「一變四，四變十二」 -- Bowmore 12 Years
Patreon 用戶 (毋須訂閱) ：
https://www.patreon.com/posts/34222975
Medium 用戶：
https://medium.com/…/%E4%B8%80%E8%AE%8A%E5%9B%9B-%E5%9B%9B%…
//
呢個星期，香港人難得聽到一啲好消息。例如話，「善惡到頭終有報，武漢肺炎中差佬」。呀又例如，曾經窩藏 7.21 白衣人嘅南邊圍村鄉公所涉嫌僭建被勒令拆卸。一夜間， Facebook 開香檳、開 Corona 啤酒、開威士忌暢飲嘅圖片瘋狂洗板，唔知道嘅話，仲以為香港人人酗酒。
開心嘅事又真係唔好畀佢停。星期五，傳出首名感染武漢肺炎嘅警員有份出席嘅警員聚會，另外有四人出現病癥而需要送院檢疫。「一變四」，大家記得容祖兒嘅《 16 號愛人》就自然會跟住憧憬「四變十二」。香港仔警署亦有女警疑似受感染而要接受檢查。以警察呢種對人為主嘅職業嚟講，開咗個頭，都真係好難停落嚟。
有人話，唔應該咁黑心。咁賴叔一向都唔係聖人，甚至自覺住喺道德低窪。正如一張網上圖片話齋，「一個人有事，另一個人開心，叫冇同情心；一個人有事，全部人都開心，叫大快人心」。究竟一個群體或者一種職業，要去到幾神憎鬼厭，先至可以因為單單一個成員染病 (而且未死得) ，而觸發大家召喚小鳳姐，要熱烈地彈琴熱烈地唱？
呀，唔記得講，對上一個有能力令香港人額首稱慶，齊歡唱、同慶賀嘅，叫何君堯。
- - -
#酒精抗疫 ，喺冠狀病毒橫行，甚至落雨不怕落雪酷熱也不怕嘅狀況下，其實有兩個幾重大嘅意義。一，係物理上消毒。嗱，正確啲講，你冇 75% 嘅酒精，都唔好學人講殺菌消毒。咁飲 40 度嘅威士忌消到啲咩毒呢？學「四哥」 ( 窮遊威士忌的世界 Facebook 專頁主人) 話齋，飲杯 Hot Toddy 囉，英國人都係用呢隻 Whisky-based 嘅雞尾酒治感冒。 (四哥見字畀返廣告費我，唔該)
另一個「酒精抗疫」嘅意義，係心理上消毒。 De-tox 呀，早兩年咪好興講啲咩飲五青汁定 cold-pressed 果汁去幫身體排毒嘅？飲呢啲纖維豐富嘅，自然腸道健康、一瀉千里，而飲威士忌抗疫呢，重手啲就劏到七彩，一樣清腸胃，淺酌怡情的話，則有抒解鬱結、滋養心靈之效。
#作為一個酒精 (賴叔真係要積極考慮下用呢個名開個 Page) ，每日飲返一兩 shot 都真係家常便飯。酒友會有 daily drinks 嘅概念，四哥初次見面嘅時候介紹過嘅 Glendronach 12 Years 係一個選擇，賴叔早期飲過嘅 Glenmorangie Lasanta 12 Years 都係令人飲得舒服嘅。雖然大路啲，冇乜特別。
咁近期呢，我就埋首 Bowmore 嘅世界，雖然 Bowmore 10 Years 係最穩膽樁腳嘅日用品，但係其他年數，諸如 9 、 11 、 15 我都叫做涉獵過下，有機會會寫下。 So, what about 12 Years?
- - -
之前寫過 Bowmore Small Batch 呢支喺波本桶熟成、相當之輕盈 (sorry 唔覺意押咗個韻) 嘅東西，但原來我都未介紹過 Bowmore 呢間酒廠。 To start with ， Bowmore 始創於 1779 年，即係 241 年前，份屬 Islay 島上最古老嘅酒廠之一。 Bowmore 將大麥浸泡喺取自附近 River Laggan 嘅水內 27 小時，然後攤喺自家茅屋嘅石地板上面風乾、發芽。工作人員要每隔四個鐘將麥芽翻轉一次，直至五至七日之後，先可以拎去烘麥窯，經歷煙薰及烘乾嘅過程，以便發酵及陳釀。
來自 Islay 嘅 Bowmore 酒廠，出品通常都帶有突出嘅泥煤味。不過有別於上次介紹嘅 Duncan Taylor the Big Smoke ， Bowmore 不至於一味蠻力或者死命供給泥煤同煙薰味，程度係適可而止嘅。
其中 Bowmore 12 Years 係以波本酒桶釀製 (同 Bowmore 10 Years 用雪梨桶風格唔同) ，打開瓶蓋已經醇香撲鼻，蜜糖領銜之餘，不失一貫 Bowmore 令人安心嘅泥煤氣息。酒體厚度中等，唔算油膩，一入口，一息間傳來 dark chocolate 嘅味道，然後已經由柑橘同果香接力，配少少辣椒，最終由煙薰埋接力埋尾。
呢個舖排，變化同層次都相當之多。當然，有睇過賴叔嘅頭盔免責聲明 (見本文末) 嘅朋友都知，我只能有杯話杯，有碗話碗，唔會叻到每分每秒都形容到十鳩幾種氣味或味道點樣喺一杯 Whisky 入面湧出嚟。「一變四，四變十二」嘅嘢，留返埋忠誠勇毅進仔做啦。
臨尾附上官方 tasting note (賴叔英譯中) 畀大家參考返：
聞香：含蓄嘅檸檬同蜜糖，與 Bowmore 招牌式泥煤煙薰味巧妙地平衡
嚐味：酒體順滑，溫暖而可口嘅風味，隱含黑朱古力嘅味道
餘韻：以泥煤味作結，餘韻滋味而溫婉悠長
- - -
[頭盔] 賴叔係鼻敏感患者，嗅覺係正常人一半；又由於青春期喪食白烚翠玉瓜同娃娃菜，味覺都係正常人嘅一半。
所以，我講啲咩都好，大家最好 take it with a pinch of salt 。唔好阿叔講乜就講乜，自己用個鼻、用條脷，試真佢。 [/頭盔]
Bowmore Single Malt Whisky
