時間跳過去（下）
上集：https://bit.ly/3r16AHz
我想拍拖，想結婚，跳過追求嘅糾結、跳過失戀嘅痛苦、跳過爭執嘅無奈……我已經企喺教堂，準備講「我願意」。
我望住新郎，忽然覺得有啲陌生，我腦裡只有同佢甜甜蜜蜜，行街睇戲食飯嘅記憶……咁我就要嫁畀佢啦？
我答：「我願意。」
反正就算離婚，我嘅痛苦都可以跳過，我驚咩啫？
婚後我生咗兩個仔，懷孕嘅痛苦、生產嘅折磨、捱夜照顧嬰兒嘅無奈……都被跳過。
但唔知點解，跳過得愈多，人生中唔如意嘅時候就愈多。
老公成日同我嘈交，而對於佢不滿嘅地方，我根本冇咩印象，結果就嘈得更多。
唔緊要，通通都跳過去、跳過去！
後來，一場車禍，奪走咗我父母嘅性命。
我想回憶同佢哋相處嘅過程，但赫然發現，我記得番起嘅，好似都係細個嘅事。
我長大後……應該話，我得到隻錶後，同父母相處嘅時候，我覺得好煩所以通通都「跳過去」。
我自責我痛苦，我抵受唔住呢種痛苦，下意識轉一轉個指針。
下一秒，距離我父母嘅死，已經過咗三個月，佢哋已經被燒成骨灰，我已經徹底錯過佢哋嘅喪禮。
我跑番去當年買錶嘅「煩惱小店」，其實我曾經好多次去番嗰個地方，但之後都冇見過嗰間小店，好似憑空消失咗一樣。
呢次，我終於見番呢間小店。
依然係嗰個黑衣女人，佢個樣好似冇老過一樣，佢講：「歡迎光臨『煩惱小店』，你有咩……」
我打斷佢嘅說話：「我有煩惱，我想睇番晒所有我『跳過去』嘅時間！」
黑衣女人彬彬有禮咁答：「對唔住，你『跳過去』嘅時間，係俾你放棄咗，係唔會搵得番。」
「但我依加好痛苦，我覺得我嘅人生好似……咩都冇，咁我點算啊？」我聲嘶力竭咁問。
「一係你找咗條數先？當年你買錶係未畀錢。」黑衣女人一講，我即刻將身上嘅錢交晒畀佢，希望佢可以大發慈悲，將啲回憶畀番我。
黑衣女人微笑：「我嘅建議係，我將隻錶回收，從此你好好體驗生命中嘅每分每秒。」
「咩話？我比番隻錶你？咁我辛苦嗰陣點算？」我死死抓住隻錶，唔肯放手。
黑衣女人皺眉：「但你依加嘅情況，唔適合再用『跳過去』……」
佢話音未落，我已經逃離呢間小店，生怕呢個似乎有魔力嘅女人，會搶走我隻錶。
我跑咗好遠，我個頭好痛，我心中充滿悔恨同不安，於是，我轉一轉個指針。
下一秒，我已經瞓喺病床上。
「阿媽，你放心去啦，我哋會好好照顧自己。」床邊嘅兩個中年男人同我講。
阿媽？我嗰兩個仔明明仲讀緊小學㗎。
我嘗試舉高手，發現自己成隻手都係皺紋，我已經變咗一個好老好老、行將就木嘅阿婆。
我終於明白，點解黑衣女人會話，我嘅情況唔適合再用「跳過去」。
因為「跳過去」係會自動跳過「我認為痛苦嘅時間」。
而以我當時嘅狀態，我心底係覺得，餘生都係痛苦嘅。
所以我一跳，就跳過咗成個人生。
每個人都想跳過難受嘅時間，但世上冇一樣嘢係只有正面，冇負面。
面對光，背後就一定有陰影；經歷過痛苦，先會感受到快樂。
—完—
將專頁設定為「搶先看」/ "See first"，最新故仔馬上睇！
新書《筍工重生高科技》已經出版了，現正發售中，
詳情可點擊這裡：https://bit.ly/32hgoSN
你的支持是我最大的動力！
#短故 #短篇 #小說 #陳美濤 #廣東話 #粵語 #tomatochan #時間跳過去
