深度文之食柒個花蓮
話說我同陳都叫去遍台灣大大夜市(因為冇去勻細夜市所以不敢太牙刷)，但之前去花蓮HEA遊時，本來都係諗住膠遊下，影下偽文青相，吸收下日月精華，竟然俾我地發現花蓮原來收埋好多好野食，仲要係食完你會為左想翻兜而再買機票返去食。
但我地份人好NICE，有好野一定話俾大家知，唔會自私食，所以今次介紹左幾款堅正到離地的美食，食完再多謝我都未遲，由於小妹真心非食評家，所以D美食詞彙缺乏，大大有怪莫怪啦！去相！
1. 蔣記官材板＠自強夜市
話說其實台灣好多地方都有官材板食，但你食完呢個先知咩叫正，剩係出面長期不見龍尾不在話下，仲要好多款口味，有辣有唔辣任君選擇，想歎真D就當然揀唔辣啦，咬落第一啖，吊一聲，出面類似西多既皮超有口感，唔會一堆麵粉咁痴粒粒，超爽DER。
2. 妙不可言果汁@自強夜市
食完個板覺得少少口渴，隔離就有賣果汁，吊SET好架？一套服務唔係唔飲呀？但之不過頂！又要排長龍，好啦就試下你，叫左個芋泥牛奶，好飲到呢……妙不可言，不禁令你驚歎都係生果一個，榨汁機一部，點解可以咁離地的好飲？我冇老點，真心好飲，試下你就知，況且都係隔離順個便姐。
3. 炸蛋蔥油餅@復興街
炸蛋蔥油餅其實係花蓮必食，冇食過唔可以話自己去左花蓮，但花蓮的蔥油餅多到就好似洪瑞珍咁，都唔知邊間係真，等老娘教你啦，認住果條街唯一一個係藍色車仔既就係架啦，唔好傻豬豬食左第2間又走黎嗌媽媽話唔好食。呢樣野說穿了其實係蛋加蔥油餅，你心諗有咩特別？就係特別在於咁簡單都整到咁好食呀嘛！記得到時要嗌半熟蛋呀，咁樣D蛋汁先會食緊果時爆出來！
4. 五霸焦糖粉圓@中華路
其實數到最多野食並不是自強夜市，而係中華路果邊，但我今次並不是要介紹公正飽子，周家蒸餃果D行貨（當然我自己也有食，路過點都要捧下場睇下咩頭咩路既，但你見我冇介紹就知咩事啦）。入去呢間野食左個招牌刨冰，入口即溶等的廢話就不多說，最正係D粉圓超級軟Q，仲軟過我D筋呀點搞，食到阿陳牙都唔洗大力咬已吞得（因為佢有敏感牙齒sor LOL）。
5. 戴記扁食＠中華路
講到呢間，真心算係隱藏版美食，因為既唔係夜市中，又唔係花蓮市美食地圖中，加上地址比較偏僻，店面又舊舊地，見到都唔會主動行埋去，但我地嗌左一碗扁食（其實即係餃子，想知點解台灣叫扁食自行谷歌），平時老娘食開餃都係要點醋調味，但呢碗我竟然不需任何調味料食光光，就可見佢功力，一碗貌似清湯咁既底竟然有如此厚功夫，如果大家都想做深度遊客建議來食，周家蒸餃果D行過拮2粒就好（周家又躺著中槍）。
6. 蔡記豆花＠民國路
講明豆花實係食豆花啦，咁又錯，我地果次就叫左仙草奶凍同薏仁牛奶，佢既情況就好似沙嗲王唔係剩係食沙嗲一樣咁改錯名，佢最出名既不是豆花（雖然豆花迷也是可以一試），但黎得台灣，有邊個個肚唔係飽到頂晒出來都仲繼續塞，只求可試多1，2樣，所以識食就當然食招牌仙草奶凍同薏仁牛奶，至於有幾好食，其實我已詞窮，不過試完上面5樣的朋友如覺得我的推介都仲試得過，就不妨去埋呢個啦，因為我真係好少打食記，但我呢D人食完都覺真心大力推推的，難食有個限度既！
終於打完呢篇，第一次打到最尾hang機我真心喊出來，後來我用1分鐘重拾心情再打過，雖覺得第一篇應該好笑D，但照收貨先啦，資訊緊要D!
花蓮市美食地圖 在 花蓮旅人誌- 花蓮旅遊部落格Hualien Blog - Pinterest 的推薦與評價
Dec 29, 2014 - 「花蓮美食地圖」十年了～謝謝大家給的動力，這地圖會持續更新下去！（地圖範圍主要為花蓮市中心鬧區地段。） ... <看更多>