關於 薛耶治國家隊 ，我們在網路上蒐集到這些相關的討論、資訊與評價

《咎由自取的失分 抹煞前線的努力 車路士對修咸頓賽後分析》
.
由三分變一分，相信除左令一眾睇住直播既球迷氣憤之外，對場上經已付出足九十分鐘既球員黎講亦難掩一份失落，個別球員「自殺式」犯錯可以話埋下失分既伏線，亦同時抹煞左前線球員喺比分上既努力，其實哩啲學費都已經交左接近一季去到依加都仲交緊，身為主教練既林伯特需要負上不能推卸的責任。
.
繼續源用4231陣式，正選陣容上有佩利錫正式復出，令添姆雲拿可以回歸正箭頭位置，身後支援既亦繼續係夏弗斯，而蒙特就依然兼任左翼鋒角色，雙中場分別用左佐真奴配搭簡迪，至於四人防線就用上蘇馬同基斯甸臣為中堅組合，賽前傳出有小傷既捷維爾亦趕及復出同艾斯派古達擔任左右兩間，而門將就由基柏接替於國家隊訓練時受傷既文迪，堤亞高斯華就因倦勤而並無在賽事名單之中。
.
以結果論黎睇著眼點過份側重於個別球員既失誤而引致既失波，但其實今場波理應平均分為入球與失球兩部份黎睇，雖然最終都唔能夠全取三分，不過喺進攻層面上其實有唔少值得觀賞既看點可以分析，先講組織攻勢，過往車路士由後場開始組織主要都以短傳同地面戰為主，不過自捷維爾接任左閘正選後，好多時後場既波都會經由右閘到中堅再到佢腳下，而捷維爾既視野同能力可以省略左中場轉換直接將皮球傳上前線發動攻勢，比起中堅同樣以長傳方式唔同既地方係，哩位英格蘭左閘除左可以選擇向前傳上邊線之外，亦可以以拋物線方式彎入中路，變相令進攻套路更加多元化。
.
由於添姆雲拿偏好走向左路發展，多番見到佢成功接應到捷維爾既長傳，德國人回歸正前鋒後可以得到更大既活動活間，可以令佢專心於前線捕捉機會，而今場波兩個入球亦見得到添姆雲拿既個人質素，早前亦多次強調球迷們無需過份擔心佢會有步向莫拉達後塵既機會，因為兩者係截然不同風格類型既前鋒；至於喺佢身後既夏弗斯亦漸入佳境，繼續以前場多面手既角色串聯攻勢以及為隊友製造機會，更同雲拿一樣正式取得英超入球，而佐真奴亦終於「擦出」助攻。
.
略略講完組織同入波喺進攻層面上既野之後，就係時候到令人氣憤既失球部份，而喺哩部份之中亦可分為兩個範疇，除左場上球員既失誤之外，另一個位就係林伯特既安排同臨場部署上同樣都存在失誤，先講前者，睇返三個失波，除左最尾禾確特彈射命中隊友改變角度入網果球略有幸運成份之外，前兩球都係由於球員個人失誤所造成，先由夏弗斯於中後場區域推失波所致，當時睇到哩個畫面之後第一時間令人聯想起巴克利過往既犯錯，同樣地係喺接近哩個位置推失波，其實唔係唔比你向後推，但係喺哩個位推真係好危險，基本上一推失就等同伏左後面既隊友，哩方面夏弗斯就真係要交下學費。
.
至於第二球失波，亦係大眾球迷著眼同車迷們氣憤既一球失波，蘇馬回傳力度不足派出「醫院波」，同時基柏喺禁區內撲救存在猶豫，撲救失敗後雖然有基斯甸臣試圖解圍，但最終都被對手以半空門方式射入，如果單計責任的話，蘇馬同基柏兩者難辭其咎，前者犯錯後無嘗試起跑跟返轉對手彌補自己既失誤，返而覺得龍門應份地幫佢補鑊，至於基柏既心理狀態其實都已經打唔起，多次自我犯錯或被防線「放伏」到就連自信心都無埋，而其實喺哩球失誤之前兩者都經已出現過誤會畫面，當時蘇馬呼喝基柏出黎將皮球沒收，其實果下對手都唔算壓迫得蘇馬太西利，理應自己由能力轉身再組織過，而基柏本人都覺得無必要出龍，蘇馬幾時變左後防大佬連出龍都可以由佢叫？場外人都睇到兩者明顯存在心病，對一條防線黎講絕無半點得益。
.
最後就講到林伯特，要講既野亦唔會比球員少，先講防守佈置，佢都執教過左一季時間，球隊依然喺防守死球時存在明顯漏洞，今場波對手兩下死球時都能輕鬆地喺禁區頂位置施射，而哩個區域係並無任何藍衫球員進行防守，變相只要解圍不遠，對手就可以有空間輕鬆起腳，防守唔洗教都唔識教係兩件事黎，而林伯特好明顯係後者；令一個問題就係臨場調動，其實球隊喺下半場已經開始失去壓倒性優勢，尤其係喺六十分鐘打後形勢已經交到修咸頓為主導，但感覺上林伯特好似無乜目標咁，換完薛耶治入黎就等完場咁，去到下一個換人已經係要數到八十六分鐘既占士，果時其實未被對手扳平已經係好彩。
.
你要縮既，其實理應六七十分鐘要開始換人縮，如果你要谷多粒既，就早啲換艾巴咸入黎跑下，唔係去到九十分鐘先換佢入黎踩下草咁，你臨完場前先換佢入黎請問有咩用？感覺上林伯特喺球隊仲係些微領先3:2果時係完全無方向，完全無任何為球隊再鞏固形勢既目標；最後一樣想講既就係喺戰術安排上，喺國際賽前對水晶宮時都有睇到同講過，果場波球隊既中前場除左做迫搶之外，亦好肯落腳去制止對手製造攻勢，講緊既係對手連半場都未過到時已經被打斷，果時明顯見到球隊係有刻意咁做，但今場波完全見唔返哩樣野，中前場肯落腳既就只有簡迪一個，其餘人就淨係企位迫之後就再無其他跟進動作，都講過咁做既話變相令對手好輕易咁透過短傳就破解到你哩招，無系統性既迫搶只係掛羊皮賣狗肉，亦無助為後場減壓。
.
學費唔係唔想交，而係交到有冇意義，都經過左一季多既時間，陣容上亦都有補充同提升，但內容上依然都好似維持原狀咁，失既波都依然繼續都係咁，根本上只係等邊位球員犯錯，而林伯特就好似永遠立於不敗之地咁既樣，如果係咁的話前線入幾多球，後面都真係同你失番咁多球。
.
《岩睇既比個Like支持我地啊！》
作者 : BluexLion車迷手記
-------------------------------
同場加映《令車迷們「瘋狂」的一個暑假 淺談藍軍大灑金錢的一個轉會窗 – 後場篇》
https://bit.ly/2T6r2YE
.
#Chelsea #車路士 #修咸頓 #英超
https://s.fanpiece.com/nnT7mUh

［我睇過2-7，你睇過未？你真係睇過？］

其實而家少睇波，國家隊仲會睇晒，但德甲已少睇，甚至歐聯都唔係成日睇，分組賽早場就可能睇，尾場都多數唔睇。但神推鬼撞，10月1號3點未訓，就睇咗陣熱刺對拜仁，其實係開住去做其他嘢，點知越睇越過癮（明顯係飛機），就睇到完場。

咁明顯，係因為拜仁雖然先落後，但好快已經追平，上半場已經反先。我先咁有心機睇到尾。換著上半場輸四球我就熄機訓覺啦，唔使返工咩。我都係香港人啫

拜仁初段受制於熱刺嘅前場瘋狂迫搶，踢到失晒魂。熱刺似乎係十分有心部署，技術型嘅艾歷臣放後備，出晒啲活力／爛仔型中場。組織力未必好，但明顯佔咗中場先機。熱刺亦都針對拜仁中堅轉身慢嘅弱點，不停咁畀波去中堅後面，開波十分鐘已經做到幾個好有威脅嘅埋門。然後孫興慜把握到一球，先開紀錄。

（http://bit.ly/2nDhEzE）

點睇都係熱刺大炒拜仁嘅格局。

但，足球就係咁先吸引嘛（當然我係捧拜仁先咁講，你係捧熱刺嘅,就唔會—你見熱刺啲球迷都提早離場）

熱刺先開紀錄後幾分鐘，拜仁嘅甘美治禁區外射球靚波，極速追和。拜仁定住陣腳，但都冇見點佔優。然後完半場前，利雲度夫斯基在混戰中，禁區外轉身180度拗腰一射，就幫拜仁反先2-1。

想講嘅係，拜仁呢兩球波，都入得幾，神奇。熱刺開紀錄嘅波係依師餐屎（唔好問我落場入唔入），甚至之前幾次失機都係相當大嘅迫餐屎（可能亦埋下伏線），近距離，生波。但拜仁唔同，兩球波都係人少對人多，兩球都禁區外。睇你點演繹，正面嘅可以話係球員個人質素，世界波，把握力強。負面嘅係撞棍，好彩，射得次都入唔到。

我個人傾向中立啲（聽講難聽過粗口），客觀嚟講，拜仁呢啲就係士摩餐士（同熱刺嘅迫餐屎比）。唔使睇圖都知，個xG好低。何謂xG自己Google，或者睇我朋友 陳祉俊 Christopher Chan嘅文 (http://bit.ly/2mRy4DV)。雖然佢篇文都唔係主講xG（佢FB仲有其他文，請睇）(http://bit.ly/2nBkHbD)，而佢亦唔係數佬出身，而xG實在係一樣相當technical嘅嘢。但邊撚有咁完美，數佬就唔睇波，睇波就唔數佬。兩樣都有嘅？多數都係痴線佬。但，講應用層面，睇陳生嘅文夠了，正如你唔使知道你架七人車係咩原理先可以去北海道開車（然後撞到人）。

我自己都寫過篇文講xG，不過都唔係成篇講 (http://bit.ly/2mSpYLh)

講返，唔睇數字都知，拜仁上半場嘅xG極低。懶搵（最後都搵到），但好肯定熱刺上半場xG高過拜仁。熱刺幾個近乎呼餐士（你睇個方型幾大個），拜仁嗰啲吼乎餐屎都唔係（幾細粒）。偏偏就二比一。call it把握力，或好唔好彩，任你。

但即係現代足球（即係，你睇波開始）嚟講，普遍都重視xG。你見十年前邊有人講呢啲（OK你好勁，廿年前冇啦掛？）。我地細個睇波，三十幾碼抽入就世界波好波啦。大把例子，除咗神奇頂級超卓嘅謝拉特，仲有耶保亞嘅窩利，或者白頭老拉雲拿利（好耐冇講呢條友，近況點？）嘅窩利。嗰啲，唔使搵片你都記得。

但即係，其實而家啲教頭，係唔多鼓勵呢啲東西。因為好睇唔好食。Simon Kuper本Soccernomics有寫，呢啲波，球員梗係J一世，球迷梗係記一世—但射失咗幾十球你又唔理者。入波就係入波，冇難度分，更唔好計你炒出街畀返個控球權人地。而家就梗係哥迪奧拿式足球（其實路維雲戈爾，甚至其他人都係），慢慢做build up，少啲遠射，角球唔好成日大腳斬，龍門要識用波，後防唔好大腳清。最理想就好似曼城咁，扭撚埋個龍門先射空門(http://bit.ly/2pkRcLH)，真係「你阿媽落場都入」嘅餐屎，就最好

（順手講下，曼城呢種哲學，係令我諗起畢菲特所講，最好搵啲傻仔去做 CEO都掂嘅公司。兩位都閱人無數，但都明白有時信制度好過信人）

正如哥迪奧拿帶嘅拜仁，有一季（未fact check），甚至係可以唔打龍都贏德甲！純係誇張，但講嘅係，根本好多場波對手中龍次數都唔夠拜仁入波多，即係我當你中龍嘅入晒，都仲要贏你（當然實際上你唔打龍嘅人地半場笠你啦，明啦）。就係去到咁誇張，你搶到個波起到腳先講啦

講返熱刺對拜仁，下半場，就球迷奇遇記，變咗基拿比個人表演，大四喜。十分神奇地，射親都中。我唔認為就係因為半場換走艾拿巴用艾簡達拉入替嘅效果。只能講拜仁踢順境波真係一流（但，有誰不是？可能多蒙特不是啦）。基拿比下半場初段忽然間洛賓＋列貝利上身梅開二度後，熱刺大勢已去，縱然京士利高文送返球十二碼，哈利鯨又射得極靚（紐亞幾乎飛到），追到２—４，但熱刺都係返魂乏後。最後輸多兩球都冇乜特別

但想講嘅係，即使去到下半場，拜仁嗰啲，都唔係球球迫餐屎。但就係射親都中，中親都入。唔知係好把握力丫，熱刺個龍雞丫，定只係好彩。熱刺呢？除咗球十二碼，攻勢係冇乜。上半場xG仲有1.1，下半場得返0.3。仲要係幾個好士摩嘅餐屎加埋先有，唔係一個0.3

又係睇數據，我寫到呢度先搵張圖的。一如所料，你睇xG，拜仁只係略為佔優（順手一提，xG唔計十二碼，而十二碼真係扭轉賽果的）。xG2.1，但入夠7球，仲要冇十二碼冇老烏冇乜誤判，真係有今生冇來世。我甚至懷疑呢個deviation （actual — expected）係史上最大嘅一場。

又當然唔好講xG冇用咁撚膚淺。講明x，就梗係有機會超過低過啦，否則使撚x。只能又係嗰句，球迷奇遇記。但實際上，拜仁都仲係xG高過熱刺而贏波，其實低xG贏波都唔算太少見。但，average，average呀。平均嚟講xG高嘅就梗係贏。希望知道呢啲咁簡單嘅數學常識。
________________________________________
其實講多咗，固然係因為我係拜仁球迷（甚至都唔係，我只係捧國家隊，我好樂意見到多蒙特拎德甲的）(http://bit.ly/2p9dCiD)。但絶對不打算抽熱刺水。實不相瞞，我妹正係熱刺球迷，不過都好多年前，講緊Ian Walker嘅年代。原因？梗係夠靚仔。然後我都唔知Ian Walker去咗上海教波。

我本身當然唔係特別鍾意英超，甚至樂於見英格蘭或英超隊輸波。但相當肯定熱刺係我敵意比較少嘅一隊。首先，熱刺N咁多年冇對過拜仁。二來，熱刺有相當多嘅德國國腳，所以我初睇英超時，除咗曼聯（有人知我係前曼迷呀可？）就係熱刺。最初睇奇連士文，後來薛基，科達。連帶睇埋舒寧咸，岩士唐，真路拿，安達頓，華度等等。加斯居尼係我最鍾意嘅英格蘭球員。Good Old Days．

某程度上，same applies to 阿仙奴，亦係多德國球員嘅英超球會。加上我一路都話根本雲加嘅DNA教拜仁係啱晒（長線，財政要穩，可以玩育成，年年有歐聯打，但唔使要捧盃）—雲加仲要係斯特拉斯堡人。而眾所周知（？）斯特拉斯堡同阿爾薩斯，自古（？）以來就是德意志不可分割的一部份。雲加當然識德文，仲係相當流利，去到一個講德文說服奧燒加盟嘅地步。就連在倫敦出trip（兩次咁大把），我都係住返北倫敦。其實都冇乜好大分別，只係順手。仲可以行到去阿仙奴球場。反而熱刺個場就冇去過。

OK ，其實呢篇文只係前言。我想講嘅在下一篇，又費事一篇五六千字畀人鬧。多謝你嘅時間。臨尾送隻勞蘇你睇。八歲了

下篇講數學