#Sharedomo煲劇台
.
最近多咗時間留係屋企，唔知大家有咩做呢？平時咁忙，最近終於有返啲時間睇返一直想睇但係冇時間睇嘅劇，例如呢套 #回答吧1988，上網search返先知原來呢套劇係2015年播呀哈哈哈，成日都俾人笑56k但今次delay左五年真係誇張左少少，好懷疑到底仲有無人未睇😹
.
故事講述1988年居住係首爾市道峰區雙門洞嘅五個青少年，關於佢地嘅親情，友情同埋愛情。主要賣點之一係劇組完美地還原1988年嘅場景，細緻嘅程度係你睇睇下，會忘記左呢套劇係2015年拍，好似真係去返80年代睇個時啲人嘅生活咁。
.
另外一個賣點就係回答吧1988同其他韓劇唔同，愛情係呢套劇入面唔係主線，最吸引嘅情節都係圍繞親情、友情同埋青春。劇中對每一個家庭嘅描述都好細膩，例如重男輕女嘅德善家、單親家庭長大嘅善宇家、吵吵鬧鬧但又好warm嘅正煥家～總之你一定可以係入面搵到自己家庭嘅影子，最觸動我嘅一定係成東日爸爸😭個種上一代不善辭令、只係識得內儉地表達對子女嘅關愛嘅描寫真係催淚到不得了😭
.
最後就係關於成長，關於逝去嘅青春，五個主角由每日鳩下鳩下，到後來慢慢長大、畢業，一個一個咁搬走，最後連雙門洞都拆卸重建，因為太真實，睇到我勁心酸😭人來人往，各奔前程，青春一去不復回。
.
果然係名不虛傳嘅神劇，睇完有一段時間都好似沉浸係劇入面嘅80年代咁，如果仲有人未睇(應該無🤣)，可以快啲去Netflix睇。
