在香港時嘅偽中產日子與在英國的真生活 （9）差七個鐘嘅流星
由我去到英國嘅第一個夜晚，我久唔久都會戇居居咁望下個天。我唔係一個觀星愛好者，只係作為一個香港人，真係好難睇到一片充滿星星嘅天空，唔好講流星，今晚之前成世仔都未見過！
唔好笑我，如果好天，當我夜晚去倒垃圾嘅時候，我真係會好享受個星空同嗰一種靜。有啲城市人會好怕靜，因為習慣咗任何時候身邊都有唔同嘅聲。我本來都係厘種人，點樣都要有聲，音樂好，電視好，收音機都好。但係當我到咗英國，我真係開始識得欣賞厘樣嘢。
今晚，老婆同我講會有流星雨，所以佢自己到十點幾就走咗出廳希望睇到流星（我心諗咁易咩，用肉眼喎😅）。而我呢，因為阿女要瞓覺，我唯有安頓咗佢，準備story time。點知到阿女差唔多瞓著嘅時候，老婆走入黎話真係睇到，重叫我同個女一齊去睇。
阿女就忽然之間醒晒，我就抱著阿女，一家三口就走咗出廳到睇星星。三個就望著個天發呆，等到雙眼習慣咗之後，滿天嘅星星就越來越明顯。忽然之間，流星就出現咗！阿女重問：「點解個星星會走黎走去嘅？」，然後就係咁唱Twinkle Twinkle Little Star。唔好講一家人，就算兩公婆都未試過咁浪漫去睇星星，等流星（做戲咩😄）。老婆就同阿女講，唔知你到幾多歲先再見到星星走黎走去，阿女都唔知明唔明白。等下等下，最後阿女就出聲話好眼瞓，老婆同阿女就番去瞓覺。
得番我自己一個，繼續戇居居咁睇。比我睇到一粒又一粒嘅流星，係我一世仔嘅第一次。一路睇，我突然之間覺得好感觸，同一晚，相差七個鐘，其實香港都同樣有同一樣嘅天空。但係就係厘七個鐘，一切都唔同晒，包括我自己、家人、甚至其它人嘅生活，感覺，諗法都已經唔再一樣🙁。
睇睇下，好想用相機影低厘片星空。雖然我識小小影相，亦大概知道影星星嘅原理，但係我從來都未試過實際咁做過。就係咁攞住個幾部相機，左試右試，搞咗個幾鐘，結果都比我成功咗！竟然重比我影到流星！
我真係想同大家分享一下！老實講真係劣作，Post咗亦都唔知睇唔睇到，只係想大家感受下😊！
#香港中產 #英國生活 #流星 #走黎走去嘅星星 #差七個鐘其實係無分別 #第一次影到星空
******************************
在香港時嘅偽中產日子與在英國的真生活 (8.5)
http://bit.ly/2vl0hEK
在香港時嘅偽中產日子與在英國的真生活 (8)
http://bit.ly/2vQSyzR
在香港時嘅偽中產日子與在英國的真生活 (7)
http://bit.ly/2vGnphG
******************************
