《寵物》
♂：早晨
♀：早晨
♂：唉，我真係覺得做貓好過做人……點解一張相可以成千上萬like，可愛真係大晒咩！
♀：因為你前世積唔夠福，所以今世先做唔到貓要做人，你恨唔到
♂：你平時影埋隻貓既post平均比你自己既post多30％ like
♀：我知啊，所以我先得閒出下絕招
♂：貓同埋狗，如果要你揀一樣養你會揀邊樣？
♀：我比你估下，咁你自己呢
♂：我係荷蘭遇過一隻貓，佢係附近周圍玩，有時會爬入黎我個單位，我會比罐頭佢食，隻貓並唔特別，只係灰色紋既家貓，但唔知點解佢好鍾意我
♀：所以你既答案係貓？其實你唔係長留係一個地方，養乜寵物都無資格
♂：我知自己事，個一下我有諗過帶佢走，連價都報埋，要3800歐……呢個價錢，我可以買隻超可愛超靚既純種比賽貓，但如果唔係有個鄰居同我講佢年紀大，坐飛機會好危險，我應該會帶佢走
♀：錢可以買到美麗同品種，但買唔到緣份，你肯付出3800歐，只係因為你同佢有聯繫嘛，我有四隻貓，但我鍾意既只有一隻，就係最臭串既個隻
♂：係咪因為你覺得佢似你呢
♀：乜家陣你覺得我好臭串咁話？
♂：我諗無人會鍾意臭串既貓或者人，所以你鍾意佢既原因唔會係臭串，我估，佢對所有人臭串，但對你會展示出唔臭串既一面
♀：寫開野既係唔同，咁都比你兜得咁靚
♂：首先，我講得通係因為呢句係真心話；其次，我開始摸到你個思維
♀：咁你摸到我個思維，你一開始條問題又點需要問呢？
♂：未問之前，我覺得係貓，但聽你講完，我覺得係狗
♀：喂，我養左四隻貓，無養狗，你唔係摸清，只係好似十二碼咁，一係入一係唔入喎
♂：之前有7成，依家有9成
♀：好啊，不如又賭一場，你估中既，我比你上黎睇貓，你估唔中既，呢個月我四隻貓既開銷就交比你喇！
♂：最後答案，我揀狗
♀：答案係……其實，呢個係主觀答案，只要我想你輸，你就輸硬，點解你仲要答？
♂：勝負又有幾重要呢，答中我有貓睇，答唔中，我咪請佢地食野認識下，但二選一既題目，我有個能力，就係我一定估得中
♀：我真係好想講你錯，滅下你威風，但你撞中左，以前我養過隻狗，叫Morning，但佢走左幾年，我一直都唔敢再養返，就係因為我知道自己再養都唔會搵得返個感覺
♂：緣份呢樣野真係好重要，佢親唔親近你，怕唔怕你，唔係訓練同培養可以得返黎，所以我真係好想帶荷蘭隻貓返黎，有一晚佢夜晚爬入黎陪我訓左一晚
♀：喂，係貓定女啊
♂：貓啊，不過如果講女，我都有故事可以分享
♀：哦，有故事聽啊，我好想聽下喎！
♂：故事就係，隻貓陪我訓左一晚，第二朝起身就唔見左，然後我就去左第二個城市，因為我發現佢有蚤……張床唔訓得喇……
♀：你個反轉都黎得幾快喎，所以你同佢一夜過後就發現緣盡？
♂：我連續幾晚比蚤咬到訓唔到……你話我點樣可以唔走……
♀：個房東多得你唔少
♂：我有留返按金比佢啊
♀：所以你喜歡既係貓？
♂：你喜歡貓我就喜歡貓，依家你喜歡狗我就喜歡狗喇！
♀：乜你個人咁無原則既
♂：你無聽過愛屋及烏咩，如果我地再養隻狗，個名都諗好左，叫Good Night啦！
♀：你真係想得太多太遠……不過如果我再養我都想用呢個名，好啦，就咁啦，晚安
♂：我答中左，有一次機會去睇貓喎，我記住先，唔好走我數，晚安
#長傾不見 #蔣薇 #小說 #故事 #好久不見
未睇過既重頭睇：
https://www.patreon.com/maydreaming/posts?filters[tag]=長傾不見&sort=published_at
鄰居狗叫 在 [問卦] 鄰居的狗叫晚上吵人不可以，白天就可以？ - 看板Gossiping 的推薦與評價