［讀者投票決定未來！！］
《 仆街！一唔小心跌咗入戀愛育成嘅世界。》（2）
---------------------
答案係B！嚟啦！
我一伸手就擋住佢：「閘住！唔洗！你彈開！你同我講喺邊得嫁喇！」
佢似乎畀我咁大嘅反應嚇親。
月巴同學：「做...做咩事啊？」
我重覆一次我啱啱講嘅說話：「你、同、我、講、間、學、校、喺、邊、就、得、嫁、喇。」
月巴同學聽我咁樣講完，佢兩眼慢慢咁滲出眼淚。佢哽咽咁話：「三上同學，我...我係...係咪做...做錯咗...咗啲咩...啊？」
我望實佢，無回答到佢嘅說話。佢視線開始避開我嘅胸部，咁我當然要教訓吓依個資本主義社會之下將女性物化嘅咸濕仔。
我：「你做咩望我個胸啊死肥仔！」
講出嚟我都打兩個冷震。不過佢塊臉開始由紅轉青，把口仲疾過頭先。
我：「我嚟問下路你都扯晒旗？！係咪精蟲上腦？！係咪隻抽撩交打啊！吓？！」
月巴同學好感度-50
好似玩大咗，不過唔緊要啦。月巴同學眼角滲出淚水，佢抽泣一下，手抺向眼角。
我兇佢咁話：「死肥仔！講啦！你間學校喺邊啊？！」
月巴同學好感度-50
月巴慢慢遞起手，指住無遠處嘅一間學校。
我跟住佢嘅方向一指：「哦！啫係最近依間啦吓話？！」
佢臉無血色，無乜反應。但我唔會因為咁放軟手腳，喂，無啦啦要畀個男人昅JJ (雖然我依家無JJ)，感覺實在十分之差。
「我問你嘢啊！係咪啊？」我一隻手指向間學校，另一隻手拍住佢塊臉，逐隻逐隻字、一下一下咁打住問：「答我啦。」月巴同學額角冒汗，不發一語。我緊係食住上：「我問你啊！」
月巴：「係...係啊...」
我上下打量佢一番，拎起佢手上面部N3DS望咗兩眼，一手抽起佢條耳筒線，望望佢對名牌耳筒，佢應該有返少少錢。佢叫到我咁，就急急腳轉身想逃離現場，我叫住佢。
我指住佢大叫：「企喺到！你唔好走住！」
點知佢真係會企喺到無再走。依隻小嘍囉咁多肥肉咁多裝，試問我又點可以放過唔打。
我：「依家唔洗賠啊！？」
「賠...？」月巴同學撐大眼。
「係啊！望望望。」我睥實佢咁鬧，差啲唔記得咗我係女人。我一巴車落肥仔塊臉到：「死豬兜！榜啦！唔好望！」
月巴終於忍唔住大喊出嚟。
我：「交晒你身上啲錢出嚟！」
金錢 +5000
物品：N3DS x 1,名牌耳筒 x1
袋好啲嘢，我拍拍月巴膊頭，然後我揚一下手打發咗佢：「得嫁喇，無你嘅事，你可以走。」
佢向住我，望住我手上面嘅嘢，依依不捨咁倒後行咗幾步，一路喊，一路跑走。我心諗，吖，原來做靚女有咁多着數。
突然間，周圍嘅一切停晒落嚟。我視線中間彈出一個框框。
習得技能： 敲詐勒索
善惡值： --
估唔到隻Game仲會有技能同善惡值依啲嘢。我諗遲啲會提議埋隻Game出戰鬥系統同寵物功能，等我可以收隻月巴做寵物。買隻寵物返嚟換錢再買隻寵物，到時就利疊利疊利疊利...不過依啲係後話，依家返學要緊。
我禁走咗個框框。而就係我又行多兩步之際，畫面又彈咗另一個框框出嚟——
宅毒自衛隊 陣營友好度-500
我求求其其就禁走咗佢，無理會到。
無幾耐我就去到學校。學校門口寫住「川崎國立高中」幾隻大字。由操場到校門每一個人都向住同一方向，走入我眼前依幢幾層高嘅白色校舍裏面。
而依個時候我先發覺，原來依個時候我連自己係幾多年級邊一班都唔知，就戇戇居居一個人企咗喺一堆又一堆來來往往嘅人中間。
點算呢點算呢。
無遠處有個二三十歲左右嘅姐姐，著住件灰色西裝褸、入面著住件白色恤衫、緊身窄西裝短裙、一對黑絲，佢一步一步咁行到過嚟。
「你係三上同學？」姐姐側住頭向我問。
我視線掃向佢條短裙，搞到我不禁臉紅、冒汗、心跳加速。
我：「啊，係。」
話就話我無啦啦變咗做三上悠亞，但係我心裏面仲係一個雄糾糾嘅男子漢大丈夫，依點不容置疑。
我一個九十度鞠躬：「唔知我有咩幫到你呢！」
佢戴住副眼鏡，紥咗個髻，鼻尖尖臉紅紅咁，比我年紀唔係大好多，我諗只係啱啱畢業開始教書無耐，仲係個新人老師。
姐姐：「我係依到嘅老師啊...我係...」
——請輸入角色名稱。
我：「蒼井老師你好。」
蒼井老師：「三上同學，我哋之前見過嫁喇？你唔記得喇咩？」
我呆咗一陣。
A) 唔記得喇...
B) 唔知喺邊見過呢？
C) Err…
嘻！我禁！
我：「我以前睇日本動作電影見過你嫁喇。」
蒼井老師：「吓，你講咩啊？」
我：「哈哈，你好似一個名星。」
蒼井老師佢笑笑咁話：「哈哈哈又邊係呢，三上同學你真係識講嘢啊。」
蒼井老師好感度+20
連女角都有好感度，感覺大地在我腳下。等我三上悠亞攻略晒你哋返嚟一個一個咁玩弄啦！哈哈哈哈哈！
隱藏任務開啟：全女角攻略
乜愛情育成唔係就係要追晒啲女仔返嚟嫁咩？個任務有幾隱藏啊？
蒼井老師好瞇起眼，佢好開心咁笑住同我講：「三上同學，好少女同學會好似你咁講嘢嫁喎，哈哈。」
A) 詢問關於這間學校的女生
B) 詢問關於蒼井老師認得我的來由
我視線向下掃，去到佢嘅胸部，佢套西裝褸都蓋唔住佢嘅身材，微微咁隆起咗。我心意已決，決定「詢問關於蒼井老師」。
我：「蒼井老師你好正啊。」
蒼井老師乾咳一吓：「三上同學你講嘢唔可以咁無嚟正經嫁。」
蒼井老師好感度 +20
太易玩了！
我：「蒼井老師你多唔多男仔追啊？」
蒼井老師佢豎起隻手指，佢鬧我：「三上同學你做咩係咁問我私人嘅事啊吓？！」
蒼井老師好感度 +20
真係其實唔難。
蒼井老師佢無再畀我講落去，佢接住我話：「之前你嚟我哋學校面試嗰陣啊，你唔記得喇？」
我瘋狂點頭：「哦！我記喇！哈哈！係喎！」
其實我咩都唔記得。
蒼井老師：「真係橋，我係你今年嘅班主任，陣間我帶上去課室，我就介紹你畀佢哋認識啦。」
我：「好吖，唔該晒啊蒼井老師。」
然後佢就帶住我，行上樓梯，一連上咗幾層樓。沿途我哋講過吓依間學校嘅一啲小事，我哋可以去邊到打波啊、做運動啊，仲有去邊到可以食嘢咁樣。仲有一啲校規。
蒼井老師：「唔可以上後山玩嫁，知唔知啊？成日都好多同學仔偷偷地上去玩，我哋都會嚴厲執行校規，唔會手軟嫁！」
我微微鞠咗個躬：「係嘅蒼井老師！」
蒼井老師瞇起眼笑：「三上同學真係乖。」
蒼井老師好感度+20
最後我哋嚟到課室門口，門口上塊牌寫住「2年3組」四隻大字。蒼井老師佢叫我喺課室門口外面等佢一陣，等佢叫我入去嘅時候，我再入去。
蒼井老師：「各位早晨。」
眾同學：「蒼井老師早晨！」
蒼井老師：「大家放假有無好好咁溫習啊？」
眾同學：「無！！」
蒼井老師：「都估到你哋嫁喇。」
課室一片歡樂，睇嚟裏面班人應該會幾好玩。
蒼井老師：「今年我哋有個新插班生，你哋要好好照顧佢啊，知唔知道？」
眾同學：「知道~~」
蒼井老師向門外面嗌：「三上同學你入嚟喇。」
我敞開道門，走入去，企到蒼井老師嘅隔離。
眾男：「嘩~~」
我微微一笑。
眾男：「嘩！」
2年3組的男生 好感度+50
所以話，女人生得靚真係可以橫行霸道。
蒼井老師企到我後面，兩隻手搭住我膊頭，將我擰向一班同學仔嘅方向。佢哋一個二個整齊咁坐晒喺啲學校嘅木面鐵架書枱前面，靜靜咁等我出聲講嘢。
蒼井老師喺我耳邊叫我：「三上同學，你自我介紹吓吖。」
請決定自我介紹的風格——
A) 霸氣外露
B) 迷人放電
C) 溫文有禮
-----------------
嘩嘩😮= A) 霸氣外露
心心❤= B) 迷人放電
哈哈😂= C) 溫文有禮
請選擇！
#一唔小心跌咗入戀愛育成嘅世界
#記得正評引伏
