《維他奶的人情味》
維他奶味道你可以點形容？從廣告上睇，佢地好少會形容味道，反觀檸檬茶系統會用澀同酸去表達，但奶呢個系列，亦即係佢地最根本嘅產品，係用人去形容。
親情，友情，愛情等係廣告入面最多表達嘅訊息，而最近佢地發出嘅聲明，再次表達出呢個品牌嘅人情味。
流出嘅聲明提到兩個重點，第一，事件係不幸；第二，對家人致以深切慰問。
聲明出現後半日，已經有內地代言人發出聲明指維他支持恐怖分子，終止合作，而網民亦聲言要抵制。
但我睇完一次又一次都唔明，到底維他奶係呢件事入面做錯左咩？
唔講政治，任何人係事件中受傷以及死亡，難道係一件值得高興嘅事？以不幸去形容，有問題嗎？
因為任何原因而作出傷人傷己嘅行為，佢背後總有一個故事同原因，是對是錯都好，都只可以用不幸去形容，我諗呢個社會無人會希望見到有人企圖去傷人，有人企圖去自殺。
再去到第二點，一個人無論犯左咩錯都好，佢家人係無辜，一件不幸嘅事入面，家人嘅悲痛，唔通唔予以深切慰問，而係要講，喂，你家人犯法，你傷心係抵死啊！？咁啊？
作為一間有人情味嘅企業，事情發生左，可以做嘅係對於受影響人士提供協助，而唔係用立場、政治正確去作出批判，是對是錯，社會自有公論。
今時今日香港最大問題係，立場行先，非我族類，就算佢妻兒都係有罪，都應該受罪，更應該受到懲罰，最好所有敵人都死於非命，同理心？已經唔再存在。連座連座再連座，社會無左一條線，幾時應該停，更唔好講點先令個社會少啲戾氣。
不如問下要抵制嘅人，將心比己，如果你有親人離世，而佢嘅公司唔慰問之餘，仲話你死有餘辜，你地作為家人都係抵死嘅，呢種咁政治正確，冷冰冰，毫無同理心嘅企業，係咪你要想要嘅？
人情味，從來都唔係錦上添花，而係雪中送炭，作為企業，可以對員工好似家人咁對待，不離不棄，係不幸之中盡己所能令受傷嘅人過得輕鬆少少。
廣告講得再多嘅Stand by Me，都唔及一個真實行動去表達，無論發生咩事，佢都會Stand by Me。
—————
作者一小時後更新，維他奶公司發聲明指之前既聲明係假，保留發出假聲明既人法律責任
我睇完有諗過刪文，但再睇一次覺得有另一番風味，所以留低，大家自行品嘗當中新味道
