得運用餘下資金，選股，把握投資時機，先可以有較大的財富增值。
另外，以你的年齡，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。
現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
Q15352：
龔sir你好，近來有幸接觸你的書籍，並決心一改自己以往投機陋習，報讀6月課程，屆時希望見到你。
本人有一個人知識的問題(跟股票無關)
我失業好幾個月，並相信接下來亦有段時間才能找到工作，正正想藉這個時間自我增值，提升知識和在職場上的技能，所以想聽聽老師你有沒有什麼建議給我？
盼收到你的回覆，祝安康。
龔成老師：
其實好睇你想發展的方向，所有野都要以長期作視點，唔好只睇這刻。
你要分析，自己5年後、10年後，想變成怎樣，想做咩職位，這是你的大方向，而你這一刻，就要學一些與這目標有關係的野。
例如你想5年後開一間糖水店，但這刻無資金，其實可以利用這些時間，多學習飲食業有關的知識，技巧，生意手法，這就是好好利用時間的方法。一切，都要你有大目標先。
6月見！
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
Q15353：
龔老師你好！我今年26歲，想開始學投資投票，但有D迷惘
現時失業，靠份part time搵幾蚊收入剛夠基本生活，無乜錢剩，所以唔敢做月供股票。銀行有約20萬儲蓄，請問可以點樣投資？
我有意買匯豐，見呢兩日股價跌左好多，但入場費都唔少，如果只入少量一兩手係咪意異唔大呢？另外有意買建行做短線投資，但錯過左上星期6.1個價位，依家已經升返上6.5了。請問有無咩意見比到我呢？
我睇過你其中一篇分享文章提到股票高低位並非只著眼於股價高低，而要視乎市場係處於恐慌氣氛定狂熱期，再比較價位高低...想請教點樣可以分析到市場氣氛係恐慌定狂熱呢？
唔同時期嘅價位又可以點樣劃分？以匯豐為例，呢幾日相關消息出左股價一直跌，但我見買入嘅人依然好多，係咪意味未係入市時機呢？你對於現時入市有咩睇法？
以匯豐現時嘅情況，未來仍然睇好嗎？
非常感謝！
龔成老師：
如果你這刻失業，理財就會偏向防守，現金較多，投資不能進取，因為我地投資，一定會假設這筆錢是中長期不會動用的。
所以，你要睇翻你的情況，睇下現金要預留多少作備用。
匯豐（0005），雖然跌左好多，但未平，現時只是合理區。你預這企業的增長力有限，買入只是收息。建行（0939）都有類似情況，只是收息股。
記住，並不是跌得多就是平。
我地要計算企業價值（這好難三言兩語講到，因為就算在我的股票班，都要5小時先講完）。同時，分析大市冷熱，正如最初肺炎爆時，就是小恐慌期，是大市次的表現，即是入市時機。
如果你26歲，建議你考慮其他更有增長力的股票，盈富（2800）、銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）等，你可以了解下這些股票，然後從中選股。
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
Q15354：
老師你好，請問1740 同1269前景點樣？現價值唔值得買少少？
龔成老師：
新石文化（1740）主要透過合約安排在中國從事授出電視劇播放權許可（包括作為執行製作人製作的自製電視劇及外購電視劇）；以非執行製作人身份投資電視劇；以及擔任電視劇的發行代理。
佢的客戶包括電視台、從事電視劇發行業務的公司、電視劇執行製作人及版權擁有人。
佢業務都幾波動，雖然有前景，但風險較高，如果可承受風險，小注都可。
至於首控集團（1269）年年虧損，暫時見唔到有投資價值。
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
Q15355：
老師你好想問 916 龍源電力現時屬於便宜區嗎? 是小注入市時候嗎? 謝謝!
龔成老師：
龍源電力（0916）長遠仍有發展，但相信中短期會較一般。現價合理區中下部，如小注，可以。
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
Q15356：
成老師，想指教一下！
我本人去年9月轉按樓宇，4百萬，每月供款為$15,000。實質從收入取出$10,500 供款。
因為當中轉按備用現金130萬有high rate interest $3,200每月.
你覺得我可以從130萬取部分投資嗎？本人收入為36,000每月，每月必須要留下21,000供樓及照顧父母！
我現時積蓄只是買了小量01177,0966,03759,09988,2800。 對嗎？感謝你
龔成老師：
你可以考慮將部分現金，投資收息股，但不建議全部。
因為這部分始終是借錢而得，因此在策略上，唔建議太進取，故投資收息股，賺差息同時風險不高，是較好的選擇。
你可以建立考慮一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、匯豐（0005）、置富（0778）、陽光（0435）都可以。
至於現時持有的股票，基本上都可以持有，問題不大。
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
Q15357：
你好 我想向你請教一下投資建議。
我（28歲）月入2萬，目前現金儲蓄只有15萬，現時每月可儲1/3月薪；
我未有股票戶口，但有2份保險（1份醫療保，1份儲蓄保，每年分別供款1萬及2萬）
我最近遇到個難題，我想問 以我現有的15萬資金all in 股票投資 想要一年內增長10萬，有冇可能？
可否給我一點具體投資組合意見？
龔成老師︰
我地投資其實係要係講緊係可承受的合理風險下，將利潤最大化，我地一般會追求平均每年10%-15%的回報。故一年內用投資優質股方法，由15萬本金升至25萬是不可行的。
首先講保險，這是每個人都需要的，這是理財中其中一部分。買保險的原理就是將風險分散，將風險轉去比保險公司。至於買多少，則視乎個人需要，我則建議買「最基本」就可以，增值部份留給投資優質股去做。
我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。
以你年紀計，應以增值為主。現在你每月儲到的$4000去做月供，其餘先儲起，用一邊月供一邊儲蓄的策略。
月供方面，你可以選擇投資在平穏增長股︰盈富（2800）、金沙（1928）、恆基（0012）、中銀（2388）、港鐵（0066）、煤氣（0003）、港交所（388）、長建（1038）、粵海（0270）、領展（823）、深高速（0548）或潛力股︰比亞迪（1211），中生（1177）或福壽園（1448）。
至於15萬和儲到的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資，我想這做法會較理想。
記住"財不入急門"，再優質的股票都要時間去增長，所以緊記"買入，並長線持有"這個策略。
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
Q15358：
老師 依家社會實在太多負能量嘅人, 你喺專頁度聲明 要排隊 真係教精佢!
我係澳門人，早排賭場放咗15日有薪假 我一啲都冇浪費 不停睇書 ，但係都係只係睇咗三本, 有你嘅著作, 同埋窮爸爸富爸爸， 同埋一啲線上 增值 嘅課程。
老師你之前提過港澳冇一啲理財嘅學科, 畀小朋友去學, 你會唔會好似富爸爸一樣 開班教小朋友 理財， 或者整一啲大富翁嘅桌上遊戲 小朋友可以重細認識
我真係唔想我下一代 好似書上面咁老鼠賽跑！ 因為我就係書上面嘅窮爸爸。辛苦曬老師
龔成老師：
對，學校完全無教過我地理財教產，令一般人唔識理財，唔識買樓，以為現金有價值，只懂賺現金差價。
所以，我地要盡快學正確的理財知識，你好好利用放假時間，是增值自己的好機會！
只要你努力，一定可以有所突破，保持進步！加油！
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
Q15359：
老師，我想問如何分辨增長型既股同收息股
此階段建議我入手中生製藥嗎 及如何投資？月供？
還是草一大筆等佢便宜區再大手購入 它什麼價位才算便宜區
龔成老師：
你要從企業及派息政策去分析。
買股票就是買企業，有些企業處於業務高增長階段，例如比亞迪（1211）中生製（1177）等，這類股是潛力股，不過，你見佢會將來部分的盈利，再投資翻去公司作發展，而唔會派息。
相反，有D企業，業務增長力不強，例如港燈（2638），企業賺錢後，都將盈利作派息，而佢過往的股息都好穩定，這就是收息股。
中生製這刻仍有少少貴，小注或月供可以。
如果你本身已較多股票，當然是儲下現金先進行。
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
Q15360：
你好, 龔成.本人是自僱人士, 29歲, 月入不定, 比較浮動, 平均大約2-3萬. 老婆月入22000左右.
今年上左車,開始要供, 月供約2萬, 而流動現金儲備約20萬. 計埋二人每月開支約1萬, 總共3萬開支.
股票方面:
836 2000股 $14左右入
939 14000股 $6.9 左右入
想問龔成, 現時我可以點做先可以令財富增值? 我現在歲數, 應該接受中風險的投資嗎? 又或者應該買什麼股票較好?謝謝
龔成老師：
由於你有一定的負擔，所以唔好用盡現金，要留一定數目。
現時持有的股票，都是有質素的，唔需要太理會買入價，持有就得，不過增長力不強。
只要是閒錢的部分，就可以投資「平穩增長股」+「潛力股」，平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、港交所（0388）。你可以考慮月供模式進行，每月供$6000。
至於現金部分，就要留$10萬以上，餘下就可以等大跌市時投資優質股。
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\
多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。
另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。
百味人生電視劇線上看 在 百味人生shared a video from the playlist 电视剧01. | Facebook 的推薦與評價
百味人生.. 1 yr Report. 徐靖惠, profile picture ... 14 hrs ·. TVB視後惠英紅新劇再演配角花甲之年演技依舊線上曾直言「拋棄自己、用生命演戲」 網友：好演員 ... ... <看更多>