《讀者投稿》長篇，第二部分
搬左出黎之後我老公情緒不穩亦好低落，有一晚佢同奶奶line 傳msg ,講話自己不孝，要奶奶照顧好自己唔好病之類，奶奶又話自己幫老公洗好舊鞋等佢番去拎（我即時有諗平時又唔見佢洗？果堆舊鞋我冇見過，老公平時冇著過），之後我見到奶奶仲打左一句，話我平時態度唔好唔主動，講一套做一套好表面，平時剩係顧住睇手機。
我即時覺得好失望，我第一次見奶奶，奶奶有講過絶對唔會同個仔講新抱壞話，跟著俾我見到呢句野，奶奶屋企洗碗由我洗，洗廁所都係我，台北舊屋要搬要執垃圾冇請人做慳錢我都去幫手冇怨言；基本上奶奶希望我老公可以成功減肥、戒煙戒酒，希望我教好佢，但係我冇做好所以話我講一套做一套；睇手機因為我冇電腦，我想時時刻刻mon住online生意⋯⋯我心諗都算喇已經搬出黎我都唔開心左一個月，心裡面討厭奶奶覺得佢假、做咩都老馮、大安旨意，當然我都明白老公永遠係奶奶親生骨肉唔會係老公面前講我感受，亦從來冇阻止佢地見面。
到今年年頭，我地搬出黎先半年多一個月，奶奶開始唔耐煩要我地同佢地一齊做生意，好積極搵舖頭，佢意思係幫佢開第二間舖，又帶我地搵舖同佢合作過嘅生意人傾，但係我同老公唔想過以前果種活係奶奶操蹤之下嘅生活，而且第二間舖我地負責租金，賣奶奶舖頭賣唔出嘅貨。我諗左好耐，好唔想同奶奶共事，因為好綑綁，而且我地一唔聽佢意見佢就唔開心，成日拎親情綁架，所以我有諗過搬去高雄搞小食生意，搬遠d亦俾我老公重新適應自主能力。
最後奶奶當然唔滿意，於是同我老公講試唔試養雞，有識到人做養雞而且收入唔錯，每四十日出雞可以賺十五至二十萬台幣。咁又帶我地去見養雞師父、睇地，睇完之後覺得養雞師父好奇怪，每批自己賺咁多，多一個股東入黎就分走收入仲要另外起新雞舍養走地雞，完全計唔到佢可以賺得比而家更多，而且支出非常高，於是我同老公決定唔養，去高雄搞小食。之後老公打電話覆奶奶唔做，去高雄搞小食，奶奶表面接受實情梗係唔開心，自己心入面盤算點樣氹個仔落搭。
＃待續
＃我的極品四大長老
