一年前嘅聖誕節,我叫大家唔好借錢去「投資」、要買就直接買幣,唔好買礦機、咩礦場合約。
之後我俾人問候我娘親。
今日,我只係想問句:我有冇講錯?
係架,現代社會的確識人好過識字,但前提係你要帶眼識人。有啲人真係擺到明呃你嘅,會咁好死開心share條財路俾你?
我想講嘅係,呢個世界係有好人,前提係你的利益不會損害我的既得與潛在利益。例如我分享食譜、分享遊記,我唔會因爲你跟我煮完爆汁蕃茄後而我無蕃茄食、我亦唔會因爲你睇完《空谷之王》而我睇唔到幅畫。在這個前提下,我是很樂意分享的。但你叫我分享平時去邊度俾仔溝、有邊啲餐廳係我的私人飯堂,我真係唔會公開講。親愛的,一個和尚有水食,兩個和尚沒水食,何況是出名大食,並且奉行 #肥腸不流別人田 嘅人妻先生?
咳... 說遠了,簡單點來說,就是明知掘礦呢件事,越多人掘,自己就會越難掘到,時間和成本都會上升,咁點解要推薦俾三九唔識七嘅你,讓你加入一齊掘?難道世上有如此不孝之人,有著數唔叫自己父母親戚兄弟姊妹、以至街口睇住自己大嘅三姑去訓身投資,而要先益街外人?呢啲金融騙子成日都炫富,佢又有冇按埋自己啲其他投資去訓身?叫人借錢去投資嗰個,自己都冇訓身,你望下都知咩事了吧?
唔止呢啲虛幻幣合約,一切「必中賭波料」、「財經貼士」亦然。點解咁著數,佢自己唔訓身,要俾個機會一個陌生人「一齊財務自由」?
話說,人妻先生其實都儲緊錢買地買農場(雖然仲好遙遠),但在外國買農場,蝕嘅機率遠高於賺嘅機率,所以我唔會叫親戚朋友一齊去買、更唔會叫讀者陪我「碌爆卡都去馬」。但點解都仲要買?因為我覺得世界越來越亂,終有一日會打仗,我唔怕俾人捉去做慰安佬(?!),但我好怕肚餓,亦都好怕食來路不明的食物,如果有個農場,起碼衰極都有野食吧?
如果要搵人一齊「投資」,我看唯一的可能性,係策略投資人。即係例如你有幾十年調理農務嘅經驗,我好歡迎你加入一齊種菊花;你夠大隻做開紮鐵可以幫手擔擔抬抬起屋,都可以諗下;如果你本尊係擅長養牛養馬,一副旺夫益子丁財兩旺相,我啲牛可以生到成棚都係,我都可以考慮。
但如果你淨係諗住帶舊錢入黎,然後乜都唔駛做,就可以有人幫你管理,你日日有「被動收入」,你呢啲人真係遲早俾人動,你都係去買返嗰啲虛幻幣合約啦。你話本身friend底都仲可以考慮,否則點解我要辛苦做一輪俾你從我身上不勞而獲?做生意賺錢重要,但理念更重要,我唔想搞兩年又要煩退股,啲股進進出出太多,(軍心)鬆晒就麻煩。全世界係得Facebook先咁好,成日都有「project」益大家,不問學歷又不問背景、又不管你是否理念一致,淨係要你投資現金,咩都唔駛你煩,完全係「港豬式佛系投資」— 緣份到了,就會血本無歸。
#仲可以養牛養馬
#養多幾隻鴨
#歐洲啲鴨好正架
#得閒騎下馬又騎下鴨
#從此就過著酒池肉林幸福快樂的生活了
#我梗係唔會同你講個plan啦
#肥腸不流別人田
#點解我要幫你財務自由
#家陣好熟咩
#有正嘅鴨我孝敬街口呀三姑先唔好
#三叔表示.......
Search