【袋口罩都犯法？】項明生昨晚行返商台開咪 親歷戰場見防暴警兜路行
昨日特首林鄭月娥於凌晨頒佈《蒙面法》，引發多區市民不滿，出現堵路情況，加上地鐵又逐步停駛，令市面交通混亂。而旅遊達人項明生，昨晚10點半要返商台，與馮志豐主持直播節目《全世界嚮導》，昨晚他在facebook怗文，表示因沒有港鐵及馬路被封，他惟有選擇步行，他寫道︰「沒有港鐵的日子，我們都是這樣走過來的。打不死嘅精神，才是香港人精神！港鐵全線停車丶馬路全線封，無阻我返工嘅決心，由西貢行路去彩虹，經過block咗嘅龍翔道、俾人縱緊火嘅鑽石山、放緊催淚煙的黃大仙、好多家長車的竹園、相對平靜的樂富、最後到商台，行咗總共七公里，行出一身大汗，趕得切開咪做節目！」之後他做完節目，再次步行返西貢寓所，他說：「做完節目，依然冇車丶冇Uber丶冇的士，惟有再做步兵，原路長征行返屋企！路上遇上同路人，有人家住屯門，更加無助！PS︰行咗一個半鐘頭，半夜一點已經平安返到屋企了，多謝大家關心！」
項明生今日接受《蘋果》電話訪問，對於昨晚做「步兵」的經歷，坦言好難忘︰「我已經預早個幾鐘出發，原本call的士又冇，坐小巴出去彩虹，未到龍翔道已經塞住，落車行去彩虹，點知睇住佢落閘，惟有半走半跑咁行返去商台，好彩我返到去10點25分剛剛好，不過一身臭汗。」項明生表示他完全沒有任何準備，連口罩都沒有，他說︰「喺龍翔道好犀利，好似戰場咁，我又冇口罩，見前面放催淚煙，我都兜路行，冇吸咁多煙。」他坦言沿途有見到防暴警察，但他情願兜路行，他說︰「我回程時喺黃大仙竹園見到好多防暴警，梗係驚啦！佢哋無差別可以查你，梗係兜路行，而家袋口罩都好似犯法咁，話你係暴徒，我連口罩都唔戴。」
談到做完節目同樣做「步兵」返家，他說︰「我加100蚊都call唔到的士，我無理由喺商台度瞓，從未試過行咁長路，跑馬拉松都只係10K，我而家來回行咗14公里。」向來只做乘客的他，即使有車位都沒有買車，今次之後他坦言要買部單車，他謂︰「我覺得冇地鐵會成為習慣，隨時都會封，有fans提議我買部單車，我都上網睇緊。」
