吳敏兒宣布參加新界西民主派初選
【勇氣不滅 如火重燃】
參選宣言
經歷一整年嘅反送中運動，我哋感受過挫敗、失望、憤怒。我哋承受過嘅苦難，化為集體連結。共同經歷嘅痛苦，使我哋成為實實在在嘅共同體。我哋嘅集體行動帶黎嘅，係無法磨滅嘅香港人身份。
黎明前嘅黑暗，係最黑暗嘅。我哋伸手不見五指，連同路人都差啲失散。政權嘅打壓只會愈趨嚴重，由上年嘅送中條例，到今日嘅國安法，甚至以後，可能會變成西藏同新疆咁樣。無人有通曉未來嘅水晶球，我只係知道，香港人嘅抗爭唔可以就此結束。今日，我想話俾大家知，我會喺呢個充滿不確定嘅未來，同大家一齊企出黎。我願意做黑夜嘅一點光，燃燒我嘅生命，同大家一齊面對黑暗，照亮同路人。今日，我參加初選，同時決定放棄英國公民身份，留喺香港同大家一齊面對黑暗，尋求出路。
對抗強權 從無退後
從2003年開始，我就無離開過追求公義嘅道路。喺傘後嘅低潮，我同大家一齊喺法庭上打贏梁振英，喺「行李門」事件上撼動強權。但係，我從來唔係自己一個。「逆權空姐」嘅名銜，唔單單屬於我，仲屬於所有同我一齊對抗權威嘅同路人。從對抗跨國財團到對抗政權，工會呢個共同體，一直係香港人所建構嘅共同體一員。我希望帶領大家擴大工會戰線—— 呢一個不可忽視嘅力量，為香港人帶黎真正嘅公義。以前打嘅每一場仗都以年計，而家嘅抗爭，我都一樣會同大家全情投入。
國家機器從來無停過，由以前嘅DQ、要梁天琦補簽確認書，而家甚至伸延到所有職場——政治審查、白色恐怖，無人倖免。過去我哋以為可以屈就，可以慢慢傾，但事實係，當國家機器目空一切咁碾壓我哋嘅時候，過往民主派自以爲可以斡旋嘅空間已經不復存在。只有民主派抗爭到底，寸步不讓，我哋先有可能突破形勢。而我，吳敏兒，永遠唔會做背棄香港人嘅民主派。
四線合一 重奪未來
好多人覺得灰心，覺得35+無可能，就算有，都無咩可以做到。但呢一次，係我哋寶貴嘅機會。只有工會、街頭、國際、議會四線合一，先有可能勝出呢場仗。當選嘅人，包括我，都一定會同所有其他民主派齊上齊落，聯手用最大嘅力量同意志對抗中共。團結確實重要，但團結並且抗爭先係重中之重。國安法壓境，我哋只可以背水一戰。每一個入立法會嘅民主派，都要成為團結而堅實嘅抗爭派，而唔係臨陣退縮。呢個係真正民主派嘅任務。我期望35+所有人都能夠成為抗爭派，結合二百萬個手足，喺議會抗爭，同時繼續壯大工會，擴展國際戰線嘅力量。破釜沉舟，方可得一線生機。
我哋都唔知前路係點樣，但我哋亦已經退無可退。喺我哋前面嘅，係黑暗、係血腥，但只有胼手抵足，抵擋強權，將鬥志化為熊熊烈火，先有可能殺出一條血路。
－－－－－－－－－－－－－－－－－－－－－－
【Instagram】https://www.instagram.com/nmy_carol/
【Telegram 頻道】t.me/unionsforhk
【加入我們做義工】https://bit.ly/3cEgQhg
