【 #JARvelogue周遊學・日劇日影「W主演」的意思】
上次講完咩係「特別出演」，今次同大家講下另外一個喺劇集同電影中都好常見嘅字眼，「W主演」。「W主演」同普通主演有咩分別？意思又係咩？簡單同大家分享吓。
首先「W主演」係解作一部劇入面有兩個主角，就會特別說明係「W主演」。W喺日文發音中，同Double係同音，所以成日都會用W黎意指Double，所以「W主演」就係雙主演咁解喇！
至於點解要特登寫係雙主演？好多劇就咁一睇，都知邊個係男女主角啦！咪住！問題就係呢度喇！以我地一般認知，一套劇入面多數都係有男女主角、男女配角，唔需要特別寫明。但係喺日本嘅劇集同電影中，幾乎可以話係無男女主角各一呢個講法，因為喺日本影視界，主角永遠只有一個，而其他人就係配角。正正因為呢個原因，所以當雙主角時，例如主要嘅男女角色都係主角時，或者兩個男演員／兩個女演員同為主角時，就會稱為「W主演」。
講多少少，日本行內人普遍都認為「W主演」嘅好處不少，一來可以作為宣傳賣點，二來兩位主演嘅演員唔使爭黎爭去，關係變好嘅話，更加容易可以開拍到續集添！下次如果見到「W主演」就知點解啦！
#JARvelogue
#日本冷知識
#解答問題時間
#今次圖文有啲符啦
#送大家一張N年前去採訪東京國際電影節嘅相
#留言夠多嘅話可以揭曉係幾多年前
