[免費試睇]男女市場學？我還是相信緣份。
https://www.patreon.com/posts/mian-fei-shi-di-45549073
窮生早前講過，我係理財博客，本身就冇資格寫愛情題目，而且咁多年失敗經驗不少，令一Ｄ人失望傷心過。所以一向少班門弄斧。但係昨天拜讀左一篇講男女市場學嘅鴻文，講到男女要搵另一半，先要了解自己「市場價值」，針對市場需求去「打造」自己，就會成功脫單。Sorry，我作為一個係香港拍過拖嘅正常男人睇左篇咁嘅野，我必須要表達一下我對愛情嘅睇法，何解愛情難以簡單量化？
愛情的「去中心化」
而家Bitcoin咁熱烈討論，相信大家都明白咩係「去中心化」。事實上我地當然知道，香港係有主流價值，我無意對所謂「市場」視而不見。係香港今日咁多窮人，生活壓力咁大黎講，有經濟能力，不錯的薪金，已經置業，擁有不錯的職位，有社會地位，擁有權力等的確會令唔少女性感到好吸引。但係愛情本來就咁好個人嘅事，我地要面對嘅唔係市場，而係「個體」。我成日引電影＜＜一念無明＞＞其中一幕，當中講方皓文有一段獨白，佢話「我係一個普通女仔，想29歲結婚，30歲生小朋友，之後28歲識左前男友阿東，係何文田半山買咗個單位。之後係新聞知道阿東屋企出咗事，阿東入咗醫院再無供樓，阿東亦借落孖展攪到有人要追數。」
係我第一次睇呢段戲果陣，我好毛骨悚然。因為佢講左咁大段野，其實佢要嘅，唔係阿東，而係佢所講果種生活。阿東只係成就佢呢種生活嘅人。而更恐怖就係，佢真係一個普通女仔，好多人都係咁諗野。雖然，我唔信乜野「真命天子」，我認為人係可以同唔同人都有機會過幸福嘅一輩子。但係人唔可以忘記，我地面對嘅唔係市場，而係你另一半，佢係一個人黎。每個人都有佢嘅故事，有佢好同唔好嘅地方。我知道科技令大家識人易左，每個人係１小時內可以接觸到嘅新對象可以好多。咁好容易令大家忘記左，我地目的唔係要接觸受眾，我地係要搵一個自己愛嘅人，重要唔係接觸幾多人，而係你揀左之後能唔能夠堅持，打唔打算溝通解決問題。如果唔係，其實我當你一日識左３個對象，只要你唔放棄，其實你一定可以KEEP住搵到更好嘅人，愛情係唔係一回咁嘅事呢？
反對將人商品化
文中有提到：
"女性嘅價值不斷提升，但市場價值卻不同，女性嘅市場價值有時限性，女性要留意自己「時間值」的消耗。另外，外貌身材同樣是市場(即男士)所關心的，故要適度在這方提升，創造市場價值，當中要點是了解市場想要甚麼。"
我想問如果我用佢呢個邏輯，我作為一個男人。我點解要結婚？我明知你價值有時限性，即係我而家買入你，我可以得到嘅價值一定係年年下跌。乜野人會做一件咁嘅事呢？我不如不停１—２年換一個新女朋友好過啦係咪？人嘅感情係可以咁量化咩？而女人如果有住趁後生用高嘅市場價值黎沽貨，到底算唔算係搵人笨呢？又係唔係覺得自己隨左外表，就乏善可陳呢？我經常同朋友講笑話，其實當你講完你Ｄ擇偶條件，到最後出現係你身邊果個，多數都係錯哂的！原因係因為條件係好「非人化」，係將人斬件黎睇。而人係活生生一個一個，有血肉，有個性，有故事的。我如果齋睇條件就係一件三張野冇樣冇錢冇身形嘅垃圾，但係我從來都有我值得欣賞嘅地方。
人，從來唔係譚仔剔飛仔咁睇。
為何要脫單？
男女市場學講到，我地要順住個市場走。提升市場價以得到「更好」的對象。我想問，咁唔係本末倒置咩？我要脫單，係因為我希望有個我喜歡嘅人同我一齊生活落去。如果我因為要迎合市場變成另一個人，同我一齊生活嘅果個人，到底係唔係真係喜歡我？而又係唔係我喜歡嘅呢？我並唔係話要放任自己嘅缺點，而係我地應該為自己而改變。我地要吸引到我地喜歡嘅人，應該係令自己變成自己想要嘅模樣，之後吸引欣賞我地嘅對象。而唔係扭曲自己性格，令所有人都變成一個模樣。因為投資市場，我地目標好清楚。大家都係想贏錢係咪？有冇人有其他目的？應該冇掛？但係愛情係唔同的，每個人要嘅野都唔同。有人喜歡品味，有人喜歡愛心，有人喜歡地位。唔同人有唔同價值觀。我反而認為，一個人有冇正確表達自己，比有冇呢Ｄ市場價值更重要。因為，同你一齊嘅果個人則將要同你活好長時間，大家有冇太多主觀嘅誤會好影響日後嘅感情發展。
如果你整天對著電腦、打機、看動漫、影相，你要做嘅最自然嘅事唔係去用學習有見識、浪漫、幽默感來提升自己的市場價值。而是你要找一個能陪你打機、看動漫、影相嘅人。佢未必一定好叻，但真正喜歡你嘅人，會為左你去學。最少係你打緊機果陣，佢唔識都會坐係度陪你。而不是大家都放一張「NICE GUY」嘅樣，永遠扮成別人期望嘅樣子生活。
我還是很相信緣份
你話我老土又好咩都好，投資我好信數據。但係就算係大數據橫行嘅今日。好多地方用AI做配對，交友APPS都開始有佢嘅演算法。但係我到今日，仍然好信緣份。因為我由心底唔認為，愛情嘅目標一定係要「成功」。我明白有好多人好希望初戀就終老，但係好似我活到三張野，我回首一諗，我完全冇覺得以前任何一段愛情係浪費時間。所有開心回憶同失敗經驗都有份構成今日嘅我。如果我冇經歷呢Ｄ，今日又可唔可以識到窮太呢？講得俗D其實就係，當你稍為有溝過下女／仔其實都知道，感覺嘅野話黎就黎。人唔係我地想像中咁理性。我地的確會俾好多Factor影響我地判斷，但咁其實又有咩所謂呢？兩個人本來就係因為「喜歡」而一齊，而唔係「有益」而一齊嘛！
最重要係，我唔接受任何人話冇結果嘅感情就係浪費時間。第一，冇人知道一段感情會唔會有結果，我同窮太開始果陣，都幾乎係所有人都唔睇好，結果我地已經行到十年。而有Ｄ感情我自己本身都以為大家好夾，大家都好愛，應該可以行得耐，結果都因為好多事情告終。我地之所以會開始每一段感情，係因為我地相信我地有緣份，所以我地珍惜呢段關係。我地先有係不滿對方嘅時間有堅持嘅心，因為我地某程度都相信，我地一定係上天有所牽引先會相遇，而我地係過程當中都有回憶。難聽Ｄ講就係，如果沒有緣份，我敢講我一定可以搵到比窮太更好嘅人，而窮太都一定可以搵到俾我更鍚佢嘅人。如果大家日日「睇住個市」，又有邊個抽時間去望一望自己身邊果個，原來係你傷心難過果陣，為你送上嘅熱湯呢？
果Ｄ凡事計算得失嘅人， 屹今為止有沒有談過一場「值得記一世」嘅戀愛呢？
身形判斷計算 在 桃園市婦女館體適能健身中心 - Facebook 的推薦與評價
... 般的精美肌肉體格或是女神維納斯曼妙窈窕身形，那就趕快來試試我們的新儀器吧!!! ... 可檢測體重體脂肪率肌肉率體型判斷內臟脂肪等並有專業教練為您分析檢測數據 ... <看更多>