《好想有坦克車 總之我需要 擁有一架車》
大家有無聽過黃偉文填詞，Shine 主唱個首《坦克車》，首歌就係講「好想要架車.....」，其中一句係「不想再跟隊搭車了 應該去開荒遠征了」。喺某啲人心目中，車係身份象徵，成功標記。我無咁諗，要用架車來證明自己有成就，呢件事好廉價。但此時此刻，我真係「好想要架車.....」
有人話「三十歲仲要依賴地鐵好可憐」，諸葛紫岐話「巴士易翻車，好危險」。我無覺得搭公共交通工具好可憐，亦唔覺得危險，就算私人飛機，都有「the」機嘅風險。
※※※※※※
我想要架車，純粹係，唔想同「呢啲 人」逼.....
每日搭車，總站嘅朋友死都唔行入啲，然後有啲「最後一秒」先返工嘅朋友，好似推銀機咁，明知不可能，死都要發揮奧運精神，自己推自己入車廂，呢啲都係碎料，我都捱得過。
但好多樣碎料sss加埋一齊，就「來料」啦.....
● 有啲女人，好鐘意拎個順風速遞員咁大嘅袋，佢一定要用手臀夾住袋嘅中央位置，死都唔肯將個大袋夾返喺心口前面，佢個袋又筆挺到好似一個無踩扁嘅陽光檸檬茶盒一樣，極佔空間。大家少不免會擠壓到佢個袋，佢就「嘖」你。
● 有啲男人，佢好高，然後我好矮，佢揸住個手機，就喺正我面部，佢就當我塊面係QR code 咁，對正我塊面打機，whatsapp，我塊面正面接收哂佢手機所有幅射。
● 有啲「身痕」嘅朋友，車廂density 已經偏高至甚高，然後佢要不停郁，不停移動，務求調整位置，企到個好位，但任佢點調整，個位都唔會好。更不幸係遇到長髮馬尾「身痕」嘅女人，佢條馬尾就好似豬肉檔用來 fing 烏蠅個條野咁，係咁 fing，佢係令我好有衝動帶把鉸剪搭地鐵。
● 仲有啲朋友係永遠都要喺車廂「尋找失物」，已經好撚逼，佢總係要喺呢個時候，喺個袋摷嘢， 而呢啲仆街永遠都唔知將啲嘢擺喺邊，由旺角站，摷到金鐘站，以為佢摷咩咁重要，end up只係扯返條earphone出來。
● 而我今日，又再次行衰運，遇上鞋踭「離地」嘅高踭鞋女人，就喺「請緊握扶手」急停個下，佢個「離地」踭就踩正我腳背，中央無肉嘅位置。我慘叫就換來佢「頭也不回」嘅一聲「梳ly」。
最近繁忙時間，地鐵搵咗啲明星，曾志偉，佘詩曼喺車站廣播「我係曾志偉，而家係繁忙時間，請大家耐心啲等候......」，搵啲根本唔會搭地鐵嘅人， 叫你耐心啲，真係好有挑釁性嘅舉動。有人話，香港人心胸狹窄， 小小事斤斤計較，小題大做，成日都好躁底。你要明白，當你每日兩次，早晚都要好似東非大遷徙咁，由九龍遷去港島再遷返九龍，個種生活嘅磨折，係會令你無哂做人嘅風度。
更令你憤怒係，某朝早你已經因為遲到而飛的，然後因為城市「虧」劃，人口膨脹，人多到一個點，周圍都塞車，你會發現，香港真係有錢無錢都活得咁辛苦。有錢，就車貼車咁逼喺條馬路度，無錢就身貼身逼喺車廂度。um…..我諗我要嘅，係Harry Potter 個架自動變型橡筋車。
