[絶非廣告]天地良心,寫廣告寫成咁,一定畀客或者公關黑名單。本人一般係好識撈的。
1. TLDR:星州唔炒輪,唔通炒米?正如馬克吐溫唔吐溫,唔通吐痰?山口素弘唔素弘,唔通掃黃?(呢個句式明顯抄林振強,但我已唔記得佢原文係用乜嘢例子)
==============
一週年!比別人知得多。subscribe now(https://bityl.co/4Y0h)。Ivan Patreon,港美市場評點,專題號外,每日一圖,好文推介。每星期6篇,月費100,已經1900人訂! 畀年費仲有85折,20/40年費VIP 送本人著作一本。
==============
2. 香港嘅新輪商,登登,就係我舊東家(唏一夜夫妻都百二蚊,何況我做咗年幾,拎咗好多個百二蚊),星展銀行。這不是愚人節
3. 個重點唔係 星展咁XX 都學人出輪—大把更加XX 嘅公司都出輪啦,星展喎大佬,好長時間係東南亞最大市值公司(唔肯定而家仲係咪,視乎SEA你當唔當東南亞公司),好失禮你?
4. 咁你咩Macquarie都出做輪商啦(死咗未?我對上一隻買嘅輪就係Macquarie,十幾年前嘅事),「我知Macquarie在澳洲好大」(其實都唔係,迫科CBA NAB ANZ WestPac後都未到佢,有冇話你知我係睇銀行股的?),但,we talking about 新渣坡 ok?新加坡LP(*)咁大嘅地方,600萬人,又唔似香港咁有大陸公司上市(坡國上嘅大陸公司就算鳩數啦),但股市市值好長時間係東南亞最大—大佬你印尼講緊3億人呀!(其實印尼GDP係坡國4倍,see?坡國係金融中心呀)
5. 同朋友講起呢,個重點當然唔係「星展都學人出輪」,而係「而家先出」?
6. 的確,星展當然夠資格出輪有突,樓上都講咗。反而你可以奇怪係,做乜而家先出?朋友話頭,「個個炒美股啦仲有人炒香港窩輪牛熊證?」
7. 不過朋友此言我又唔係完全同意,首先,why not both?炒美股都可以照炒港股。況且,窩輪牛熊證可以買跌嘛,咁覺得騰訊爆煲嘅,咪瞓身家put 咯(Just saying,而星展出嘅正係騰訊輪,有call有put,可以幫襯下)。
8. 況且你睇港股每日嘅輪證成交,當然仲有大把人炒輪炒牛熊證。可能因為覺得自己眼光好準,可能唔想捱夜(但,邊個話買美股要捱夜?好多人以為買股票要日日望住佢,但你見我有時瞓到四點港股收市先起身),可能係覺得美股交易費貴(其實唔貴),或者覺得升咗好多,或者覺得「唔熟美股」(你以為自己好熟港股?)。Whatever.總之,睇多次呢段第一句。
9. 而另一方面,過去十幾廿年,最大嘅轉變係:發輪已經成為commodity business.呢個亦係商業社會嘅殘忍,或者進步。最初你就「認股證認法興」,後來就「買得準里昂輪」(行家戲稱「買得準你戇卵」,後來里昂都冇埋,變咗「買得準匯里輪」),仲有遠近馳名嘅「波法比餅店」(自己google)
10. 講過了,多數係歐洲嘢。里昂法興比聯(KBC,好多人都唔知點解係K,行家俗稱Kredit Bank),歐洲公司。最初就係請晒啲巴黎第X大學嘅數學家,法國出名多數學勁人,真的。
11. 但後來,人人有得抄啦,你識請法國佬我唔識?況且後來亦都有大陸仔印度仔嘅quant,一樣識講法文(嗰時匯理個quant頭同我舊老細相熟,係個踢拖但一口流利法文嘅大陸佬),點做pricing,用乜software,點行銷,點搞講座上電視,人人都識抄。波法比甚麼,只能搵第一輪水。
12. 任你講乜都好,呢啲鬥到最後係commodity business,你唔會因為A行輪后對波大啲就幫襯(我唔會啦下,我鍾意細胸),散戶都係睇貼唔貼市,多唔多成交,睇引伸波幅(**)
13. 鬥到最後,咁鬥乜?就鬥funding cost,銀牙!呢啲就係歐洲行唔夠鬥嘅地方啦。眾所周知(你唔知嘅我話你知),波法比等等,在香港邊有deposit base?咁你出輪當然要有貨打底,錢從何來?歐洲行就只能靠問匯豐中銀之類日日借,當時我做蕉行都拆唔少出去。(有啲戇鳩仔真係以為輪商要同你對賭,錯,人地食硬你,使撚同你對賭睇好定睇淡騰訊)
14. 但星展,就係個funding cost夠低,見唔見張相寫撚住亞洲最安全銀行?信貨評級好多的說。況且,quasi 國企啦。我都話我去坡國,淡馬錫都肯見我聽我鳩up—何晶識我老鼠咩(當然我亦唔會見到佢),畀面星展之嘛
15. 你見到嘅係,之前N年好多歐洲行都收晒皮,開始少人競爭,亦都有返啲肉食,所以可能而家想入場咯。
16. 仲有一樣嘢,睇嘢不能咁狹窄啦。你出輪之餘,又掃埋正股做對沖,但你又可以出埋產品畀private bank嘛。成套咁睇的。得罪講句,你KBC啲private bank,同星展點比?我唔止淨係賣香港喎,坡國馬國仲有大把……客。
17. 以上種種,只係我猜測,冇任何內幕,冇問過任何做星展嘅人。但星展啲嘢,OK架,可以幫襯下。
18. 話時話,做quant我就冇料啦,星展搵唔搵人做廣告post?Inbox我,一場舊相好,畀個特價你,保證唔講粗口。
19. 正文講完,但,當然後記仲好睇。
=============================================
20. 首先講個好簡單嘅故事:話說我在星展嘅年代,真係有次有間PR公司搵我,叫我宣傳某銀行嘅產品,問得幾問,原來係星展。成件事好似你上Tinder Match返自己老婆咁。PR問我介唔介意,我梗係唔介意,但我話你去問下你個客aka星展介唔介意,當然成件事就冇咗下文。但,我真係覺得something is wrong,星展肯畀錢街外人,然後街外人搵我喎。
21. 不過講返,我對星展真係無仇無恨,固然佢有大公司嘅老味嘢,但亦有大公司嘅好嘢。人工高(還好啦,陣間講)福利好(廿鳩幾日假,仲有士大夫供樓,搞到我幾乎買咗太古城)。你見我同啲星展舊同事都仲有食飯(你估我好得閒?),同啲舊客都仲有傾計,星展as a company 係OK的,「我係同我舊老細唔妥之嘛」
22. 遲下再寫個故事,但聽啲小朋友見工,話HR「壓佢價」,come on,C朗都減人工啦,supply and demand,老細當然係壓價,兩萬八請到嘅人點解要畀三萬?正如你想叫高人工,甚至有人吹大上一份工嘅人工(我從來唔會),咪又係昆鳩人賺到盡。哦,唔同,人地係仆街資本主義巨獸—咁你就米撚去做啦。
23. 我想講,我去星展嗰時,我開嘅人工,佢冇壓價之餘,仲加多咗啲畀我。「多五百都係多丫」(唔止五百嘅)。呢啲先係做大事嘛。其實我請人都係咁,一般你叫幾多我再畀高你,「又唔係我啲錢」。
24. 當然,入到去我冇加過人工,就係後話,一個仙都冇,雖然都只係年半。食得鹹魚抵得渴啦,喂但你條鹹魚越食越渴喎。咁你可以話我辦事不力廢撚柴,你做星展年年都加好人工,的確好多人係咁。但我又話你知,我去第間公司都係年年加人工,即使康宏咁XX都仲有加我人工(託我老細洪福,多謝)—結論?都係八字唔夾,早走早著。
25. 真的,唔夾咪分手,唔通我仲要去「好,我要好努力,證明畀你睇係你睇錯」,仲十八廿二咩,我使撚靠你「證明」咩,我去搵過份工咪最好嘅證明。
26. 其實唔應該講,但最後我都係忍唔住講。到我當時轉去星展呢,我啲朋友就叫我delete 晒以前啲Facebook Post,我話咩回事?佢地話,「你成日話人地係「保險箱都掉撚埋你嘅亞州最安全銀行嘛」」
27. 心諗,係喎,雖然我覺得我冇「成日」講(但今日又講多次),但,即係好似啲球員轉會咁,「咁轉去利物浦就梗係delete咗之前係咁串人嘅ig post」
28. 不過還是要講,「保險箱」呢單嘢真係太經典,開埠以嚟第一次喎!威唔威?更要留意,當時(2004年尾)我剛由教書轉去做銀行(蕉行嘛),真係深深震憾我心靈。我仲記得當日係標哥睇睇下報紙,自己在個位度講,「哈,啲坡佬咁撚樣都得喎」(原文照錄),當然仲要係有女同事在場。咁留意,當時我只係返工個幾月,試用期都未過,當然唔敢回佢「點撚樣呢?」。但以佢性格,當然自己主動講畀我地知。
29. 不過呢,諗深一層,扯,人地講「亞州最安全銀行」,講個credit rating嘛,講借錢存錢畀佢好安全之嘛,nothing to do with 保險箱喎。況且,to be fair,班友個個都拎一大舊錢和解啦,幾大舊冇人知,non-disclosure 嘛,但,肯定好大舊掩口費啦。Fair enough 啦。
30. 拿,有呢段,你可以肯定唔係廣告post啦。
(*)這很經典 — https://bityl.co/8SED
(**)我成日都話,香港地呢,屯門街市師奶都識講引伸波幅,金融普及程度肯定全球首位,啲咩學者話香港人金融知識不足都戇鳩。Try me,你去紐約去倫敦街市,試下問人咩叫縮vol?
==============
一週年!比別人知得多。subscribe now(https://bityl.co/4Y0h)。Ivan Patreon,港美市場評點,專題號外,每日一圖,好文推介。每星期6篇,月費100,已經1900人訂! 畀年費仲有85折,20/40年費VIP 送本人著作一本。
==============
同時也有10000部Youtube影片,追蹤數超過2,910的網紅コバにゃんチャンネル,也在其Youtube影片中提到,...
聽 說 我叫 卵 咪 在 陳美濤 Tomato Facebook 的精選貼文
我同家姐個名一樣(上)
我叫明秀,名字表達咗父母對子女嘅期望,阿媽希望我聰明同優秀,所以叫我做明秀。
有趣嘅係,我家姐都叫明秀,我諗冇邊個家庭,會有一對同名嘅姐妹。
嚴格嚟講,我都唔可以話,我同家姐同名。
因為由始至終,只有一個明秀。
簡單啲講,我同家姐係雙胞胎,生得一模一樣。
阿媽經歷過無數人生低潮同挫折之後,生咗我哋。
佢將所有希望寄託喺下一代身上,希望下一代成為最出色嘅人,贏咗起跑線,再由頭帶到落尾。
呢種期望,喺家長之中都算幾普遍。
但阿媽有自知之明,佢唔聰明亦唔算有錢,培養子女方面,佢真係冇乜優勢。
正當佢苦惱之際,佢早產,生產過程意外地順利,喺屋企生咗我哋兩姐妹。
阿媽意識到,只有佢自己知道,佢生咗兩個女。
所以佢只係登記咗一份出世紙,一個身份,就叫明秀。
阿媽嘅諗法好簡單,如果兩個人一齊努力,經營同一個身份,就比其他人多咗時間同精力上嘅優勢。
所以佢幫我哋分咗工,自從小學開始,家姐負責讀英文同數學,我負責中文同常識。
返學都係一人返一日,剩低嗰個留喺屋企溫書。
考試嗰陣,就視乎考邊科,安排邊個去考試。
我哋要溫嘅科目,比其他人少一倍,專注力更集中,成績都好優秀。
我哋仲可以學唔同嘅才藝,彈琴、畫畫等等,當然係一人學一樣。
漸漸地,「明秀」成為優秀嘅代名詞。
有時都會有失誤㗎,例如學校安排同一日有中文同英文測試,咁家姐嘅英文成績就差咗好多。
但阿媽話唔緊要,因為第日公開試,一定係一日考一科,我哋實搞得掂。
如果你問我嘅感受,其實我自細都幾開心同滿足。
人人都要一個星期返五日學,我只需要返兩、三日,連功課都少一半。
而且我都可以照識朋友,同朋友出街玩。
只不過,同一時間只可以有一個明秀出門,同埋每次返到屋企,我哋都要同對方詳細描述,今日發生咗咩事,免得出現破綻。
可能有人會問,就算係同卵雙胞胎,都唔係完全一樣,總會有破綻,例如指紋唔同,個樣可能有微細嘅差異。
係㗎,不過只要我哋唔犯案,唔做奇怪嘅事,根本唔會有人幻想,世上係咪有兩個明秀。
破綻源於懷疑,從來冇懷疑,就唔會有破綻。
就係咁,明秀漸漸長大,成為一個優秀嘅女仔。
佢考上最好嘅大學,拎埋獎學金,阿媽好開心,人人都羨慕佢有一個咁好嘅囡。
而我同家姐都非常和諧,或者係因為我哋自細嘅經歷一模一樣,所以性格都差唔多,做嘅決定好少有矛盾。
我以為,我哋會幸福快樂咁生活落去。
對於愛情,我同家姐早就有過協議,我哋將會搵一個優秀嘅男人,拍拖結婚生仔。
結婚後,我哋依然輪班,一個照顧家庭,一個喺職場奮鬥。
家庭事業兩不誤,明秀會成為最成功嘅女人。
懷孕嘅時候會有啲麻煩,不過總會解決到。
開始返工之後,我愛上一個男人,佢叫有成。
有成事業有成,又靚仔又有車有樓,完全符合我哋對理想對象嘅要求,符合阿媽對女婿嘅要求。
唯一嘅問題係,家姐唔愛有成。
「有成有咩唔好?」我忍唔住問。
家姐猶猶豫豫咁答:「佢冇唔好,只係……可能冇Feel掛。」
對於愛情,人難免有佔有慾。
家姐唔愛有成,喺佔有慾嘅角度出發,我應該開心。
因為未來明秀嘅時間分配,肯定係我陪住有成,家姐去做其他嘢。
直到有一日,有成拎住一條片,怒氣沖沖咁質問我:「我對你咁好,你畀帽我戴?」
影片中,家姐同一個陌生男人,激情擁吻。
我下意識答:「呢個唔係我。」
「唔係你?佢著住你條裙,拎住你個手袋。」
有成冷笑:「我拍完片之後,大叫『明秀』,你擰轉頭望一望我,面都青埋,落荒而逃,你唔記得啦?」
我啞口無言,事到如今,就算我叫埋家姐出嚟,話我有個雙胞胎家姐,都解釋唔到當日嘅奇怪行逕。
除非我坦白,一直以嚟就有兩個明秀,但有成只會更加接受唔到。
我正諗緊點樣解決,呢個時候,手機震一震,我收到一則轉帳提示,家姐將一半積蓄,轉去一個陌生嘅戶口。
有成見我仲睇手機,好嬲咁走咗,然後我即刻搵家姐。
「我搵到我畢生嘅摯愛,佢叫阿風,佢係一個好有才華嘅畫家……」家姐滔滔不絕。
我質問佢:「我唔想聽你嘅愛情故事,啲錢去咗邊?」
家姐含羞答答咁答:「阿風要搞畫展,仲差少少錢。佢唔肯要我啲錢㗎,我要匿名支持佢。」
下集:https://bit.ly/33H96sq
將專頁設定為「搶先看」/ "See first",最新故仔馬上睇!
你到底愛唔愛我:https://goo.gl/SDZrU5
美女與野獸與愛情:http://bit.do/fbwSy
#短故 #短篇 #小說 #陳美濤 #廣東話 #粵語 #tomatochan #我同家姐個名一樣
聽 說 我叫 卵 咪 在 有心無默 Facebook 的精選貼文
《無異之地》極樂謊園(八)
毫無疑問,頭先廣播所指嘅「第一百萬位遊客」同「帶我去血慾騷嘅人可以一齊成為VIP會員」肯定又係樂園員工嘅另一個謊言,目的係借其他人嘅力量將我捉住。
雖然周圍嘅途人好快就注意到我,但可能佢哋都冇諗過我呢位「中獎者」居然會跋腿逃走,所以最初都顯得有啲驚訝。
不過,等到反應過嚟後,有幾個人即刻加快腳步從後追上嚟。中途有其他人注意到呢個情況,都有樣學樣跟埋嚟,當中不乏湊熱鬧嘅人士……成個畫面就好似滾雪球一樣,越滾越大。
「佢點解要走呢?」「係囉,好奇怪……」
「會唔會又係夾埋?以前都好似試過……」
「喂,你上啦。」「妳唔上?妳女仔易搞啲喎。」
而畢竟我右腳扭傷咗,所以個距離只會不斷收窄。望住走喺前排嘅人如狼似虎嘅眼神,隨時都會一湧而上,絕望感再一次充斥全身……
=========
一至七集:
https://www.facebook.com/pg/Echo.of.Heart/photos/?tab=album&album_id=1736011713197304
【廣告時間】《無異之初》、《時間守衡者》、《絕命上映》、《絕望走廊》、《絕無轉機》各大書局有售!
=========
「妳繼續行!」陳伯突然轉身擋喺我後面,「等我頂一陣!」
一講完,佢即刻用雙手捉住旁邊嘅垃圾桶,再猛地一倒,將裡面嘅垃圾通通倒喺地上面,形成一道路障擋喺人潮前面。
「陳伯……」
「唔好再望喇!妳再向前行多陣就會見到間小屋!」
雖然話係路障,但實際威脅其實接近係零。以眼前嘅人數差距,陳伯嘅舉動明顯係以卵擊石。但即使我留喺度都幫唔到啲咩,反而仲可能害到佢……
所以,我下定決心向住目的地繼續行。就算聽到後面開始有人嘈、有人發出驚訝嘅叫聲,都再冇回頭。
跑完最後一道斜路後,我終於見到嗰間荒廢小屋了。雖然驟眼睇落冇人喺附近,但我記得陳伯提過員工都知道呢度係另一個出口,所以都唔敢放鬆心情。然後,戰戰兢兢咁行落嗰條通往小屋必經嘅樓梯……
「Cheryl,我就知妳會返嚟呢度。」意料之外嘅係,一把熟悉嘅女聲忽然喺樓梯底嘅視線死角傳嚟──係Alice。
「Alice……」聞言,我不禁停低腳步,「原來妳已經醒返。」
「嗯,我真係估唔到……妳竟然會拋低我走咗去。」Alice邊講邊由死角位行返出嚟,「我部手機呢?」
「我都冇諗過,妳竟然會瞞住帶我嚟呢個鬼地方。」我邊拎出Alice部手機,慢慢彎腰放喺樓梯上面,「還返畀妳。」
「乜嘢鬼地方?」Alice好驚訝,「唔單止Zoey、慶仔、朱少、阿廉、Bella佢哋都好鍾意呢個地方,甚至連阿海……佢玩完摩天輪之後都接受咗呢度!係唯獨妳……雖然我唔知點解會咁,但只要妳肯相信我,我一定可以……」
「夠喇!」我大聲打斷佢,「Alice,我已經知道呢個地方嘅真相。你哋……仲有呢度所有遊客都俾班員工呃咗。可能表面上係好美好,但底裡嗰班員工不斷做緊唔人道嘅事……包括捉走我呢類唔肯接受『樂園』嘅人!」
「Cheryl……妳到底係聽邊個講?」Alice皺起眉問,從表情睇唔出佢係咪知情。
「係邊個唔重要……Alice,我今日之所以嚟海馬公園係為咗搵真相,而唔係聽更加多嘅大話……」我重新行落樓梯,「所以,假如妳真係當我朋友……就請妳唔好擋住我。」
Alice聽完一臉受傷嘅神情,最後總算退後一步,等我可以繼續行。
「Cheryl……」行到Alice旁邊嘅時候,佢再次開聲講:「雖然妳而家揀咗走,但我始終相信妳會回心轉意。」
有一刻,我真係以為自己可以順利離開呢度。但就喺下一瞬間,荒廢小屋嘅木門突然被推開,有兩個著住員工服嘅男人喺裡面行出嚟。因為周圍冇咩遮掩,所以佢哋即刻就注意到我。
「就係佢!」其中一個高壯嘅男人講:「守喺度果然冇錯!」
「只要捉住佢,我哋就有機會再升一級!」另一個男人興奮咁講。
「到時就有機會見到園長……」語畢,佢哋兩個即刻就衝上嚟。
雖然Alice冇趁住呢個機會幫手制伏我,但要從呢兩個男人手中逃脫都唔係一件易事。本身,我已經打定輸數……
──呯、呯!
但就喺下一刻,樓梯上方突然傳出兩聲巨響。我反射性咁掩住雙耳,再抬頭望上去,係陳伯──佢呢刻右手拎住一枝手槍,右邊臉頰有明顯嘅瘀傷。再轉身望返轉頭,可以見到個一高一矮嘅員工都中槍倒地,一動不動咁,唔通已經死咗……?
「好彩早有準備……」陳伯邊行落樓梯邊講,下一瞬間就注意到Alice。
「佢係我朋友!」因為驚佢可能會開槍射殺Alice,所以我早一步講:「唔好開槍……」
呢刻我總算諗通了,陳伯頭先應該都係用槍威嚇追趕我嗰班人,所以先可以擋到咁耐……
「小妹妹,而家應該冇人阻到妳喇,」陳伯用另一隻手捉住我隻手臂,邊行邊講:「聽住,入到屋之後,妳一直行到最盡頭嘅房間。唔使驚係死路,等一陣就自然可以返到出去。」
「但陳伯你真係唔可以一齊走?」我問,途中經過地上面嘅兩具「屍體」。
「傻妹,我之所以咁清楚裡面嘅情況,就係因為我已經試過……」陳伯無奈一笑,「但我走唔到,唔代表妳唔得,入去喇。」
說罷,我哋終於嚟到門前。而同一時間,我注意到後方樓梯上面已經聚集咗好多人……包括樂員員工、仲有頭先追趕我嗰班人。
「陳伯!果然真係你!」November憤怒咁講:「我一早已經估到你有份幫人走,今次仲唔捉到正!?」
「捉到正又點?」陳伯毫不畏懼咁回應:「你哋咪又係唔會殺我!?」講到呢度,佢就轉身推我入屋,「記住,盡頭嘅房間。」
「陳伯……點解你會肯咁落力幫我?」我忍唔住問。
「我仲以為我講過添,」陳伯溫柔一笑,「因為我喺妳身上見到我個女嘅影子……」
「吓?」我愕然。
「但妳當然唔係佢……小妹妹,再見喇。」語畢,陳伯就用力閂埋門。最後一眼係見到November同其他人已經衝到落嚟,去到Alice旁邊,「你哋想入去就過咗我呢關先!」
──呯!
之後發生咩事我已經理唔到了。只能抹一抹眼眶嘅淚水,然後鼓起勇氣行去最盡頭嘅房間。入到去,因為現場太黑咩都見唔到,所以我拎起自己部手機開著電筒功能。
最先照到嘅,係右手邊一張望落非常殘舊嘅床,床嘅角落仲有隻右眼已經甩咗嘅熊公仔。再向左照過去,有一張已經佈滿灰塵嘅矮書台。因為粉紅色嘅緣故,所以感覺係比細路女用嘅……
「唔通……」
就喺我行過去想望清楚嘅時候,身後嘅房門突然「嘭」一聲閂埋。我都未反應得切,成間房就開始猛烈嘅上下震動起嚟……
「吖!?」我即刻將身體貼近牆邊,總算勉強平衡到身體,「到底……」
唔通係陷阱?就喺我腦海浮起呢個念頭嘅一刻……地震結束了,隨即係有人推開房門──係一男一女,其中嗰個女人仲抱住一位昏迷中嘅細路女,我第一眼就認得出佢係陳伯個女。
「February,就咁放佢喺度?」女人問:「呢度咩都冇喎。」
聞言,我即刻望咗眼四周,赫然發現房間入面嘅傢俬居然全部消失晒……唔通,而家所見到嘅嘢都係過去嘅片段?咁就解釋到點解呢對男女見唔到我,仲有陳伯個女點解會喺度……
「而家冇啫,將來可以補返。」February冷酷咁講,然後望向個細路女,「佢係咁耐以嚟第一個接受唔到『樂園』嘅人,所以一定要搵人廿四小時睇實佢。」
「明白。」女人點頭後,就緩緩行去房間角落將細路女放低,「好好瞓喇,瞓醒之後等緊妳嘅係一場漫長嘅惡夢。」
「……爸爸……救我……」細路女喺睡夢中痛苦咁講。
下一刻,眼前嘅三個人全部成為煙霧消失了,同一時間房間亦都擺滿晒新淨嘅傢俬。
「吖吖吖吖吖吖───!」突然,門外面傳嚟細路女嘅尖叫聲:「爸爸、媽媽……救我……樂樂……好痛……嗚嗚……」
原來陳伯個女就係叫樂樂……雖然唔知佢喺外面發生緊咩事,但感覺就好似做緊相當殘忍嘅實驗。越聽就越感到痛心,無力感亦都不斷加劇……
幾秒後,房間嘅景象又變了。可以見到稍微長大嘅樂樂躺咗喺床上面,寂寞咁同雙眼仍然完整嘅熊公仔講嘢:
「熊先生,到底幾時開始……講真話係錯?」樂樂問:「明明,學校老師係教我哋做個正直嘅小朋友……」
就喺下一刻,房間大門突然俾人粗暴咁打開。係最初帶樂樂嚟呢度嘅February,佢仲帶住另一位著住醫生袍嘅男人。
「我哋仲有幾耐時間?」醫生袍男人問。
「唔多……」February回應:「你要速戰速決,總之唔可以俾佢離開呢度。」
「可惡,最難搞嘅嘢偏偏由我做。」醫生袍男人先深呼吸一口氣。然後就走到樂樂面前,強行搶走佢手上嘅熊公仔,公仔嘅右眼就係因為咁而甩出嚟。
「吖……公仔!?」可能當咗熊公仔係唯一嘅朋友,所以樂樂顯得相當難受。
「雖然好想繼續研究妳……」醫生袍男人拎出一枝針筒,「但對唔住喇,上頭已經決定咗要放棄妳嘅生命。」
「唔好啊!?」聞言,我反射性咁伸手想阻止佢,但右手只係穿過佢嘅身體……呢一切果然只係過去嘅片段。
就喺佢即將落手嘅一刻,整間房突然變得漆黑一片,同一時間我嘅眼皮亦都變得好重,全身軟弱無力……最後終於失平衡瞓咗喺旁邊嘅床上面。
「……樂樂……」
到我有返意識,重新睜開眼後,我注意到自己瞓咗喺海馬公園嘅海盜船旁邊。眼前再唔係無情嘅夜空,而係一片耀目嘅晨光。
當然,最初我都仲係半信半疑,唔敢相信自己返番去現實世界。直至見返熟悉嘅風景、曾經玩過嘅機動設施,仲有平平常常嘅清潔工人同樂園員工……先至搵返久違嘅安全感。
但呢件事並未完結。
到我順利坐上巴士,我忍唔住打咗個電話畀阿海。
「喂!?」阿海接聽得好快,而且語氣非常激動,「Cheryl!太好喇,妳終於肯打返俾我……」
「吓?」我對佢呢個反應感到愕然。
「Sorry,今次係我做錯咗,當時喺鬼屋根本唔應該同妳分開行……」
「鬼屋?阿海……根本唔關鬼屋事,我係喺摩天輪度同你分開……」
「咩摩天輪?我哋有玩過咩?」阿海疑惑咁問:「妳離開鬼屋之後就自己走咗去……」
「冇,我哋仲係一齊,Alice帶咗我哋幾個去咗一個叫做『極樂園』嘅地方。」
「『極樂園』?妳到底講緊咩……」阿海問:「Cheryl……妳而家喺邊度?不如我哋見面再講?」
原先,我仲以為阿海係講大話呃我,扮冇去過「極樂園」呢個地方。但見面之後傾落,越傾就越覺得佢唔似係扮,而係真係唔記得有呢件事。
而慶仔、朱少、Bella、阿廉,甚至連Zoey亦都係一樣,對喺「極樂園」發生過嘅事全部冇晒印象……以及一致記得我係玩完鬼屋之後發脾氣走咗去,仲熄埋手機。如果佢哋係有心隱瞞我,又未免係做得太過迫真。
原先,我都有一刻猶豫過,會唔會喺「極樂園」發生過嘅事全部都係一場夢?但Alice嘅離奇消失卻徹底打消咗我呢個諗法。
我再聯絡唔到佢,打電話唔通,短訊唔覆。而問佢屋企人,只係話佢去咗歐洲旅行,要一個月後先返。
以我對Alice嘅認識,佢明顯係刻意避開我,咁就更加證明到「極樂園」嘅事係真實存在,但其他人呢?到底點解會咁?
轉眼間就過咗一星期,本來呢日我約好咗同阿海見面。但就喺我即將到達目的地嘅時候,突然落起滂沱大雨,冇遮嘅我就只可以避埋一邊。
正想打電話畀阿海叫佢嚟接我。但就喺呢個時候,突然有個擔緊遮嘅少女停喺我面前,同我講:
「我睇得出妳好迷茫,內心迫切需要一個『真相』。」
一聽到真相呢兩個字,我突然醒起某個短訊……
「唔通妳就係嗰陣幫我……」
「聽住,」少女舉起手打斷我,「妳男朋友今個禮拜日就會再去『極樂園』。如果妳今次唔制止佢……就會永永遠遠咁失去佢。」
「咁我應該點做?」我問。
「妳去呢個地址,」少女將一張紙條交畀我,「搵一個叫做無二嘅男人,只有佢先有能力幫到妳。」
等到我收好張紙條後,少女隨即將佢把遮遞埋畀我。
「拎埋去。」
「唔使,妳咁樣自己會濕身!」見佢明顯冇後備遮喺身,我理所當然咁婉拒,但對方睇落好堅持。
「世人見到嘅係雨,但我見到嘅係謊言所帶嚟嘅淚水。而淚水係冇辦法傷到我,只會令我意志越嚟越堅定。」等我握好遮柄後,少女就退後一步任由雨打,「係喇,如果無二佢問起我係邊個……妳就答佢,我叫做如初。」
「如初。」我點點頭,當刻並冇絲毫懷疑,「嗯,我會記住妳所講嘅嘢……」
聞言,佢就轉身離開,最後消失喺人群之中。
*
*
*
【韋家聰視角】
「成件事就係咁。」Cheryl將嗰位自稱「如初」嘅少女畀佢嘅紙條拎出嚟。
「呢個字跡肯定唔係如初寫。」我好肯定咁講:「到底係邊個扮佢……」
我望向無二,呢刻佢企喺窗邊,邊望住外面嘅景色邊食煙。雖然中段佢好似有稍微認真聽(Cheryl同阿海坐上摩天輪嗰段開始)。但成個過程俾我感覺都好似喺度思考緊其他嘢咁。
「所以……」幾秒後,無二終於開口問:「妳嚟搵我係想我阻止妳男友去『極樂園』?會唔會係咁簡單?」
「吓?」Cheryl愕然。
「妳唔想佢去嘅話,其實仲有好多方法。用繩綁住佢又得,想盡啲嘅扑暈佢都得……」
「其實好難怪啫,」我打斷無二,「一嚟佢係女仔好難落手,二來咁做阻得一次都阻唔到第二次啦?」
「唔係,」Cheryl搖搖頭,「無二先生講得冇錯,我係仲有另一件事想你幫手……我希望你可以去救陳伯,帶佢離開嗰個地方。」
救陳伯?難怪……正如無二所講,要暫時阻止阿海去「極樂園」其實真係唔難。但要救陳伯嘅話,點睇都係要無二出手。
短暫嘅沉默後,無二終於作出決定,整熄煙頭然後對住Cheryl微微一笑。
我曾經聽如初提起過佢同無二第一次見面嘅情況,所以已經預想到之後會發生咩事。
「對唔住,我幫妳唔到。」
果然,係無情嘅回答。
(待續)
過去又係痛苦嘅一星期。希望各位可以體諒同繼續支持外面嘅年青人,佢哋已經為我哋犧牲得太多……相比之外,我哋少少嘅不便真係算唔上啲咩。
睇完又鍾意呢個故事嘅朋友,不妨分享出去同埋留句 #留言派嬲 ~我哋 100 SHARES 繼續,下集暫定星期六。
===================
【非呃嬲植入式廣告時間】《無異之初》《時間守衡者》《絕命上映》《絕望走廊》《絕無轉機》《無限次告白》《醉後的藍》已經登錄各大書局。
IG: echoofheart