《股債轉淚點》
今個星期，科技股股災，係人都識得講係因為美債既孳息急升，觸發科技股急跌。美國同香港既科技股有幾咁危險，我都解釋過喇。到左今時今日依然唔願走既朋友，無非都係因為擔心你呢頭走，果頭孳息又回落啫。放心，今日我寫呢一篇，並唔係要迫你走，只係想你從宏觀既角度睇清楚：呢個世界已經唔係企响你果邊啫！
美國十年期國債既孳息率飆到上1.50厘，到底係一個咩概念？點解咁得人驚？正所謂有圖有真相：圖中嘅藍色線（孳息率）其實係响8月見底回升，但係點解到近日先有人提？科技股升到依家先至冧？咪就係因為佢升穿左白色線（美國標準普爾500指數既股息率）囉。佢本身無咁低既，係股價越黎越高，股息率先越黎越低。
債息升穿股息到底有幾咁大件事？我話俾你知：呢個係影響緊全球大戶、基金既轉捩點！就係當債券既回報高過股票既話，而債券係零風險risk free既（呢個econ第一個chapter已經教）咁保守型既資金譬如係養老金又洗乜出黎equities度擔驚受怕？入晒fixed incomes度就得啦！仲有，你唔好忘記渣科技股既估值超貴架喇！
依家，你終於都明白個泡沫點解會依家爆啦？跟手你一定會問喇：隔夜個孳息率落返1.40厘咯渦，咁科技股會唔會有少少彈呀？我既答案係：會，但你唔好期望會好多。你就當條藍色線係一隻股，佢擺到明升出左勢頭來，又點可以隨便估頂？對比返恆生科指指數既雙頂穿頸線（9360），亦都係跌出左勢頭來，又點樣估底渦？
最後喇，我都要帶返個頭盔先：就係2017至2018年，孳息率一直都係高過股息率架啦，但美國既科技股咪一樣係牛市！所以，依家既科技股唔係熊市，係牛市入面既大調整，而且以科指為例，雙頂穿頸線你唔避既話，下方仲有幾多跌你根本唔知！情願等科指收復9360，騰訊（700）美團（3690）收復681、356企穩再買啦！
🙃
#美國國債 #孳息率上升 #穿越股息率 #科技股急跌
