［三萬達成］話說上兩星期，我先同老公講個專頁就快有三萬個like，係咪應該要「做返啲野」慶祝？然後闊佬懶理地諗住過多一兩個月再算，結果今日一睇：呃…三萬了…
這下子問題可大了，需知道人妻先生除左婊揚好人好事之外，似乎一無是處，我總不能婊演寫文吧？睇人打機，我明；但睇人打字是那招？於是我只好用排除法思考自己平時最叻係啲乜，睇下可以拎出黎污染大家眼球。
唱歌？對住三萬個讀者唱歌，這是那來的自信？話說，其實我扮羅文唱歌還是挺像的，不過我才不會表演這個啦，太尷尬了，否決！那麼逛博物館？但怎樣表演逛博物館？我最討厭別人在博物館裡吵鬧了，這個不行，否決！表演俾仔溝？裝個cam偷拍我落酒吧，然後加旁白好似國家地理雜誌頻道咁樣「呢條雄性洋腸開始接近人妻先生了，到底佢會怎樣吸引人妻先生注意？而人妻先生又會作出咩反應呢？」這提案太變態了，否決！
餘下我擅長的，就只有食同埋訓覺。想同我訓覺嘅人好多(?!)，但想睇我訓覺的人應該冇幾多個，有嘅話你都唔好同我講，感覺上很變態的說。結果，似乎只餘下飲飲食食呢條line可以考慮。
我唔打算剪片做餐廳食評，廢事同劣食教母爭食啦。咁不如… 我開live半個鐘同大家一齊煮意粉吧？
暫定下個星期五(2月9號)，我朝早11:30，即係香港晚上7:30，我會準時開live和大家同步煮意粉，到時同大家分享一個我很拿手的意粉醬食譜，家常便飯，我唔敢話教，大家師奶分享下煮飯心得，切磋切磋，又切又磋咁啦。下星期一我寫個食材名單出黎，大家預早買定材料後，就可以跟我在下星期五煮意粉啦！
放心，我是絕對不會露面的，大家最多睇到我對手同我背影，我不打算也不需要更不能夠靠樣子搵食（外面男神很多，我這種鄰家男孩型的可不是他們的對手），大家還是專注我的文字就好啦！
#趁我未改變主意縮沙前出呢個post
#明天訓醒我一定會後悔
#難道對住咁多人煮野食又唔尷尬嗎
#今天的我整蠱下星期五的我
#講明先到時緊張失手唔關我事架
#感謝讀者們支持
