今年新書《畀個伍我老婆》入面其中一個章節，係「港島西美食地圖」。明明爆緊阿太啲低能嘢，點解又會走咗去講餐廳呢？一，我覺得夫妻又好情侶又好，都周不時會為去邊度食飯而頭痛；咁既然本書係講男女之間嘅相處趣事，不如順手講下我哋平時嘅「飯堂」啦。阿太日常嘅廚藝的確係ok嘅，但平日大家都要開工，未必有時間日日煮。
二，我真係好想為大家介紹下我成長嘅地方 - 港島西。做咗三十幾年西柚，其實一直都想寫本關於港島西嘅書，不過考慮當中會牽涉到大量資料搜集同人物訪問，唔係一時三刻可以做完成，所以今次就簡單啲，由「食」入手，希望可以引起區外朋友嘅興趣。
幾間餐廳，都係我嘅飯堂，間間都幫趁咗最少十年，而且全部係小店，絕對唔係鱔稿。當然食方面嘅口味可以人人唔同，例如我見到臭豆腐會一口氣啪兩舊，有人就連聞到都覺得慘過食屎；有關畀我寫咗落書度嘅食肆，我想講下其他嘢。
今次嘅餐廳名單入面，其中一間，叫「金祥排骨麵」。
呢間嘢，我由中學食到而家；以前係喺電車路均益樓下，而家已經搬咗去水街斜路。坦白講，我覺得佢以前再好食啲；不過無論如何，佢而家嘅水準都係高嘅，我同阿太真係經常幫趁。早排有次去到先知佢冇開，原來係因為非洲豬瘟停入活豬，所以冇原材料做生意；講出嚟真係慚愧，食咗成廿年，我要到嗰一刻先知佢哋原來用嘅係新鮮豬。欣賞佢呢種堅持，係其一；
其二，喺因為豬瘟而被迫停開幾日之後，隔咗冇耐，佢哋嚮應612罷市。
我只係覺得，地區小店，受完疫情影響，之後要再自己選擇做少日生意，呢個決定，其實唔容易。
唔知佢哋舖頭喺邊嘅，可以Google map下，你就會見到附近有咩建築物；你應該知道，嗰度最近發生過咩事。
而睇「西環變幻時」個街坊group，有巴打話喺啱啱過咗個星期日，店員主動開門，畀學生入去。
講完喇，希望大家多啲支持金祥排骨麵 Kam Cheung Pork Noodle(我又係到而家先知原來佢哋有個page)，同埋，記得去書局買本《畀個伍我老婆》睇下🤣(遲啲會話畀大家知邊度有得賣)
#非廣告
#撐小店
#西柚好嘢
#金祥排骨麵
#港島西美食地圖
#畀個伍我老婆
#白卷出版社
