關於 股神系統收費 ，我們在網路上蒐集到這些相關的討論、資訊與評價

【一連七集，第五】哈佛知識分享: Trade-offs 如何「取捨」?

你要取得更多，就要捨棄更多。「取捨」is tough, but you have to do it!

股神巴菲特 Warren Buffett 有句名言好影響我:

"The difference between successful people and really successful people is that really successful people say no to almost everything.‘’

成功及非常成功嘅人分別就係非常成功嘅人對絕大部分事情都係 say No.

識我嘅朋友都知道，我經常講:「我乜都唔識、乜都唔買! 我只買幾千萬以下香港嘅街舖。 我唔買樓、唔買工廈、唔買商廈、唔買農地、唔買車位/骨灰龕位、唔買大灣區、英國樓、非洲農地、 火星月球。 全部都唔買，送畀我都唔要。Again … 我只買港幣五六千萬以下香港的街舖仔。 香港有十萬間，買十世我都買唔晒! 呢世我只想買一千間。」

哈佛大學教授 Michael Porter 亦講過: “Strategy is making trade-offs in competing. The essence of strategy is choosing what not to do."

策略就係要以「取捨」去競爭。 策略嘅精髓就係要知道唔做乜!

上一集講過，何謂一個好嘅策略 Good Strategy? 教授 Michael Porter 話要經得起五個 Tests:

A distinctive value proposition 獨特的價值主張

A tailored value chain 度身訂造的企業價值鏈

Trade-offs different from rivals 同競爭對手不同的「取捨」

Fit across value chain 成條企業價值鏈的活動要配合

Continuity over time 持續性、持續性，不能一時一樣

今集同你講第(3) Trade-offs different from rivals 要贏，就要有同競爭對手不同的「取捨」。

What are trade-offs?

"Trade-offs are the strategic equivalent of a fork in the road. If you take one path, you cannot simultaneously take the other." by Michael Porter

「取捨就好似去咗一個交叉路口咁， 你只可以二選其一，唔可以兩條路都行晒。」

做生意，唔係多啲，就好啲。 多啲產品、 多啲服務、多啲客戶， 唔代表你就係好啲。 因為你營業額可能多咗三成， 但利潤反而可能無咗一半。 咁我就情願營業額細啲，利潤多一倍好過。 記住一開始嘅時候我話 Michael Porter 講過:

"Competition is not about being the BEST, not about MARKET SHARE. Competition is about being UNIQUE, about earning PROFITS" by Michael Porter

競爭唔係要做到最好，最大嘅市佔率。競爭係要做到最獨特，同埋賺到錢，長遠地賺錢。

幾年前我講過，香港週街都係髮廊，但點解有間特別唔同?

video …

QB House (Quick Barber) 就係做咗好多「取捨」 trade-offs ， 好多嘢唔做，但反而吸引咗一班想「快、靚、正」 ，但又唔想求求其其、 污糟邋遢剪個頭髮嘅繁忙上班一族， most likely 男士們、三四五十歲左近。10 minutes, just cut!

QB House 專注培訓、建立系統，令呢班目標顧客群由原本一兩三個月先剪個頭髮，而家一兩三個星期就去剪轉一轉。 剪快咗、剪多咗，就令QB House 同佢嘅髮型師雖然做少咗嘢，但反而收入及利潤上升。This is what I call "trade-offs", LESS IS MORE!

就係因為 QB House 嘅 Trades-offs 同一般髮廊嘅競爭對手唔同，當初首創新嘅經營模式係日本做到最獨特， 亦都解釋咗點解佢1996年由東京一間開始， 短短幾年間就能夠開到全球幾百間分店，2018年仲係東京証交所主板上市， 依家市值近20億港幣。 雖然有好多人想抄佢，QB House 嘅專注，佢 make 嘅 trade-offs 至今依然令佢每年生意額都上升，到今日都保持住係「速剪」行業嘅領導地位。

我成日都話，「當你乜都做，等如你乜都唔做!」 …. 因為你無樣嘢做得好、無樣嘢做得專。When you please everybody, you please nobody. 做生意要「取捨」，唔放手，唔會得到更多。

可能你會覺得 Just-Cut, QB House 都做咗啦。 做髮廊仲可以點變? 根據 Michael Porter，大把方法變。 最緊要就係，唔係人做你做。Your trade-offs have to be different from your rivals, then you have a strategy.

你嘅「取捨」要同你競爭對手唔同，咁你就有好策略。人哋 Just-Cut, 咁你可唔可以 Just Perm 電髮? Just Color 染髮? Just Blow Dry 吹頭?

唉! Just Blow Dry? 美國加州有間咁嘅髮廊 …

佢就好似係 QB House 嘅翻版，但係 No Cuts No Color, Just Blowouts. 齋吹頭! 美金$40，45分鐘時間，班目標顧客群，即係長頭髮嘅二三四五十歲女士們， 就可以 enjoy 喺個輕鬆嘅環境洗下頭、按下頭、吹下頭、飲杯 champagne、聽下音樂、Relax 下，就有個清神爽利嘅頭見人!

因為做得夠專，懂得運用 Michael Porter 所指嘅 trade-offs ，同一般髮廊競爭對手唔同嘅 trade-offs, 好多女士就個個禮拜去幫襯，relax relax 下。2010年由美國加州第一間店開始， 十年間，全美開超過一百間分店， 擁有超過5000個髮型師， 每次美金$40，每個月幫緊20萬個客人吹頭。 淨係吹頭，依家營業額每年超過一億美金。

全球最大嘅傢俬公司，IKEA， 又係另一個Michael Porter 所指 Trade-Offs 嘅典型例子。佢由產品設計 (自己裝嵌)、產品種類 (簡單得來又多幾樣選擇)、 自己推住架車嘅購物模式、至到客戶服務 (間舖頭永遠唔易搵到人幫手，人客自己搞掂，慳番啲成本，換取平啲價錢)，到最後排隊畀錢、自己包裝、抬件貨返屋企 …. 如果唔係送貨要額外收費 (無得免費)。IKEA 成條嘅企業價值鏈 value chain 都係同其他一般嘅傢俬公司好唔同，有好唔同嘅 Trade-offs 取捨。

IKEA 嘅「取捨」，就能夠吸引咗一班 “with a thin wallet" 想價錢平，但又想 good design, 唔介意自己辛苦做多啲， 工餘時間，甚至乎自己花成日裝嵌埋嘅顧客。IKEA 明白佢唔會 serve 晒所有人。 我以前係美國讀大學、 或者啱啱出嚟 New York 做嘢，都好鍾意去 IKEA 買嘢，因為平! 而家? 叫我花成日嵌件傢俬，睬你都傻! I was an IKEA Customer, but not anymore! It's OK, you cannot please everybody! 做生意就係個「取捨」! 賺到錢就得啦。

美國最賺錢嘅航空公司 Southwest Airlines 西南航空都係一樣，No first class, No meals, No assigned seats, No baggage transfer, No planes other than Boeing 737s, No International Flight … so on and so forth.

無頭等、無飛機餐、無預設定座位、無行李轉運 、除咗波音737乜嘢客機都無、無國際航線。 仲有好多都比一般其他航空公司無。

但就係因為「冇」， 運動複雜程度及成本下降，Southwest 就可以專注做以下幾樣嘢特別好，就係「平」、「快」、「準時」、員工做得開心自然服務態度更好。其他乜都無， 但未必個個客人都啱!

於是 Southwest 有個好出名嘅 "Pen Pal" 故事，就有位乘客 Mrs. Crabapple， 經常好唔滿意 Southwest Airlines 乜都冇，無頭等、無飛機餐、無預設定座位、無行李轉運等等等等， 經常寫信去 Southwest 投訴，呢個「筆友」"Pen Pal" 個個客戶服務部同事都怕咗佢， 寫完又寫， 回覆左又寫，投訴完又投訴。 直至客戶服務 部嘅同事們都冇計， 叫當時嘅CEO/創辦人 Herb Kelleher 回覆。佢點寫? 真人真事! 60秒內，佢回覆:

“Dear Mrs. Crabapple. We will miss you. Love, Herb." 即係話，請佢走， 唔好再返來!

聽落好似好搞笑，但Michael Porter 話呢個係一個典型嘅 trade-offs 例子，you cannot please everyone. 記住，一開始嘅時候，我講過:

"Strategy is making trade-offs in competing. The essence of strategy is choosing what not to do." by Michael Porter.

策略就係要以「取捨」去競爭。 取捨嘅精髓就係要知道唔做乜!

"When you try to offer something for everybody, you tend to relax the trade-offs that underpin your competitive advantage." by Michael Porter.

當您嘗試做曬所有嘢去服務每一個人，你嘅「取捨」就會減少， 同時亦都會減少你嘅競爭優勢。

善用 Trade-offs 「取捨」去增強自己競爭力嘅機會隨處都係，爭在你願唔願意「放手」，先能夠取得「更多」。

包括我自己在內， 如果我乜嘢地產項目都投資，有賺錢就買， 甚至乎集資錢多地盤都搞埋， 我只係一個三四流嘅地產發展商。 我點同新鴻基/恒基/長實打呢? 但我專注幾千萬以下嘅香港街舖，我就係一個一流嘅商舖基金公司， 全香港人， 包括所有大嘅地產發展商，係街舖買賣都唔會夠我來。 社運/肺炎後，全香港買賣舖無人夠我哋多，呢個係事實!

"Trade-offs are choices that make strategies sustainable because they are not easy to match or to neutralize." by Michael Porter.

「取捨」會令到策略更有持續性，因為競爭對手 好難去複製或抵消你嘅優勢。特別是你嘅 first mover advantage 先行者優勢。

我係香港第一個商舖基金，就永遠都係香港第一個商舖基金。只我哋專注，未來幾十年，我知道係香港嘅街舖，無人會動搖到我哋嘅領導地位。

即是有人入嚟炒，Michael Porter 話新入嚟嘅 「模仿者」好多時都只係做 Straddling 跨騎， 即係好似「一腳踏兩船」咁， 自己本身嘅本業又做，商舖又做，結果兩邊都做唔「專」。

就係因為有自信我先咁講。因為好似今集一開始咁講，根據 Michael Porter 嘅 "Trade-offs different from rivals"， 我哋係放棄咗好多嘅嘢，同競爭對手大大唔同，先能夠建立到我哋今日係香港街舖嘅領導地位。 只要我哋專注，我哋嘅基金投資者會賺錢! I know it. 但如果有一日，我開始搞工廈、搞商廈、搞地盤、搞英國樓、搞埋茶餐廳、 補習社 、 酒樓、酒店等， 就係投資者應該攞錢走嘅時候! 乜都做，就開始等如乜都唔做!

你呢? What are your trade-offs? 你的「取捨」同競爭對手有咩唔同呢? 抑或人做你做，人客想要乜，你就俾佢乜呢?

There is no problem with that! 第一集一開始我就話，99%嘅公司都係咁，養家活兒可能好多年都冇問題， 但根據 Michael Porter，你只係停留係第二個 S - Sustaining 持續緊嘅階段。 做好多年，搵到食，但可能仍然冇人識你，無突破。Survive, Sustain, 但要去到第三個 S, Succeed, I mean Super Successful 好似一支箭咁標上去，等如以上 QB House, DryBar, IKEA, Southwest Airlines 咁，你就要有 strategy 策略。 你嘅「取捨」trade-offs 要同競爭對手截然不同。

李小龍嘅名言，亦都係掛喺我公司office嘅唯一名言: "I fear not the man who has practiced 10,000 kicks once, but I fear the man who has practiced one kick 10,000 times."

李小龍唔怕嗰啲踢過一萬種唔同腳法嘅人。但佢怕嗰啲踢過一種腳法一萬次嘅人。 你嘅腳法又點呢? 有興趣一齊研究下點做? 聽多啲 Michael Porter，就來我星期六嘅早餐會啦! 下集我再同你講 (4) Fit across value chain 成條企業價值鏈的活動，如何配合去增強你的競爭優勢?

。。。。。

My hobby 《星期六早餐會》!

九/十月份早餐會 Topic: Applying "Michael Porter" to your business: How to compete and win!

哈佛分享: 如何應用「米高波特」於你盤生意? 點競爭? 點贏?

講起哈佛策略教授， 無人出名過 Michael Porter. 有幸我2017年在哈佛親身上過他教的課程， 今次早餐會同你分享，希望對你做生意亦有所啟發。

有興趣參加啦 😃 每次限四位 (包括我)。 人多傾唔到計。

9月份，逢星期六早上9時開始，約三小時。地點中環。

對象: 中小企老闆/創業者/公司管理層，連我限4位。

有興趣參加的話，請 whatsapp 你的名片給 Suki (我助手) (+852) 5566 1335。

我唔係靠呢行搵食，免費，我請食早餐 😉 Be friends ..... 有機會到時見你。李根興 Edwin

www.edwinlee.com.hk
www.bwfund.com

聯絡李根興 whatsapp (+852) 90361143

#michael_porter #競爭策略

【龔成問答信箱】（Q21601-Q21620）

Q21601：

Hi 你好，睇咗你個page好耐，本人一路想做中低風險投資，只係未開始落手做，因為我知道好大部份財經資訊同新聞都唔係真係教人投資令讀者得到回報同被動收入，

而係好似龐氏騙局咁，呢個觀察令我大學揀商科都選擇咗marketing and pr，冇揀banking and finance，到而家我都係做嘢然後儲錢，冇投資過。

我想由頭開始學正確嘅投資方法，唔係投機或者賭博，我唔想做個啲無基礎知識扮識個類人，請問我可以點做？

如果係咁，我minimum應該預幾多本金慢慢累積呢？

多謝你睇我個msg！期待回覆。

龔成老師︰

你要分清甚麼是「龐氏騙局」，原理就是一個無任何經濟價值的項目，只利用新加入的投資者資金，令初期投資者得益，以這模式一支滾存。

但如果一間企業，本身有實體價值，對社會有長期正面影響，就不是騙局，你要分清「價值」的概念。

其實，坊間你會接受到好多投資資訊，但並不是全部有用。你要學識分辨那些"有用的客觀資訊"和"主觀的個人意見"。

前者係一些你值得參考的資訊，後者對你係無任何意義。

投資絕對唔應該係賭博，因此你需要有相關知識和經驗，去助你判斷每個投資機會。所以，你係投資前，一定要增進投資知識。

我自己會看好多有關投資、理財、股票、成功、激勵、心靈、致富等各方面的書。

我一開始，對投資一無所知，當開始睇，就發現自己過住的投資方法都是錯，更發現坊間的所謂「專家」、散戶，投資方法都是錯！

之後，我開始明白點解香港有9成散戶，投資股票都是輸多贏少，因為佢地無知識！

當我愈睇書，就愈明白真正的投資道理，同時自己的投資實力大升。由多年前輸多贏少，到現時贏多輸少。唔少散戶，可能憑短期市況好而獲利，但如果要做長勝將軍，就只有靠知識。

巴菲特的閱讀就更多，他多年來，絕對不是「睇住個市」，而是不斷睇書增加知識，睇年報了解企業。

我最初睇得好廣泛，到後來會睇較多「分析企業」、「價值投資法」、「巴菲特」類的書。

以下是我認為適合初學者睇的書，部分要到圖書館找的：

《我十一歲，就很有錢》
《經濟蕭條中，七年賺$1500萬》
《富爸爸，窮爸爸》
《思考致富聖經》
《秘密》
《財富金鑰匙》
《有錢人想的和你不一樣》
《世界上最偉大的成功寶典》
《洛克菲勒寫給兒子的38封信》
《解讀巴菲特》
《巴菲特傳-永恆的價值》
《勝券在握》
《智慧型股票投資人》
《非常潛力股》
《彼得林區的選股戰略》
《誰搬走了我的乳酪？》
《人性的弱點》

同時間，你都可以睇我架《80後百萬富翁》、《財務自由行》和《股票勝經》，都適合初學者。

至於開始投資，你唔需要預好多本金。其實只要每月有一定閒錢，就可以用月供股票，去做財富增值。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

若你係偏年青，應以增值為主，建議你用「平穏增長股」 + 「潛力股」作組合，去創造一個增值平台。

現在你每月先用5成儲蓄做月供。其餘先儲起，用一邊月供一邊儲蓄的策略。

由於你投資知識不高，因此可較集中ETF。到你有一定知識，對這些股票又有一定了解，才考慮加入其他股票，咁會較好。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q21602：

龔sir你好，3年前接觸你的fb及書籍，見你一直推介1211， 思量後跟你買了少少，現在還持有著，真的萬分感激你！

講一講我背景，42歲，月入4萬，單身，與1位退休家人同住居屋（已供完），屋企所有開支我全負責，每月儲1.3萬。手上現金1百萬，但當中30萬要撥備以防不時之需。

因投資知識不足，股票分得太散，成19隻，當中不乏高位買入。曾經看過阿sir說8-9隻股票組合就夠了，所以想向阿sir請教一下我該如何整合出一個平衡及適合我歲數的組合

以下是手上股票數目及買入價-

銀娛，1手，$52.2
金沙，3手，$35
港鐵，1手，$41.2
粵海，2手，$12.28
比亞迪，3手，$40.6

福壽園，2手，$7.5
小米，2手，$22.9
阿里巴巴，2手，$215.8
騰訊，2手，$610
中生，1手，$7.72
平安好醫生，2手， $84.8

京東健康，1手，$112
金界，2手，$7.7
郵儲銀行，1手，$5.82
中行，1手，$2.95
中銀香港，3手，$29.81

中國人壽，1手，十幾年前買忘了價位
長和 及 長地， 各1手多，當年和黃重組換成的，和黃$68買入

今年4月剛開始月供 恆地$2000 及 中生$1000

想請教阿sir-

1）19隻股票內哪些該集中保留？

2）中銀香港，金沙，郵儲，一來高位買入，二來好似增長不大。是不是等到升回買入價後該優先舍棄呢？

3）手上股票市值8x萬，可動用的現金70萬，比例約一半一半。是不是全部現金都留待大市在平宜區時才入貨較好呢？

如果現在想慢慢入10萬貨，該加注哪隻較好？

謝謝你的時間及解答！Thank you very much!

龔成老師︰

1) 你現時有股票，都係有質素和適合你年紀，不需沽出任何一隻，照長線持有就可以。

中國人壽(2628)賺錢能力弱左，質素只算中等，現貨可持有，但不要加注。

但長線計，你要集中翻係10隻以內，否則你好難定期去審視佢地質素。

2) 首先你要明白一個概念，我地持有一隻股票與否，關鍵位是企業質素、前景，不要被買入價影響。因為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心，照持有就可以。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

這3隻股票都有質素，佢地增長力無潛力股咁高。中銀香港(2388)和金沙(1928)有平穏增長力，加一定股息。而郵儲銀行(1658)主要係派息。

雖然佢地增長力唔高，但有助於你平衡成個組合，建議保留。

3) 現時大市只係合理水平，現金佔比重大約3-5成。餘下資金，就等大跌市出現，才加大力度掃貨。

你想再動用10萬，去分注入市，都係可以。

由於你現時組合，潛力股較多，再加上不少潛力股都在略貴水平。我建議你這10萬，集中係一些平穏增長股身上。現價都算合理水平，可分注儲貨。

另外，你月供組合都可以。但我建議加大月供供款，最好用每月一半儲蓄去做($6500)，餘下一半儲起，等大跌市機會。

------------------------------------------------

Q21603：

龔成老師，本人一直有追蹤你的FACEBOOK和YOUTUBE頻道，雖然你我不曾認識，但對於你想提升大眾的財務知識水平的大任，我實在深感佩服。

而當中的一些觀點，我卻出奇地認同，所以我想寫信給你。感謝你寫了80後千萬富翁這書，也希望藉此告之你有知音，認同其致富之道。

其實我和龔成老師的背景有點相似，自小在公共屋村長大，家境非常一般，讀書也不是特別擅長，會考只有十五分，大學也是剛剛好的進去，畢業成績也是非常一般。還有一點相似的是，我們畢業後都從事銀行業。

龔成老師在很早便明白為富者，有很多道理並非一般中小大學課程所傳授，反而更多是躲在日常生活中的潛則規。我贊同推廣財務教育，畢竟金錢是我們所有人一生中用得最多的工具，但現今竟缺乏學科教授。

然而現在的教育制度也僅僅是培養年輕人成為一個出色的僱員或專業人士，而絕非是一個創業家或投資者。

我和龔成老師也有一點很似，就是很早已經讀了很多金融及理財書藉，可能在潛移默化下走上一個銀行家之路。

可是現今的銀行家大多變成跑數的代表，亦只是公司的其中一個齒輪，即是離不開僱員的命運，你所有的付出和努力說穿了也只是為公司的盈利貢獻。

你所分得的其實很少，但付出了最寶貴的時間，這點我非常明白，但我之前 沒有老師當初的勇氣逃脫這命運之輪。反而沉醉在大公司所給予的看似亮麗的職位和不高不低的收入。

當然後來我真的離開了創立了一隊銷售團隊，單純為了持續而穩定的被動收入和可持續的事業發展。

所以我看到龔成老師所提及成為富翁的五大範疇時（全職股票/商業投資者，全職物業投資者，知名專家，企業家，擁有強大銷售團隊）突然發覺自己一路走來方向是對的。

雖然我和所有一般大眾一樣不是天才，也不是特別聰明。但我天生對所有學問的追求和強大行動力，令我創造了很多人認為的不可能。

在我29歲時買下第一層物業。在35歲，在銀行事業正處高峰時離開選擇一條不一樣的路。在於39歲時重返中文大學修讀全職MBA，主修創業家精神。

在40歲時選擇創立銷售團隊不再為大公司拼命，而是為自己而作選擇。回顧到此，再看看你寫的書，便明白有知音，所以非常感激你可以將你的想法匯集成書，以簡潔的方式表達出來，激勵大眾。除了堅定了我的信念外，你的點子也給我和同事們訓練的重要材料之一，我實在感激。

你在書本中提及銷售能力的重要性，年少時的我曾對銷售員有種不屑之感。

我不知道是大眾的刻版印象影響了我，還是成長中有植入錯誤觀念。到我認真反思為富者應具備的能力時，我真的認為銷售技巧和投資知識非常重要，

其實每一個人也需要作銷售，包括是向股東或潛在投資者解說的CEO，以及是提出論點和協議的大律師，本質上也是銷售。所以愈快掌握和深入研究當中技巧對將來致富之路會更為輕鬆。

最後，我花了二天時間讀完80後千萬富翁，在此我鼓勵其他人。龔成老師所說的並不是提供股票號碼，而是確實地，有系統地說明致富的潛則規和在正常書本中學不到的論財知識，所以我非常推薦這書。也希望在不久之將來可以和老師好好交流一下。謝謝你。

你的追隨者

龔成老師︰

多謝你的支持！其實我希望將正確投資理念，和一些過往經驗和方法，跟大眾分享。

希望為一班有理想，但未找到方法的人，提供一條可參考的道路。

同時，也為一班對投資理財有誤解，因而到處碰壁的朋友，引領佢地重回正軌。

成個財富增值之路，要透過不斷學習，令自己保持進步，才可以令我們走得更高，更遠。

其實當我寫書、教班時，我除左想賺錢外，同錯會一定想「怎樣貢獻到社會」，這是一個好大的核心，我相信只要這個大方I向正確，所做的事就正確，而錢就會進來。保持努力，加油~

------------------------------------------------

Q21604：

老師，你好呀。最近岩岩睇完你講樓市既書，

有一章講到地區性。我想問最近有好多新樓盤既位置都係新開發。

我想問問老師點睇屯門掃管芴一帶既新樓盤。

呢一區會唔會受惠到屯赤公路，駁去港珠澳大橋。
發展潛力大唔大呀？好唔好係果區上車

龔成老師︰

屯門是大型的住宅區，商業活動少。而且地理位置上，較遠離市區，因此樓價與市區有距離。

但隨屯門港鐵通車，屯門區交通會較以前便利。屯赤公路，可能都會係一個利好因素。

但始終屯門跟市區有一定隔離，而掃管笏雖在屯門﹐但隔離港鐵站較遠，未能明顯受惠。

因此，掃管笏升值潛力係有，但唔會話好高。因為所有利好因素都反映左，預期掃管笏配套，未來都唔會有好大提升。

------------------------------------------------

Q21605：

想請教，我五十歲，看了你的幾本著作！先想學買股票！

（我份工六十歲要退休，我只剩十年時間有收入去投資！）我應該用月供買邊D股票？

（我每月得4000可運用）手中儲蓄有18萬（但唔係太咁動用)？謝！

龔成老師︰

以你50歲的年齡計，其實已開始為退休做準備。你離退休尚有10年，只要好好把握，都可以做到一個合理增值效果。

但財富增長同時，我地不能過於進取。因此，你可以投資「平穩增值股」+「收息股」。

現時的$18萬，暫時只能動用$7-10萬，因為大市唔算平，你要分注投資，同時留下大約一半資金，等大跌市時入平貨，作長線投資。

當然你覺得自己風險承受力唔高，你保留多一點現金，都係可以。但就會令你財富增值效率，會慢左少少。

月供股票方面，你可以先用$1500供盈富（2800）和供2隻收息股(各$750)。餘下$1000就儲起，同樣等大跌市機會。

但就隨著年齡增加，你要慢慢增加收息股比例。到退休時，收息股佔組合100%。因為你到時，需要透過收息股的現金流(即係股息)，去支持你退休後日常開支。

以下是一些適合你的選擇，你可以從中參考下。

收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

------------------------------------------------

Q21606：

你好，想請教你一些意見。我今年47歲單身，同家人同住公屋，自己有銀行儲蓄大約39萬，股票大約11萬，MPF大約55萬。

想自己搬出來住有私人空間，買樓但又唔想全部銀行儲蓄用晒，唔知好唔好租樓 。

又諗過海外買樓會平啲，再放租出去，再在香港租樓。
你有什麼意見？我頗煩惱。

謝謝！

龔成老師︰

如果置業後，會令到你資金儲備盡用，再無閒錢去買優質股，去保持投資增值，係唔理想。

至於租樓，會令你可投資資金減少，減低左財富增值能力。如非必要，我都唔建議咁做。

當然你可以用買海外樓收租，再租香港樓的方法，去平衡個支出。

但你必需對海外樓投資，有全面的認知，才好實行。我地投資的其中一個關鍵，是你有多認識這項目，「不認識就不投資」，如果你真的已了解當地的物業市場、租務市場、法例、經濟發展，那可說是過了第一關。

土地是有限資源，所以長期一定上升，但你都要分析這地方的長期土地供應。另外就是匯價如何，就算物業有穩定租金，以及樓價上升，但若然匯價不穩，都會對你的投資造成打擊，這方面不能忽視，你應該了解當地貨幣過去的變化，以及將來的強弱分析。

若你不懂，就不要去投資了。

以你47歲，要開始慢慢為退休做準備。在財富增值上，你可以集中係優質股身上。投資目標，可以用「平穩增值股」為主。

現時的$39萬，建議動用多$5-10萬，因為大市唔算平，你要分注投資，同時留下約一半資金。長線投資。

如果你每月有閒錢可以儲，你可以做埋月供股票，供「平穩增值股」。比例上都係用一半，餘下儲起，等大跌市機會。

------------------------------------------------

Q21607：

龔sir, 我是一位50歲嘅未婚女士，有男友但未有結婚打算，現獨居在與父親合資的自住物業。

2008年以198萬買入，市值約750萬，按揭尚餘107萬還清，每月用$6,600供樓。

我現時喺政府做合約職員（今年內可能轉制成為公務員），月入5萬，每年約滿後有一筆約滿酬金，佔全年收入15%，收入算穩定。

做呢份工之前一直不懂投資，亦沒有太多儲蓄。入職5年後到現在儲到約55萬現金，另有30萬股票，同埋下年就供完嘅基金投資保險（現值約24萬）。

股票資產分佈如下：
388 (100股）@$362.7
823（571股）@$78.9
1211 (517股）@$168
1810 (1200股）@$27.3

2800（1774股）@$26.8
6618（100股）@$165
9988（107股）@$250.5

每月扣除按揭供款，所有開支和供養父母的費用後，每月大約儲到$15,000現金。

早前follow你嘅post得到啟發，亦都很認同價值投資法，所以用其中$5,000月供2800和823至上述數量，供咗3年左右直到去年因某些原因停咗月供。

現有數個問題希望你指點一下：

1. 根據現時嘅工作狀況，我預算65歲退休，希望用餘下嘅工作年期可以盡快儲到更多錢做退休儲備。如恢復月供股票應該怎樣分佈較適合我？

2. 你對我現時嘅股票組合有什麼評價？由於有啲股票於較高位買入,現時股價回落，是否應繼續持有抑或應趁低吸納更多？

3. 現時嘅資產應怎樣配置才有機會達到每月$30000現金收入嘅退休目標？

4. 明年供完嘅基金投資保險，到時應全數提取作其他投資，抑或繼續存放滾存比較適合？

感謝你嘅耐性及期待你嘅回覆。謝謝。

龔成老師︰

1) 以你的年齡，其實要開始為退休做準備，但同時，財富仍有增長力（但不是進取），因此，你可以投資「平穩增值股」+「收息股」。

現時的$110萬(連同將贖回24萬基金)，可動用多20-30萬，因為大市唔算平，你要分注投資。同時留下一半資金，等大跌市出現，用來買平貨，作長線投資。

月供方面，你可以供「平穩增值股」+「收息股」。每月先用$8000供款，餘下$7000就儲起，同樣用來等大跌市機會。

如果你風險承受力較高，又想進取D，可以較集中係「平穩增值股」。相反，你較保守，可以較集中係「收息股」。

但你要留意，隨著年齡增加，要慢慢增加收息股的比例。到退休時，收息股應佔100%。

平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、平安(2318)。

收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

緊記，月供係一個長線計劃，唔好供下停下。咁樣會影響到平均價格風險的效果，會對你造成不利。

2) 你組合的股票，都係有質素。除左京東健康（6618）真係買入價偏貴外，其他都唔係太貴，算係貴左少少。

部份投資，雖然帳面上有虧損，但由於企業係有質素。長線佢地價值，都會慢慢提升，所以你長線持有就可以。

盈富(2800)和領展(0823)，未來再有明顯回調，你可以考慮加注。

但其他持股，因為風險較高，以你年紀不應持有太多。故只建議你持有現貨，不要再加注了。

3) 由於你自住問題已解決，也算持有一物業。故未來增值上，都係集中係優質股，令成個財富組合更平衡。

如果你希望退休後，每月有3萬蚊現金流，以股息率6%計，你需要本金600萬。

我假設投資回報有8%（連股息再投資），你每月投資$15000 + 現有110萬資產，15年後大約會增值至830萬，故這樣安排相信很大機會達至你的財務目標。

4) 你要睇佢扣除費用後，回報係多少。如果佢整體係優於大市，而風險又唔算過高，你可以考慮繼續存放滾存。

否則，你就按以上計劃。將贖回資金，分注咁慢慢投入「平穩增值股」和「收息股」中。

------------------------------------------------

Q21608：

龔sir，感謝感謝，你之前的回覆得好詳細好用心，老公說很有參考價值，我一直都想供盈富。但考量澳門銀行手續費問題所以未實行，聽您說完更安心了。

我真的要盡快決定投入同開始草貨了。

我老公說：

1.上堂時您提出的‘佐丹奴、粵海投資、大快活、六福‘，當時係優質股，依家隔左咁多年還值得投資嗎？想您俾點點意見，因他說這幾隻文中冇提到。

2.佢見組合內沒有內銀股，如滙豐，這些股票適合繼續持有嗎？

3.科技ETF市面上還有幾隻，是否因為呢隻手續費平D所以選呢隻？

4. 另外是關於我自己的，當時藍月亮發行抽新股時，我抽中左一手，那時睇中它是獨市生意及大陸龍頭，所以冇放，在$13蚊多時更入多了一手，現在這情況你認為適唔適合溝貨或繼續持有？

5. 之前我幾心儀想入手必瘦站，5蚊既時候吾敢入貨吾識睇位，最終沒有持有，必瘦站您認為之後喺邊個位我可以入手？

感謝感謝。
————
我近日開始去看股票勝經，但現在我既level睇會卡住唔太明白，老公說睇左再上您既堂效果會更好。如果老公再上多一次堂，有沒有優惠?

我們2個都會一起上，因有他在我應該會更好學習。

龔成老師︰

1)以上4隻依然係有質素，你投資係無問題。佐丹奴(0709)主要係收息，增長力不高，唔係咁適合你年紀。

粵海投資(0270)和大快活(0052)則平穏增長+股息。而增長力，會係六福(0590)較高，這3隻你們都可以投資。

現時都在合理區，可分注。

2) 大型內銀股和匯控(0005)都有投資價值，但由於已經好大隻，未來增長力唔會高，主要係收息。

以你年紀，應以增長為主，這類收息股就唔係咁適合你。

3) 安碩恒生科技(3067)每年收費和追蹤誤差，都係幾隻當中較低，暫時睇會係較好選擇。

但你要留意，由於幾隻恒生科技ETF都係初上市，追蹤誤差只能作參考，實際誤差未必一樣。

4) 藍月亮（6993）有質素的。

佢有「中國P&G」之稱，成立於1992年，擁有衣物清潔護理、個人清潔護理和家居清潔護理三大系列共73個品種的產品。

佢係中國洗衣液有龍頭地位，加上毛利率高，賺錢能力強。睇翻佢之前的資料，以零售額計算，藍月亮在洗衣液市場、濃縮洗衣液市場及洗手液市場的市佔率均為第一，分別為24%、28%、17%。

整體有質素與發展力，若持貨佔你組合不高，長線持有就可以。

近期雖然回左唔少，但都只算係合理區頂，唔建議現時加注。最好回多1,2成，才考慮。

5) 必瘦站（1830）長遠有發展，本身有一定的質素。

睇翻之前的疫情，佢身處的行業受影響，但佢的現金流及財務數據都唔算差，這點可以想象到，當正常的經營環境，佢的生意一定唔錯。

加上佢的野心愈來愈大，本身有一定的技術，同時不斷將香港的業務模式複製到其他海外地區，我見佢加強了發展其他地方，因此發展不差。

這股有長線投資價值。

業績前計佢$4是合理區頂，業績後股價升左好多，雖然我之前好大機會會調高佢合理價值，不過，現價都有少少貴。

所以，如果無貨，又真係好想入。你可考慮回少少，先小注，然後等跌多d先正式分注投資。

6. 上堂前，你先睇左股票勝經，的確係有助吸收課堂知識。但唔明都唔緊要，到時課堂都會再仔細解釋，當中的概念。

如果你基礎不足，可以上多一次基礎班，同時當你地2人一同上，可以有互動作用，增加了學習的進度，打好基礎後，再上進階。

你重讀初班，可以比個優惠價你，你whatsapp 55457212我同事講翻。

------------------------------------------------

Q21609：

阿sir 我25歲，係疫情低下 3月頭我決定祼辭左一份我覺得毫無進升和學到野既工作！

我自知呢份工如同書入面星期一捱 想等星期五，毫無激情，繼續向呢個公司只係浪費時間（我覺得時間好寶貴）我已經考慮半年，

但身邊朋友同事都勸我騎牛搵馬，都唔太認同我辭職，話呢個時勢有咁既工已經算好，但最尾諗左半年決定辭 因為我唔知前面會點 但我知總會接觸新環境新事物

而且想趁冇負擔年齡試多啲 至少收入冇呢份工高 但我辭左好肯定都有兼職收入 經過兩個月一直好積極揾全職 一邊睇書 一邊兼職 奈何疫情下難揾全職

開始質疑自己夠竟係未岩同焦慮呢兩日睇左書阿sir 本書 覺得完全觀念同我想法一樣！令我更加相信自己冇揀錯，得到肯定！

因為我覺得我花更多時間黎睇理財知識 運動 學野是值得的！多謝阿sir !

龔成老師︰

其實，我地做決定，一定係睇長線。

好多人一直安於現狀，唔肯試下離開舒適圈，就永遠只能停留係現時階段。

恭喜你，能突破自己舒適圈。你才25歲，還很年輕，應該把握這個負擔較少的年紀，去作出不同的嘗試。

現時你就要好好計劃將來，到底自已未來10年、20年目標係點樣，想自己變成一個點樣架人。點做，才會一步步接近你想的人生。

你現時把握未有全職工作的時間，去學習、做運動，努力投資在自己身上，這個態度係非常正確。

相信你將來，一定可以找到理想的人生。

------------------------------------------------

Q21610：

龔SIR 你好~本人是投資倍升股課程學生，剛上了第一課，感謝你在課堂上釐清了一些錯誤的投資觀念。本人今年35歲，通常會每儲蓄到一筆錢就會買股票投資, 增值財富。

這個投資組合有沒有問題? 還是需要再執一執?

00388 $478.6 @200-
0003 $14 @3707-
0005 $33.617 @ 1200-
02202 $27.3 @200-
03988 $2.4 @3000-
09988 234.8 @100

另外，知道澳門政府在珠海哪邊建立一個新街坊項目，在橫琴哪邊建立一個屬於澳門的新區。（橫琴「澳門新街坊」項目）

位置鄰近澳門關口, 在此發展中的新區對面亦有新樓盤開賣, 你認為值不值得投資?樓價大約為33平方, 值港幣110 萬左右, 租大約每月可收4000-5000元。

龔成老師：

你上述持有的，基本上都有質素，不算差，但可以優化組合。

你年齡35歲，其實可以著重增值多少少，所以，你持有的煤氣（0003）、匯豐（0005）、中行（3988）只是收息類別，不應佔你組合比例太多。

至於港交所（0388）及阿里（9988）無問題。而萬科企業（2202）負債較高，不宜持有太多。

你在之後的財富配置，可以投資平穩增長股+潛力股。

至於澳門新街坊，我無仔細研究在，但我自己對橫琴是正面的，這地方是中央其中一個重點發展地區，加上澳門地方細，一定要想方法延伸經濟圈。

同時，中央會對澳門的信任度會大過香港，所以會加強澳門周邊地區發展。

當然，你最好實地考察下先，上述只是簡單意見。

------------------------------------------------

Q21611：

老師，我亦很仰慕股神巴菲特，所以我亦有投資brk.b，持有1個半月已有7.5%回報，再加上佢財報穩健，令我更有信心持有。

不過，畢竟他年時已高，有佢隨時退休令股價下跌的隱憂，亦不清楚接任的人會不會處理伯克希爾如股神一樣穩妥。

你又對此有什麼看法？

龔成老師︰

其實巴郡已經係一間大型企業，雖然股神巴菲特真的退下來，很難找一個有咁高能力的人取代。

但由於企業已係好成熟，就算係其他人掌舵，相信大方向唔會差好遠。

此股依然係具有投資價值，值得你長線持有，

不過，回報率點都會比過往略減，但仍然是不差的。

------------------------------------------------

Q21612：

想問老師，一年只買1/2隻股票，是否次次都是賺錢。

如果我這樣做，我心理上會害怕。如果睇錯，整年的儲蓄，會就此蝕了。

暫時都想分散投資，如果不夠資本，可能3067/2833/QQQ/VOO/ARKK便算

請問我的想法是否可行？

此外，你為何會有信心，果1/2隻會是眾多公司中，成長最快的一兩間？

龔成老師︰

唔係，就算股神巴菲特投資，都唔會隻隻都係賺錢，佢都試過不少失敗投資。

但由於佢成個組合做得好，整體成績都有唔錯表現，這就是我成日強調，組合要優質和平衡的原因。

其實只要你有一定經驗，細心分析，加上係合理價或以下，才買入優質股，長線虧損的機會，唔會好高。

至於點解有信心，個1,2隻係眾多公司中，成長最快的一兩間。除左累積不少分析經驗外，我都分析左好多企業，從中作比較，才會知道個別企業，優質度如何。

你5隻股票都有質素，3067/VOO/ARKK係潛力型股票，波動性較大。如果你係偏年長、投資經驗較少、或者風險承受力唔高，就不要持有太多。

現時大市在合理區，記得資金唔好用盡，要留部份等大跌市，才出手。

------------------------------------------------

Q21613：

老師，有評論話如果完美醫療（1830）無左過期套票，必瘦站會蝕錢，可信嗎？

龔成老師︰

完美醫療（1830），這個所謂過期套票，其實是指一些客人已付費，但顧客於合約服務期內並無使用服務確認的收益。

預繳收入其實在不少行業都存在，是一種對企業甚為有利的營運模式，利用折扣價向客戶出售預繳套票，藉此推廣纖體美容服務，多年來令集團收入提升不少。

而這些過期套票，大致維持佔每年入帳之套票2-3成。至於出現原因，可以係客人計錯數買多左，或者好多其他因素，無人知。

但這部份一直多年恆常地存在，佔收入比重每年都大致相同。基本上，佢已經算係恆常收入一部份。

這部份收益，無話好定唔好。但我地計算企業盈利時，考慮這部份收益，才算正常。因為佢真係成個生意模式中，其中一個收入部份。

其實，你試從顧客的角度去想想，當你買產品時，你不會假設自己不會用，而最終總會有一部分客無用，有部分客只用到部分。

正如你食一個飯，都會食剩，如果將食剩的%要退錢，要按比例從收入扣除，相信好多食店都會虧損。

這些「用不到」「食剩」，其實是產品收入的一部分，所以，做生意不可能強行將「過期套票」數目折去的。

------------------------------------------------

Q21614：

龔sir你好，今年33歲。早兩年賣左樓，賣咗樓之後大概有5,000,000現金，現在跟屋企人租緊樓，全家五人，爸爸媽媽啱啱退休，我同老公同細佬做嘢

大家都係搵萬幾蚊，每個月租金$29500，屋企人覺得都係買返樓好啲，自己都有買下股票，手上持有3690，3993，6969，6618，291，都係短炒為主

因為都想幫補租金，每年要供三份合共大約120,000保險，3年前供的，包括一份基金（$50000每年），基金已經供咗3年可以隨時停供

一份儲蓄（$50000每年）另外一份危疾（$26000每年），想你俾啲意見我，啲錢點樣可以運用同埋投資得好啲,可以40歲達致財務自由

龔成老師：

你地首先要決定，是否買翻買，如果買樓，就要預留部分資金，然後餘下投資增值。

如果唔買樓，就可全部用作增值。

如果現時完全無物業，我會傾向買基本的自住樓，但就作高成數按，餘下資金投資增值。

如果想40歲財務自由，你可以投資
平穩增長股：潛力股
7：3
（如果你投資實力較強，可增加潛力股比例）

好好利用7年時間，去進行財富增值，利用股票投資。現時現金，計好多少會買樓，餘下的「可長線投資金」，現時已可分注買入（當然要有一定的現金留低）。

另外，唔好再短炒。至於現時持有的其他理財產品，都可以繼續進行。

------------------------------------------------

Q21615：

老師你好....自己依家嘅方向好迷惘，自己有工作，但債項實在太多，呢個時候我真係唔知點做好.....

我好想去重新好好開始，已經31歲嘅我仲係一事無成，我依家應該要點做好....

龔成老師︰

我明白你此刻，可能有太多不如意事情，同時間圍繞在你身邊，令你好氣餒和無奈。

但其實所有問題，都總會有解決方法。在好多問題圍繞自己時，我地要努力去保持一個正面心態。有系統地，將問題逐一拆解。

首先，我相信你最大問題，係債務方面。你先集中去清理這部份，優先處理利息較高債項。或者可以將較高息債務，先轉到較低貸款利息的地方。

我地先減少你長線還債負擔，再慢慢被這些負債消滅。

至於，人生目標，每個人都不同。唔一定要做到家財萬貫，才算係事業有成。

你要清楚知道，5年、10年、甚至20年後，希望自己變成點。之後，再想下，點樣先可以一步步咁達成。

記住，這個世界無問題係解決唔到。只要你定好計劃，按部就班咁實行，問題總會解決。而你人生目標，都總會達到。

------------------------------------------------

Q21616：

Hi 龔sir! 我年紀2X, 每月都儲到幾千蚊加上本身有少少閒錢，所以想由月供股票開始投資。

我有3個問題希望龔sir可以指點一下。

第一：就係月供股票嘅回報。我傾向長期投資，但係唔知道長期係幾長。簡單啲講月供股應該供幾耐(5年10年?)，或者供到有幾多手先夠? 雖然成本平均咗，但回報係咪同時會平均(拉低)咗?

如果股價合適係咪直接(或儲夠錢)買一手長渣好啲?

第二：我諗緊月個股票包括0027 0293 0823 3690

前三隻我覺得喺疫情之下已經係低谷，未來幾年都會升。3690就潛力而言，現時股價係咪屬於合理/便宜區域，或者bottom line (市場消化完美團負面消息)?

第三：揀月供股嚟講成交量應唔應該係重要考量? 抑或其他因素比容易賣碎股更重要?

謝謝

龔成老師︰

1) 如果你定平貴能力不足，一手手買，會有買貴貨風險。月供可以平衡價格波動風險，所以較適合你這類初學者。

月供係一個長線計劃，月供最少維持3年，並持有這些股票5年以上，才會有較理想效果。當然，更理想係一直做，一直維持累積優質股(優質資產)的習慣，對你會最有利。

用月供方法，成本會拉平均左，但同時間，平均回報都會有機會被拖低左。

所以，若你用估值方法，直接1手手係合理區，甚至平宜水平才入貨，的確回報一般會比用月供儲貨為高。

但問題係，用估值方法去入貨，對投資知識要求較高。初學者我唔建議咁做，反而會增大你買貴貨的風險。

記住，我地投資唔係想賺到盡。而係在合理風險下，賺取最大回報。

2) 國泰（0293）的質素只是一般。其中一個風險，是油價，睇翻佢過往多年，油價對佢成本影響好大，令佢盈利十分波動，就算佢利用對沖，都唔係好成功，反而試過因對沖而蝕大錢。

另外，航空業對經濟週期較敏感，收入不穩，同時唔算係一個好賺錢的行業，因此這股的質素只是一般，此股不宜作為月供目標。

其餘3隻，用來月供都可以，美團點評（3690）有潛力的，但不確定性都高，只可小注月供。

3) 成交量，參考價值好低。有無碎股，其實都唔重要。

你要記住，我地係長線持有一些優質股，而唔係短炒。我地著眼點，應該係企業質素、行業發展、財務狀況等。

我建議你，可以睇我寫架"80後百萬富翁"、"財務自由行"和"股票勝經"，都適合初學者，可以令你更深入了解成個財富增值的理念。

------------------------------------------------

Q21617：

龔成老師你好！本人（31歲）與丈夫（34歲）共月入7萬，育有1子，現金大約有50萬，持有股票價值約12萬，依家持有友邦、盈富、小米、安碩恆生科技，買左一層公屋自住。

仲有3年供完，市值大約300萬。依家每月大概有3萬蚊流動資金可以用黎投資。

想問下老師，如果想係10年內做到每月被動收入有3萬，可唔可行？應該點先可以做到？

龔成老師︰

由於你已有自住物業，因此在你之後的財富配置上，不用太急增持物業部分，可以利用股票去進行增值，而現時自住公屋，基本上狀態不用有特別變動。過3年供樓完成後，你可以再加大力度投資股票，令財富進一步增值。

要做到每月有3萬蚊現金流這個目標，以股息率6%計，你需要本金600萬。

以你31歲，可以選擇一些「平穩增值股」+「潛力股」作投資目標。現有持股，都係有質素，適合用來增值，可長線持有。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，即先用$15000月供，另一半就先儲起架策略。

如果你投資經驗唔算高，可以先集中係平穏增長股，潛力股只小注(少於3成)。若你有一定投資經驗﹐可以加大潛力股比重，最多佔組合3-5成，視乎你投資經驗多寡和了解這些股票程度而定。

現時大市只是合理區，你現有50萬資金可以先投入多10-20萬，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

我假設投資回報有10%（連股息再投資），你每月投資$30000 + 現有資產62萬(現+股票)，10年後大約會增值至720萬，故這樣安排相信很大機會達至你的財務目標。

------------------------------------------------

Q21618：

老師你好，小弟現年31歲手上有20萬資金想入市投資股票。

最近有留意0002, 0003, 0012, 2800, 6823想從中開始投資，不過有部分股黎緊都會除淨，理解到一般情況下股價係除淨日後會回調，

如果我目標係長線持有以上股票的話，請問我係唔係應該等除淨日後先開始入市？多謝老師指教。

龔成老師︰

你對除淨派息的運作，似乎有少少誤解。

如果你要收到股息，必需在「除淨日」前一天，依然持有股票。「除淨日」，其實就是用來確認那些股東收到這權益的日子。等到「除淨日」當天才買，派息就唔會有你份。

「除淨日」那天，股價就會扣除派息部份，例如原來股價$10，派息$1。那麼「除淨日」就會將股價，從$10下調至$9，以反映派息動作。

所以，假設不受其他市場因素影響，單係除淨這個因素，除淨日股價下跌，係正常。

而「派息日」，就係這班合資格股東，正式收到股息的日子。

由於「除淨日」股價會下跌。而下跌比重同收到息係一樣，所以只係左手交右手動作。因此，你唔會在此期間前後做買/沽貨，而出現任何著數。

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時31歲去計，應先集中做好增值部份。你所講的股票都有質素﹐但中電(0002)、香港電訊(6823)增長力較弱，主要係收下息，不建議你持有太多。

策略上，你可以較集中投資在「平穏增長股」和「潛力股」上。如果你覺得自己經驗尚淺，想先保守少少，用中電(0002)、香港電訊(6823)都係可以。

現時大市只在合理水平，你20萬可以先用一半，以分注形式，慢慢入貨。餘下的另一半現金，我地就等機會，當大市出現較大回調，就加大力度掃貨，然後作長線投資。

由於「潛力股」係需要一定經驗，你投資經驗較淺，建議你先小注，大約佔組合3成左右。此期間，你要努力提高投資知識，到有一定水平時，你可以慢慢將佢調升至5成比重。

------------------------------------------------

Q21619：

你好，我由2020年中開始到今年5月在不同的日子持有的股票比例：

00941 10,000股
02628 10,000股
00003 10,000股
03988 5000股
700 100股

另有現金200,000

以上比例會唔會太不平均，比例太重放在0941？

呢幾隻都係股息很不錯的股票我才選上的，但其實這個想法是否錯誤？求解答！謝謝！

龔成老師︰

你現時持有的股票，大體上都有質素，可以長線持有。

但中國人壽(2628)增長力，近年明顯係弱左，你可以考慮沽少少，換去其他優質股。

另外，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

你現時中國移動(0941)，佔成個組合一半，明顯係嚴重偏高。你必需慢慢減持部份，換至其他優質股，去平衡風險。

至於以上股票是否適合你，要睇你年紀、經驗和風險承受能力。

好以騰訊(0700)這類潛力股，增長潛力大，但同時間波動性都較高。比較適合年青、有經驗的投資者。否則，不宜持有太多。

至於中國移動(0941)、中行(3988)這類收息股，增長力好弱，但勝在有穏定的派息，風險較細。適合較年長、或者投資取態好保守架人士。

而中國人壽(2628)和煤氣(0003)算係2者只間，有一定增長力之餘，都有一定派息，風險度相對係中等。

你現時組合，算係一個偏向保守的平穏增長 + 收息組合。

若係較接近退休之年的人士，或者投資好保守，想以收息為主。941和3988係合適，但其餘幾隻，就未必太適合。

以下是一些優質收息股，給你參考。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

------------------------------------------------

Q21620：

小妹我已經35歲，工作13年，穩定，但無特破，對炒樓有興趣，想做地產經紀，但家庭有負擔，兩難，但我這年齡又是出去衝的最後機會，點算？

我想做有錢人，但呢刻又好多限制！
同埋我唔夠勇氣呀！

龔成老師︰

要成為有錢人，就不能安於現狀，要有勇氣去突破，你已經存在了第一個條件，因為你已懂得對不理想的現象不滿。

地產代理是成為有錢人的5大方法之一，建立銷售團隊之路。

但從事這條路，不確定性一定比你現時工作高。而且開頭時，收入有機會比你現有工作少。如你選擇好這條路，就要有一定決心，一直走行去。

否則，好大機會會令你成個事業發展，變得進退失據，你要明白這一點。

較好的方法，就是你一邊做現時的工作，一邊尋找一些可以「不辭工但又能創富」的模式（因為我從你的文字，已見到你勇氣不足，如果這刻不足，只能暫時留在原工作先）。

例如你利用投資，好好滾大資金。

然後，到了資金有一定的水平時，你在負擔上較安心，而你又有足夠的勇氣，到時才跳出去。

同時，你可以在這段時間，結識一下地產代理，多了解佢地的工作。（甚至做兼職，當然，你要了解現時正職是否容許，或當中風險，所以你自己衡量，如果真的做兼職，當見到自己這方面真的有發展時，先全力去做。加油啦！

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q20901-Q20920）

Q20901：

老師:我係你學生，想問62號估值，我用你其中一個所教的方法計，我首先自行推算一做EPS(2.7),5年平均數自行調整

老慮PE(7.394-12.2)5年取3年中位數，合理價範圍:19.96-32.94。

那麼，現價是否平?
我有什麼因素考慮忽略?

龔成老師：

載通（0062）都質素中等，始終業務穩定，以及現金流強，不過，又不是最好高質，因為過往無乜加價能力，加上無法轉嫁油價等成本因素，營運模式並非最理想。

首每，每股盈利數字你比得太高，佢2016-2019年的每股盈利：
2.040、3.110、1.680、1.380

平均數為$2

而我並無計算2020度的數字，因為這年度有大量特殊收入。如果你想計算，就可以自行將特殊收入數扣除，以調整後的盈利去計算。

如果用$2去計，而我用翻你的PE（7.394-12.2）

這股的估值就是（$14.8-$24.4），可以理解為現時「合理區中下部」。

若果考慮近年疫情潛在風險、油價因經濟好轉而上升的可能，你預現價只是合理區中間。

------------------------------------------------

Q20902：

師傅，我從書本得知你在2.5元入1830，我知道1830在去年三月曾跌到1元，我想問時機問題，你是在見1元前才買（即是去年三月前）還是見咗一元底部後（去年三月後）才買

雖然大家都是二元入，但心理壓力會好唔同，所以我想了解你買入的timing ，請指教可以嗎？

龔成老師：

必瘦站（1830），我在$1.X-$3，都有買，我不會一次過入貨的，通常會有分注投資模式，我入貨期持績了一年。

你在分析時，最重要睇長期，絕對不要被買入價影響在心理因素，我從來都唔會這樣影響，因為我最初買入後，股價是持績下跌的，但我十分開心，因為我從不理這刻股價，我只睇這企業3年後的價值。

首先，這股有質素，另外，當時疫情影響行業，如果你記得我上堂講過，我好強調我地等機會：「企業短期不利令股價下跌，而長期質素無變」，這就是我地的機會。

------------------------------------------------

Q20903：

龔sir我有個問題想問..

上次inbox你提及到2800同3067都係可入貨水平
現時我有30萬左右Mpf喺宏利，揀嘅係恒指基金，而宏利
網頁講 佢嘅恒指基金現時係盈富基金

如果我打算月供盈富基金，應該揀中銀好，還是喺宏利供佢嘅恒指基金好? 收費或效果有分別嗎?

現時我2800同3067都未有貨，應該入邊隻先?

另外雖然我10年前開始買股票，但其實對投資冇咩認識，應該睇你邊本書先? 感謝！

龔成老師：

原理是一樣的，但強積會的彈性較低，因為要到多年才用得，因此，你自行月供盈富（2800）會比較好。

現時盈富在合理區，你已經可以開始月供或分注投資。至於3067，現時在合理區頂部，你小注慢慢分注去買入，可以。

記住，我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

你可首先睇：

《80後百萬富翁》
《股票勝經》
《財務自由行》

之後再睇其他。

書本在三聯、商務、誠品都有得賣。由於部分書在一些書店已斷，所以若你見唔到，問下職員就得（又或向職員訂都可以）。

以下是我的12本書：

《80後百萬富翁》（第9版）
《80後2百萬富翁》（第4版）
《80後3百萬富翁》（第2版）
《財務自由行》（第7版）
《大富翁致富藍圖》（第5版）
《50優質潛力股》（第4版）
《50穩健收息股》（第3版）
《50值博倍升股》（第3版）
《股票勝經》（第3版）
《選股勝經》（第2版）
《年報勝經》（第2版）
《5年買樓4部曲》（第2版）

------------------------------------------------

Q20904：

老師，小米26入左少少，幾錢可再入或再溝貨
港交所由高位588跌到依家了。。。我無止賺。

心理上確實不開心，現在壞消息一籮籮。。。
應該點算

依家放雖然賺十萬，但比起588賺少成十萬，唉。好唔開心。應該點調節心態。。。。 雖然話長線，但588放左賺左開心錢先，然後搵位先再入更開心。

龔成老師：

你的投資觀念，好錯誤！

你同9成散戶一樣，以為自己可以最高位賣出，但就連股神都不會這樣做。

另外，你要調整心理因素，你這樣想，長遠會好影響你的投資。

我當年做銀行，見好多客在$15買入港交所，之前創當時歷史新高$20，就是95%的客，都同你一樣想法（高位賣出，賺左開心錢先，然後搵位先再入更開心），所以，佢地在$20賣晒！

之後，當港交所升上$400，佢地賺少左好多好多。

有時你會見到賣出會有得賺，有時長線會有較多賺。而根據統計，長線是賺得較多的。

至於小米（1810）近期的不利消息，都是短期的。不用太擔心。

強烈建議你提高投資知識。

上述兩股根本完全無問題，你不要再同9成散戶一樣想法了！

------------------------------------------------

Q20905：

龔Sir1799，2308如何？1799，18入！2308，2入！要止蝕嗎？

龔成老師：

新特能源（1799）係太陽能級多晶硅生產商和光伏項目承包商，主要從事中國光伏產業上游和下游環節的業務。

佢除左多晶硅生產外，亦從事電力銷售（透過自有燃煤發電廠供應電力多晶硅生產之用，並銷售多餘電力予當地電網）；工程建設承包（根據ＥＰＣ、ＰＣ或ＢＴ承包模式經營，為光伏及風電項目提供能源解決方案，包括工程設計、諮詢、建設、調試及運維）；逆變器生產（用於光伏項目的一項關鍵部件）及光伏硅片及組件生產。

其實過往的生意與盈利唔算好突出，同埋有D波動，只是近期新能源有炒作，佢都炒起左。實質支持係咪好大，未知。但建議保守少少，暫時這股投資值博率不高。

如果持貨多，建議減持。

研祥智能（2308）主要從事研究、開發、製造及分銷特種計算機產品以及買賣電子產品及配件；以及銷售發展物業。

企業無獨特性，規模細，賺錢能力不高。投資價值唔算高。

你可以等佢上翻多少少，有反彈時減持。

------------------------------------------------

Q20906：

老師你好啊，我嘅持倉比例中佔最重係2018年買入嘅工商銀行($6.5 40000股），今日好開心見到佢終於升番52周高（$5.6） 收咗3年派息，扣減番就蝕緊5千幾。

想請教老師我要點去決定？等出末期業績派息再決定？定減持倉比例？定係繼續持有當收息股？
感謝老師

龔成老師：

最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

如果你年紀唔大，其實工行（1398）未必最適合你，你應該賣出部分或全部，轉其他。

轉到較有增長力的股票。所以，你這刻先分析自己的年齡及風險承受程度，設計適合你的配置比例，之後就可決定是否賣這股。之後就決定將資金轉買甚麼。

------------------------------------------------

Q20907：

老師您好，我現時 24歲，月入 22K，現金 33萬，持有以下股票：

0173 嘉華國際 10000股 @ $3.94
1113 長實集團 500股 @ $40.05
1270 朗廷 20000股 @ $1.01
1833 平安好醫生 200股 @ $119

目標係平穩增長，同埋儲錢讀書，想請教投資意見
唔該晒

龔成老師：

上述股票，都有質素，但你過份集中在地產相關類別，這會出現集中風險。建議你慢慢調整翻整個組合，唔好太集中。

整體上，能產生平穩增長效果，只是行業集中情況要調整。

------------------------------------------------

Q20908：

龔成老師，Follow 了你的專頁幾個月，終於的起心肝去理財，請教你的意見。

本人今年33歲

2020年下半年才有正職, 月入18K, 額外兼職收入現時$9K左右, 過多幾個月會得返5K.

現時每月儲蓄$10K, 會打算轉工增加月薪入息 , 同時有短期目標想係2-3年內儲到50-60萬, 當然都想將來有財富滾存

本身自己都有股票債券外幣等投資, 但股票蝕多過賺
現金:10萬左右
債券:2萬
外幣:7-8萬

1. 想問問需要沽出現時股票?
買入價
6 500股 68.5
66 500股 34.5
1398 2000股 3.98
1162 8000股 1.00
1177 3000股 8.75
1810 800股 27.3

2. 保險理財儲蓄對我是否可行?

3. 月供股票是否適合我? 大約月供多少? 那些股會是增長股（盈富基金）?
謝謝你的指導。

龔成老師：

1）我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

現時你的持股，基本上都有質素的，瑩嵐集團（1162）業務一般般，企業無獨特性，賺錢能力不高，賣出較好。

至於其他，其實以你的年齡，唔需要持有太多收息股如電能（0006）、工行（1398），這些可以轉平穩增長股如盈富（2800）。

如果你過往投資成績不佳，其實最簡單的投資方法，就是月供ETF，如盈富、恆生科指ETF（3067），長期儲貨，已有不差的回報。

2）要睇你本身是那一種類型，如果你比較保守，而你本身在財富組合中，無乜防守性資產，投資儲蓄型的保險，可以助你這部分的建立。

當我地進行理財，攻守兼備是應該的，問題是比例如何，以及這個人風險度如果。

如果是純保險，你可以留翻更多資金，用作自己投資增值，「攻」方面的效果會更好。

因此，好睇你自己的風險度，自己的投資能力，以及你本身、你想的財富配置。

3）對於本身投資實力不高，未掌握企業估值與買賣時機的投資者來說，月供股票是不差的投資方法。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。做月供股票，每月$8000。

你可以考慮盈富（2800）$4000。

另外再加2隻（每隻$2000）：銀娛（0027）、恆基（0012）、港鐵（0066）、中銀香港（2388）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：安碩恆生科技ETF（3067）、阿里（9988）、騰訊（0700）、港交所（0388）、舜宇光學（2382）、小米（1810）、ＧＸ中國電車基金（2845）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

如果你不懂股，就集中供盈富$8000。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q20909：

龔成老師你好，9922 我係$31.8入左，個市哩排好差，個人都慌左

以市價黎講，我應該再要加注嗎？
定係斬倉？謝謝您

龔成老師：

九毛九（9922）係內地中式快時尚餐飲品牌管理及運營者，佢係內地所有中式快時尚餐飲餐廳收入中排名第三，於華南地區則排名第一。

可見，在業務上、品牌上、市佔率上都不差。現時運營269間餐廳，以及管理41間加盟餐廳，而「九毛九」及「太二」為佢的兩個主力品牌。

睇翻佢的財務數據，唔差的。但你的買入價貴，現價仍略貴，所以暫時唔好加注住。

你原有貨可持有，除非出現大跌，否則，唔好加注。相信短期股價仍波動，但這股不差，有得守。

------------------------------------------------

Q20910：

Hello老師，請問點睇3800，1258，1183同2158
4隻我都有，但蝕緊，呢4隻值唔值得長期持有？

龔成老師：

這4股，都是風險類股，你預股價大上大落，風險高，唔建議持尢太多。

保利協鑫能源（3800）業務不穩，質素中等。不過不是無增長，是有危有機類。

佢主要為光伏行業製造多晶硅及硅片；銷售電力；開發、投資、管理及營運光伏項目。

市場炒緊佢前景，但當中存有不確定性，股價大上大落，佢的確可能會大升，但同樣可以大跌，無得估，這炒作不少，現時值博率未算好高。

如果真的想投資，小小注好了。

中國有色礦業（1258）主要係非洲贊比亞經營銅開採、選礦、濕法冶煉、火法冶煉及銷售業務，主要產品為銅精礦、粗銅及陰極銅，以及粗銅冶煉工序中產生的副產品硫酸。

業務不是無質素的，見佢生意保持向上，不過，盈利就有點波動，有時盈利會大跌超過一半，相信好受成本及國際資源價值影響，反映佢有少少被動，企業質素未算最高。

過往股價上落大，要留意風險。企業質素算是中等，現價合理區中上部，都有長線投資價值，但就唔值得持有太多。

澳能建設（1183）以過往的業務來睇，只是中等，業務發展不算強，整體不差但又未算好好。

佢最近宣布，同德國創新科技企業Ｕｂｉｔｒｉｃｉｔｙ達成戰略合作，於大灣區拓展大灣區開發、製造及分銷電動汽車充電業務。

睇翻澳能果邊，主席表示，目標係兩年內在港澳大灣區安裝500至1000個充電裝置。

企業發展力都有，但早前股價其實有點超前反映。就算近期回落，這刻投資值博率未算高，如睇好，小小注好了。

醫渡科技（2158）有潛力的。可長線。

提供基於大數據和人工智能（AI）技術的醫療解決方案。集團主要向醫療行業的主要參與者（如醫院、製藥、生物技術及醫療設備公司、研究機構、保險公司、醫生和患者以及監管機構及政策制定者）提供服務和合作。

佢平台有一定擴張性，長遠受惠更多醫療保健客戶使用平台。不過公司客戶過度集中，以及依賴公共部門。

但佢依然係在燒銀紙狀態，係一個扣分架地方。整體算係有質素，但要注意風險，投資時唔建議大注。

------------------------------------------------

Q20911：

你好！請問可以介紹下現價合理並且可長線持有的股票企業嗎？

有不少可以長線持有
但股值太高了

龔成老師：

你可考慮考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

現價仍在合理區。

如果你想潛力度高D，就考慮安碩恆生科技ETF（3067），但就要明白波動性比上述會高左，同時風險大左，你要自己平衡。現價合理區頂，要小心控制注碼。

現時大市波動，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q20912：

啊sir 你好！ 我係股票班學生，上緊堂，想請教股票配置既問題。現時25歲，有穩定收入，每月月供中生製藥$500，小米$500，阿里巴巴$1000，盈富$1000；$3000美股，主要投資ARKK, TESLA，APPLE。每月儲蓄$4000將來入市。

現手持：

234股長江基建 （平均買入價$41.05）
225股港鐵（$42.87）
569股越秀（$5.2）
53股中國平安（$86.58）
600股中生製藥（$7.29）

86股香港電訊（$11.59）
52股比亞迪（$52）
429股盈富（$26.08）
14股阿里巴巴（$249.1）
511股小米（$25.23）

請問我既組合會否太散？有無邊隻股需要賣出？或者太集中新經濟股風險好大？多謝你！

龔成老師：

你現時持有，以及月供的，都是有質素的，不過就有少少散。

一個成熟組金（$100萬以上），組合大約10-15隻股票會較好。

其實，組合散都有風險分散作用，但最大的問題，是較難管理。我地買入股票等於買企業，你持有該股，就要持續去檢視分析這些企業，每次出業績，或有重大消息出，你都要了解與分析。如果股數目太多，你根本無法每一隻都了解。

由於上述都有質素，因此無特別要盡快賣出。以你的年齡，可以先減一些增長力較慢的，例如長建（1038）、香港電訊（6823）。

其他問題就不太。

當你上完整個課程，會明白我地買入股票前要有好多野分析，要了解好多資料，而你之後投資時，每一次都要更仔細分析先下決定。

------------------------------------------------

Q20913：

龔成老師，本人38 歲， 老婆35歲， 育有兩女， 一個兩歲半， 一個未夠一個月，收入穩定，家庭月入約13萬

現每月可儲約6-7 萬， 剛於去年11月購入三房單位， 借貸528萬， 分30年還

現有股票1810, 9618, 1691, 1211, 2382, 8083 合共約80萬(全部蟹貨)

自己已為子女及家人買好晒醫療保險， 另有一份價值14萬的基金(10年前買落), 年金一份， 現金約200萬，擺晒係高息戶口。

自從睇左你的facebook專業一年， 明白到長線投資的重要性， 現想開始月供股票9988($2000) , 388($2000), 27($2000), 823($2000), 3067($2000), 2800($2000)

目標15年1000萬 你認為可行ma ? 我投資金額還需增加嗎 ?

如需增加， 可月供其他哪些股票 ?? 謝謝你的時間及意見。

龔成老師：

其實你現時持有，不是無質素的，可能你集中在貴的價位買入，相信日後你用月供股票，或分注投資模式進行，會更適合你。

另外，你持有較集中在新經濟或近一年的熱炒類，你要注意風險。我地建立一個平衡組合都好重要。

至於中國有贊（8083）集團主要於中國從事經營電商業務及支付服務業務，近年業務發展快速，生意增長力，不過，現時估值高，業務變化較，整體有好大的不確定性。加上佢過往在核數師報告出現過「保留意見」，盤數可能有古怪，雖然已是數年前的事，但都會扣分。

佢不是無潛力，但風險較高，這刻投資值博率不高，這股唔建議太大注。

至於月供股票都是有質素，以及一個平衡的組合，可以進行。

如果增加，建議你加大盈富（2800）金額至$6000，另外可以加入舜宇（2382）、中生（1177）去月供各$2000。

假設你每月投資$20000，持續15年，回報率為10%一年，15年預期滾存到$760萬。

如果你想滾存至$1000萬，你每月要同時儲多$1萬去等投資機會，在適當價值買入優質股，長線投資。

當然，你地的儲蓄數，加大每月月供金額，都是一個可行的方法。

------------------------------------------------

Q20914：

你好龔成老師，Follow你一段時間 見到你好用心解答每一位學生 希望我都可以有機會請教你

我爸爸57歲 現收入約每月兩萬 只有現金約40萬 有從來沒有投資沒有醫療保險 手上有一份月供$2000儲蓄保險 供了五年

最近感覺自己快要退休 先開始想想投資呢回事

前排佢用積蓄入手左以下股票

02160 3000股 （$18.42入）
01024 500股 （$411入300股，$332入200股）
00981 2000股（26.65入）

因為高位入，賬面蝕緊好多，佢年紀較高，我都比較擔心風險，想請問黎緊應如何部署？另外如果想風險低點，佢應該月供股票，還是月供基金較好？

希望可以得到老師你的解答
謝謝

龔成老師：

如果已57並差不多退休，現時的策略就是建立一個退休的組合，當中要穩陣，唔好有太高風險，同時有現金流。

坦白講，現時佢持有的3隻股，都是潛力股類別，風險較高，並不適合佢的情況，要睇位賣出。

至於佢現時的現金，以及每月能儲到的資金，要集中持有收息類工具。

佢可以將這$40萬，分成3部分。

第一部分投資收息股，你可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

第二，你亦可投資銀行低風險類的產品，你可自行到銀行了解下，總之是「低風險，持續現金流」的。

第三，持有現金，除了可做定期外，現金亦可以為你的後盾，以備不時之選。同時，若投資市場大跌，你可以在這時買到更多的收息股，股息率會進一步上升。

你可以將$40萬資金，平衡地分配在上述的項目上，對佢來說是最好平衡風險，同時有穩定的現金流。

------------------------------------------------

Q20915：

你好，我而家手上有呢啲股...

66、1211、1810、2800、3690、6823

係大致都係得一至兩手...而比亞迪就月供緊1000...而盈富同港鐵都係月供到一手無再供...

美團我就係$98嗰陣入左2手...其餘約一手..現階段黎我係咪可以照keep住先....因為我見美國嗰邊息口上都有少少影響同埋調整得好多....希望你可以俾少少意見我...多謝

另外早前18.1入左2手3067係咪都可以擺住先？
多謝

龔成老師：

現時你持有的股票，都是有質素，可長線持有的。

你唔需要理中短期股市波動，集中長期持有就得，這都是優質股，長線對你的回報是最高，股價中短期總有上落，平常心就得。

至於3067，你持友就得。

基本上，整個組合都無問題，有質素。

------------------------------------------------

Q20916：

老師，呢排個市不斷回，我知老師會講我地係買間公司睇好佢發展。

但好多評論都講緊個市咁回法會影響到公司既估值，一旦重估，好多企業價值都會打個折，令到股價好難上得番以往咁令仔。 想問下老師點睇

龔成老師：

短期股價，受買賣供求及市場情緒影響，短期，可以同企業無關。

至於長期，就一定會回歸翻企業價值。

如果你持有的股，現時處好貴的水平，在理論上，股價會慢慢向下回歸到合理價。因此，你可以賣出部分，餘下就長線。

不過，當一些好優質的股，企業價值不斷向上，例如港交所（0388）、騰訊（0700），其實一直持有最好，你見佢地過往股價都升左100倍，如果經常抱你上述心態，就好難賺到這類大錢。

------------------------------------------------

Q20917：

你好，老師，我想買一隻股票(around 2萬）比我個bb 當每年當生日禮物，到佢大個用。可以每5/10年再換其他股票。有沒有好建議？謝謝

龔成老師：

最正路是買入ETF，因為組合可以平衡風險，當中股票不差，以及有平穩增長力。

一般來說，盈富（2800）是最適合。

如果你可承受風險，希望回報高D，就可考慮恆生科指ETF（3067）。

------------------------------------------------

Q20918：

龔sir你好，係朋友先排介紹我睇你既文章，覺得學到好多野，因此想請教下～

本人40歲，每月儲蓄大概一萬元，有十萬元閒置既儲蓄。以前完全無投資～

但因為而家有左兩個小朋友想開始學習，請問有無好介紹同埋應該點投資？萬分感謝並祝新年快樂

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

以你40歲的年齡，可以投資平穩壤長型股票，如果你過一段時間，有一定的投資知識及經驗，就加入潛力股。

你現時的$10萬，可以考慮動用$3萬-$5萬，投資平穩增長股。至於每月的$1萬，可動用巷中$7000去做月供股票，這是最簡單的方法。

平穩增長類：你可以考慮盈富（2800）$2000。

另外再加1、2隻（每隻$1500）：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

------------------------------------------------

Q20919：

師傅好，想問下366前景點睇，見佢主要經營業務係水泥，7成都係賣番比越南當地，冇咩負債，現價入岩數嗎？

不過佢5係龍頭，占成個越南水泥生產1%

龔成老師：

陸氏集團(越南)（0366）主要從事製造及銷售水泥、物業投資、物業發展、銷售電子產品及酒店業務。

近年中美貿戰，加上中國成本增加，部分企業考慮將生產基地轉移至東南亞地區，由中國轉到越南，的確有這情況。

但見佢業績，就無乜增長力，反映佢無把握到上述所講情況，未能對佢有明顯利好影響。

業務是平穩的，這股收息都可以，但就唔好對股價有太大期望，現價合理。

------------------------------------------------

Q20920：

老師你好

2月份高追了
1211@262
500股

2269@112
1000股

[email protected]
2500股

另外琴日入了
[email protected]
6000股

明白要睇企業價值，但1211同2269買入後不停跌，已冇資金再溝貨，老師想問下中長線有機會去返買入價嗎

呢半年炒炒賣賣，賺了10幾萬，但而家似乎要回吐了，老師我就係想快d賺多d本金，想5年內有100萬，而家明白短炒冇用

要分散投資同長期持有，黎緊會開始月供股票，但上面幾隻股票唔知應該點步署，係未要止蝕了
2269都跌到唔停

龔成老師：

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

你要改變炒炒賣賣的行為，因為你所賺的，最後一定會輸翻，我之前做了10年銀行同證券行，見大部分輸錢的客，就是短炒的一群！這是我10年見到的情況，這是行內的秘密，根本大家都知短炒者一定輸，但業界一定唔會講！

個個都想在短期盡快滾大本金，但10個卻有9個輸，如果你想長遠繼續輸，你就一直用短炒方法啦！

上述股票，根本無問題，只是你投資策略有問題，以及買入價的問題！全部買入價都貴！現價都略貴！

同埋我一聽你「已冇資金再溝貨」已知你投資觀念錯晒。

現時的持股，如果你持貨不過多，上述股其實可以持有的。但如太多，上翻D最好減部分。

藥明生物（2269）其實有質素，但你預上落會較大，唔建議持有太多。

希望你日後可以提高股票知識，這是唯一能令你長遠能真正財富增值的方法。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。