2011年，仲係入行冇耐，嗰時有機會入到一套打仗片嘅電影劇組做making of，如果以開眼界嚟講，呢個頭都算係開得好，因為條片製作都算大，仲可以周圍去，對於一個啱啱入行無耐嘅小朋友嚟講，簡直可以話係寓工作於娛樂，又有得見識，仲有錢收添。
-
但亦都真正見識到入面有好多做咗好多年嘅前輩，令我知道原來有啲位你可能做十幾廿年，都只能係做嗰個位，電影看似好風光，但其實一啲都唔容易，尤其係香港。
-
電影，大家可能都只係會諗到出產咗好多明星，演員，導演，攝影師，點解唔提編劇？因為真係冇人理的。
-
行內嘅人可能會理吓，知道吓
或一啲鍾意電影嘅觀眾都話可能會認吓編劇，攝影就應該唔會記得，同埋一個劇組可能有好幾個攝影師，即係有一個攝影指導（即攝影導演，其他係名義上係叫 operator，其實也是攝影師，不過亦有好多人會好謙虛自稱只係 operator，唔算得上叫攝影師）
-
仲有無數咁多嘅幕後，大家見到 ending roller 就知道其實仲有成村人先完成到一部電影。
-
我記得我嗰時做完呢部戲，有段時間係戲院睇戲，啲人走晒，我都會睇埋 ending roller 先走，以示尊重，同埋都想睇吓有咩人拍，當然呢個咁虛偽嘅行為，唔頂得幾耐，因為如果真心覺得某啲戲好睇，你自然會去搵係邊個拍，邊個寫，唔係靠坐唔坐得耐。
-
點解無啦啦講呢啲？
因為我對當時無意中影到嘅呢張相，念念不忘，好反映到當時我作為一個拍嘢嘅青頭仔，然後一下子被開包，唔再係處男「啊，原來電影係咁樣嘅」嘅一個成人禮
