「望著是萬馬千軍都直衝」
// 老規矩，原文畢錄如下。 Medium link: https://link.medium.com/Te35sdhCEY ，會睇得舒服啲。 //
香港人，很愛香港吧？
星期六，我想落街食個早餐，都要問一問自己：「今日著乜嘢顏色嘅衫落街好？」早幾年，喺啲分散啲嘅議題上，大家爭取嘅係免於被歧視嘅自由 (例如 LGBT) ，又有時係出入境嘅自由 (你睇下林榮基)。但原來，嚟到 2019 年嘅夏天，連著咩顏色嘅衫落街，都未必有自由。
早一晚，賴叔同朋友飲嘢，席間講起朋友嘅公司週年聚餐 (又會七月就搞嘅？) ，邀請晒大中華區嘅高層落嚟，大家幾圍枱，食好嘢、飲紅酒。不過，撇除老闆循例致下辭，以及個別同事飲大咗喺度互隊之外，全晚各席嘅話題，都係圍繞兩個字：「元朗」。
「元朗有咩咁特別？」
「點解大家要入元朗？」
「元朗嘅原居民好巴閉架？」
「林鄭會唔會因為元朗而下台？」
朋友最記得嗰句係，喺香港工作嘅大陸老闆話：「我最近很糾結怎麼穿衣服外出，因為我的衣櫃裡只有黑和白。」
我話，著迷彩囉。有咩事匿入草叢度，冇人睇到你添。
- - -
呢個星期，新聞好多，訊息量好大。星期初嘅謠傳屯門反攻元朗，週中嘅何君堯喺廣播道被掟鞋，然後何君堯父母嘅墳墓被毀壞，又然後，香港總商會出聲明要求政府成立獨立調查委員會⋯⋯到週末， 404 not found 咗一段時間嘅政務司司長張建宗出嚟為警隊喺元朗恐襲處理不周而道歉，再換來警察散仔協會 (正式好似叫警務員佐級協會) 發炮還擊。
然後有人問，香港要亂到幾時。係咪因為政治同經濟問題，係咪如果香港人個個都上到車買到樓，煩惱自然解決？
坦白講，即使聽日特區政府宣布每位市民派兩萬蚊，我都唔相信大家會停落嚟。何況兩萬蚊唔夠買一格階磚啦。
解鈴還需繫鈴人，而將問題、矛盾逐步加深、激化嘅特首林鄭月娥，而家學埋被捕嘅示威人士咁「我冇嘢講」喎。 Okay 或者你相信佢已經意興闌柵，純粹因為畀中央夾住唔畀辭職，所以仲喺度尸位素餐。咁佢一個人嘅動彈不得，就要全香港人陪葬？冇嘢嘛？當初林鄭唔係自作聰明，騎劫陳同佳從台灣流亡返港嘅案件，邊度嚟咁多事？
又，如果唔係反送中浪潮持續一個月仲未平息， 721 民陣唔會發起遊行架喎。咁 721 嘅元朗恐襲，邊度有機會發生？本來無一物，何處惹塵埃呀施主。林鄭被中央割蓆，但仍然坐住喺特首呢個位，如果佢連警隊、元朗以至新界鄉事派都搞唔撚掂，落十八次地獄都唔夠喎。
- - -
我今日本身都好想入元朗。奈何身體繼續抱恙，唔方便，亦無謂徒添其他前線抗爭者嘅負擔。一個月前，我寫過一篇文，叫人唔好死，所以唔好衝。當時都畀人屌鳩我犬儒，連身邊比較熟絡嘅朋友都覺得篇嘢條尾收得唔好。
一個月後，勇武同和理非已經因為林鄭而徹底 “We connect” ，不割蓆、不篤灰、不指摘。香港人，連西環中聯辦都去埋，玩 Splatoon 射漆彈，喺上環食咗幾十枚催淚彈同橡膠子彈。香港人對呢個城市嘅愛，已經去到連地區勢力人士、社團人士以至黑社會成員都唔怕嘅地步。人多、齊心，就事成。
無論係直入元朗睇你老豆疊羅漢，抑或入去唱 Sing Hallelujah to 李鵬，要入去嘅朋友，冇人阻止到。 (其實如果西鐵線故障，都仲有大欖隧道、新界環迴公路等道路進出元朗嘅⋯⋯) 但我想講， 727 入元朗，只入一個手段，唔係目的，更加唔係終點。「光復香港，時代革命」呢句口號，最近重新被提起，我相信，都係好多抗爭者嘅信念。
而喺真正光復之前，齊上齊落、唔好落單，呢個係群眾鬥群眾歲月，必須記得嘅八個大字。有手機甚至相機嘅朋友，記得帶備尿袋，將你見到嘅、如實紀錄，畀全世界知道，香港嘅政府、警隊、鄉紳、黑勢力，正如何摧毀一個所謂亞洲國際都會，而呢個城市入面嘅市民，又如何莊敬自強地，負隅、頑抗。
圖片來源： https://flic.kr/p/pcTy8U by Willy AuYeung
解鈴還需繫鈴人原文 在 誰能繫鈴、誰能解鈴... - Translation Matters 翻譯有要緊 的推薦與評價
在這段話中， #解鈴還須繫鈴人（中方原文He who tied the bell to the tiger must take it off）是一句諺語。根據中國的百度百科，它的含意是“ ... <看更多>