關於 老婆簽睇樓紙 ，我們在網路上蒐集到這些相關的討論、資訊與評價

《孤辰》

♂：早晨

♀：早晨

♂：知唔知今日咩日子？

♀：一個月零兩日，我以為尋日你會認叻喇，尋晚有一下我覺得你唔記得左

♂：唔係，我想過到一個月零一日先再認叻，點啊，讚我！

♀：我無睇錯人

♂：喂……讚我啊……

♀：見到你，我可以比個你唔會投訴既驚喜你

♂：好，但依家都要讚我

♀：我係一個好享受黑暗既人，甚至有少少討厭光，而你就係一種我唔抗拒既光，我唔係想讚你，我係想多謝你

♂：有樣野我想同你講，你知我識算命嘛，但我無同你講，點解我會學算命

♀：係，你依家準備講？

♂：我屋企係做生意既，佢地會放好多風水野，係我五歲個年，我媽將我既八字比左一個大師算，然後個大師話我條命係剋我屋企人，我係唔可以停留係一個地方，因為停得耐，我就會為身邊既人帶來不幸……

♀：所以你先至長傾不見？

♂：其一，其二係，我唔係香港，我都唔會見到對方

♀：萬一係個大師算錯呢？

♂：佢無錯，我大學個陣睇過我媽部電腦，裡面有我條大命批命，上面講既野我好記得，所以我去學，諗住可以反駁佢，可惜……我學完先發現，原來佢講既係無錯，仲可以話係講得好厚道

♀：莫非你就係傳說中既天煞孤星！？

♂：無咁誇張，要對應返受既人八字，好似我屋企人咁，簡直係火星撞地球，對於其他人無咁強烈既，所以我都有諗過要你八字

♀：要黎做乜？如果唔夾，你會剋我，你就會消失？

♂：可能會，所以我唔敢問你拎

♀：咁我都唔會比你

♂：如果我真係剋你既話你點算？

♀：你剋我幾多，你就補償我幾多，負返責任就得！

♂：就算我唔剋你，我都會盡力對你好

♀：咁咪得，不過暫時未感受到太多，你要加油

♂：今日我阿哥打比我，佢話我媽有癌症想見我

♀：你唔想見？

♂：真係唔想，以往同佢地一齊食飯都無次開心，今次都唔會例外

♀：食餐飯都可以唔開心，你地發生咩事

♂：我媽一向都睇我唔順眼，我哥係高材生，專業人士，做左三年野就買到樓，而我，唔係名牌大學畢業，仲要做作家呢種搵唔到錢既職業

♀：職業無分貴賤

♂：我媽覺得有，佢每次都會講，我幾時先可以定落黎，認認真真搵份工做，但我就偏偏唔鍾意，一個唔覺就會嘈，每次都係咁，所以我都好厭，唔想同佢地見面

♀：咁你對將來有冇打算先？你打算流浪一世？唔打算結婚生仔買樓定落黎？

♂：以前真係無諗過……

♀：你記唔記得，我既擇偶條件？

♂：記得，所以我話以前

♀：咁就好，呢樣野我可以等，但我唔可以退讓，希望你明白……

♂：都係個句，我努力起上黎連我自己都驚啊！

♀：唔好迫得自己咁緊，我講多次，我可以等，我唔係口講要上進心，但其實係想即時享受成果既港女

♂：我知你唔係，如果你係既……諗起都得人驚，我怕你係我都會撞埋牆

♀：撞埋姐姐度，我應該夠緩衝既，笑

♂：我好似聽到少少絃外之音

♀：無，我希望你可以知道，我會等，亦會幫你，有好多野係要兩個人一齊努力既

♂：我終於知道有個好老婆既感覺係點

♀：又抽水！你依家連男朋友都未係，請你自重！

♂：好好好，等真係簽完紙我先叫你老婆，放心

♀：講明先，我對於一拍拖就叫老婆，叫好親暱既名呢種行為有少少反感

♂：咁你講你個名我知

♀：唔講

♂：唔通要簽紙個日我先知你叫咩名！？

♀：唔……呢個想法都幾有趣，就咁決定啦

♂：喂，唔好咁啦，我都講左名你知

♀：你自願既，我無責任回報你喎

♂：ok，我等！

♀：喂，如果你怕一個人去的話，我可以陪你見你屋企人

♂：……我覺得無咩幫助，要嘈都係要嘈，我同佢地恩怨太深

♀：你嘈都好，我會拖住你隻手陪住你

♂：聽落……係有少少唔同……我再考慮下，剛剛先同佢地嘈完一獲

♀：好，你決定左就話時間我知，盡早，我怕要做野

♂：好，你今日唔係好忙咩？

♀：係，今晚應該收十二點左右

♂：你份工真係辛苦

♀：搵錢係要辛苦，所以我先講，最緊要知自己做乜，唔係好易捱唔住

♂：我等你，你返到屋企話我知，你忙先

♀：好，你都加油做野！

♂：知道喇，我要儲老婆本

♀：收工喇……比想像中遲，你訓左未？

♂：未，我等緊你，一邊掛住你一邊等

♀：傻，我返到喇，聽朝又要返早，你今日點啊？

♂：幾好，我就出書喇

♀：咁咪好，第一本記得要比我！

♂：你唔講我都會

♀：夜喇，辛苦你等我咁耐，你訓啦，我沖完涼都訓喇

♂：唔差在等埋你沖完涼先啦，你訓上床我同你講晚安

♀：訓左上床喇，今晚無洗頭，唔係有排吹，吹頭真係好煩

♂：我每日都會洗頭

♀：男人有乜所謂，見你等我咁耐，比返少少福利你【圖片】

♂：喂，點訓啊大佬

♀：哦，你訓唔訓到唔係我問題，我訓喇，晚安，嘻

♂：你好野……你都攰喇，早少少訓，晚安，我做少少野先！

♀：我咩都睇唔到，唔關我事，晚安

♂：講笑咋，晚安

——

作者的話

一個月了，連續一個月每朝八點既《長傾·不見》，打破左我最長連載時間，今日我終於可以認次叻！我做到了目標！

亦好多謝你地每朝都咁支持呢個又長氣又進度慢既故事

希望你地喜歡呢個，唔知幾時會係高潮，唔知聽日會講乜，唔知幾時會停，唔知幾時會完既奇怪連載

星期日，將會係長傾不見一個重要既日子，亦有個消息想同大家分享！

我希望呢個故事將會比真情更長，每日比你地偷窺一對情侶既對話

多謝你地，不見，不散！

一個月喇，講返兩句啦衰鬼！

——

長傾·不見 第一回 @筆友
https://bit.ly/LongchatEP1
長傾·不見 第三十回 @換鞋
https://bit.ly/LongchatEP30
好久 不見 第一回@久違
https://bit.ly/LongtimeEP1
好久 不見 第八回@兄弟
https://bit.ly/LongtimeEP8

第一回－系統

結婚？近乎係同生老病死一樣，係人生中不可或缺嘅一環。

2019年香港有44247對新人結婚，同時亦有21157對夫妻離婚，近乎48％嘅離婚率，換句話說，你喺婚姻注冊處完成注冊後，喺你後面嘅一對新人，數據上，唔係你離，就係我離。

結婚當日，劉俊文喺親朋戚友面前揚言：

「婚姻係戀愛嘅墳墓，但埋葬咗戀愛之後，就係一家人嘅全新開始！」

當時贏得一眾掌聲，然後三年後嘅今日，佢一個人喺屋企重睇結婚片段，著起當日結婚訂造嘅西裝，出發去律師樓，今日係佢同老婆簽紙離婚嘅一日。

律師喺簽紙前重申一次：「我需要再次向兩位確認，呢段婚姻已經去到兩位都覺得不能挽救嘅地步，你哋今日簽署嘅係『擬向法庭申請解除結婚的同意書』亦即是表格2E，今次係雙方同意下嘅離婚，提出申請後一年，就可以正式向法庭申請正式離婚，兩位清楚有關情況嗎？」

劉俊文望一望老婆，見佢微微咁點頭，自己亦只可以嘆口氣點頭。

律師將筆遞向女方：「李倩盈小姐，請喺兩份表格最下方簽署確認。」

兩個人一齊簽署，對劉俊文講曾經係一件幸福同快樂嘅事，之前簽過三次，第一次係開聯名戶口，第二次係結婚，第三次係買樓，果然三次之後，就係大結局，今日兩個一齊簽離婚協議書……

簽名如舊，都係好熟悉嘅簽名，但簽署嘅內容就有天淵之別。

結婚簽署當日，李倩盈感動到落淚，而離婚呢日，佢亦都落淚……兩次都係，佢忍住淚水去簽署人生中最重要嘅決定。

「劉俊文先生，到你簽名，簽完後呢份協議書就會正式成立。」律師將兩份滴有淚痕嘅同意書推到佢面前。

李倩盈別過頭，唔想望住自己老公簽呢個名。

劉俊文腦海入面不停重覆一句：呢段婚姻已經去到兩位都覺得不能挽救嘅地步？

其實係唔係挽救唔到呢？最近呢一年，係唔係真係做到最好？係唔係只要再做多少少，我哋嘅結局就會唔同？

作為程序員，劉俊文十分理性，當呢個問題無確實答案之前，佢唔會憑直覺去確認……

「我唔想簽住……對唔住……」劉俊文放低支筆。

「既然劉生未確認，咁今日我哋或者就到此為止，等雙方都諗清楚我哋再約時間簽文件吧。」律師相當有經驗，見太多未諗清楚嘅夫妻，如果呢個時候要迫佢哋做決定，只會演變成爭執，佢並唔想聽夫妻間嘅指控，一個唔覺意，有人會大打出手，到時都唔知點收科。

「劉俊文！！！！！！！！」李倩盈咬牙切齒咁怒吼：「你係唔係玩野！！！！婚又係你話要離，簽紙你先反口，係唔係嫌未傷得我深？」

律師即時將兩人分開，安撫好情緒再分別送落樓，律師心諗，要嘈唔該落樓再嘈。

劉俊文到樓下時，李倩盈已經喺大堂等緊佢，以劉俊文認識嘅佢，依家係前所未有咁嬲。

為左唔係大街上演鬧劇，一個唔覺就比人放上網，劉俊文拉住佢去後巷慢慢傾。

點起一支香煙，李倩盈一臉嫌棄咁望住點煙嘅劉俊文，係，李倩盈好唔鍾意人食煙，所以佢憤怒值再向上升左：「劉俊文，今日我已經好唔開心，簽完大家各行各路，我唔想再為你呢個人傷心，點解你偏偏要我再經歷多一次咁唔開心嘅日子？我前世欠你啊？你係唔係想我死喺你面前你先安樂！」

劉俊文沉默左一陣先答：「我呢排諗左好多，到底我愛唔愛你，答案係愛，我唔明點解我愛你，但偏偏得出黎嘅結果係我哋要離婚……頭先律師問我，係唔係覺得呢段婚姻無法挽救，我係有個問號，會唔會我做多少少，我哋就會好，我哋就會成為童話中幸福快樂嘅結局？

同你一齊，我真係好攰，但我付出過嘅你又知道幾多？而你付出嘅又唔會少，我知你為我改左唔少，我哋試過改，但始終兩個人性格太唔夾，你鍾意做嘅我唔鍾意，我鍾意嘅你又唔鍾意。

我唔明，我真係唔明，點解兩個相愛嘅人，會有咁嘅下場，點解我哋唔可以成為幸福嘅一對？」

李倩盈靜靜咁聽完，問佢拎左支煙點完之後吸左一啖，咳左好耐：「咳……咳……我真係唔明食煙有乜好，你明知我唔喜歡，但你都照食，又唔係好味，又浪費錢，又唔健康，但你就係唔肯戒，呢個就係你同我嘅問題，我唔明你，你亦說服唔到我，有好多事唔係改就改到，煙你可以唔食咩？

劉俊文，你問點解，咁你又有冇問過自己點解啊？

我哋改又改過，試又試過，最後你都係唔滿意，我話，咁我放生你啦，等你搵個真係啱你嘅人，你知唔知我講呢句係用左幾大勇氣啊！！！！

人人都以為我好幸福，我爸我媽到今日都唔知我有幾唔開心，佢哋仲問我黎緊中秋你上唔上黎做節，我真係唔敢同佢哋講，我哋搞緊離婚啊！」

係，結婚需要見證人，當日坐喺佢哋旁邊睇住簽紙嘅父母，由佢哋批準認同嘅婚姻，今日由兩個人做決定就可以離婚，父母再唔同意都無用，相同嘅係，劉俊文都無同父母提過。

「李倩盈，如果我想再同你試一次，你仲肯唔肯比個機會我哋？」

「哈，試你又唔係未試過，你有咩方法去試？婚姻輔導我哋又見過，心理醫生又搵過，社工又傾過，佢哋比過我哋嘅方法少咩？唔似你為人，你平時唔係好講邏輯咩？同一個方法，只會有同一個結局，呢句係你講嫁劉生，依家你又想變啊？」

劉俊文一手抱住左李倩盈：「係……我無新嘅方法……但我都想試多次，我都想不顧一切，我都想夾硬去試多次……我同你結婚唔係無原因，而呢個原因我一直都記住……或者……再試一次會有一個唔一樣嘅結局……

李倩盈，我就只係問你一個問題，你仲愛唔愛我？如果你愛嘅，我哋就試多次，最後最後一次，但如果你唔愛嘅，我哋就上去簽紙，今次我比你做決定好唔好……」

未回答之前，兩人腦海突然叮左一聲，一把聲出現。

【婚姻革命系統正在啟動，檢測宿主，同步中……時間為二零二一年六月二十一日，宿主為劉俊文以及李倩盈，同步成功，系統啟動。】

劉俊文放開手，臉色都好奇怪咁望住老婆，問佢係唔係聽到咩奇怪嘅聲音，佢疑惑咁點頭。

腦海嘅聲音再次出現。

【此系統為兩人共生，製作人係章少崇博士，二零四六年，世界各地發達國家離婚率已高達九成以上，該時代人類已唔再相信婚姻，離婚就好似分手咁簡單，章少崇博士花費十五年製作出婚姻革命系統，配合時空技術將之投放到唔同年代，當兩個仍然相愛嘅人面臨離婚之時，系統就會自動生成，協助兩人挽救最後一次婚姻，如果系統解決唔到兩人嘅問題，你哋就可以毫無顧慮地離婚。】

「你聽唔聽到一個系統嘅聲啊？」劉俊文猶豫地問，因為件事太匪夷所思。

李倩盈試探地講：「章少崇博士？」

「頂……你真係聽到，即係我無思覺失調無幻覺，太好喇……」確認唔係幻覺之後，劉俊文開始思考頭先聽到嘅訊息，離婚率去到二零四六年超過九成，聽到都覺得心酸，人經歷得愈多，社會愈進步，但對於感情同婚姻就愈來愈兒戲。

【唔需要太擔心，本系統暫時喺不同時空之中成功拯救一千六百五十一萬四千三百七十九對夫妻，成功率超過七成，章少崇博士講過，從來無人教你點去應對婚姻，出現問題係好正常，加上人類對於物慾愈來愈強，缺乏感情探索，婚姻從來都唔易，相愛但因為相處問題而忘記愛情初衷係好平常嘅事，章博士都曾經好似你哋咁，當失去時先後悔莫及，本系統會慢慢協助你哋更了解婚姻，就算最後失敗都好，你哋都可以更明白愛情同婚姻。】

「你……我……我哋可以交流？」劉俊文奇怪問。

【可以，本系統係劃時代設計，有最強嘅AI系統，比起你哋更懂人性，更懂愛情，更懂婚姻，你有心事同問題想問，本系統都可以答你。】

李倩盈突然問：「我想問，你話我哋仲係相愛，呢件事係真事？」

【本系統偵測得出嘅數據係確認你哋相愛，唔係本系統唔會出現為你哋同步。】

李倩盈望向劉俊文，剛好佢都望向自己，喺對望之中，佢哋笑左笑，原來大家都仲係相愛，或者系統比出嘅呢個結論，係對於剛剛仲打算離婚嘅兩人一個最大笑話。

「咁章少崇博士所提出嘅婚姻見解又係點？」作為程序員，劉俊文比較在意一個系統嘅邏輯同過程，到底咩為之婚姻？從來都無人有一個好明確嘅定義，憑乜佢咁肯定佢嘅理論係正確？起碼要先了解佢嘅理論先可以判斷成效。

【宿主婚姻階段太低，現時是新婚夫妻，並未有權限閱讀章博士的完整理論，宿主請盡快升級以開啟更多權限。

現時劉俊文及李倩盈夫婦的狀況如下：

婚姻等級：新婚夫妻
共同積分：零
階段：零
第一階段任務：尚未發放
第一階段緊急任務：尚未到達開啟條件
積分任務：尚未開啟

請問宿主二人是否同意參與婚姻革命系統？】

李倩盈有少少擔心咁問：「呢個系統需要我哋付出咩代價？」

【本系統費用全免，到達不同階段更會有獎勵發放，請宿主放心，你們需要考慮係想唔想挽救呢段即將破裂嘅婚姻，去了解兩個人相處嘅奧秘，為對方付出，令自己成為更好嘅人類。】

「呢個時候，既然我哋都無更好嘅方法，咁不如信任呢個咁神奇嘅系統，睇下佢會唔會令我哋有所改變？」劉俊文同老婆講，如佢所講，試過好多方法但都係失敗告終，咁不如死馬當活馬醫。

【雙方宿主均同意參與婚姻革命系統，全面檢測二人數據……請稍等……完整系統激活！

本系統有兩個達成方式，其一係雙方積分到達一萬分，其二係雙方通過第五階段的最終考驗，章少崇博士提出婚姻有五個階段，現時劉俊文及李倩盈階段為零。

積分系統激活成功，系統根據雙方意願發放基礎積分：
劉俊文積分－－100分
李倩盈積分－－500分

積分任務尚未激活，請宿主先進行新手任務，數據分析中……現將雙方生活中的最大矛盾生成新手任務……檢測中……異常數據發現……數據重組中……生成任務中……

檢測到兩位宿主存在極大矛盾，即將發放特別新手任務，此特別新手任務困難度為地獄級別，所以成功通過將發放新手特別禮品包，獎勵豐富，希望宿主努力。

任務發放中……

新手任務：房事】

「吓？？？？」「吓吓吓？？？？」劉俊文同李倩盈對於呢個地獄級新手任務難得地有同一個反應，吓？？？？？？

－－－－－－－－－－－－－－－－－－－－－－－－－－－－－

下回預告：

【2021年香港房事排名位於亞洲倒數第二，平均每月3.7次，一星期不足一次，僅比日本的三次多一點，離婚之夫妻房事數值均低於平均數，擁有一個健康和穩定的性生活是每對夫妻不可為缺的部份。

檢測到過去一年，劉俊文及李倩盈夫妻只進行過六次房事，達到滿足標準的次數為零，危機級別是最高等級，發放特別新手任務。

任務目標：達到一次雙方滿足級別的房事一次
任務獎勵：新手特別禮包
任務時限：一星期
失敗懲罰：婚姻系統將宣告二人失敗，建議離婚處理】

－－－－－－－－－－－－－－－－－－－－－－－－－－－－－

作者的話：

終於終於又出新故事，係呢個故事之前，我起草左三個新故事，但每個寫到五千字左右都覺得唔夠張力同追看性，所以又停筆再諗，終於有一個可以令我覺得好想寫落去好緊張既題材

希望大家喜歡可以 LIKE COMMENT SHARE，我本來係一個唔睇重LIKE既人，但對上一個貓貓故，面對每一回只有幾十Like既時候，我好質疑自己係唔係寫得咁差，已經無力量再寫落去，寫左咁耐，生活所迫，如果都係寫作上無一個成長，呢個將會係我最後一個故事，書又出過，我心願已了，只好重新去做一個營營役役既普通人

我唔求多，真係唔好再得幾十like好唔好……只要過百我都就會繼續寫落去，呢個係一個免費作者小小既期望，感激成全

《鑽石山行人隧道女屍》第一回
　
大概兩年前我喺書展出咗本《跟蹤》，可能我近年第一次見讀者，所以都有唔少讀者搵我簽書。最高峰時期通常都係中午同夜晚時段，可以有成三十個人等住你簽名。
　
而我通常都簽到個人迷迷糊糊，人群之中見到有個著住校服嘅女仔一直低頭向住我方向望住我，由於低頭關係，頭髮遮蔽咗佢個樣，如果唔係現場有咁多人，我真係會比佢嚇親。
　
同時間，可能我對校服特別有種感覺，所以特別留意住佢，同時又會諗，呢家唔係放緊暑假咩？點解仲會著住校服？
　
簽完一輪之後，發現個學生妹無搵我簽，亦消失於人群之中，可能唔係我讀者吧？
　
突然間，我拍擋突然遞咗本書《跟蹤》比我。
　
「頭先有個女仔比你。」我拍擋說。
　
我接過本書後，一臉迷惑，做咩買我本書但又送返本比我，係咪想我簽名？當我打開本書時，書內跌咗一張相出嚟。我隨即執返起嚟睇，發現張相有點殘舊，係一張學生相，樣貌幾好，一副清純感覺，帶點怕羞地望住鏡頭影呢張相。
　
但點解會有張學生相喺到？ 然後我留意到第一頁寫住兩隻字－「幫我」。
　
我心寒咗一寒，點解會寫呢兩隻字，係求救定係惡作劇？
　
我抬頭周圍望下，再追問拍擋個女仔點。
　
「我都唔係好記得，我一直喺到執書收錢，只係見佢行埋嚟塞本書比我叫我比你。」說罷，拍擋就繼續做收銀離去，而我呆呆望住呢張學生相感到迷惑。
　
夜晚搭巴士返屋企時侯，我不禁再次拎起張相出嚟望，我總覺得自己好似喺邊到見過呢張相，但一時三刻醒唔起邊到見過，令我腦海一直運作去諗呢張相來源，如果醒唔起嘅話，我一定唔會心息。
　
去到樓下，我仲需要行一段路先到屋企，但零晨時份底下，街上只有暗暗燈光，剩下我一人在寒冷天氣之中走過。我一直拎住張相一直行，邊行邊諗，感覺好似差少少就醒起邊到見到。
　
「孔明。」突然有把女聲從後叫。
　
雖然我真名唔係叫孔明，但我已經認同孔明呢個身份係我，所以好自然咁轉身一望。
　
一望之下，街上空無一人。
　
我吞一吞口水，心諗唔係咁邪呀，再轉返身時侯，驚見書展所見到個學生妹企喺我面前。
　
我頓時感到時間即時靜止，我嚇到個心離咗一離，嚇到完全唔識比反應。喺燈光暗淡底下，佢一直低頭郁都唔郁。
　
咪住，佢呢件校服咪係張相件校服？張相係佢嚟？
　
喺我腦海高速運算之時，佢慢慢抬起頭來，冷風吹來，將佢前面幾執頭髮吹開，露出令人感到心寒嘅樣貌，佢左半邊臉被削，左眼外露幾乎跌出嚟，好似左邊被硬物重擊而被削邊臉。
　
佢開口講咗一句：「幫我，我叫陳慧敏。」
　
當佢講起陳慧敏呢個名時，我終於諗到張相係邊個了。我記得我當年寫《失蹤》時侯，我為咗拎靈感而一直搜查好多關於香港以往一直出現令人心寒嘅懸案，其中一單就係鑽石山行人隧道女屍。
　
「1980年2月20日，黃大仙學生陳慧敏案，事主失蹤後被發現在黃大仙大磡窩村對面一條偏僻行人隧道內，全身赤裸，身上被人用水喉通物體刺插百多下，滿身傷痕，頭部破裂，屈身藏於一個帆布袋巾，死狀恐怖。 懸而未破的凶殺案。」
　
我印象中係當日事主約咗朋友一齊去買波鞋，但自此就無再出現，繼而失蹤。之後第二朝早被發現死喺隧道內……我仲記得當年報紙貼咗陳慧敏嘅相，正正就係我手上張學生相，只係當年報紙係黑白，一時之間令我醒唔起。
　
當我腦海攪清所有時侯，不知不覺間，眼前嘅學生已經唔見咗，我立即轉身一望，再轉回，街上只剩下我一人，我再拎起張相望，陳慧敏已經死咗差唔多四十年，點解到呢刻仲出現喺我面前，仲要我幫佢？ 突然，我心入面股寒冷而不安嘅感覺充斥全身，冷得令我整個人都震抖，我隨即急步跑返屋企。
　
當晚，我大病了。
　
我整個人一直發冷，老婆為我探熱，燒到38度。由於深夜時份，已經無醫生睇，唯有食住屋企嘅感冒藥頂住先。呢一晚我不但時不時發冷，亦會突然熱到出汗，而且吞口水非常痛，整晚一直受住殘酷煎熬，雙眼一直閉不上，完全瞓唔到，我只能痛苦地望住天花板。
　
可能真係病得太重，我開始出現幻覺，我夢見自己身處一條行人隧道，然後見到有個男人一直拖住一個紅白藍袋走動，我見狀後，即時大叫：「喂！」
　
個男人聽到後，轉身一望，但行人隧道缺乏燈光，我唔係太清楚見到佢臉容，佢見到我後即時放低個紅白藍袋就跑走。我無追個男人，反而慢慢向住紅白藍袋方向行去，我吞一吞口水，我大概知道袋入面係裝住啲咩，但我手腳好似不受控制咁，慢慢行到袋前。
　
我伸出雙手，慢慢伸去將個袋拉鏈拉開……
　
一陣血腥惡臭隨即從空隙之中發出……
　
打開袋後，驚見一個裸體嘅女屍，正正就係我今晚見到嘅陳慧敏，左邊臉被削，左眼露出，血肉膜糊，死狀恐怖。
　
個女屍一直望住我，然後突然伸出雙手將我條頸鏈住，鏈得我一時之間透唔到氣，十分痛苦。
　
個女屍說：「幫我捉個兇手。」
　
我痛得張開雙眼，然後彈起身狂咳，一直喘氣。冷靜落嚟後，驚見自己瞓張床到，我即刻起身去廁所照一照鏡，只見頸上出現兩條手抓痕，我嚇得心寒，原來個夢係真？
　
(去Patreon看全文：https://www.patreon.com/posts/45514481）
（所有回數已經全部喺哂patreon）
－－－－－－－－－－－－－－
開咗一個月Patreon，感激訂閱咗嘅讀者一直支持我
我好鐘意呢個平台，因為我可以隨心所欲將我想講嘅故事一一呈現
本身我預自己出文能力一定好耐
但大家給予我嘅動力，令我每日或幾日就出文同故仔
　
新一年，我會繼續努力經營呢個平台
創作更加故事，將廣東話流行文化繼續延續
亦為大家在不公義同無助生活之中帶點娛樂安慰
　
希望大家訂閱Patreon 睇更多獨家故事 多多支持
往後出書免費送去你屋企！
https://www.patreon.com/Homing