抗疫篇（二）
IG: @ally_blahblah
https://instagram.com/ally_blahblah?igshid=1jtemurbno3q7
太過自由？
民眾自私？
政府無能？
抑或政治考量？
荷蘭成新一輪疫情重災區，係咩原因導致？
到底係唔係太自由？
荷蘭其中一個核心價值，就係難能可貴嘅自由。喺一般情況下，當地嘅高度自由同包容使其成為「最快樂國度」之一。
抗疫篇（一）提到，呢種自由同包容並唔係得個講字，而係當地憲法保障人民應有嘅權利。荷蘭係最早將同性婚姻合法化嘅國家；另外吸食大麻同紅燈區等喺國際間較具爭議性嘅都係當地合法。
但正正因為如此，令到荷蘭政府抗之路比想像中難。荷蘭人習慣「挑戰權威」，對唔少政府政策都會有所質問。所以當政府想要有抗議政策，如規定聚會人數，執行力度弱，只能依賴市民「自覺」跟從政策。不過，抗議初期政府「開錯左個頭」，表示新冠肺炎同流感差唔多，又話「冇證據顯示戴口罩有用」，說法深入民心；到後期就算政府改口，「強烈建議」戴口罩，唔少民眾都唔願意跟從，認為有社交距離就足夠【註一】。慢半拍又天真地以為民眾會自覺嘅政府，最近先開始積極研究強制戴口罩嘅法例，恐怕要等一排先見到荷蘭人個個「勉為其難」戴口罩【註二】。
雖然市民對抗疫認知及做法不一，可貴嘅係包容度高，當地人甚少因為疫情而對華人有歧視行為。反觀英美德法等地有華人因疫情被冠上「病毒」壞名，甚至遭受攻擊，在荷華人相對安全的多。
民眾自私，定係社會問題？
抗疫及社交距離下，唔少行業大受打擊。餐飲、旅遊、健身美容、酒店業等，首當其衝。呢啲行業嘅人士自然對政府政策有所不滿。但另外有一批人，特別係二三十歲年輕人，有啲會覺得自己年輕力壯，所以「有本錢」，唔怕染病；有啲甚至私下表示想「多啲老人家過身」，原來係因為佢地覺得只要少左老年人口，樓價就會跌。只要你人在荷蘭，大概就會識人/有朋友嘅朋友講過類似嘅嘢。有人覺得係因為大家對整個新冠肺炎情況太震驚，所以有另類coping mechanism。到底係開玩笑定係真心話就不得而知。但反映出當地年輕人都面對住屋問題。疫情目前為止只令大城市租金下跌，但整體樓價波動不大；想樓價重創嘅年輕人恐怕失望而回。
抗疫暴露政府機構協調不足
抗疫初期，荷蘭政府低估疫情嚴重性，已經棋差一著。不過，犯同樣錯誤嘅唔單只係荷蘭，普遍歐洲都面對類似問題。西方國家一向對「戴口罩」不太重視；老實講，香港同鄰近亞洲地區都係經歷過沙士等先有現時防範意識。不過，一次疫情，好快就睇到歐洲各國應變速度，而荷蘭政府，咳咳，真係慢人大半拍（掩面）。連東歐國家，包括保加利亞、羅馬里亞等，一開始應變都比荷蘭快得多。初期冇經驗唔緊要，但足足有半年時間準備秋冬來臨。原本荷蘭有一段時間可以俾任何有病徵嘅市民檢驗，不過後來capacity不足。有傳媒報導，明明德國有大型檢驗設備，可供荷蘭合作使用，但荷蘭就以「語言不通」為由拒絕，寧願要荷蘭本土較細型、需時較長嘅實驗室【註三】。結果呢？檢驗人員同設備唔夠，阿姆斯特丹Schipol 機場只係搞左幾星期嘅自願檢驗計畫中止；（新）衛生部長Hugo de Jonge 仲要話係因為「太多冇病嘅人走去檢驗」⋯⋯大佬啊，嫌太得閒冇嘢好做咩⋯⋯
但係唔係真係單單一句政府無能就能解釋呢？
原來政個部門之間協調都好有關係。話說荷蘭衛生部長同 RIVM（Netherlands National Institute for Public Health，中譯 荷蘭國家公共衛生研究所）喺政府係獨立個體；RIVM轄下有一隊緊急應對小隊 Outbreak Management Team (OMT)，主要提供同公共衛生安全有關嘅「專業建議」，然後國會內閣會討論，指定應對方案【註四】。咁你知啦，國會入面嗰班係政客，唔係專家，指定政策除左有政治考量，都要聽「專家講」。偏偏，RIVM嘅傳染病控制中心主管Jaap van Dissel 認為「戴口罩冇用」、「錯誤戴口罩反而會令人容易感染」、「只要每個人都跟從規矩就冇問題」，唔少民眾都覺得佢過於樂觀，事實上就已經有唔少人冇遵從社交距離等措施【註五】（坊間關於 Van Dissel 嘅評語就⋯⋯大家不妨自己Google下）。
話說荷蘭明年大選，所以政府如何處理疫情會係選戰重要關鍵。總理Mark Rutte 及執政黨VVD 疫情初期得到民眾支持。但後繼無力，疫情急劇反彈，政個部門又準備不足。加上局部封城後，皇室又想去希臘度假，事前知情嘅Mark Rutte 承認考慮不周【註六】，無疑係喺失落嘅民望雪上加霜。
講到底，筆者認為荷蘭今鋪真係多得幾個「自以為是」嘅人唔少。唯有盡量留喺屋企唔出街。如抗議篇（一）所講，唔少大企業，包括筆者所在公司，早以行動表示對政府政策嘅不信任。行內人圍內傾計，有銀行已經叫員工有心裡準備要在家工作至起碼今年年底；有行家更話個別公司會WFH到2021年夏天。呢個時候，深深體會到，跟一間好嘅公司做嘢，安全好多啊！
抗疫篇(一）https://www.facebook.com/allyblahblah/photos/a.276193166080761/1267274203639314
【註一】https://www.dutchnews.nl/news/2020/10/despite-the-government-u-turn-the-dutch-are-still-unwilling-to-wear-masks/
【註二】https://www.dutchnews.nl/news/2020/10/why-is-there-a-legal-issue-with-facemasks-and-quarantine-fines/
【註三】https://www.youtube.com/watch?feature=youtu.be&v=JUx-kdbKQys&app=desktop
【註四】https://www.rivm.nl/en/novel-coronavirus-covid-19/omt
【註五】https://www.dutchnews.nl/news/2020/10/quarantine-rules-widely-ignored-survey-shows-as-new-infections-touch-8000/
【註六】君主制喺荷蘭日常運作中冇正式作用。但由總理嘅領導總務部負責皇室言行。 https://www.bbc.com/news/world-europe-54548633
