我:「最近好嗎?」
Winnie:「我好好呀,你幾好嘛?最近天氣凍,著多件衫呀!」
佢係一位64歲嘅女士,亦係我以前嘅求職者,當年有間會計師樓要茶水姐姐,我介紹咗Winnie上去interview之後,對方一直採取拖字訣,淨係叫我hold住,差唔多一個月喇,人哋唔使食飯咩?點hold呀?
某日Winnie打嚟:「唔好意思呀,今朝飲茶個位置收唔到電話,驚你打過畀我。」呢句開場白應該諗咗好耐,可想而知佢一直等緊通知,年紀大好難搵工,緊張係理所當然。
會計師樓嗰邊好冇品,依然冇答覆只係一直叫我hold,其實機會應該好微喇,不過呢單係我入行後第一隻job,嗰種挫敗感唔識形容,曾經諗過獵頭咁難做,不如轉工啦!又要追個客,又要同求職者交代。
但係Winnie嘅積極態度令人好感動,我打開求職網search Pantry Lady,得5間公司登廣告請人,逐間打去問使唔使介紹?好多都cut我線,最後一間律師樓竟然有彩蛋,個HR聽到之後仲開心過我:「搵咗好耐呀,係咪有人?」
第二日安排見工,雙方一拍即合,Winnie成日話我好幫忙,其實係佢幫咗我先啱,睇住Winnie嘅積極態度同嗰種蠻勁,啓發咗我主動搵其他客,我畀咗生活上嘅希望佢,但佢亦畀咗工作上嘅希望我。
情況好似呢條片入面嘅主角,日日被「腦細」壓迫,搞到有開工冇收工,媽咪為咗煮飯畀佢食仲整親隻腳,可能真係「天將降大任於斯人也,必先苦其心志,勞其筋骨」,男主角照顧完媽咪,即刻撞出一條買餸app嘅靚橋,你以為佢畀咗「腦細」生意上嘅希望?點止呀,佢仲為其他買餸嘅人帶嚟生活上嘅希望同便利。
其實唔止公司或者「腦細」,人人都需要品格教育,有人畀咗你希望,一定要傳遞出去,同樣為其他人帶嚟希望。
#人人都需要品格教育 #品格教育協會 #希望 #買餸app有得諗喎 #晨早6點交proposal係真有其事㗎 #香港品格日 #傳遞希望 #賽馬會品格傳城計劃 #希望就在身邊
Search