【Kongner編輯室】
瘋子愷：為鋪路而犧牲嘅作品 二世事件簿簡評
二世事件簿係本人7月入面絕無僅有會每星期keep住追嘅新番。呢套嘢其實早於19年年頭已經播出咗第0集，而第0集嘅制作水準亦係令本人感到大為驚喜。到咗完整版13集已經播完嘅今日，本人對呢套嘢嘅評價就變得一言難盡，所以就喺呢度略略咁講少少主觀同偏見嘅感想啦。
事件簿原作小說啱啱喺今年完結，而係10月重頭戲。作為日本最吸金嘅手機遊戲FGO嘅第七部動畫開播前，《事件簿》動畫就早已被安排係7月檔期播出，其用意顯而易見，就係要作為FGO嘅預熱，想達致19年下半年ACG界都係Fate嘅天下。雖然FGO依家只播咗一集，難以評價，但事件簿又叫唔叫做完成咗佢嘅任務呢？
作為小說改編動畫不變嘅命運，就係一定講唔晒，需要作出唔少刪減同修改以Fit 返落動畫呢個媒介。《事件簿》嘅修改就選擇咗將頭半套內容改為以原創單元劇式去演，而後半套先將小說中段嘅故事拎返出來演。為咗盡量避免劇情過於跳脫，佢喺頭6集嘅原創故事都嘗試埋下伏筆，為之後魔眼列車篇穿針引線。而呢6集的確係睇得出落咗唔少功夫。
《事件簿》本身係成個Fate系列世界觀入面，其實就相當於Fate 0.5一樣。承接住《Fate/Zero》嘅設定，將故事帶到正傳《Fate/Stay Night》嘅時間線。當然，作為後置嘅前傳故事並無辦法為最初面世嘅F/SN帶來任何影響，作品性質比較接近F/Z嘅後日談，再加上真正意義上，對Fate系列世界觀嘅補完作品。但係呢個係小說嘅事，動畫版不論係原創，還是選題上面就已經睇得出另一種味道。
無論係原創劇情出場嘅降靈科部長個老嘢、獅子劫、考列斯、新所長，去到魔眼列車篇嘅主角前所長、佢口中所提到嘅老所長、地球模擬環境模型等等，似乎都睇得出所有角色出場嘅用意都係想帶觀眾由前年嘅《Apocrypha》開始，透過《事件簿》，最終指向FGO。當然啦，其實呢三套係設定上都各自係平衡世界，但《事件簿》因為佢比較輕鬆嘅背景設定，就被賦予咗作為中間橋樑嘅重要角色，一切都為咗FGO而鋪路。
從呢個角度去睇，《事件簿》毫無疑問地完成咗呢個重要嘅角色，但係從一套獨立作品嘅角度睇，《事件簿》就稱唔上係一套出色嘅作品。雖然作品打著推理小說嘅旗號，但事實上對Type-moon作品有認識嘅讀者都知佢地嘅出品，就係佢話OK 就OK，講咩邏輯推論，到最後都係離唔開作者嘅設定。用呢個角度睇，大眾一開始就無對《事件簿》嘅推理內容有期望。但慶幸嘅係《事件簿》打嘅就係Fans市場，所以理應唔出太大問題嘅話，觀眾都會受落。可惜嘅係即使本人一早已經抱住佢話OK就OK嘅心態去睇，依然對劇情嘅發展同解釋搲晒頭。因為動畫無時間去做設定上嘅補完，然後偏偏喺解決問題嘅時候先爆出一堆聽都未聽過嘅設定，再見住堆見都未見過嘅原創角色同主角係度互相嘴遁，得出嘅結論就係：媽呀！我究竟睇緊啲咩呀！？
即使二世經常強調我地要搵出嘅係whydunit（動機），但呢一點去到最後魔眼列車篇就正正成為咗一個諷刺。魔眼列車篇作為原作改編劇情，理應係故事嘅高潮，但反而比到本人高開低走嘅感覺。呢章開始增加嘅動作場畫完全顯示出製作組嘅弱項，根本無足夠能力處理流暢嘅動作場面。分鏡、作畫雖然都未至於好差，但明顯係有種勉強做出來嘅感覺。而到咗呢篇最後爆出幕後黑手嘅時候，居然係一個完全未見過嘅角色，完全諗唔到係點推理出來架！呢點都講咗算啦，重點係我睇完晒到最後都唔知佢搞咁多嘢嘅動機係咩呀！！說好的whydunit呢！？我淨係知佢係始皇帝咋！然後又經過一輪無意義嘅動作戲，打兩下話走又比人叫停，又打兩下又話走又叫停，仲要見住部車變型開炮，成集完全係意義不明，終極1999，睇到本人十分尷尬。
去到最後一集，選擇用返文藝式收尾，本人其實覺得幾受落嘅，但呢度反而突出咗另一個問題，就係原來成套嘢我都唔知二世班徒弟嘅存在意義係咩呀！唔好話佢地做過啲咩，佢地有幾多次有意義嘅出場都成問題。
總括來講，本人認為《事件簿》動畫為咗為FGO動畫鋪路而壯烈犧牲，浪費咗大好嘅人設同音樂，成為咗一套無靈魂嘅作品，甚至到咗可唔可以當佢係一套單獨作品都難以評價嘅尷尬之地。難得格蕾、萊涅斯同所長咁好睇，實在太可惜啦。而本人亦都開始質疑系列構成嘅小太刀右京嘅功力，不過呢度唔多講啦，有機會再講啦。想再睇動畫評論就記得留意我地Facebook Page啦。
（本欄逢周一、四更新。敬希讀者垂注）
