外圍的核心內圍《第二回》
上回講到我喺一間體育資訊公司門口徘徊，結果入埋去interview，最終成為員工，而請我嗰位主管叫阿明，為咗令大家更了解成個架構，以下係真實中角色人物分佈 (PS：呢間公司嘅人對我好好，我唔想佢哋身份曝光，所以將所有人名都化咗)。
👉🏽終極Boss鷹哥 (好少返公司，有啲似加藤鷹，所以化名鷹哥)
👉🏽Boss山哥 (金主，大股東，好人，成日返嚟公司Hea)
👉🏽瘦骨仙 (細股東，同佢冇乜交接，不過最後因為佢而冇得做)
👉🏽阿明 (管理晒成個Office)
👉🏽Ricky (管理資料輸入組)
👉🏽一堆嘍囉 (包括我，隸屬資料輸入組，入下足球賽果，打下賽前賽後分析)
公司大約25 ~ 30人，一半以上都有背景，唔係邊個邊個大佬啲手下，就係乜哥物哥啲親戚，是但得罪一個都好麻煩。
Ricky係我直屬阿頭，廢人一個，冇一樣嘢落手落腳做，大部份時間執死雞同埋認叻，喺老細面前扮到好能幹好有衝勁，佢有一句口頭蟬，就係「明白」，每當Boss同佢講嘢，Ricky就會扮晒一臉認真咁聽，每隔幾秒就好似機械人咁答「明白」。
阿明一早睇穿Ricky係閪佬，有一次開會講緊公司行政嘅嘢，Ricky又係咁答「明白」，人哋嗰句說話都未講完，Ricky已經答定「明白」，阿明終於忍唔住扯火：「明明明！你明乜L嘢呀？」當時我哋班嘍囉喺半瞓著嘅狀態都嚇醒，只見Ricky面都青埋，我真係好心涼呀。
社會有千千萬萬個Ricky呢類人，廢唔係重點，識得擦鞋，拉關係同埋阿諛奉承就自然搵到食，我哋都見慣不怪，我只係想多番一兩個阿明呢類主管，心水清之餘仲夠膽爆你一鑊，可惜我之後幾份工都遇唔到，Ricky呢類就大把。
Boss山哥係公司金主，五六十歲，據聞海外業務係賭波公司，所以非常有錢，主力係享受人生，真係唔使做但係大把錢嗰隻，得閒返公司坐下，身邊好多江湖中人，但佢其實冇乜江湖味，仲要幾好人，有啲爸爸feel，會同我哋班嘍囉傾閒計，講下做人道理，佢自己係咁賭波，但就一直叫人唔好賭波。
山哥對上係終極Boss鷹哥，唔知係咪江湖中人特別敬重啲大佬，所以山哥口中嘅鷹哥係十分猛料同浮誇：「聶仔，你知唔知鷹哥好有face？費格遜會打電話畀鷹哥，同佢講曼聯嘅出場陣容，佢哋兩個好friend架。」
當年曼聯領隊仲係費格遜，但你打死我都唔信費Sir會Call鷹哥報告出場陣容，我自己開波前上網都睇到曼聯出咩人啦！另外我想問下鷹哥同費Sir係用廣東話交談吖，還是用英文呢？當時我只係覺得山哥幾廿歲人傻得好可愛，點知隔離有啲嘍囉仲要補多句：「係呀，鷹哥同費Sir好熟架，嗰次打嚟同佢講加利尼維利同碧咸會正選出場。」嘩，原來一個二個都係Short架！古惑仔唔係應該好古惑架咩？點解可以Kai到呢個地步？
我唔敢笑，一來未過試用期，二來我知佢哋背景，笑咗我驚冇命返屋企，我唔肯定鷹哥係咪勁到會同加利尼維利周圍食咖哩，我淨係肯定呢間公司啲人係痴根嘅。
呢班老粗字都唔識多隻，佢哋從來都唔知英文字母有26個咁多，數嚟數去都係數到E，所以吊過下鹽水同埋食過下夜香嘅我好快就上到位，喺呢度識得用「You are」好叻架喇，佢哋真係夠膽用「You is」、「How money」同埋「How time」架。
由於山哥覺得我好幫到手，所以十分願意同我傾計，講好多足球圈嘅真實情況畀我聽，後來仲帶咗我去馬來西亞參觀佢個外圍總部，呢啲機會真係有今生冇來世，下回話你知我喺馬拉有咩奇遇。
#賭波害人一生
#唔好賭波
#曼聯
#費格遜
《第一回》
https://www.facebook.com/officedaily/posts/522113084902184
賭波害人一生 在 欄杆飛滿天，公安車翻倒賭波害人，影響一生| By 赴湯2.0 | Facebook 的推薦與評價
欄杆飛滿天，公安車翻倒賭波害人，影響一生. ... 白衣人無差別襲擊人群，香港警. Apr 23, 2023 · 2.3K views ... 全球20個城市香港人，聯合舉辦. ... <看更多>