《笑話》
♀：早晨
♂：早晨啊……我尋日有一刻以為你會嬲左我，然後今日唔出聲，甚至會Delete埋我……
♀：傻啦，我雖然唔係一個小器既人，但問題係，要令一個人真心嬲，首先，要對呢個人有期望先，暫時你都未有資格令我嬲，所以請放心
♂：你咁講，我唔知應該開心定唔開心好
♀：隨便你，今日我開題目，我想聽笑話，你講個笑話令我開心下吧
♂：笑話……坦白講，我真係唔多擅長喎
♀：即係，唔傾係咪？
♂：唔係，我盡量諗個笑話啦
♀：其實你大可以上網搵個笑話，複製貼上咪得囉
♂：你講既我有諗過，但我覺得咁樣太無誠意，你想搵笑話，上網都搵到，唔需要同我講，所以我需要既係一個由我諗出黎既笑話
♀：呢個位，有分加，我準備好紙巾喇，請出招！
♂：……嗱，真人真事，你笑完就算喇，想當年我讀書個陣，有一次作文，我想問老師一個字點寫，咁我就當然叫老師啦，但我唔知做乜野，口快快叫左媽咪……當時全班都好靜咁作緊文，呢句媽咪真係比人笑足一個星期
♀：嘩，呢個有創意，真人真事值得加分！
♂：咁請問你開心返未？
♀：我有講我唔開心咩？
♂：一個人突然想聽笑話，總有原因既，最大機會就係佢唔開心
♀：開心左少少
♂：其實一個真正既笑話，係意想不到地聽到，就好似臭屁不響，響屁不臭呢個道理，當你聽到好大聲既屁，你好自然就會暫停呼吸；當你聽唔到臭聲，但又聞到有奇怪味，你想再大力索一啖聞下係咩，點知就中招
♀：所以，唔開心就唔應該聽笑話？
♂：你想聽笑話都係想開心，應該係做開心野，而唔係聽笑話，亦可以係有人氹你開心之類
♀：好，咁你氹下我
♂：我陪住你，咪就係最好既氹囉
♀：嘿，果然係高手，比你溝晒啲女啦
♂：唔好咁講，知道有一個人唔開心，想令佢開心返，係一種修養同美德，係同理心，所以即使係有個男人唔開心，我都會氹下佢
♀：但氹男人同女人既方式係好唔同你知嫁可？
♂：男人我會陪佢發洩情緒，打下機傾下就會開心
♀：咁女人呢？
♂：女人就……要睇下係邊個，男人簡單易明，女人複雜，複雜到女人之中都有分唔同既人，我未清楚你係邊一種女人，暫時無信心可以好大把握
♀：唔好又乘機套我講野好唔好，我警覺性好高
♂：女人好似洋蔥咁，一層一層，你要花好多時間同心機先可以去到核心
♀：係嫁，每一層仲會令你流唔少眼淚添
♂：我好耐好耐無認真喊過，回敬返你，要令一個人喊，都要講資格
♀：算吧啦，男人只係對女人既衫有一層一層扯開既興趣
♂：除衫容易交心難
♀：係嫁，一個人除完衫，仲可以著返衫，但一個人交左心，你比人睇穿晒，已經好似赤裸裸咁，無得返轉頭
♂：所以你先會咁著緊唔比個心出黎？
♀：可以咁講
♂：你係咪讀中文？好少見網上傾計既人會有咁獨特既睇法
♀：唔好套我
♂：咁你鍾唔鍾意睇書？
♀：離題喇，關笑話咩事？
♂：無，如果你鍾意睇書，我諗住送你一本真係笑話姐
♀：……你頭先，係唔係，講左一個笑話？
♂：我話唔係，你可唔可以當我真係唔係講緊笑
♀：唔得，but good try
♂：喂，你真係無再嬲我？我認真覺得尋日講野唔太合適，如果令你唔開心既話，我真係想同你道歉
♀：道歉就算喇，你可以諗定幾個笑話，我有需要時可以氹下我
♂：好，我應承你，聽朝有野要做，要訓先，晚安喇筆友
♀：哦，好，晚安
♂：哈，今日終於係我End Topic先
♀：好威啊你
♂：威唔威我唔知，但我知道，今晚你會記得我
♀：……
♀：我對你既警覺性要再提升一個級別
♂：我對你既進攻性都要提升一個級別，好喇，真係訓，晚安
—————
長傾·不見@筆友
https://bit.ly/LongchatEP1
長傾·不見@緣份
https://bit.ly/LongchatEP2
長傾·不見@年齡
https://bit.ly/LongchatEP3
長傾·不見@拜金
https://bit.ly/LongchatEP4
