回到過去，發現阿媽嘅缺點（上）
如果你回到過去，遇到你後生嗰陣嘅父母，你會點？
關於呢種故事，前有《難兄難弟》，近來仲有《你好，李煥英》，故事感人又搞笑。
而且，無論結局係點，主角都同父母做咗好朋友，發現父母身上種種嘅優點，度過咗一段溫馨嘅時光。
坦白講，我初初發現自己穿越到九十年代，並且喺超級市場遇到做收銀員嘅阿媽，我哋都以為，會發生一段「難兄難弟式」嘅母女情。
於是我故意接近阿媽，同阿媽做咗朋友，呢個時候，佢先十八歲。
先簡介我阿媽係一個點樣嘅人，穿越前，佢對我要求好嚴格。
佢成日都話，佢細個成績好好，可惜屋企太窮，冇錢繼續讀書，佢就好遺憾咁出咗嚟做嘢。
依加經濟條件好咗，佢將所有資源擺喺我身上，希望我會努力讀書，完成佢當年嘅願望：入到最好嘅大學。
阿媽嘅故事都好勵志，佢雖然只係一個超級市場嘅收銀員，但佢從來冇放棄增值自己。
後來，阿媽嘅勤奮上進吸引咗阿爸，身為名牌大學生嘅阿爸，好快就同阿媽結咗婚。
阿媽努力輔助阿爸嘅事業，直到我出世之後，阿媽先慢慢轉型為一個家庭主婦，一心相夫教女。
所以，阿媽成日都教我，唔好貪靚，內在美先係最重要嘅。
美貌只可以吸引狂風浪蝶，真正優秀嘅男人，係會欣賞你嘅內在美。
所以，我穿越到九十年代，喺超級市場搵到阿媽嗰陣，我都有少少震驚。
因為後生嘅阿媽打扮得好靚，收銀員通常係唔化妝嘅，只有阿媽個妝化到花枝招展。
我估，可能咁啱今日，阿媽放工約咗人呢。
阿媽不嬲熱情大方，鍾意識朋友。
我好快就同阿媽做咗朋友，阿媽話：「你叫勤勤？好少女仔叫呢個名。」
「係啊，我媽媽係一個好勤力嘅人，佢希望我好似佢咁勤力，闖出自己嘅一片天，就叫我做勤勤。」我答。
阿媽當然唔知，我口中講嘅「阿媽」係佢。
阿媽點點頭：「哦，你媽媽一定好叻啦。我就唔得啦，中學嗰陣又冇努力讀書，讀完中三就出咗嚟做嘢。」
我好驚訝：「你唔係成績好好㗎咩？」
阿媽望咗我一眼：「你係咪記錯咗第個朋友啊？成績好，就唔會中三輟學啦。」
「可能你屋企窮……」我嘗試幫阿媽辯解。
「窮就係窮，但真係成績好好嘅話，拎埋獎學金讀上去啦。」阿媽眼珠一轉：「就係因為我細個好窮，我發誓第日一定要有錢，至少要中產啦。」
我又問：「咁你打算點樣賺錢呢？」
「釣、金、龜。」阿媽答得爽快。
我呆咗。
阿媽繼續講：「唔好誤會，我唔係諗住痴嗰啲肚滿腸肥嘅有錢佬，我諗住搵個家境好，自己又叻仔嘅好男人。然後嫁畀佢，下半世都唔洗做。」
「吓？」我已經唔知畀咩反應好。
「所以我日日出門口都化妝㗎，後生仔好簡單㗎咋，你個外表夠靚，佢就會俾你吸引。」阿媽講得頭頭是道。
「係喎，勤勤，你係咪唔識化妝？不如我教你丫，教埋你襯衫。」阿媽好熱情咁講。
我下意識答：「我……我媽媽叫我唔好貪靚，內在美先係最重要嘅。」
「哦，你媽媽梗係會咁講啦。」阿媽聳聳肩。
「你都覺得，內在美先係最重要？」我對阿媽仲抱有一絲希望。
「個個女人都希望自己靚女，老公有錢，仔女讀書叻㗎啦。」阿媽望向我：「所以你媽媽肯定會講，內在美先係最重要。」
下集：https://bit.ly/3wpxawB
Patreon訂閱即時睇下集，快人一步：https://www.patreon.com/tomato28
#短故 #短篇 #小說 #陳美濤 #廣東話 #粵語 #tomatochan #回到過去發現阿媽嘅缺點
超級市場缺點 在 2022傳統市場優點-酒店飯店，精選在PTT上的開箱討論及優惠 ... 的推薦與評價
2022傳統市場優點-酒店飯店，精選在PTT開箱討論和優惠推薦，找傳統市場優點,傳統市場優勢,傳統市場分析,傳統市場vs超級市場在PTT上的體驗文章就來PTT ... ... <看更多>