有啲人視中共為無法撼動嘅怪物猛獸
因而斷言香港抗爭運動必然失敗
我覺得只係懦弱同習得性無助所致
一個政權再強大，都係由人所組成，並非由乜鬼嘢外星高智慧生命體組成🤡，佢哋做到嘅嘢，我哋都會做到
只要我哋努力不懈，不斷壯大自己嘅力量，等待時機，全面奪回香港主權絕非天方夜譚
呢幾個禮拜我哋睇到香港人要智慧有智慧要勇武有勇武要創意有創意要錢有錢
即使我哋未能即時得到想要嘅成果，都唔代表從此要認輸
呢條抗爭路漫長，但我哋要堅持到底
中共步入衰退週期，全民跳船做好準備
相比起社會主義，中國最富有特色嘅，就係國內民眾有錢有權必定移民，十三億個體嘅中國夢都係離開中國。縱觀世上其他發達經濟體，舉國上下如同屍殺列車車廂直播嘅現象，可謂絕無僅有。呢種處世態度之所以成為主流，源於中國社會完全無法為民眾製造希望，計劃未來，而未來只有一片黑暗嘅國家，潰散只係時間嘅問題，並非美國隻手遮天所致，更非地緣政治之過。改革開放以降，中國人掙扎求存，見錢開眼，全為極力擺脫中共治下嘅歷史循環，毅力可謂無從挑剔。而香港人難得半邊身體已經置身局外，就更理應洞悉先機，擇善固執，盡力脫離中國控制，以免錯失爭取主權嘅黃金機會，再次自陷於絕境。
現代中國人不論貧富，思維都係大同小異，因為生於中國，生存方式早已註定要停留於原始社會。中共立國之後，毛澤東一度銳意與世隔絕，建立共產主義烏托邦，直至文革大亂，全國民眾一窮二白，加上毛死鄧繼，中國至走向新局面，對外開放。然而，災劫過後，人類自然學識趨吉避凶，因此即使經濟風氣漸漸自由，中共領導人物貌似開明，但中國人經歷大鳴大放，上山下鄉，早就唔敢輕易相信政府，因此仍然抱持觀望態度。其後，六四事件發生，所謂自由市場原來同自由社會無關，中國人就唔再對貢獻祖國心存幻想，轉而一心賺錢養家，而移民海外就成為佢地嘅終極目標。從此，中國人犬儒心態蔚然成風，公義道德進一步扭曲，上有土豪幹部，千方百計從改革開放中謀取暴利，中飽私囊，甚至勾結黑道，欺壓弱小，下有無業遊民，飽受委屈而不惜鋌而走險，殺人越貨，只求撈到一筆，快活一剎，即使入獄受罪亦無可無不可。中國社會之亂象叢生，既與政治制度先天不足有關，亦與所謂中華文化落後世界有關。
此之所以，即使經濟持續增長，甚至躍升為世界第二大經濟體，中國社會都總係瀰漫一陣腐爛氣息，因為真正嘅中國模式就係有如無間地獄，人在其中，永不超生——官吏一上任，就急不及待以權謀私，拉幫結派，一方面安插親戚同鄉進入大小部門上下其手，另一方面開辦企業左右逢源，瘦人肥己，務求喺自己所依附嘅派系失勢之前，匯出所有資金，以及將家人送離中國；而一般平民出賣勞力，只有兩種出路：一係淪為體制內嘅鏍絲釘，無法向上流動，發財無望，任由政府政策擺佈；二係因各種理由動輒得咎及無法離鄉（例如失去身分證、得罪權貴或以言入罪等），就直接無視法紀，趁火打劫，或者放棄生命，行屍走肉，過得一日得一日。前無去路可進，後無腹地可守，中國人朝不保夕，無法安身立命，只可以努力喺最短時間之內活得精彩，今朝有酒今朝醉，要數廣為人知嘅例子，就有意圖由地方殺上中央嘅薄熙來同揚威日本嘅三和大神。
假如經濟向好，國際間相安無事，以上中國模式絕對可以苟延殘喘。人命如草芥，打黑如家常，只要當權者保持警惕，全力維穩，反動勢力就缺乏反撲時機，而自由陣營亦懶得干預，只要企業仍然有利可圖。所以，改革開放至今，中共就係咁樣任由派系以及階級自相殘殺去維護生態平衡，而成功入籍英美澳加嘅高官家屬，就係大逃殺之中嘅少數生還者。然而，習近平執政之後，西方國家逐漸意識到中國毫無契約精神，無意共同維護世界秩序，拒絕開放國內市場以及偷竊他國科技機密，正係鐵證。加上廉價勞動力供應不再，地方各式敲詐勒索源源不絕，西方企業終於下定決心，將世界工廠遷往東南亞，美國出手以關稅制裁，只係各國聯手打擊中國嘅第一步。面對美國開出嘅條件，習近平繼續表面欣然接受，內裡則態度照舊，長此下去，美國就有可能果斷停止補助，將習近平迫入窄巷，屆時中國各個派系階級都求財無門，動亂就會無日無之。當習近平忙於應付政敵及盲流，中國四分五裂，香港要重奪主權嘅時機就會出現。
因此，及早思考香港嘅角色同潛力，就係香港人當務之急。首先，香港人毋須捲入權鬥，因為接近中國官場，下場只有身敗名裂，冒險犯難，極為不智。中共領導人嚴格奉行嘅信條有二，一係「一將功成萬骨枯」，二係「寧要我負天下人」。特區首長管治失當，可以切割，地方幹部貪贓枉法，可以切割，就連中共核心人物政策出錯，都一樣可以同政策切割，諉過於執行者，一如文革嘅蓋棺定論，荒謬絕倫。中共沿用滿清管治模式，視一切體制中人為利用工具，功勞高如曾國藩之流，都只配充當用完即棄嘅塑膠製品，林鄭與之相比，不過係兵卒一枚。起用鄉勇平亂，事成之後繼續為清廷效勞，導致同鄉湘軍鄙視自己；全心服務皇帝，偏因天津教案而失信於皇帝，結果異族清廷防範自己——一心想做忠臣義士，或者正正就係佢憂鬱而終嘅原因，一言以蔽之，就係自投羅網，自取其辱。若然香港人效法林鄭，走入自己唔熟悉嘅場域作戰，以為自己可以力保不失，全身而退，結局定必有殺冇賠，相當悲涼。
其次，香港人亦絕對唔可以變成盲流，同習近平同歸於盡，因為香港人有資產有籌碼，大可智取。只有亡命之徒，至會毫無顧忌，如同張獻忠李自成之流因為飯碗不保而聚眾起事，最終徹底破壞江南經濟，動搖明室根基，而香港人一直與國際接軌，亦有自由陣營可以投靠，自然不必以美玉之身，與石俱焚。明帝國晚年，朱氏政權內外受敵，先受流寇重創，再歷女真強攻，終於崩塌，而其中流寇之患，比女真造成破壞更大，同如今中共所面對嘅困局極之相似。
當時，明帝國境內土地兼併已經相當嚴重，加上天災人禍導致饑民大量湧現，而朝廷財政又因軍費負擔增加而日益拮据，最終決定下令裁驛，兩者結合，就迅速引發大規模動亂，一發不可收。農民溫飽不繼，求生之法有二：一係首先食草，再食樹皮，然後就食人——根據記載，官盜交戰之後，饑民就會一擁而上，爭食戰死者嘅屍體；二則係食無可食就索性變成強盜，離開本省，四出搶掠他人收成，結果迫到本來有餘嘅農民都加入大隊，落草為寇。而驛站官吏相繼失業，等於形成一股無產階級嘅巨大能量，呢批目不識丁而又毫無操守可言嘅人就逐漸以兩三萬為一群聚集，逐個城市襲擊佔領，榨取一切，再去下個尚算富裕嘅城市重複，直至劫無可劫為止。當流寇完全牽制當權者，甚至重創國本，吳三桂同外敵利益交換，引清兵入關，可謂識時務者為俊傑，係香港可以參考嘅對象。
正因為有原則有底線，相比起以無產階級姿態揭竿而起，或者借助中共派系力量互相傾軋，香港人應該做嘅係學識掌握世界秩序，以及鞏固自身文化及經濟力量。只要香港人可以留前鬥後，留意政府賣港小動作，定期製造混亂，至少保證二零二零年可以隨時自發佔領，牽制主攻台灣總統大選嘅中共，咁香港前途就會趨向明朗，繼而趁中共分身不暇之際，要求前途自決。呢種抗爭模式，其實正係中共發展時期最擅長嘅游擊戰，敵方難以捉摸，亦難以剿清。等到他日中共無力回天，香港正式從中國分裂出去，其實已經係習近平生命中尚能承受之輕——只要佢仍然有一大片中國陪佢閉關自守，以及十三億中國人陪佢食人為樂，佢係唔會死攬住香港唔放。
對中共而言，最緊要嘅係保住原有地盤。只要保得住中國大半版圖，重行計劃經濟，他日中共就可以東山再起，而權衡輕重過後，習近平就會意識到，失去一個協助未來再次改革開放嘅小城市，實在算唔上傷亡慘重。當香港人身分認同日益鞏固，本土精英經濟力量有增無減，形勢發展又理想，有朝一日香港要效法越南蒙古，就並非天方夜譚。
回望歷史，中原政權每次勢弱，周邊地區都會乘時分裂，古有越南，今有蒙古，都曾逃出中原政權魔掌。南北朝末期，李賁起義，割據交州稱帝；唐帝國晚年，吳權自立為王，即開後來之吳朝；明帝國宣宗時期，黎利大敗明軍於昇龍，建立後黎朝。越南千年抗暴歷史，足以證明中原政權並非牢不可破。又，一八五八年《璦琿條約》簽訂，滿清政府曾經割讓烏蘇里江以東大片土地予沙俄；一九二一年，蘇聯支持北蒙古獨立，中華民國無力反抗；至一九四九年，中華人民共和國更因應形勢而承認蒙古國獨立。蒙古獨立雖然主要得蘇聯之力，其後亦深受共產主義之毒害，但至少反映中原政權並非世上唯一強權，間中虛張聲勢亦不足為慮。香港人自有文化，民族主義隨年漸長，香港未來，其實比中國未來更有希望。
而要想像香港未來，前提就係要停止建設民主中國嘅虛妄幻想。過去歷史，如果真有產出任何教訓，香港人應該銘記於心嘅就係香港要生，中國就必須要亡。中共要維護嘅，從來只有黨嘅利益，全中國十三億人嘅生命，於中共官員眼中，只係十三億條賤命。正因如此，中共黨內派系雖然持續鬥爭，但從來槍頭對外，而中國人就係佢地向美國要錢嘅人質。每一任中共領導人，所追求嘅只係家族利益，只要中共體制穩定，不過不失，大家就可以得體離場，然後風流快活，中國廿年後如何，百年後如何，從來都唔係鄧小平江澤民胡錦濤嘅焦點，因為自私自利，就係中國人嘅代名詞。簡而言之，只要中共可以佔地為王，永續管治，中國前景如何，根本就無人關心，而所謂民族復興，亦只不過係一張信口開河嘅空頭支票，兌現永遠無期，民眾天真相信，就會中計。
自中華民國成立，崇洋嘅中國知識分子一直等待明君聖主出現，對中國未來充滿不切實際嘅希望。佢地等待帶領，等待獨裁軍閥忽然變好，等待和平演變隨機發生，等待自由中國從天而降，一生都喺等待之中度過，反復中計。佢地所無法領悟嘅係，自由國家乃係個體自由嘅延伸，而民族國家必然自下而上建立，要向列強學習，中國就必須跟從西方民族國家建構必由之路從頭行過——洗心革面，由零開始，先有可能達致富國強兵。中國知識分子癡心錯付，一再期待蔣介石毛澤東胡耀邦大發慈悲，思維同洋務運動嘅「中學為體，西學為用」相去不遠，所得嘅結果自然亦同洋務運動下場雷同。由此可見，任何人仍然相信中共治下嘅中國可以自然轉型，都等同於仍然無法理解民主之本質，即使係幾資深嘅學者，都只會係從未讀通歷史嘅孔乙己，缺乏深刻思考能力，更遑論對香港政治說三道四。
只有全力爭取香港主權，謝絕港人治港，高度自治，目前劣勢至會有所改變。中共從來都係紙老虎，並非香港人想像中咁難以擊敗，而中國內部充斥貪生怕死而缺乏救國理想嘅人，亦不乏視財如命而急於叛國出走嘅人，更證明咗中國已經步入衰退週期。所以，反送中雖然未見成果，但唔等於香港人全盤皆輸，因為中共之後定必會舉棋不定，接二連三犯錯，而香港抗爭密度同大眾覺醒速度亦會變得頻繁同迅速。唯有心存正氣，忠於個人自由，不為眼前得失所動搖，不為一時受挫而灰心，香港擺脫中共統治之期，方會指日可待。
http://gnimmm.com/2019/06/28/jump_boat/
