#珊吹老師
#和你吹
#補堂
#真正嘅法治之區
#保安局局長唔識法治保安
Good Evening Class:
Thanks to 特首領導嘅管治團隊，搞到今日香港戒嚴咁，MTR 率先變成EmptyR，成功令大部份同學仔都出唔到街，大家乖乖哋留喺屋企睇多啲新聞，同同學仔傾吓偈，令週末長假期變得更悠長，有咩唔使留返拜山先講，呢個領導班子，真係功德無量。
今日珊吹老師睇多咗好多新聞，見到我哋嘅保安局局長李家超先生，繼續唔明白咩係「法治」，而喺呢個基礎上面，佢當然唔明白咩叫「保安」。
比卡超繼續出嚟further elaborate 佢所講嘅「有暴徒犯法，先至要警方執法」膠論。珊吹老師覺得有必要將第三堂 #法治之區 重貼，同大家溫習下。
🦊🦊🦊🦊🦊🦊🦊🦊🦊🦊🦊🦊
Good evening class.
我頭先睇住關於「反蒙面法」嘅記招直播，真係好嬲，我嘗試平伏自己心情，不過唔係好得，愈睇新聞愈嬲。
我本身好少戴太陽眼鏡，更加好少戴口罩，呢條法例對我並無影響，但係點解我咁嬲呢？並唔係因為市民係都要鬥氣，亦都唔係我想遮面出街，重點係，呢條係成大條狐狸尾巴，之前都遮遮掩掩，而家佢成碌擺上枱呀！
好似捉棋，又好似踢波，應付你對手，永遠唔係睇佢啱啱行嗰步，係要預計佢嘅下一步同下幾步。而家我哋打緊仗，波已開，大家要打醒十二分精神，唔單止要有participation, 仲要有anticipation.
如果唔知我講咩，去問個識踢波既，佢會解釋俾你聽，落咗場，anticipation嘅重要性。
講返轉頭，我覺得大家今晚唔駛出街硬碰，盡快去安全地方，準備今晚訓一覺好既，咪由得佢哋喺街等捉蒙面囉，空城計，都係高級策略嘅一種。
🐞🐞🐞🐞🐞🐞🐞🐞🐞
好！各位同學，而家入正題，今堂第三堂，教反駁李家超膠論。
喺頭先3點鐘記者會度，保安局局長李家超多次重覆呢兩句：「如果無暴徒犯法，就唔駛警方執法。」
佢咁講法，大錯得錯，但佢好明顯好滿意，覺得好型，重覆又重覆。
好，珊吹老師盡量唔講粗口，斯文啲回應吓李局長（或撰稿員）呢兩句嘢。
「局長先生：一個法治之區，其法治效率嘅展現，並唔係喺呢個地方裡面無人犯法，而係當呢個地方裡面有人犯法，我哋有一套成熟完整既法律制度，讓執權一方能有效地依法執法。
而法治精神既相反就係人治 - 朝令夕改，仲唔駛經程序，呢啲就叫做人治，正正就係而家香港政府做緊嘅一套。」
舉個例子：
「李局長：如果你係廁所所長，你並唔係要追求無人如廁，而係有人如廁後必須妥善處理善後及清潔，咁邊個去做呢？如果係使用者自律冲廁同埋唔整到一地都係就當然好啦，佢唔做你亦可以勸喻佢，或者依例罰佢。但如果仲係有人破壞規則，廁所臭崩崩，請你返嚟就係要你去妥善處理呀！呢個咁簡單嘅道理，連一般廁所阿嬸都明，你唔係唔明呀？
局長，又如果照你鋪話法，係咪即係嗰個月如果無人犯法，警方唔駛執法，出糧pro rata呀?」
🦋🦋🦋🦋🦋🦋🦋🦋
珊吹老師真係好好奇，呢個理論，係局長自己想法？如果係，咁好對唔住，佢對保安既概念好錯，連廁所阿嬸都不如。大家幾時聽過有阿嬸好鳩💩咁講：「如果無人痾屎，我就唔駛管理個廁所」？
又如果，呢兩句嘢係撰稿員寫出嚟俾局長讀嘅，咁，飛雲，機會嚟啦！！
同學仔只要由而家開始俾心機學習吓邏輯思考，你最少可以勝任為政府公關人員及撰稿員，甚至做保安局局長！
想要做得好過現任嗰啲，應該唔難。大家努力，加油！ＯＫ？
Goodbye class!
