【米已成炊？】深圳市已預備起「深港西部快軌」
唔識自己搵大陸文件黎睇，都唔知原來宜家大陸諗緊除左個條我哋早月踢爆連接東大嶼人工島嘅「高鐵2.0」之外，原來加加埋埋係「三條鐵路、直插香港」嘅基建融合大計。
我哋搵到有官方文件顯示，除左東大嶼駁前海的隱藏高鐵外，原來重隱藏有條連接深圳機場同香港機場嘅「深港西部快軌」、另加一條前海駁去洪水橋嘅「穗莞深延快線」，聲稱要用呢三條鐵路同香港「互聯互通」（註一）。發展局局長黃偉綸之前就話條高鐵支線只係前海單方面嘅「構想」、未同港府傾但都會尊重；但睇返深圳政府文件，就會發現條「深港西部快軌」唔止係深圳政府「構想」咁簡單。
講返個背景先：香港政府2014年就話擱置咗「深港西部快軌」方案，因為快軌要起海底鐵路隧道，預計至少洗成1,100億港元(按2013年價格計算)，整體財務可行性成疑，所以唔打算喺2031年之前放入鐵路發展策略入面（註二）。照計香港放棄咗，深圳都唔駛做啦。但原來「村民唔係咁諗」，原來深圳並無跟港府擱置快軌方案，近年重做繼續籌備，似乎勢在必行：
【證據一：深已列入交通「十三五」規劃】
我哋翻查深圳市交通運輸委員會公佈咗份《深圳市綜合交通「十三五」規劃》 (2016年)，文件中講明要「加快推進深港西部快軌前期研究」（註三）。如果深港西部快軌2014年已經唔起，點解深圳嗰邊仲要繼續將佢嘅「前期研究」，列入自己未來五年規劃裡面呢？
【證據二：深已撥款做前期研究】
深圳市政府唔止口噏噏，仲批咗一大舊錢做前期工作。翻查《深圳城市基礎設施建設工程項目表(2016-2020年) 》（註四），講到快軌「全長約55.7公里，深圳段約25.2公里」，預計單係深圳嗰邊總投資已係260億人民幣，前期工作已經洗成8.5億人民幣，仲講到「建設週期」係2020-2028年。
剛剛港方先話快軌方案已經難產，但深圳政府點解可以好似「先知」，咁具體寫到軌道嘅長度、造價，俾埋錢做前期工作，預計2020年開工？
【證據三：前海灣站將接駁港深快軌】
再同一份列表（註四），入面批咗20公頃「前海綜合交通樞紐工程」畀深圳地鐵，並講明「包括1、5、11號線、穗莞深城際線和港深西部快軌的前海灣站」，近期工程總投資成91億人民幣，建設周期2014-2019。深圳地鐵部門在2016年更向《文匯報》介紹「機場線在前海灣站預留至香港支線的條件，接駁深港西部快軌」（註五），即係其實連快軌個站都已經規劃好，香港人重以為2014年已經被擱置。
【證據四：廣東稱「協同香港啟動港深西部快軌前期研究」】
2019年2月，廣東省交通運輸廳、省發改委有關負責人受訪時，指廣東省將斥1,200億促灣區「內聯外通」，更聲稱「協同香港啟動港深西部快軌前期研究」（註六），可見直至今年年初，廣東省官員都仍將快軌掛在口邊，更稱與香港啟動前期研究......
從以上種種跡象可見，深圳政府好積極咁準備起深港西部快軌，甚至係話已經同香港協同緊，即係話：
一、繼續推動這條深港西部快軌，已經違反左2014年既香港鐵路發展策略諮詢結果；
二、除左東大嶼高鐵支線之外再加這條隱藏快軌，你估究竟基建成本還需要幾多個千億？
三、一係就係我地俾深圳夾著「被規劃」，一係就係香港政府將香港市民蒙在鼓裡。
#被規劃 #港深西部快軌 #人工島 #東大嶼 #機場城市 #大灣區 #協同效應 #媽我好亂
⚔️ 結束土地壟斷 請支持民間土地研究
https://liber-research.com/research-category/land-supply/
💪 了解更多: https://liber-research.com/about-us
註一：前海規劃多條軌道連接香港 加強互聯互通 (2019-02-26)
http://news.wenweipo.com/2019/02/26/IN1902260050.htm
註二：《鐵路發展策略2014》 (p.55-57)
https://www.thb.gov.hk/…/publ…/transport/studies/rds2014.pdf
註三：《深圳市綜合交通「十三五」規劃》
http://www.sz.gov.cn/…/tz…/201607/P020160704628812873754.pdf
註四：深圳市發展和改革委員會關於印發《深圳城市基礎設施建設五年行動計劃（2016—2020年）》的通知
http://www.sz.gov.cn/…/2…/gb960/201606/t20160615_3701413.htm
註五：機場線在前海灣站預留至香港支線的條件，接駁深港西部快軌
http://paper.wenweipo.com/2016/06/28/CH1606280012.htm
註六：粵今年1200億「重資」交通 促灣區內聯外通
http://news.wenweipo.com/2019/02/20/IN1902200060.htm
