呢幾日喺Facebook上面你見我喺泰國玩得好開心，一定係心情勁靚呢，點知唔係喎，因為我有件行李失蹤咗36小時！
我唔係蒙面歌王，件行李乾乾淨淨，冇貼任何唔等使嘅嘢，所以當有一件人地嘅行李喺我眼前出現咗10次有多，我仍然唔係幾信我件行李會寄失！
到最後真係冇行李再出嚟啦，於是我行埋去其中一個機場人員，問佢仲有冇行李，佢話冇啦，跟住用佢嘅方法check一輪之後，就叫我行去7號輸送帶。嗰度有一個Baggage Claim Office。
燈光非常之黑暗，有一個工作人員揮手叫我行過去！跟住佢問我攞個luggage tag，然之後問埋啲唔知乜嘢譬如我件行李幾重之類嘅嘢！我鬼記得我件行李幾重咩！
跟住又俾一塊膠牌我叫我指示下件行李係乜嘢樣，於是我就指咗其中一款咁上下樣嘅。跟住佢問我香港地址同埋泰國地址，冇幾耐就print一份野出嚟俾我，叫我返到去酒店叫酒店啲人打呢個電話，話俾佢聽我住幾多號房，咁搵到行李就會送俾我㗎喇。
我去到酒店、通知門房、門房打電話去通知對方我個房間號碼，當然呢啲電話係唔會好快就有人接嘅，結果係我食完晚飯返嚟，個門房就話俾我聽佢哋通知咗對方我嘅房間號碼啦。
36小時之後，件行李出現喺我眼前。
返到香港我去8號行李帶嗰度同CX講我件行李寄失咗36小時，對方非常有禮，但係似乎好驚咁解釋點解回得$290咁少，猛話唔好意思，搞到我又要同佢講唔好意思！
我諗佢係俾人鬧得太多！我覺得呢個數額係唔關呢個哥仔事嘅，希望其他人唔好見人就鬧，寄失行李唔關佢哋事！不過我好奇怪嘅就係我check in當日見住嗰條luggage tag係貼得好緊先至出發嘅，點解會中途甩咗呢，係有人剪tag啊，定係lowest bid所以膠水黐唔穩呢！如果係前者，唔該報警，如果係後者麻煩阿CX你出年搵間質量好啲嘅，其實你咁去幫人客搵行李，都好浪費資源！
其實喺等待行李嘅過程中，我曾經上過網去查我件行李嘅蹤影，至知泰國嗰個阿叔真係就咁寫黑色拖喼來形容我個喼！大佬你俾多啲資料人哋咪容易搵啲囉，但係我當時真係唔知我有機會提供我嘅喼嘅特色，如果唔係以我嘅形容一定一眼就瞄中，呢啲咪叫做揸流攤囉，嘢係叫做做咗，但係冇提供最好嘅資料，令到尋找行李嘅時間長咗，對公司嘅形象都唔好啦。
我見返我件行李，再諗下負責呢部份工作嘅人員，都替佢地辛苦，如果個個都好似個泰國阿叔咁用黑色拖夾嚟形容失蹤行李，而我相信一日之內成個機場冇一萬都有9千個黑色拖喼，人哋點搵啊！個牌啲字咁細，真係睇到眼水都標！
好多謝香港國泰航空嘅行李部人員，唔好意思，我唔想加重你哋嘅工作量，係你公司CX慳皮而泰國嗰個agent又水皮, 可能都係同慳皮有關！
#何嘉麗CallMeGaGa #何嘉麗 #CX #國泰航空公司 #出街玩 #我唔係蒙面歌王 #行李失蹤36小時 #多謝國泰航空香港行李部嘅人員 #唔該大家唔好鬧喺機場回水俾你嗰啲人個額數唔係佢哋定嘅 #條氣唔順可以去打官司唔好見人就鬧 #我同學個阿媽就成日話信唔信我告你因為佢老公係律師 #一個字衰慳皮
