《盛夏友晴天》
小朋友睇得開心，成年人睇到傷心，係Pixer一向嘅風格，呢套談論得好少嘅戲，對我講係一套好令自己反思嘅電影。
唔劇透之下講，故事好簡單，一個人魚佢上岸尋找佢嘅夢想，夢想一波三折後，終於成功，係傳統童話式結構。
作為一個成年人，我睇到嘅卻係另一種見解。
小魚人佢想上岸，佢嘅父母勸佢唔好去，人類世界好危險，係自己嘅海灣入面養魚過住簡單日子唔好咩？
當然小魚人佢唔會聽，偷偷地上岸探索呢個未知嘅世界。
但我就會諗，唉，佢上岸一陣遇到有惡意既人類，將佢殺死、捕捉、實驗咁點好？呢個世界充滿惡意，一個唔小心個仔出事，為人父母真係會好傷心。
其次係，小魚人同佢朋友嘅夢想係擁有一架電單單，呢架電單車可以去到世界任何一個地方，真係……好可愛嘅夢想，電單車對於小朋友係探索世界嘅工具，而成人就係用黎代步，去返工去買餸，會為油錢而煩惱，會為供款而憂慮。
我已經唔再係睇童話會興奮嘅年紀，反思之後我先發現，唔單止唔興奮，仲對於呢種行為有驚慌同抗拒嘅感覺，證明我真係老喇……
成年人唔再純粹，做事畏手畏尾，船頭驚鬼船尾怕賊，我都算係一個肯試肯闖嘅人，但原來無形中我都開始有呢種心態。
小朋友可能因為一隻紙飛機可以飛到二十米而開心一日，覺得係一種成就，但成年人睇，咪就係一隻紙飛機囉，飛到二百米都好，搵到錢啊？幫到你生活？
一隻紙飛機，一部電單車，係成年人眼中都係充滿功利，當你有部可以環遊世界嘅電單車，你都要計，你去環遊世界嘅開支、洗費、唔搵錢之後點算、用十年八年時間之後環遊花界返黎可以做乜，真係諗起都覺得好大壓力。
人類可以信任嗎？就算大家都係人類，對於一個陌生人，你都會怕佢害你，不信任同防備已經係一種常態。
沉默一日之後，我諗左好耐，到底呢種成年人嘅想法係咪錯？小朋友呢種先係好呢？
答案唔係，對於未知要擔心要準備要恐懼，係一種對自己同對身邊人負責嘅行為，對於做事要考慮要功利要計算都係一種對自己生活嘅責任。
童話故事係美滿，就好似倖存者偏見一樣，係，世界有好多人奮不顧身去做而取得成功，但當你一個唔好彩，一個唔覺意，一個失誤，一個錯判，你可能會傷害到你身邊嘅人同你自己，所以成人想法並唔係錯，我地更唔應該去追求小朋友嘅衝動同天真。
真正問題係，我地會唔會因為想得太多而錯過？得到知識同經驗後，我地應該權衡利幣後將風險降到最低，令成功率去到更高，然後抱住小心翼翼嘅心態去前進。
至於功利，做人應該功利，應該計算去為生活負責，但同時我地都要搵出至少一種，你唔會睇得失，只睇開心既目標？興趣？夢想？
唔係得到再多，你都唔會得到滿足。
成人睇動畫，係一種好好嘅檢討，自己會唔會因成功，因現實，因生活而失去初心。
---------------------------
如果你都係一個成人，想睇一個講成人婚姻既故事，可以睇睇以下呢個新故事《婚姻挽救系統》：
https://www.facebook.com/photo?fbid=349685013189716&set=a.275594140598804
