我嘅職業係：模擬市民（下）
上集：https://bit.ly/3vddsDR
然後有把女聲回應：「係啊，呢個玩法喺網上學番嚟㗎。睇住隻角色急到瀨尿、餓到就死……幾好笑啊，哈哈哈。」
「我就鍾意睇住佢哋自由發展、返工放工、拍拖結婚，平平凡凡咁都幾減壓。」男聲講。
「所以見阿俊就死，我咪拆牆放番佢出嚟囉。」女聲話：「可惜我屋企冇裝《模擬市民》丫，以後我要多啲嚟表哥屋企玩。」
男聲就答：「哈哈，你嚟多幾次，我啲模擬市民俾你玩死晒。」
我只係《模擬市民》裡面嘅虛擬角色？我根本唔係真實存在嘅人，一舉一動都係人哋嘅玩物？
我好震驚，我唔敢相信，但我又不得不相信。
除咗呢個理由，仲有咩可以解釋，我就咁瞓個晏覺，幾個鐘內俾四面牆圍住，嗰四面牆又莫名其妙咁消失。
我好唔開心，我唔敢同老婆講呢件事，我驚佢比我更唔開心。
我決定自己諗辦法，跳出第四道牆，跳出呢隻Game，擺脫人類嘅控制，成為一個獨立嘅人。
為咗了解我身處嘅世界，我去Game鋪買咗一隻《模擬市民》。
我發現模擬市民真係有好多玩法，有啲玩家唔會特登操縱隻角色，只係關鍵時刻，例如搵工、結婚，先做吓決定。
咁隻角色就會按自己嘅意識去行動，肚餓就食飯，眼瞓就瞓覺，甚至同另一半嘈吓交咁。
我諗，我嘅主人「表哥」，就係呢種玩法，亦因為咁，我先可以生活得咁輕鬆。
有啲玩家就以折磨角色為樂，由於《模擬市民》唔可以直接拎把刀出嚟斬死人，所以佢哋研發出好多殺人嘅方法。
除咗起四面牆餓死隻角色之外，仲有特登製造火災、電死、種食人花……
嗰個「表妹」睇嚟就係呢種人。
最令我困擾嘅係，「表妹」間中都會嚟玩。
有一次，我行出門口，眼前無啦啦出現咗一個好細、好深嘅游泳池。
我不受控制咁落咗去「游水」，游泳池嘅梯又突然消失，我點努力都上唔番嚟。
我喺水裡面浸住，就嚟浸死嗰陣，條梯先出現番。
你話啦，如果係你條命仔，咁樣俾人操控住，你接受到咩？
我接受唔到，我更努力搵方法。
但有好多嘢，唔係努力就會成功。
呢件咁詭異嘅事，我就算同其他人講，佢哋都唔會信。
我只可以單打獨鬥，但我完全搵唔到「跳出第四道牆」嘅方向。
我要練巫術？我要打code？我要自殺再投胎？
我壓力好大，甚至開始甩頭髮，唯有玩《模擬市民》放鬆吓。
我開咗隻新角色，畀佢按自己嘅意志去行動，仲幫佢搵埋工、搵埋老婆，好似好幸福咁。
但每當「表妹」突然折磨完我，我都會玩《模擬市民》，用同樣方法折磨番我隻角色。
睇住佢痛苦嘅表情，我扭曲嘅心理先有少少平衡。
直到有一日，我開《模擬市民》，我照樣畀我隻角色，按自己嘅意志去行動。
我見到，隻角色食完飯，去完廁所，就打開電腦，開始玩《模擬市民》。
我係模擬市民，但到底邊個先唔係模擬市民？
或者，「表哥」同「表妹」都係模擬市民。
或者，我同你，都係被操縱嘅模擬市民。
—完—
將專頁設定為「搶先看」/ "See first"，最新故仔馬上睇！
新書《筍工重生高科技》已經出版了，現正發售中，
詳情可點擊這裡：https://bit.ly/32hgoSN
你的支持是我最大的動力！
#短故 #短篇 #小說 #陳美濤 #廣東話 #粵語 #tomatochan #我嘅職業係模擬市民 #我嘅職業係
突然甩好多頭髮 在 每日甩好多頭髮點算好？四招教你預防轉季脫髮 - YouTube 的推薦與評價
每日 甩好多頭髮 點算好？四招教你預防轉 ... 隱形殺手胰臟癌 突然 消瘦是警號- 鄭丹瑞《健康旦》內分泌及糖尿科專科醫生#周振中醫生Part 1 (CC中文字幕). ... <看更多>