有讀者同我分享佢最近視像見工嘅經歷，過程當中interviewer已經串串貢，不過佢認為見工都係咁上下，所以冇乜所謂，直至對方問佢：「你經驗唔夠喎，點解我哋要請你？」
呢位讀者答：「我會好畀心機去學，亦都會好畀心機去做，其實之前喺舊公司都有涉獵呢個範疇，相信會幫到我盡快融入同埋上手。」
Interviewer：「最唔鍾意你哋話嚟到會好畀心機學，公司唔係學校，出糧畀你哋係做嘢，唔係學嘢。」
呢次見工經歷當然唔開心啦，所以佢同朋友分享，點知身邊唔少人「專家」上身，例如：「你唔應該咁答啦！」、「你應該話......」、「可能佢考你EQ咋，你應該......」
你應該點、你唔應該點、你應該點、你唔應該點......佢話其中一個「專家上身」嘅朋友，自己本身都失緊業。
或者「我唔夠經驗，但會畀心機學」未必係最無懈可擊嘅答案，但技巧同埋態度上其實冇錯，個個都話佢答得唔好嘅同時，我唔係要盲撐個讀者，純粹想反問一句：「個interviewer係咪唔識字？」
CV 打得清清楚楚，如果你認為個candidate唔夠經驗，唔知點解要請佢？冇問題，咪skip下一份CV囉，不過你認為佢唔夠經驗，又唔歡迎佢學，咁我真係想問下喇~~~你約佢見工做咩呀？消磨時間定係跑KPI？
