關於 轉化修辭例子 ，我們在網路上蒐集到這些相關的討論、資訊與評價

文學與歷史的重要性 – 養兒育女必須知道的21件中醫知識 題外話

今天本來想繼續寫一篇「養兒育女」系列的文章，然而，心思被幾件事情觸動，想改來討論和「養兒育女」有關，但不是醫學的題外話。

最近忙於新書的校訂，非常感謝圓神出版社、方智出版社編輯群及其他同仁的幫忙，我們有許多討論，我也得到了很多反饋。我們遇到了一個難題，那就是現在的讀者大多不太了解歷史，不知道「張仲景」是何許人也，甚至連「東漢」距離當今大約多少年也不清楚。另一方面，現在的讀者也習慣於淺顯白話的文字，稍微有些典故的修辭就搞不清楚了。擧個例子，暢銷書「當孔子遇上哈佛」作者李克明董事長在推薦序文中用到「親炙」兩個字，「親炙」的意思是親自受到教導、親承教誨，譬如「孟子」用到「親炙」兩字：「非聖人而能若是乎？而況於親炙之者乎？」，「紅樓夢」也寫到：「久仰芳名，無由親炙」。然而，編輯們認爲一般讀者很難理解，得改成白話的敘述。而翻開現在的報章雜誌，常常看到錯別字，網路上的文章更不用説，往往文字粗淺、語法錯誤、邏輯顛倒，正確引用經典字句及歷史故事的更是少之又少。

或許有人會説，這又有什麽關係？語言文字是用來溝通的，只要聽得懂，淺顯雜亂沒有什麽不對，更何況現在是科技時代，數學好、懂電腦就行，文學和歷史根本不重要！

這其實是大錯特錯的。文學與歷史是人類文明發展的基石，也是人腦運作的核心，用字遣詞直接影響到思維的深度及精準度，而人類思考是建築在過去的經驗上，歷史是人類經驗的宏觀故事。文學和歷史兩者常常相伴相輔，歷史造就了文學，文學記載了過去及現在的故事。給大家一個題目來試一試，仔細觀察自己現在所處的四周，看看眼前的物件及顔色，聽聽耳裡接受的各種聲音，聞聞入鼻的氣味，更重要的是傾聽你心裡對這四周一切的感受，然後，用文字寫下來告訴其他人你看到的、聼到的、聞到的、心裡感受到的思緒。當你對文學及歷史有一定程度的了解，你的敘述就不會只是「前面有張黑色的椅子」、「外面傳來汽車的噪音」等等，你會依循文學與歷史對你的潛移默化，思考四周那些景色、聲音、味道帶給你怎麽樣的感受，精準地轉化你的感受到文字上，讓人好比活生生地被帶到了現場，而這個寫作的過程裡，再次提升你的思維能力，不僅僅局限在文學及歷史方面，對你在數學、科學等其它方面的頭腦運作發展也非常重要。

我記得小時候上中學時，得背誦很多文章，除了教科書裡所有的文章都得背誦，論語、孟子、詩經等也得背，就連厚厚的「古文觀止」也背上大半本。那個時候每天都抱怨爲什麽要背誦那麽多「沒有用」的東西，然而，這麽多年過去了，我才了解到，那些文學與歷史才是一個人靈魂的根基、思考力的動能，在我跨越的不同領域裡，都有莫大的幫助。其實，在我認識各行各業的大師級人物中，沒有一位對文學、歷史、哲學等人文知識不深感興趣的，也都表示那些看起來「沒有用」的東西是他們成就背後無形的推手。

回到「養兒育女」的話題，我想表達的是，做父母的不要太功利，急著要小孩子學英文、補數學、上各種不同的才藝班，反而應該培養小孩子閲讀的習慣，多接觸古典文學及歷史。打個比方，無論你學習哪門哪派的功夫，如果沒有足夠的内力，也只會流為表演，無法真的自我防衛或比賽對打。而文學及歷史就像在培養小孩子的内力，雖然十年下來也不一定看得出什麽大差別，當小孩子進入他們的專業領域後，這個内力才是決定他們是否能從「工」「匠」昇華為「師」「家」的主要關鍵。

任何一個社會或教育系統，如果忽略了古典文學及歷史的教育，這個社會注定走向日本學者大前研一講的「社會群體弱智化」！

(http://andylee.pro/wp/?p=8992)
#當張仲景遇上史丹佛

《花椒之味》：香港民族P牌建國心理戰

香港電影永遠承載香港人之集體意識，不論創作者係有意識接收然後加以轉化，抑或只係無意識透露內心想法，文本呈現都有討論嘅價值，以自己方式合理解讀都係觀眾嘅職責。由鄭秀文主演嘅《花椒之味》表面上係講因為生父離世而引發嘅家庭關係思考，但實際上係講緊主角如何面對過去，認清只有獨立至係快樂之路嘅故事，因為個體人格獨立，處理好自身情緒同家庭問題，從來都係民族健康獨立嘅首要條件。放眼東亞，觸目皆是尚未健全之民族主義，日本有日本人之堅不可摧但精神分裂，韓國有韓國人之長期受壓而強弱不定，而台灣則有台灣人之溫吞猶豫因而顯得行事迂迴，香港民族反而係包袱最輕而起步點又相當高嘅民族建國P牌仔。家庭乃係社會嘅基本結構，情緒則永遠係人類嘅長期困擾，梳理清楚，相信觀眾自然會明白到麻木過後更要精進嘅道理。

喺分析鄭秀文飾演嘅主角之前，首先要為香港人已經唔再留戀過去而拍掌，因為戲中由鍾鎮濤所飾演嘅生父，既非象徵英國，亦無意暗示華夏，直接指向大約成長於七十年代嘅香港人。嗰一輩人仍然未學識何謂愛，只係盲從社會主流去成家立室，但又成世人都唔知自己想要嘅係乜，對於家庭只係情義嘅載體呢一點，可謂近乎無知。佢不擅溝通，對曾經有過嘅三個家庭都不負責任，對主角嘅付出亦極之廉價，就連間餐廳都有經營不善嘅問題。呢類人喺香港其實相當常見，佢地遠離華夏食人族，喺香港土生土長，逐漸享受到自由嘅好處，亦意識到善待他人之必要，但始終未理解自由所附帶嘅義務，亦未明白善良首先要施之於家人，至可以推恩於其他人。於是，生父嘅形象即刻變得鮮明而容易理解：做老公做得失敗，係因為佢對愛情同親情都未有深刻體會，由始至終都係顧及自己感受多於家人感受，不斷轉換對象逃避現實，因而無法獲得三個血親嘅衷心敬愛；而做老闆反而過得去，則係因為佢對自己都係缺乏要求，所以自然接受餐廳嘅分工混亂，亦輕易接受他人未有完成崗位職責之事，結果就滋養出唔算深厚但尚算融洽嘅僱傭關係，獲得外人眼中嘅好人形象，如此形象連貫而完整。

因此，主角喺生父病死後，湧上心頭嘅只有一時迷惘，而非悔不當初，因為生父之失德失格，無論如何都已經係既定事實，亦係主角嘅切身體會。三個角色因為喪禮而聚頭，一齊發現生父之面目模糊，正係佢地建立友誼嘅契機。呢種實際上只係新友情嘅疑似姊妹之情，因血緣而起，但絕非因血緣而建立，事關友情之所以形成，完全係因為佢地三個從共同經歷之中發現大家都係努力尋找自我嘅人。生父令佢地誕生於世上，但從來未有肩負應有之責，所以佢地都係靠自己成就自己——如樹之自知，反映於佢對婚姻有所追求，拒絕未婚夫「我可以結婚」而非「我想結婚」嘅思維混亂，一幕已收以小見大之效；如知改名換姓，精進球技，咁啱遇到事業樽頸而陷入低潮，但最後都發現自己精進嘅榜樣原來係一手湊大自己嘅媽媽，生父廉價支持根本可有可無；而如果就係相當典型嘅一類中國青年，因出國留學而稍為恢復善性，識得飲水思源，再次驗證婆孫關係已經走出華夏食人族自相殘殺之傳統，釋懷收場。香港人、台灣人、中國人三個角色各自步入成長下一階段，都係因為自己諗通，而生父只係佢地人生之中曾經存在而且有待整理嘅一小頁，影響之微小，近乎波瀾不興。

香港人成日假定台灣比香港更有條件獨立，但事實係香港同台灣都各自面對緊獨立之路上嘅唔同處境，而台灣民族組成比香港民族複雜，共識因而更難凝聚，自然仍然處於一種心態上獨立但仍然無法輕易回答出「何謂台灣民族性」嘅狀態。戲中如知酒後哭訴，「如果我們很努力了，但世界沒有因此而更好的時候，怎麼辦？」反映嘅係佢仍然未達到專業運動員應有嘅心境，獨自面對結果，受一時成敗所困擾。戲嘅中段，如知母女發生爭執，由於尚未察覺到生父之廉價鼓勵只係自己幻想補完而成，如知一度以生父更識得講好聽說話去刺激媽媽，令媽媽相當傷心，但到最後佢都係明白到媽媽至係願意同後生共同成長嘅好家長，只係表達方式不當，而生父則係長期缺席，從未愛過自己——隔住電視睇佢桌球比賽，已經係生父唯一願意付出嘅所謂父愛，視佢為曱甴，可謂合情合理。對照如樹始終堅持生父確實係傷害咗大家而拒絕認陌生人為父，如知仍然會因為所謂血緣紐帶而同後父保持距離，自我尚未完全確立，甚至仍然未意識到自己之所以成為後來嘅自己只因受媽媽言行身教而耳濡目染，角色成長又隱約折射出台灣民族之困局。

主角對生父有相當清晰嘅認知，花椒之味不痛不癢，正如佢對生父嘅感情只能止步於麻。由未婚夫變成好朋友（劉德華飾）之後，好朋友繼續堅持如樹生父確實愛過如樹，因為佢自己對如樹所抱持嘅正係類近嘅情感，但如樹清楚知道，愛應該光明正大，可以宣之於口，double negative之修辭，已經係婚姻隨時觸礁嘅預警。認真對待婚姻，寧缺勿濫，其實係香港人剛烈民族性於愛情方面之體現，睇喺旁人眼中或者顯得港女，但如此愛情觀絕對比戲中任何人都要成熟，至少佢自己遇唔到真愛，佢都唔會禍及無辜。而麻醉師（任賢齊飾）之出現，亦有突顯出如樹的確頭腦清醒嘅烘托之效，因為佢欠缺明確目標，遠赴敘利亞不過係憑空想像，不切實際，實際上佢只係喺目前工作崗位感受唔到工作嘅意義。而且，佢一時又鼓勵如樹揸大膽車，一時又斷定如樹唔適合揸車，忽然又慫恿如樹退而求其次唔好堅持自駕遊，角色飄忽不定之特質顯而易見，同一心考好車牌嘅如樹又再形成強烈對比。概而言之，如樹之所以同前者無法成婚，同後者亦無法擦出火花，並非因為佢諸多要求，而係因為佢好清楚過好自己一個人嘅生活，好過因為不甘寂寞而隨便進入一段未必值得經營嘅關係。

於是大家不妨回顧電影開首，如樹係點樣應對cold call同埋婚姻不忠嘅客戶。接到cold call，一般人嘅反應多數係唔聽、直接收線或者真係中招入局，但如樹則係對答自如，令對方知難而退；聽到對方訂機票酒店同第三者出遊，一般人可能會有批判嘅神情，但如樹已經散發出見慣不怪嘅氣場，亦懶得同同事分享，足證佢具有相當消化能力，達到花椒程度。然而，大家必須留意嘅係，如樹之麻木，大異於佢生父之麻木，因為前者係因敏感而麻木，而後者則係因膚淺而麻木，兩人價值觀係截然不同。如樹重視溝通，通情達理，進退有度，麻木一面只係顯示於對待俗務同唔合格嘅人，三個角色合力研發配方之積極聚合，自強不息，正係如樹有血有肉之明證；而由一開始坐喺副駕，去到揸大膽車，再去到結局P牌上路，亦係如樹未有死於習慣而且自信未有受挫嘅例子。P牌代表嘅係通過考試，淨返嘅就係路面實戰，而只要交通規則有法可依，自由之旅自然一路順風，隨心所欲。

香港民族自主權移交之後，亦有飽受華夏食人族風尚衝擊而顯得麻木嘅傾向，一度失去活力，失去自我，但發洩過後，總要成長，至係香港民族內心深處嘅樂天本質。如樹知道生父唔可靠，但亦唔再苛責，因為佢明白命運自有安排，所以專注做好自己，但求問心無愧，就如同香港民族新生代亦已經唔再忙於埋怨上一代人安於逸樂，不思進取，因為大家都已經知道所謂泛民左膠都係全體嘅共業，承受得起，至會進化成更好嘅人。香港上一代人身處於佢地嘅時代，置身於佢地嘅空間，總難免受到局限，民族建國思潮自然不成氣候，但香港民族初生代因理解而成長，已經唔再停留於過去嘅麻木，而係趨向緊自主嘅積極。一年過去，如樹再次目睹大坑舞火龍，睇透上一代人好逸惡勞自有前因，發現自己亦有好逸惡勞之民族特質，但佢已經意識到好逸惡勞本身並非壞事，因為有目標嘅人自然會為尋求樂趣而付出，而更廣闊嘅自由天地，只有勇於開拓嘅人至會成就解鎖。香港人從來都係貪玩易悶，抗爭要多變，要流動，要靈活，但正因為有反省，有承擔，而且身受其害，大家都因而認知到只有獨立至可以保衛福地樂土——天高海闊任我行過後，始終要有家可歸，而屋企代表重門深鎖定係安身之所，完全係在乎人嘅選擇。

香港獨有嘅歷史軌跡，令香港人必然成為香港民族，故此獨立建國唔係唯一出路，而應該係快樂之路。如果大家只係想像獨立係不得不選擇嘅路，以無路可退嘅心態去接受獨立主張，咁就會成日落入灰心喪志嘅境地，因為獨立根本唔係active choice。然而，香港獨立事實上就係一個順理成章嘅active choice，大家只係怕P牌建國之後又再經歷辛苦而裹足不前，但若然大家真正明白到人格獨立同民族獨立嘅關係，亦有能力想像建國之後自己可以如何自處，咁獨立就唔會係超重嘅負擔，而係無窮嘅樂趣。麻辣火鍋之味之難以複製，源於生父因曾經錯過而加入紅酒調味，而主旨花椒之味應該如何感受，如何運用，則在乎香港民族觀影之後帶走得到幾多刺激，幾多領會。反送中之後，大家知覺唔再麻痺，方向日益明確，民族建國則係下一個心理關口，只要過到，光明好快就會重臨香港，重臨東亞。

https://gnimmm.com/2020/05/25/fagara/

陳詠謙都有打手。。。。。。

本身對呢個人冇咩唔好既感覺，只係嫌少少哂左陳奕迅啲歌既曲，不過再多睇其他人既comment, 愈睇愈有問題，呀，係咪應該寫篇blog講下佢好？

路見不平，自命正義，終於都要挪用寶貴時間，去點評陳詠謙嘅大作，嘗試為民請命。其實點評歌詞實在非我所長，音律押韻我亦只有皮毛了解，但係畢竟自細聽香港流行曲聽大，有感仗義執言先至無負香港流行曲於我人生嘅啟蒙，唯有挺身而出，盡力而為。先旨聲明，寫歌詞唔同寫散文小說，遣詞造句確實有彈性得多，可以不拘泥於傳統，而寫得意象曖昧，含意深隱，亦唔代表詞作有誤，因此內文要寫嘅，主要係順應網民意見，針對絕對無法原諒嘅大弊，例如立意古怪、錯用詞語、表意混亂等各種問題，某啲顯而易見嘅小病，例如〈龍舌蘭〉直頭唔啱音呢類大家心照不宣嘅，就唔會多講。以下我精選咗十首算係近年街知巷聞嘅垃圾作品淺評分析，希望可以拋磚引玉，畀便交流。

1. 高山低谷

第一首，必定要揀林奕匡嘅成名作，因為一黎呢首亦係陳詠謙成名之作，二黎林奕匡係一眾受害歌手之中搵陳詠謙寫得最多歌嘅一位。由於呢首都算係佢填得相對認真嘅歌，稍為認真去聽，相信大家都意會到歌詞要表達嘅訊息，就係寫二人地位不對等，情人遠在天邊，抒發可望不可即嘅感慨，類似《詩經》中嘅〈蒹葭〉。而正因為立意明確，只要聽眾細加咀嚼，就會發現有唔少用語係異於我地平常嘅語文習慣，而各種誤用，都唔足以稱上鑄造新詞，而係徹底嘅錯用，長久咁用落去絕對會影響我地嘅語文鑑賞能力。

廣為傳唱嘅副歌之中，寫到「渴望被成全」，呢點係中學生都常犯嘅錯，語文水平略高嘅人都會知問題喺邊。首先，渴望社會或他人成全，寫渴望成全已經夠清晰，亦合乎文法，根本毋須強加被字。其次，就當佢係被動句，被動句多數常用於呈現負面情況，例如「他被歌迷離棄了」。雖然漢語歐化潮流之下，被字亦會拎黎寫所有被動情況，用法分別係：一、強調被動，如「他被上司提攜了」，但較恰當嘅用法應該係「他獲得了上司提攜」；二、施事者不明，如「他被痛罵了一頓」，唔知邊個鬧咗佢；以及三、強調謂語，如「民意被政府騎劫了」，突顯民意遭不當操作。近幾年社會風氣好中意講「被自殺」、「被抑鬱」、「被捉迷藏」去嘲諷中國對待異見人士嘅卑鄙手段，亦突顯被字特質。因此，成全本來就必須取決於他人，「渴望被成全」中嘅被字份屬多餘，而參考返林夕作品，佢係傾向少用呢個被字，更加從來唔會濫用去充塞字數。

然後係「腳下路程難以削短」，亦係不當。要貫徹文意，最準確應該係用「縮短」，但係唔啱音，唔用得。削字，多用於削皮去屑、削弱削減、削職以及剝削，而路程之縮減，勉強用削，拎最近則只有削弱削減一義，但削減係指從原定數目之中減去若干數目，多數牽涉具體數量。而「天一黑天一光揮發了一句再會」亦係睇得明而寫不通。考慮到揮發一詞必定要同所揮發之物共同出現，可見句意係指呢一聲拜拜會蒸發會消失，咁睇返上文下理，到底點解突然會有呢句拜拜？同埋周而復始每日講拜拜又應該點樣理解？係咪指每日返工放工同人講拜拜都係多餘？呢句都係有待解釋。加上「只見人下墮」令人聯想到跳樓，「我繼續埋藏我愛戀」嘅愛戀應該寫作感情，以及整體故事空洞，成首歌都無法打動人心。無可否認，用山勢為喻，以陳詠謙水平計，已經係上佳之作，但係真係慘不忍暏。

2. 別來無恙

第二首，因為一句「我現時自己肯做飯」而飽受批評，加上陳詠謙本人沾沾自喜現身解話，亦係一定要寫。首先，我絕對唔反對援引口語入文，推廣粵語理所當然，但豬隊友推廣得眼高手低，就係成事不足，敗事有餘。「我現時自己肯做飯」之所以不能接受，首先係做飯唔係廣東話，做愛至係，其次係破壞意境，寫得太白。根據陳詠謙本人陳詞，佢認為一個人dry到要自己煮飯好適合主人公情況，而唔押韻都係刻意為之，因為咁樣對應返故事主角悔疚一世，凡事都看破，其實呢兩點問題都唔算大，因為個出事位係在於呢句只係表現自己獨立嘅例子，而唔係概括句。副歌開首，普遍係直抒胸臆，或者概括痛心程度，甚少會兜口兜面隊一句嘢出黎，聽眾話聽到尷尬嘅原因，應該係咁。參考返黃偉文嘅「二百年後在一起／應該不怕旁人不服氣」，或者林夕嘅「世界將我包圍／誓死都一齊」，其實都相當直白同口語化，但就一啲都唔突兀，反而引起到好多人共鳴。

值得一提自然唔少得「來年陪著子女學行／紀念當初我們的愛情」。由於主人公目前單身，我地不妨假設子女係指對方嘅子女，但既然係咁，又係邊個想借用呢啲子女去紀念主人公嘅愛情？同埋若要紀念，子女非己所出，兩者關係喺邊？呢句真係相當費解。然後自然亦要談及「王菲的孤寂／多麼孤寂」。眾所周知，王菲有首〈百年孤寂〉，但咁樣抽孤寂二字借代全首，相當突兀。加上以反復修辭強調孤寂，極有濫竽充數之嫌，借用連登網民一句，一個肥柒on9仔自己打緊xanga個場景，真係完全咁呈現咗出黎。而我覺得有一句，亦係表現得出陳詠謙其人對於成語嘅運用係只取片面之意，唔識其中內涵——「恃住雄辯滔滔／隨便的把你喝罵」。呢種情況喺中學生作文之中亦係相當普遍，因為佢地背誦成語而又缺乏廣泛閱讀，對於詞語嘅理解唔係由字句之中而得，因此就會畀老師打曬交叉。雄辯滔滔一詞褒多於貶，多數用於讚美，例如「這位律師雄辯滔滔，聽得旁聽市民心悅誠服」，又或者杜甫《飲中八仙歌》中嘅「高談雄辯驚四筵」，一般係指其人發言具說服力，以理服人。雖然世俗有言，「事實勝於雄辯」，但雄辯唔等同於狡辯詭辯，因此同情人爭執，同埋事後亦知道自己理虧，係咪應該用雄辯滔滔，亦係值得商榷。

呢首歌其實有一點特色相當鮮明，相當陳詠謙，就係每句都係個腦冇點諗就不加修飾咁講出口，而且句與句之間割裂去睇都完全無礙傳意。對歌詞冇乜要求嘅人，未必察覺到問題所在。同樣生活化嘅情節，其實楊千嬅嘅〈假如讓我說下去〉都有，「但我把／談情的氣力轉贈誰／跟你電話之中講再會／再會誰」即係冇人同我傾電話，「暴雨天／我至少想講掛念你／然後你／你最多會笑著迴避」就係顧左右而言他，甚至熄機潛水，但林夕之所以一啲打xanga嘅感覺都冇，係因為佢掌握以至駕馭得到何謂藝術——將自然同現實加以修飾加以轉化，呢一層人為工夫就叫藝術。〈別〉描述主人公分手後陷於懊悔，內容貼近生活，照計係好易畀聽眾代入，但就正因為咁，意圖代入嘅聽眾聽到一頭霧水，代入無方，可以話係高不成低不就。

3. 經過一些秋與冬＋哪裡只得我共你

Dear Jane嘅簡單易明K歌之選，又係陳詠謙傑作。「兩眼一黑／然後失控」令人聯想到頭暈倒地以及精神病發，九唔搭八，而領起句嘅「一些」同「與」本來就係蛇足，事關寫歷經秋冬同揮去驚恐就已經夠曬精煉。副歌「 無謂再關心你／我沒資格慰問你／無謂再騷擾妳／我沒這塊厚面皮」其實都幾適合失戀聽眾，但量詞之選用，直接反映出陳詠謙不諳避俗，缺乏語感。所謂語感，其實就係語言使用者對其所熟悉嘅語言有冇敏銳感覺﹐能否領悟語言文字真實意思以及必然會引起嘅聯想﹐直覺必待厚積薄發，同語文根基息息相關。用塊字去形容臉皮，會令人聯想到塊狀死物，進而聯想到牛皮豬皮，就算句子本身幾有詩意，一個塊字都足以盡廢前功。語感佳者，可以善用詞語刺激聯想，但語感弱者，萬一誤用就會弄巧反拙，呢一點，所有寫作者都應當有所警覺。

另外，「得到的若期望有限期／失去的未重聚已別離／後悔如我遍地」亦係反面教材。遍地呢個詞語其實好有畫面，例如自由民主遍地開花，或者風吹草低牛羊遍地，只要一見遍地，讀者就會聯想到數量之多，發展之盛。但觀照呢句歌詞，遍地嘅理應係後悔，但寫出黎引起嘅聯想就係主人公遍地——大概係因為TVB重播《西遊記》太多，我所諗到嘅係孫悟空大顯神通，一條猴毛落地即可化成千百猴子猴孫之勢，同後悔之情極為矛盾，成個感覺極之滑稽。參考返陳奕迅一首〈黑暗中漫舞〉，其中有一句「猶如自卑水銀瀉地」，當中嘅水銀瀉地，即係水銀流到一地都係，令人聯想到玻璃落地隨之流瀉，一發不可收，非常適合用於形容主人公每每獨自揣摩情人心理之時嘅自卑爆發，同時深化主題，令人可以透過具體比喻去感受主人公單戀嘅卑微渺小。兩相對比，大家就會理解點解後悔遍地係不知所謂，而自卑瀉地則係神來之筆。

順手講埋〈哪裡只得我共你〉之中，為人詬病嘅「我們身邊太多假人／心中太多傷痕」。第一個問題，係陳詠謙點解要寫假人，因為準確而言，呢首歌想傳達嘅係對抗世俗眼光，而主要世俗現象並非虛假；第二個問題，係亂咁簡化為假人二字，又會引起不當聯想，令人諗到CPR練習用公仔，櫥窗display公仔，驅趕雀仔嘅稻草人，甚至消防處嘅任何仁。除非佢係明知到會引起不當聯想都要用，否則明顯又係語感薄弱之過。睇埋「途經幾百萬傷口」同「與外界／未隔絕我共你／能停止呼吸」，我更有理由相信，假人所指，真係CPR練習用公仔阿Anne，而「不掙扎／只緊扣」，亦一定係指緊三角巾同繃帶，成首歌係為聖約翰救傷隊暗中宣傳。

意境係一樣好抽象嘅嘢，而某年書展講座，林夕就曾經講過意境可以分為三種境界，一係山寨，二係自己創造，三係灌注生命同感情。第一種，就係運用約定俗成而又根深蒂固嘅傳統意象，亦即係中學生學習寫作必學嘅大自然景物，諸如星星月亮太陽天地花草，其中若果突然出現現代物品諸如蘋果電腦應用程式芝士拉絲抹茶爆漿，文章就會意境盡失，而陳詠謙明顯係畫虎不成反類犬嘅示範人物。第二種，自己設定，就好似林夕有期好中意用探戈咁，以跳舞相持比喻情愛拉鋸，寫得貼切就可以自成一格，睇返陳詠謙大紅作品，可以話係冇一首做到。第三種，用返林夕自己舉嘅例句，「滿街腳步突然靜了／滿天柏樹突然沒有動搖」之所以有意境，就係因為作者觸覺敏銳，以「滿天」而非「滿街」去寫柏樹，所以就描寫到樹勢之高，從而襯托出主人公獨自流連街頭何其微不足道，而其身影又係何其嘅失魂落魄，得出融情入景而後情景交融嘅效果。當一位做到寫景則情景相生，說理則情理兼備，而另一個則直接將秋與冬寫出黎，其後又再將「只知感覺失了蹤」寫出黎，文學係咪真係一句各有各觀點就可以打發紛爭，聽眾心中自有答案。

4. 百年不合

眾多歌手入面，周柏豪其實同陳詠謙係最夾，而原因係周柏豪畀人嘅觀感本來就冇乜文化，因此陳詠謙嘅詞質樸庸俗而又文句不通，反而非常配合周柏豪形象。以〈百〉為例，其實我聽咗好多次，都唔明何謂「即使今生擱淺／苦等隔世盛宴」。陳詠謙低手之處，就係唔識連用一系列有關比喻去經營意象，生硬插入詞語，但又缺乏前後呼應。見到擱淺，讀者自然會聯想到海洋，聯想到輪船，聯想到鯨豚，但〈百〉偏偏冇一樣嘢係關事。由於人係唔會擱淺，讀者必須自行領會擱淺之意，偏偏陳詠謙又冇建構到完整比喻，寫到不倫不類。參考返麥浚龍嘅〈吃鯨魚的人〉，黃偉文寫得清楚吃鯨魚者為何人，所以吃鯨魚呢個人類根本唔會做得到嘅行為亦好易理解，而「隨時能屠殺／也不必講究良心」中嘅屠殺，亦唔會偏向無關主題嘅多餘聯想例如種族屠殺，落點相對清晰。

然後我地亦可以研究「若未夠赤裸／撫摸到永遠」同「在婚紗中再見」想表達乜嘢。前句之中，赤裸應該係指主人公將自己心聲表露無遺，但對方無動於衷，然而呢點基礎，根本幫唔到讀者去理解到底係邊個撫摸邊個，同埋點解要撫摸，可謂上文不接下理。而後句之中，在婚紗中唔同在婚禮中，到底點樣至可以進入婚紗之中，又係百思不得其解。陳詠謙可能會辯稱呢啲就係創意，同埋寫到明在婚禮中再見就係死板，但達到一定文字鑑賞門檻嘅人，相信會知道咁樣寫絕對唔可行。

講返成個敘事，其實真係撲朔迷離。我至今再聽，都係諗唔明到底主人公同埋對方係情根早種，定係有緣無分。歌詞講到今世「當你想行前一寸／愛下去又發現你／站到一邊」，又講「卻是證實這段愛／沒有起點」即係對方根本唔過電，發展機率近乎零，既然如此，點解主人公會有認定大家係「分開一百年／捱到今生才遇見」？「拉扯著那根線」又到底從何而來？《紅樓夢》之中，曹雪芹一開始就以神話領起，寫賈寶玉係頑石入世，而林黛玉則係絳珠仙草，其後兩人一生糾纏係命運嘅安排，此之所以愛得轟烈，傷得淒苦，但同百年好合正正相反嘅百年不合吹到咁大，去到最尾只係講返某一世嘅小情小愛，未免流於小題大做。

5. 小問題＋3am

AGA嘅〈小問題〉係好聽，但一聽就發現取材好大問題。雖然應付失戀各有各法，喜愛夜蒲放肆買醉都可以係反映現實，但主人公個性之差難逢敵手，我估唔到連詩雅都終於會遇到競爭。「穿起高踭取悅人」同「只記得我新結識那碧眼金髪的氣質」，於我而言，某程度上係物化女性，矮化女性；「只須很悉心的設計／裝飾我這身體」同「只須很瀟灑的破費／修葺我每處枯萎」，刻劃出主人公滿足於物質，只顧外在，形象實在相當廉價。最弊嘅係，首歌完全冇任何自強之寄意，反而係以「我只得這一點智慧」為放浪行為開脫，歌手形象徹底崩壞，MK到無以復加。

而用字方面，「我不要雙眼承受雨季」嘅雨季又係毫無鋪墊就彈出黎，引用返林夕嘅意境論，雨季係老嫗能解嘅傳統意象，要寫唔係唔得，但成首歌冇提過水，冇提過雨，連眼淚都冇提過，突然以雨季去寫哭泣，就係顯得突兀嘅原因。再睇「別這樣干擾我一生」，干擾係同接受訊號有關，如果對方係干擾，主人公應該由頭到尾都係對佢反感，但既然曾經癡心錯付，對方好歹都係過氣情人，要貶損對方，以打擾形容，會比干擾合適。參考返黎明嘅〈我這樣愛你〉，會見到林夕有用覆蓋去寫主人公對情人嘅愛綿密如羅網，而「何時才發現／就算天涯海角／都可能覆蓋」之中嘅覆蓋用得準確之餘，更加迎合到和記廣告行銷要求，一石二鳥，天衣無縫。

而〈3am〉其實一首好難出事嘅歌，事關英文部分都應該係跟返demo，偏偏又畀陳詠謙踢出身價。「如假開心開心開始假得很／倒不攤開這張牌」運用頂真，但又係砌詞搪塞；而「終於真的真的不再有情意」同「 終於真的真的不同行」用詞重複，但真的二字唔係歌詞要旨，因為主人公只係夜半失眠，唔係陷入幻想，分唔清夢境同現實。陳奕迅嘅〈不來也不去〉之中，有「如煙／因給你遞過火／如火／卻也沒融掉我」，林夕嘅頂真係用得其所，因為兩句確有承接。而同樣係陳奕迅嘅〈K歌之王〉之中，有「才令我因你要呼天叫地愛愛愛愛那麼多」，其中嘅愛字四連，有嗌破喉嚨之意，係愛到力竭聲嘶嘅出色詮釋，又係用得啱啱好。

6. 矛盾一生＋揮揮手

JW嘅〈矛〉唱到街知巷聞，控訴對方不知上進，無意結婚，好多人都會引用「矛盾只因深愛著」自況，而我自此至終，都唔明乜叫「跌下來瘡疤」，而「怎會沒決心成家」亦有力問鼎陳詠謙十大缺乏語感排行榜三甲。成家呢個用語從來唔會喺抒情歌入面見到係有原因，事關多元成家、成家立室、立業成家中嘅成家，係新聞用嘅正經用語，一般人談婚論嫁，多數都係講返結婚就算，唔會選用咁沉重嘅字眼。正如我地唔會喺同朋友傾偈嘅時候話「有見及此，我會出席」，或者「多謝你諮詢我意見」，而係會講「你咁講，我就去喇」，或者「多謝你肯聽我意見」，又正如去餐廳嗌嘢食落order，我地會講「I would go for this one」，或者「I would like to take this one」，同自己朋友或者情人講嘢，就算幾咁相敬如賓，多數都係講「I want this one」，頂盡都係講「Can I have this one」，用字係應當有場合之分，身分之別，唔可以隨心亂講，任性亂寫。〈揮〉之中有句「成為寂寞人口／脫去戒指」，所犯同上。

而講到用韻乸西，〈矛〉副歌用死「aa」，以嗎吧為主，輔以架怕疤，亦係佢嘅代表作。雖然林夕曾經話過押韻其實並非必要，只係因為要迎合主流見識至堅持押韻，但用韻會令首歌易記易上口，亦令文本朗讀之時有節奏美，都有合理之處。押韻毋須句句押，隔句押亦得，最重要都係睇旋律頭，但無計可施就求其採用「aa」韻，呢點大概就係師承黃偉文嘅結果。黃偉文所填嘅〈囍帖街〉同〈苦瓜〉雖然都係大熱，但取材新穎，都掩飾唔到其人押韻手法之不足——用助語詞押韻，畢竟係有啲技窮。反觀我個人相當中意嘅〈東京百貨〉，陳少琪喺副歌係用「iu」為韻，填咗照秒少調潮票，詞句曉暢而不落俗套，可謂熟能生巧，自出機杼。

再呼應返AGA首〈小問題〉，其實〈矛〉嘅故事都係不知所謂。空有冤氣對白，缺乏具體劇情，hook line勉強可以漁翁撤網，但副歌完全打動唔到人，此其第一問題。第二問題，就係愛情觀片面膚淺，從未細加探討愛情，更遑論明寫愛情，暗寫人生咁樣去傳道解惑，繼續流行曲社教化之功能。林夕寫情寫理天下無雙，黃偉文偏向市井，都算寫盡失戀苦戀，入心入肺；而周博賢專寫時事，針砭時弊，周耀輝別具詩情，寫歌寫出詩嘅朦朧美，基本上係各有特色，而陳詠謙嘅風格，大概就係攞你命三千式殺人於無形，一聽到就想飛歌轉台——我斗膽封陳詠謙為寫歌界嘅葉念琛，相信冇人會有異議。

7. 姐姐＋活著為求甚麼

李克勤自己都係識寫詞，點解會接受到呢首歌詞，我覺得重驚人過向曼聯送禮。「原來沒有你／但仍愛你／才後悔當天不肯留住你」雖然略嫌肉麻，但出現喺主流情歌其實真係一啲問題都冇。問題係，呢首歌所描述嘅係家傭，主人公對佢抱有嘅應該係感激之情，而唔係愛情，到底點樣至會牽掛到「朝馬尼拉的方向想起你」，視姐姐為「愛的傳奇」？唱到「忍痛／將你淡忘」，我直頭覺得李克勤情深過楊過，根本應該離婚休妻，另娶姐姐。

情節上，呢首歌都有犯駁之處。一般而言，如果僱主僱員關係良好，姐姐離職之後，雙方都會保持聯絡，好少音訊全無。而既然姐姐冇離開過香港，亦即係轉咗僱主，咁主人公又點解會炒佢魷魚？「誰料我路過砵甸乍街／竟找到你」呢種電光火石，好難講得通。我嘗試去消化故事，唯一可以諗到嘅就係主人公情不自禁，苦戀姐姐，家人發現之後執意驅逐姐姐，結果主人公只可以喺姐姐有可能出沒嘅街頭巷尾搜尋對方倩影，重溫舊夢。假如有朝一日李克勤真係轉行呢種路線，講婚姻背後辛酸，講自己同屋企姐姐打得火熱，或者大眾會受落都唔奇。

用字方面，呢首歌最差嘅係「天天飾演乖少艾」，其他都可以放過陳詠謙。話說少艾一詞，語出《孟子》一句「知好色則慕少艾」，解年輕貌美嘅女子都真係好有歷史。而現代人之所以認識少艾，相信都唔係因為讀古書，而係聽得多青春少艾呢個配搭。撇開姐姐點解會以少艾形容呢點唔講，艾本植物，少艾即以艾草正鮮比喻少女亭亭而立，可見少已經係形容緊艾，而乖少艾三字呢個組合，就即係用咗兩個形容詞去寫植物，而乖係唔會拎黎寫植物。即係我地可以話一個老人家老當益壯，如同長青樹，我地唔會話佢襟老長青樹，因為長青已經表達到健康，而且襟老都唔會係要黎形容樹。

順便講埋〈活〉。林夕珠玉在前，黃偉文都有首〈燕尾蝶〉勉強壓卷，陳詠謙挑戰社會議題，無異於引火自焚。「容顏暴露摺痕」所指嘅應該係個樣好老，皺紋暴露老態，又係要聽眾自己諗。「幾個悲哀章節日日重播／天降天災萬民地上縱火」，所指嘅應該都係天災人禍大家有責，但縱火狂徒為何人，又係語焉不詳，除咗令人諗到喜怨無常嘅舊約上帝，都真係冇乜idea。

8. 半祝福＋Gonna be alight

周殷廷其人已經不知所終，但由陳詠謙操刀嘅作品，將會遺臭百年。祝福舊愛，同類歌曲多不勝數，但希望情人「快樂得更明顯」，係咪即係指對方之前都係快樂，但快樂得較為收歛？若果快樂都可以有introvert同extrovert之分，而陳詠謙又真係寫得出，其實確實會好有啟發。副歌致命，在於突然加插槍擊，「如果他真的比我好／別再時時開槍亂掃」，again，敗壞意境。Verse2主人公心態慢慢轉變，講起對方已有新歡，其實都易明，但「你已毫無疑問找到安慰睡眠」呢句又係病句。找到應該係指向人或者物件，虛嘅找到人生方向都得，但睡眠係一種狀態，進入夢鄉可以，但搵睡眠出黎係講唔通。

上承周柏豪歌曲入面大量運用赤裸，陳詠謙又再無緣無故加插情色，好地地一首最後祝福，即刻變到俗不可耐。諗到對方會同新歡有性行為係可以理解，但以「隨便白天纏綿／夜晚裸露別來送我上苦路」白描，就係自亂佈局。〈半〉嘅基調係純情，周殷廷嘅定位亦非大講鹹濕，裸露二字亂入，格調之粗劣，真係不敢恭維。

〈G〉其實都係聽得過嘅歌，風格有啲似林奕匡首〈Good Man〉，但細聽之後又聽到副歌有句「甚麼東西正在變做美好的團體」，不知所云。Verse2有句「青春出於笑容裡／開滿花」，其實都解得通，但第二句「率真出於眼神裡／一句話」嘅嗰句話從何而來，又係毫無預兆，石頭爆出黎咁。好地地一個新人，唱咗首膠歌，然後就萬劫不復，真係不無惋惜。

9. P.S. I Love You＋壯舉

張敬軒係我本人極之欣賞嘅歌手，好彩佢人在英皇而非華納，未來唔似會再有同陳詠謙合作嘅可能。〈P〉其實算係不過不失，但因為林若寧同林夕寫過好歌畀張敬軒，而張敬軒自己早期作品都寫得青澀可愛，陳詠謙嘅歌就相形見絀。故事寫因戰禍而天人相隔其實好清楚，但主人公喺副歌嘅內心戲，可謂不明不白。「忘掉了生死／用愛跟這世界對比」，其實睇唔出邊個死咗抑或係一齊死，但既然係人生無常，話係不可以抱著你，會比「不需要抱著你」更加合理。然後「逾越了生死／當知這份愛從沒禁忌」又係全無鋪墊，因為首歌冇講過呢段感情係禁忌之戀，而為死去情人守節，亦唔係禁忌。「生死難忘／別忘記自己」，驟聽似係一種提醒，提醒自己要好好生活落去，但其實突然筆鋒一轉嘅呢個提醒，同「在雲中禱告／祝福你／繼續飛」係冇衝突，因為主人公由頭到尾都冇話過要殉情。

然後繼續睇Verse2﹐病句又至。「當一切／沒法逃過了劇震」，既然係逃唔過，點解又會用個了字？「誰在瓦礫中獻吻／講永別卻那麼接近」，卻前卻後轉折不清，卻字無法理解。「捉不緊的有太多／這一雙手在提示我／時辰到／人如初」，呢雙咁重要嘅手又係突然出現，極其量只可以話佢上接Verse 1之中「硝煙裡／讓我除去了面罩」嘅手，但有冇必要用雙手除，聽眾不妨存疑。快飛去結尾，「珍惜這份愛才是勝利」換成粵語，就應該係「珍惜呢份愛先係叫贏」，然而本身主人公未有誤解勝利定義，因此亦冇要糾正嘅地方，陳詠謙想用才是二字帶出乜嘢訊息，我都依然未悟到。

另外亦必須要討論〈壯〉，畢竟呢首可以話係陳詠謙眾多作品之中最言之有物嘅一首。我地都知道所有創作者喺寫自己最熟悉嘅題材往往係寫得最入肉，林夕寫苦戀寫到出神入化，黃偉文寫同志戀情別出心裁，都係因為有親身經歷，所以緣事而發，份外有感。意淫其實冇問題，樂而不淫，無傷大雅即可，而陳詠謙擅寫不顧後果嘅價值觀，就寫出咗吳雨霏嘅〈告白〉同陳奕迅嘅〈碌卡〉兩首佳作，係要欣賞。然而我地必須思考嘅係，一個填詞人只寫得好呢種缺乏深度同修養嘅歌詞，可唔可以稱為最佳填詞人。無可否認，黃霑林振強林夕等人確實係一下子將平均數扯得太高，令到後來者好難超越，但文從字順，詞有所指，應該係最低標準，如果連咁都做唔到，直接出demo派台instead of固守曲詞俱全嘅舊例，可能至係更佳出路。

10. 給兒子的信

唔少為陳詠謙平反嘅人都話呢首寫得好，以此作結，真係最好不過。一般人一定先入為主，覺得寫畀自己親生仔，點計係誠意之作，冇理由鳩寫，但陳詠謙不負眾望，又一次成功鳩寫，本色出演，繼續陳詠謙獨樹一幟嘅意思含糊，言不及義。「成年路太遠你學識怨命／所以任性／難受但我會繼續供應」，唔知佢供應啲乜，照計係愛，但真係讀者估，唔係作者寫；「若我有天跛了／你戴上我的眼睛」驟聽好有意境，其實唔知戴上父母嘅眼睛為乜——靠後生傳承自己人生經驗，唔使等老咗至做；代爸爸去環遊世界，亦冇理由用返爸爸對眼；陀住爸爸一對眼球出遊，反而顯現到少少心意，但又不切實際，背離常理，總之點講都唔通。

再睇「如果天地狠狠的將一切理想／破滅了」又係反面教材，大家千祈唔好有樣學樣。破滅，常用於理想或者幻想破滅，此中破滅非關外力，只可以係自體消亡，如果想話理想破滅係外力迫成，簡單可以用消滅用殺掉，靚啲可以用扼殺用磨蝕。雖然語言潮流時刻變動，我地唔可以一味泥古，但將某物破滅呢種寫法，如無意外，過多一百年應該都唔會獲得學界同世俗認受。用呢句病句做副歌第一句，有人話一聽就無名火起，呢種反應真係合理不過。

宏觀睇返成首歌，主人公到底抱持點樣嘅心態育兒，我亦甚為不解。佢有話「還是流我的血／你別忘掉」，提醒對方記得有自己嘅支持，亦有話「是我對不起你」同「可以恨我」，承認自己生仔出於自私，似乎有盡力善待同保護小朋友去盡力彌補之意，但再睇「我對你好／不須答謝我」，又主動提起自己嘅好，提起完又話「不須答謝我」，聽完只覺呢個爸爸暗啞底想要人知恩報恩，但又唔敢直講，扭擰造作。更加得意嘅係，呢個爸爸一直都流露無限愛意，又講到唔介意小朋友失敗，只求佢開開心心，但又忽然狠心咁話「註定某日我將拋棄你於荒野」，到底係因何而生嘅轉折？拋棄本身暗含主動之意，字面意思只可以解讀為主人公主動為之，但呢個爸爸愛心爆棚，應該係對親兒不捨不棄至係，點解會註定拋棄親兒？如果佢想講嘅係人世間自有規律，迫到父母不得不拋棄子女，咁就一定要講得清清楚楚，否則就好難呼應其後嗰句「你永遠有一種愛／從未缺少」。概而言之，呢封信真係好深奧，除非佢身體力行去抵制香港政府強制十二年義務教育，用自己一套中文去教仔，否則佢個小朋友未來都好難聽得明佢想表達啲乜。

總結

時間有限，每首只可以點評少少，但不知不覺，都寫咗六七個鐘。我試過填詞，知道填詞唔易，但自知之明，理應人皆有之。我相信大多數人都係不滿佢「我叻仔我可以肥」嘅招積，不滿蜀中無大將，而廖化竟自以為曹操。我個人偏好林夕，上文信手拈來例子大多以佢作品為主，希望大家體諒。最後衷心希望呢個寫得相當簡單嘅分析，算係勉強整理得到大家嘅見解，我知「殘忍只須一棍」同衛蘭都好恐怖，但考慮到其中問題同以上例子大體相似，在此不贅。辭多歉甚，如有補充賜正，歡迎切磋交流。

https://gnimmm.com/2018/11/25/smartfatchan/