《你呀，只係常餐嚟㗎咋！幾時都有得食，晚市都係貴兩蚊咋！》
如果人生係充滿比喻，畀人比喻做「常餐」又係好事定壞事？
阿強尋日就同我呻，話老闆一句半講笑嘅說話令佢隱隱作痛。
不過職場上，人哋係老闆，你隱隱作痛，結果都係忍辱負重，忍氣吞聲，即使忍無可忍。
而嗰一句就係
「你呀，常餐嚟㗎咋！幾時都有得食，晚市都係貴兩蚊咋！哈哈。」
常餐，好好嘅比喻。
每間茶記都有、接近任何時段都提供；易整、易食、
唔稀有亦唔使周圍搵，
難以令人深刻，都冇人會在乎。
同阿強一樣；同我都一樣；或者，同你都一樣。
可能你想辯護：「唔係架！我仲可以轉雞扒、牛扒、豬扒，甚至煎蛋、炒蛋同太陽蛋！我係好多變化架！」
但係一句「呢啲變化，邊個唔識呀？」
晚上10時20分，你被擊沉。
冇錯，變化都有值錢同唔值錢。
用蘇格蘭式燻松茸蘑菇、香檳浸魚子醬、白蘭地配白松露，呢啲就叫變化。
轉雞扒、牛扒，等於你喺Powerpoint轉隻Font咋。
冇人唔識，唔值得得戚。
你依然係常餐，你依然係垂手可得。
不過我同阿強講：「冇所謂。常餐咪常餐囉。」
「你係常餐我係常餐佢係常餐，分分鐘你老闆都係常餐。」
常餐有咩特別呀？
咪就係冇特別囉！
但呢個社會，有時就係咁冇特別架啦！
一間公司，頂盡咪得兩三件白松露，佢哋係難求，但同樣都冇咁大需求。
常餐唔同呀，
間間茶記都有售，個個食客都食過。
你唔係獨一無二，
但出路四方八面。
若然人生嘅舞台，注定唔係歐陸高級餐廳，
就安然地喺茶記發光發熱。
世界上，偉人少凡人多，但70億人類仍然可以活得好好。
即使係一份常餐，冇一個特定名字，
但努力落去，終有一日得到一句
「呢度啲常餐幾好㗎。」
係呀，你係幾好㗎。
Ig:cheungson88
*會慢慢Up嘢上去
