我嘅職業係：灶神（下）
上集：http://bit.do/fcUgL
應該點算好呢？上次問咗黃大仙同月老，今次我就去請教車公。
佢雖然唔算最出名嘅神仙，但年年都有人搵佢，好似永遠唔會被遺忘咁，我都好羨慕。
車公咁樣答：「可能係因為，車公廟求籤好出名，年年都有人求籤，問個城市嘅未來。」
「所以我應該開個『灶神求籤』服務？但又唔夠你爭喎。」我好苦惱。
「唔一定係求籤，對於我哋呢啲無咁出名嘅神仙，可以提供特別嘅服務，令人類喺某啲場合，就會諗起你。」車公總結。
特別服務，而其他神仙又無提供嘅......
我召集信徒，集資開咗一間「灶神電訊」。
「灶神電訊」嘅網絡，都有我嘅法力加持，保證以低廉價格，提供優質網絡服務。
以前，我保佑廚房；依加，我保佑網絡。
過咗一排，真係有唔少人轉台，用「灶神電訊」，
佢哋仲會同朋友分享，話呢間公司網絡幾好，令我嘅信徒都賺咗一筆錢。
唯一嘅問題係，無論舖頭貼幾多灶神圖、工作人員點樣讚美灶神，客人都剩係讚間公司好，一啲都無留意灶神。
我相信，就算間公司改名做「垃圾電訊」，人類都唔會在意。
呢條路宣佈失敗，我決定執咗間公司佢。
我宣佈公司要執笠，信徒都好失望。
男信徒鼓起勇氣話：「您係真正嘅神仙，只要現身人羣，大家都會信奉灶神。」
「天庭有規定，一個神仙只可以喺三十個活人面前現身，而且唔可以拍片影相，否則滿天神佛飛嚟飛去，人間會亂。」
我解釋：「你哋三十人見過我，到有人死咗，我先可以喺新人面前現身。」
男信徒點點頭：「我明啦，只係咁樣好可惜，『灶神電訊』好賺錢。」
我嘆氣：「我正職係神仙，又無打算做生意，賺錢有咩用？」
「好有用㗎，如果我有錢，我本《有個神仙愛上你》就可以拍電視劇。」有個女信徒細細聲講。
「電視劇？」
女信徒解釋，原來佢寫咗本愛情小說，好想拍電視劇，連邊個演員做咩角色都諗好。
「呢啲電視劇好多人睇咩？」我隨口問，既然「灶神電訊」計劃失敗，咪同佢哋傾吓計。
「神話仙俠愛情好受歡迎，之前播嗰套呢，個幻世天尊型到震，個個女仔都鍾意佢......」女信徒滔滔不絕。
幻世天尊？天庭根本無呢個人，一個虛構嘅角色，居然比勤勤懇懇嘅我更受歡迎，呢個世界好唔公平......咪住先！
我問：「你有無諗過，拍一套以灶神為主題嘅電視劇？」
跟住落嚟嘅事，就簡單好多。
只要有錢，寫劇本、投資、開拍電視劇，都唔係難題。
灶神唔再係留鬚嘅老爺爺，而係英俊深情，經歷萬世情劫，為咗守護愛人，甘心留喺廚房，當然要搵最靚仔嘅男明星飾演。
拍完一輯，已經有好大迴響，街上嘅少女都會討論灶神：「嘩，原來灶神咁有型，唔係老土嘢。」
我終於，重新成為一個被人重視嘅神仙。
我曾經以為，神仙要被人類留意，只可以靠「保佑人類」。
估唔到，更適合我嘅方法，係做偶像。
條條大路通羅馬，但未必條條大路都啱你。
我哋需要學習，更需要搵自己嘅路。
－完－
將專頁設定為「搶先看」/ "See first"，最新故仔馬上睇！
新書《寓言地府動物園》已經出版了，現正發售中，
詳情可點擊這裡：http://bit.do/e37JG
你的支持是我最大的動力！
#短故 #短篇 #小說 #陳美濤 #廣東話 #粵語 #tomatochan #我嘅職業係灶神
