關於 賣樓幾時收錢 ，我們在網路上蒐集到這些相關的討論、資訊與評價

［今日寫呢啲］夠晒多嘢講

美股方面，冇乜特別。你見出嚟個CPI通脹數字，5.4%，但債息仲要跌，道指仲要創新高。又話驚加息驚縮表？睇嘅係其他嘢啦，文入面會講。聯儲局是對的。

＝＝＝＝＝＝＝＝＝＝＝＝＝＝
一週年！月頭訂最抵！比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100，已經1900人訂！ 畀年費仲有85折，20/40年費VIP 送本人著作一本。
＝＝＝＝＝＝＝＝＝＝＝＝＝＝

國泰293，昨日中午出業績。係喎，蝕76億，但又係照升。明明又話窮到還唔到政府優先股股息，息都還唔到。但實情半年優息股股息先3億，人地拎住300億現水—明顯係還到，但唔還。點解要咁早還？昨日都講左啦。

至於點解勁蝕都升，燒錢夠燒幾耐，幾時再要伸手，就全部Patreon講了

港交所388仲簡單，你見話業績差過預期，但又照升。但，一向港交所都唔係睇呢啲嘢。每日成交幾多你睇得到啦，要佢宣佈先知？有幾多新股集資，有幾多輪，全部日日公開。咁點會出業績先發現有驚奇？

大師冇點你嘅，BlackRock又新高，你見我完全唔會因為中途點升點跌，又去止蝕止賺。完全唔使咩好fancy嘅業務，就係管嘅錢係天文數字，收你少少已經夠。另外，公司近來有啲新搞作都做得不錯。係乜？接人嘅外判。外判乜？就文入面講（BTW，ASML差不多800蚊了）

每日一圖，第一個，你估下咩國家嘅人最多玩過加密貨幣？咁當然係計比例。雖然頭三位都算係多人口，但唔係咁易估。幾個國家有乜共通點？文入面講，但肯定唔係好high tech

第二圖，都講到好白，科企同畢菲特嘅巴郡面對差不多嘅問題：錢太多，投資落自己業務都用唔晒。咁買人呢？又嫌貴，又未必批。咁最後巴郡做咗乜？估到啦。呢個亦係美股一路有得升嘅原因。

第三圖，之前都提過下，奧運獎牌同乜有關？人口？咁越南巴基斯坦拎幾多牌？錢？咁新加坡呢？明顯地兩樣都要有啲，亦即係個經濟體糸嘅規模。個圖話到畀你知，點解美國嘅牌少咗，點解印度嘅牌多咗。

Good Read，第一篇家庭觀眾唔好學，但真係有人收錢然後幫你搞到其他人嘅戶口被ban．點做法？文入面講。不過話定你知，多人follow嘅就難啲搞。仲有，收錢搞人地戶口嘅人，往往亦係收錢幫受害者復活嘅人。「即係一路都有人話係藥廠整病毒」「防毒軟件公司整電腦病毒」「賣condom嘅公司去轉播愛滋病」

第二文，講點解大陸樓咁貴。咁最簡單嘅答法，當然係「啲人on9」，但咁答嘅多數自己最on9，因為你冇答過任何嘢。點解香港樓貴？啲人on9。點解Facebook 1萬億市值？啲人on9．係咪華人特別鍾意買樓？定唔買樓唔通買長期唔生性嘅A股？（但，你見早幾十年，恒指升幾百倍，香港人都係買樓的），到底咩原因？文入面講

最後一篇，都冇乜好特別。就係話啲要集中精神嘅創作工作，一日只能做四個鐘。不過，我寫書嗰排，好似唔止一日四個鐘。但一來，所以之後咪得返半條命。二來，咁我打字嗰部份，就唔使點用精神嘅，但諗就要

＝＝＝＝＝＝＝＝＝＝＝＝＝＝
一週年！月頭訂最抵！比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100，已經1900人訂！ 畀年費仲有85折，20/40年費VIP 送本人著作一本。
＝＝＝＝＝＝＝＝＝＝＝＝＝＝

我的2020回顧，寫咗7000字，分上下集。下面會有上集全文，但我建議你去Patreon睇，有埋圖有埋link．放心，呢篇係免費的（https://bityl.co/52Nf）

問我就上集嘅topic吸引啲，但2020大教訓在下集。所以睇晒佢吧。

剛剛下集都出埋，呢度（https://bityl.co/52OG）

另外，2020年雖則在我身上發生好多事，但整體都係不錯。想2021知得更多，同埋助養本人（畀人炒咗啦！），請訂Patreon，一星期至少六篇，一個月一舊水有找，已經近1000人 join（https://bityl.co/4Y0h）

========================================

上集
引言—我的2020，一個字，NBA。真係打籃球嘅NBA
被炒記2.0—生涯第二次
Patreon讀者救我全家，好人一生平安
台證消—本人已拎台灣居留證，一切都係為了這一天
投資 —股票總值升咗100%

下集
冇得一年去幾次日本，但我仲可以外遊兩次
好似同我老母炒咗大鑊
其他—睇書睇戲睇波，冇人想知。
2020教訓：唔好杞人憂天。但機會留畀有準備嘅人。contrarian，不朋不黨，unherd．

1. 2020回顧，寫寫下變咗7000字。分上下集出。另外呢篇文係免費的。表面好似上集好睇啲，但大教訓在下集。所以睇晒佢吧。你仲未訂Patreon嘅，即刻去吧，月頭訂抵呀。（https://bityl.co/4Y0h）

引言—我的2020，一個字，NBA。真係打籃球嘅NBA

2. 一個字形容我嘅2020？就係NBA。真係籃球嘅NBA。咩意思？籃球L勿鬧，好可能基於我錯嘅印象：但即使我青春期啲朋友一定一齊睇，我就一路唔太鍾意睇NBA。因為發現，總係睇最後一節就得，我睇都係最後一節先開始睇。最後一節，總係能人所不能，好似幾多分都會追到，又幾多分領先都會被人反先。感覺好似頭三節熱身咁。當然事實可能唔係（歡迎拎數字講），但你應該明我講乜。正如足球賽事，都有統計，補時嗰幾分鐘，入球量不成比例地超高。因為防守嘅冇力，落後嘅豁出去，而又有時畀人打反攻。

3. 2020，原本是如此美好。C’est bon．但下半年比較多事，特別係12月。如果呢個回顧在11月做，應該會幾唔同。

4. 成個2020年，我自己打分，應該係6-7分。但如果11月尾打分，會有7-8分。

5. 2020對大家嚟講，兩大件事，可能係肺炎，同埋國安法。但講真，帝力於我何有哉？我又唔係東渧汶人。唔係冇影響，但如果我拍戲嘅導演，我都係拍小人物嘅故事，細節你咪會睇到。甚麼人類福祉呀命運共同體呀香港已死呀，講真，I couldn’t care less

6. 而舊文都講過，我呢啲情況，人大咗，冇小朋友，又唔係搞生意，真係冇乜好寫的。搞生意嘅，每年講開分店新產品都得。有小朋友嘅，呀佢今年識屙屎啦呀佢今年打飛機呀，又有得講。我呢？冇乜好講喎

7. 後生，仲會有升班呀（唏果時升班轉同學好大件事，同心儀女同學編咗唔同班可能就咁GG，而家好似少子化就冇呢啲嘢），考試呀，入大學呀，出嚟做嘢呀，初夜呀（我就連初夜都寫過），轉工呀，結婚呀都可以寫

8. 但到我咁年紀，唔生仔，唔搞生意，就冇乜好寫。最多係紅事白事，托賴冇乜。

9. 咁所以，往往要寫嘅，都係去旅行（well），（被）轉工，睇咗幾多戲，食咗幾多粒星，去咗幾多次日本，咁上下。

10. 不過今年都係有啲唔同，去片。

被炒記2.0—生涯第二次

11. 就是咁。12月14日，我在台北14天隔離中。忽然有人通知我，我被炒了。唔止send個email嘅，有開埋Zoom，仲堅持想見我個樣。係想睇我咩反應？好彩我掉走咗啲自瀆完嘅紙巾（14天隔離有乜做？）。又，好似應該係Letter of Redundancy，但what can you expect？而咁並唔會令我翻生嘅。呀，我當然係去到29號佢地三催四請我先acknowledge 啦，what can you expect？而聽講，我係放緊年假的。

12. 往後我會再寫篇文講，但，唔少人都問三個問題，我呢度答埋先。第一，「點解？」。噢，我早已學會唔問呢樣嘢。重要嗎？當然另文可能都會講，但真係不重要，你畀人飛都唔使問「點解」的。第二，「等你放假唔在香港先炒？」。咁to be fair，你放假唔在香港唔係一個要等你返嚟先通知嘅理由，況且唔止我一個。第三，「咁你會唔會在台北長住？」。咪玩啦，就算我想（而我暫時唔會），都不能。我出糧出到3月，傳說中的3個月通知

13. 影響？當然是有的，冇咗個收入來源喎。朋友都紛紛鼓勵，「係佢地唔識貨」（我不反對），「以你才華實好易XXX」。幾乎搞到連我都信埋。但，朋友梗係講呢啲，唔通講「你條仆街多行不義必自斃抵你有今日，我睇你點供樓？」？「你條死肥西嚴重overpaid仲邊有競爭力？」。可能事實，但唔會有人講。

14. 現實啲睇，我搵返份人工爭唔遠嘅工，我唔覺得好難。問題係，除咗人工仲有其他嘢嘛。「要做到我仆街我又唔願」。所以係有點難。

15. 至於生計呢？你睇我Patreon成千人訂，咁你大約都知我一個月收幾多。咁，點講都係冇咗份工我會冇錢開飯供唔起樓甚至要去少次日本。頂多食米芝蓮冇咁爽，不如唔好食兩星食一星（但，兩星先性價比高！）

16. 不過話說回頭，冇咗份收入，影響都係十是釘嫂（最撚憎啲人美式口音講十是單嫂，例如我大老細）的。你試下叫你公司個CEO減一半人工丫。係呀，對佢生計完全冇影響，但都覺痛的。

17. 寫得太長，大約係咁，另外寫篇新文講。

Patreon讀者救我全家，好人一生平安

18. 舊年嘅回顧寫過，2019成就之一，係Facebook Page有點成績。今年呢？2020年頭講緊7000人。去到年尾差不多一個double，當然亦都帶到啲收入畀我

19. 但，同我開咗Patreon比，Facebook Page不值一提。

20. 如果唔係12月畀人炒咗，咁我諗全年我放最重要嘅，就係，8月開咗個Patreon．十分，十分，十分重要。因為，真係算非常，非常，非常成功。4個月我上咗近1000個讀者。固然係我有料到（唔通我覺得自己廢都好意思收錢？），但亦係大家有眼光，肯支持我。

21. 亦都有機會另文寫。但正係因為有咗Patreon，所以12月14日我台北知道被炒時，雖然係有啲意外（12月頭先同我講緊下年大計），但我亦只係「哦」咗一聲。甚至好快手咁同埃汾太，朋友，網友講。

22. 我再冇好似2014年咁憤恨（唏嗰時第一次嘛），亦冇擔心生計。唔係故意扮不在乎，而我真係不太care．「話唔care你仲寫篇文？」。你就搞錯咗了，主要係娛樂你地，同埋用嚟吸新讀者。我本人真係冇乜感覺，甚至唔覺得值得要寫多幾篇文。至少你見我而家都仲未寫，頭七過晒，七七都嚟緊。

23. 唔係有咗Patreon嘅收入，我點會咁老定？況且，除咗錢，亦係認同。你地真金白銀畀錢覺得值，就係最簡單嘅認同。唔想好似好自大，但，我呢度嘅收入，已經多過唔少人嘅正職。仲唔係代表你地十分認同？肯定唔係阿豬阿狗都可以有咁成績

24. 我真係覺得開心之至，甚至幻想，原來我嗰種midnight in Paris嘅想像（睇得耐嘅讀者應該知道我幾鍾意歐洲），已經成真。就係以前啲畫家作曲家咁，靠啲貴族養，專心做創作。不過而家科技先進，你地變咗貴族。喂，幾咁寫意

25. 我甚至諗，我可以日本住兩個月，韓國住兩個月，台北住兩個月。周圍去。試問有乜工作可以咁？至少以我嘅能力，冇。美中不足係因為疫情冇得周圍去。

26. 所以，多謝大家。你仲未加入嘅，好快啲了。

台證消—本人已拎台灣居留證，一切都係為了這一天

27. 第三件大事，當然係拎咗台灣居留證，都係12月發生。亦係我年尾去台灣嘅purpose，舊年回顧都講過。2019年尾拎咗個副本，今次去換個正本，就係上面呢張卡。原本想復活節去換，但當時已爆疫情。延期一次，去到年尾，疫情依然。再唔搞？又要再搞良民證，又要做多次體檢抽多次血。咁反正剩埋好多年假，所以即使隔離14日都照去。中途仲畀人炒埋就估唔到。

28. 又係FAQ：咁我變咗台灣人未？請define 台灣人。但如果你講中華民國公民，我唔係。我冇護照，冇得投票，唔係公民。我拎嘅只係居留證，正如綠卡都唔同美國公民。但我可以在台灣工作（雖然我唔會）唔使額外申請，同埋入境唔使再拎台證。大約係咁。

29. 幾時過台灣？另文再講吧。但唔會係短期內。兩三年，應該唔會。但十年八年後？應該幾大機會。

投資 —股票總值升咗100%

30. 今年嘅投資，我覺得係不錯嘅。具體？我都唔係好知實數。知都唔同你講。一係啲友又話你炫富晒命（但我可以有幾錢？唔通有幾億港紙？定窮到得幾皮嘢？），一係又話你嘩咁撚少錢都拎出嚟講，冇意思。

31. 但我發現，真係好少人嘅個人回顧，會寫呢樣嘢，令我大感不解。而呢個同我做唔做金融係冇關的，我估即使我2021全年失業或唔係做返金融，我個回顧都仲會寫呢樣嘢，

32. 你話港豬又好，小乘佛教又好，顧掂自己先又好乜都好。但真的，冇人畀你自己更愛你，而做大事都係銀紙，銀紙，同埋銀紙。蔡英文政府批個居留證畀我，係因為我投資咗600萬台幣，唔係認同我有任何才華。講真，你嘅個人投資，點會唔重要過咩疫情重創經濟之類？

33. 言歸正傳，今年我嘅股票倉位總值，由低位（當然係3月），係反彈超過100%嘅。如果用年頭同年尾比，都差不多有100%。嘩。

34. 但唏，唔好興奮住。首先，唔代表我啲股票回報係100%．你心諗我買乜？我推嘅股票，Patreon讀者大約都知係邊啲，個別可能低位真係有一個開，但夾埋晒照計唔會。事實我亦只係追求同大市差不多同步，已經好夠。咁即係，我係有新錢放入去嘅。「包括大家Patreon嘅錢」「仲有啲人交年費」「其實Patreon嘅錢夠我買層新界樓首期」

35. 另外，股票倉位升100%，唔代表我副身家升咗100%（當然由3000蚊變6000蚊都係100%）。有其他嘢嘛。「喂你又話叫人stay fully invested？」。係喎，但，「咁我仲有層樓嘛」。冇正式計，但照計全年應該變動不大，可能估值微跌添，但我又還咗12個月錢，拉勻個net value（賣出去減返爭銀行嘅錢），應冇乜點變，都係200萬多啲。冇乜秘密丫，唔少人都知我住邊，一個單位幾錢好易知，咁我上年亦寫過爭銀行唔夠200萬。一計就計到。呢部份，當然原地踏步

36. 仲有，本人搞投資移民台灣，咁600萬台幣搞咗間公司嘛。咁撇除啲各種租金呀，入貨呀，水電呀，出糧呀，董事人工（即係埃汾太當年嘅生活費）之類，都仲有約100萬港紙剩。嗰度又係冇郁過。「點解唔買台股？」。有諗過架，但雞同蛋問題，我都唔係公民，又冇地址，難啲開戶。

37. 「咁現金呢？」。冇喎，除咗以上講嘅台幣外，我冇現金的。真係幾皮嘢都冇架。抽iBond都問朋友借錢，服未？

38. 2020對投資嚟講係極特別嘅一年，甚至特別過2008/9。會再寫文講

剛剛下集都出埋，呢度（https://bityl.co/52OG）

你仲未訂Patreon嘅，即刻去吧，月頭訂抵呀。（https://bityl.co/4Y0h）

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
Ivan Patreon，港美市場評點，專題號外，每日一圖，好文推介。每星期6篇，月費100蚊唔使，4個月已900人訂！（https://bityl.co/4Y0h）

［匯豐強勢，小小啟示］2021有息派，咪好咯。根本最初就無辜之極，畀英國政府夾硬屈。但，之後又點？

1. 前作（睇最好，唔睇都不影響本文）領展70蚊，小小啟示　（https://fbook.cc/3JCl）。同系列仲有「中概股冇事，小小啟示．迪士尼歷史新高，小小啟示．銀行年尾減按揭息，小小啟示．」， Patreon已寫（https://bityl.co/4Y0h），請訂。或者睇完呢個Post覺得精彩再訂都得。

2. 久休復出，呢篇有啲火。寫文有火係好重要的，冇火嘅應該收檔，唔好呃飯食—雖然我冇收你地錢。咁唔收錢都咁有火，Patreon就仲有火！月頭支持下出火啦（https://bityl.co/4Y0h）

TLDR：2022年5厘息，很好。但2023年呢？會唔會都係買4厘息嘅領展好啲？當然啦，都係睇價。唔買股票嘅人其中一個最大嘅盲點。故事好多人識講，但再好嘅公司都有個價，再垃圾嘅公司都有個假。呢下先最難判斷嘛。你知人地未來十年搵幾多錢，都未必判斷到個股價之後會點的。

3. 匯控近嚟走勢唔錯，上到3個月新高，44蚊了。短答案，當然都係唔應該買。但仲想探討幾樣嘢。首先留意，近期係強，但年頭都仲60蚊，都仲係跌咗三份一。

4. 至於低位？穿過30蚊添，咁有咩人低位撈？多數都唔係你。低位買嗰個叫做平保。服未？3億買落去。錢多咪自然心安，幾時都係財不入急門，你拎啲救命錢去賭，必然輸死。

5. 另外，的確嗰時係全城皆死心，一沉百踩（其實4月已踩咗好多腳）。咁亦都真係有人話，喂，嗰時已經極悲觀啦。事實見到果然如此。都係老教訓，別人恐懼時我貪婪。不過，亦係成日重覆嗰句，當局者迷啦。你而家睇返當然容易，但當時好難去睇到幾時先係「最恐懼」。你代入下，你係個有1000萬身家買晒匯控收息退休嘅老嘢，4月息都唔派，股價仲係咁插 — 而你仲有500萬，你真係仲會買落去？

6. 講返近期，咁呢排升乜？正如寫領展時都討論過，講舊年嗰啲咩9厘息，算吧啦，意義近乎零。講咗N咁多次，「股票係炒將來」，你舊年派幾多厘息，關我乜事？又唔係我有份。好少少嘅你至少應該睇Bloomberg之類嘅2020派息，但更正路應該睇2021 2022，因為，老細，而家都2020年12月啦。投資者會睇幾遠，呢啲真係冇得量化，但very rough rule of thumb，大半年至一兩年都還好。

7. 咁但，當然，係有傳英國（同歐洲）會容許返銀行派息，咁當然會幫到公司，但，傳都傳咗好耐，乜都反映晒。話說回頭，由頭到尾我都覺得係一場鬧劇。你有啲英國銀行，金融海嘯幾乎沒頂，要政府打救。咁拎得政府錢當然有代價，你成為半間國企，總不能亂咁派息益啲Fat Cat．問題係，大佬，匯控08年根本冇問政府拎錢！供股嘛。但今次危機政府一樣管你，「喂我唔使要你啲錢，上次都冇拎到」「到時你就會話要架啦」。

8. （最新你見到超市Sainsbury 回返水畀政府，就係唔想阻撚住派息派花紅。當然香港就有大快活拎咗補就業照派息，又冇話唔得，補就業畀你出糧嘛，咁有出糧咪得）

9. 而另一方面，官嘅嘢，梗係最緊要唔好爆鑊。唔派息，你啲股東咪嘈咯，嘈嘈嘈嘈飽佢，吹得我脹？而我冇見嗰班鬧匯控嘅人去英倫銀行度嘈。事實而家見到，監管當局係過慮，銀行嘅情況遠比佢地想像中好—但，再講一次，官嘅嘢，話知你啦。畀你派息又唔係佢有份，但出咗事佢要孭鑊嘛

10. 但講返股價，都係唔好有乜期望。係呀，會派返息，但派幾多先得？寫文時唔在公司，但睇返大行高盛報告（大約都有個譜）（https://bityl.co/4hwI）—2020年就雞碎咁多啦。但2021就 3毫美金，2022就 4毫美金。即係2021就5厘息，2022就7厘息左右，還好啦

11. 之但係又，以上，係高盛估計啫。而高盛係比較進取嘅（唔進取點justify 51蚊目標價？）（＊）。2021 2022 佢估 3毫同4毫美金派息，街（大圍嘅consensus）就估2毫半同3毫咋（如圖）。如果用大圍（沙田嘅未知）嘅數，就即係2021 就4.5厘，2022先5厘—又唔係好吸引咋

12. 因為仲有一樣嘢，樓上講嗰啲派息—派到先係。銀行始終唔同領展咁，2022咩世界，邊個知？就算2022年得，2023呢？唔係玩嘢，而係真係得罪講句，「好撚多人呢，唔識就咪撚講啦」。唔係咩好火箭科學，你考CFA Level 1都要學，大學讀Finance 101 都一定學，discounted cashflow．你老味你收息收一年架？收兩年？收三年？你計條式係將未來咁多年嘅嘢discount 返晒嘛，直到無限—因為企業可以永生，永生過羅永生（又，唔係有人以為加到無限結果都係無限架可？邊個教你數學？我啲學生一定唔會咁。香港地STEM嘅嘢）。

13. 你要嘅，今年派10厘息都得架，咪預支蜜月畀你（＊＊），之後冇得派咁解之嘛。成個諗法都唔make sense：你買落間公司，梗係覺得啲錢在佢度好過在你自己度啦。否則點解你唔自己炒股票？聽講呢排個個都一個星期執幾成喎。

14. 而N咁多人，都係唔知公司係可以忽然唔派息嘅。4月咪領教過咯，宣佈咗都可以收返，除埋息亦唔會加返畀你（＊＊＊）。由始到撚都合法，亦一路公司做，只係之前啲公司冇咁大冇咁多人受害。嗰班話去法庭投訴去證監告嘅，你見有冇have a case？當然而家股價彈返上嚟咪唔嘈。升上返200蚊錫晒你添。

15. 然後你睇下，領展連今年咁嘅情況都唔使減租 仲似乎唔使減派息，應該真係要核戰或者外星人侵略地球領展先要減租減派息。

16. 事實係，領展上市咁耐（當然都唔係好耐，未夠20年），從來冇減過派息。未必去得到美股講Dividend Aristocrat 嗰種水平（有啲要睇廿年甚至廿五年），但，呢15年間，匯控已經兩次reset派息啦（如圖），仲要供股添。

17. 而舊文都寫過（https://fbook.cc/3JCl），領展呢種穩定性，十分值錢。牙醫同你自己炒股嘅分別，牙醫今日搵80萬，你炒股搵100萬—但佢都係有錢過你（除非你係1億本搵100萬嗰種）。背後嘅alternative path唔同，佢再衰都有幾皮嘢個月，你炒股嘅，倒輸都仲得。

18. 反轉頭講，你見咁多人「靠匯控收息退休」，咪知道呢種「穩定提供派息」嘅嘢係好有市場—只係你嘅期望錯咗啫。呢個年代，冇得穩穩陣陣8厘息架小朋友，怪邊個？美國聯儲局啦，歐州央行啦，英倫銀行啦，日本央行啦，人民銀行啦。其實人類好似幾百年歷史都係玩印銀紙，你有冇見有得收返？你有邊樣嘢會平過五十年前？有嘅，去日本咯，同埋電視機之類（＊＊＊＊）。只係近十幾年更加肆供忌憚咁解。Another Story．

19. 仲有最後一樣，近期銀行股強勢（國際同香港，中資另一回事），亦都同美國長債債息反彈不少有關。銀行就係借短錢放長錢嘅一個遊戲，長債債息升，對銀行息差係好事。

20. 咁做乜長債債息彈？又有人話係因為通脹預期，如是我聞。「不過債息高唔係應該不利股市？」「earnings yield gap嘛」。係就係，但又係嗰句，真實世界唔係科學實驗咁，唔係債息忽然抽上嚟，股市即插—正如之前都唔係債息一跌股價就升。

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
月頭訂最抵，Ivan Patreon，港美市場評點，專題號外，每日一圖，好文推介。每星期6篇，月費100蚊唔使，4個月已800人訂！（https://bityl.co/4Y0h）
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
（＊）大行報告往往要寫sort of「how we different from consensus」嘅東西，因為要同客交代，「做乜要睇你」。但實情多數係浪費時間，self defeating，好似匯控呢啲，閒閒地五六十個分析員寫，點樣人人都唔同？人人都contrarian，咪人人都唔係contrarian 咯。最後根本大家個consensus都係稻草人。你又話街度個個睇淡我地睇好，佢又話出面間間睇淡我地睇好，事實係人人都睇好。哲學呀。

（＊＊）預支蜜月呢個term幾耐冇聽人講過？證明而家婚前性行為係default，甚至拖前性行為都係default。世界係進步嘅（＊＊＊＊＊）

（＊＊＊）而我到而家都唔明點解有人覺得除咗淨要畀返佢。全世界都唔會咁做。而講嘅十個有十個都唔知咩係除淨。

（＊＊＊＊）呢個亦係量度通脹嘅一大問題，係呀，而家啲電視機平過當年，even in nominal terms．正如你而家啲電話咁撚勁，都係賣幾千蚊，config勁過晒幾十年前嘅　電腦　電話　相機加埋喎，仲要平一大截。不過人類係進步嘛，而家仲叫你睇大牛龜電視用大哥大咩。所以官方「通脹」啲嘢唔好太過走火入魔。

（＊＊＊＊＊）問題永遠係，後生仔就有時間有體力但冇錢溝唔到女，出嚟做嘢就有體力有錢冇時間溝唔到女，到老嘢就有時間有錢但冇體力溝到女都冇用。解決方法？偉哥。所以點解輝瑞股價升極都有（＊＊＊＊＊＊），「你估真係靠疫苗」。或者，做富二代。亦證明偉哥幾咁偉大—佢幫你補返做唔到富二代嘅不幸。

（＊＊＊＊＊＊）任何人同我講　有志者鄧竟成　或者　when there is a will there is a way嘅，我都係傳返輝瑞嘅股價圖畀佢—如果你講嘅嘢成立，人地應該執咗笠。

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
月頭訂最抵，Ivan Patreon，港美市場評點，專題號外，每日一圖，好文推介。每星期6篇，月費100蚊唔使，4個月已800人訂！（https://bityl.co/4Y0h）