上個星期本人曾經寫了一篇文章講為什麼我從不推介日本的Airbnb，我個人最主要的原因還是法律以及安全問題。
這篇分享問題之餘，也教導了大家如何找尋合法的日本民宿，各位不妨參考一下。
Airbnb - 以「共享經濟」為名嘅超夢夢
作為一個偽startup創辦人，我對新科技同新經濟模式持有絕對嘅開放態度。Uber 2014年喺香港仲用緊合法嘅豪華房車牌開始試行我就已經call緊、Airbnb 2013年未推廣我就已經登記，喺Kickstarter第一件back嘅產品應該係2012年嘅事。所以話犯唔犯法，安唔安全，我會偏向相信係「有限度而可承擔嘅風險」。
我自己第一次真正使用Airbnb喺2014年，6日行程去咗大阪同京都。論價錢唔算係好吸引，但因為一行四人扶老攜幼，所以喺大阪揀咗比較寬敞嘅複式apartment，而喺京都更租咗和式民宿。儘管唔係首次去日本，但酒店以外嘅體驗，同街坊講下おはよう，食下附近嘅居酒屋，絕對令到呢次旅程加分，亦增加咗對Airbnb嘅好感。
上個月阿女去東京訓練兼比賽十數日，結果好自然又去Airbnb搵地方。有洗衣機、又可以自己煮食嘅民宿，始終點都方便又平過住酒店。因為有兩個唔同比賽場地，結果分開咗兩個民宿嚟住：第一間，整體都係同描述相符，除咗佢應該用超廣角鏡拍攝，實際環境真係好細，大概係因為東京都掛。
第五日轉第二間民宿，因為睇相係比較「古式和風」，有掛畫同瞓畳 (たたみ)，阿女同佢朋友仔仲諗緊會唔會有驚喜嘅時候，的士停泊嘅面前，似乎係比較似深水埗日久失修嘅唐樓。
「外表殘啲唔緊要啦，入面企理咪得囉」，我老婆之後覆述。
搵咗鎖匙 (Airbnb大部份都係自己尋寶搵鎖匙嘅，如果你未住過或者唔知的話) 入到屋，一大陣霉味，第一件事就要開窗開冷氣。之但係，the worst is yet to come。
入去廚房：廚具有千年油漬、洗碗盤似乎未洗乾淨，「呢幾日都係落街食算啦」，心諗。
到睡房先發現出事！個衣櫃入面冇叮噹，但有好多灰塵；啲被鋪一揭開阿女同朋友仔就打乞嗤，過咗兩個鐘頭左右啦，三個人都覺得越嚟越痕，似係有嘢咬，但又睇唔到有蚊，直覺係蝨。
我老婆終於頂唔順要打畀我。冇錯，佢哋三個去咗東京，而我就留喺香港，結果我馬上喺Airbnb嘅網頁度遙控搵求救，轉折之下搵到個香港電話，但係都係飛咗去印度嘅call centre。
強調係衛生問題之後，customer service叫我馬上喺附近搵過第二間民宿，然後再確認狀況。搞掂嘅時候，已經係夜晚差唔多10點，我仲好天真噉叫我老婆留住的士收據，可能有得claim。
結果，經過差唔多10個email來往，6-7次電話交涉，屋主全程否認有任何問題，Airbnb話相片證據唔足夠證明衛生有問題，同埋屋主「選擇唔退錢」，所以來來往往一個星期之後，「只可以根據規定退回一半費用」。而所謂嘅一半，係扣完Airbnb手續費、屋主清潔費計算，實際上拎得番嘅係四成都唔夠。
事後Facebook嘅朋友告知，先知道原來較早前日本已經宣布Airbnb民宿係犯法，要申請成為受合法民宿變得相當困難。同時間，我個Facebook status超過九成朋友留言，都係話佢喺Airbnb預訂民宿冇試過有問題，某程度上令到我覺得更加懊惱。
故仔講完，幾千蚊跌咗，教訓係「共享經濟」呢個概念好似夢幻般美好，大部份嘅民宿都係好嘅 – 直到當你遇到差嘅時候，當你人生路不熟又入夜嘅時候，當屋主堅持「冇問題」嘅時候，因為有霉味、揭被有塵、有嘢咬呢啲「唔係足夠證據」，唔好諗住呢間市值300億美金嘅startup會嚟幫你解決問題，原來一切回歸古羅馬律法，caveat emptor (讓買者當心)。
Startup模式，就係用引入財團投資者，初期用巨額補貼去吸引用戶 (Uber喺中國燒咗20億美金、Gogovan蝕咗幾千萬、Airbnb就喺2015年開支為港幣11億)，等到慣性或者壟斷出現，就再利用數據去「優化」服務費，而同時間市場亦已經欠缺具實力嘅對手，而使咗嘅錢，終歸要搵個地方賺番返嚟嘅。
P.S. 當我諗住留review畀個屋主嘅時候，發現因為已經安排部分退款而自動「關閉交易」，我就更加明白點解間民宿嘅評價咁高。
P.P.S. 日本有合法民宿，上Google搵Minshuku，或者大型酒店搜尋網都有。無可避免要用Airbnb的話，盡一切方法保障自己，最多只係book一晚，然後再用其他可退款途徑（例如PayPal）或到步先畀錢。
P.P.P.S. 點解叫超夢夢？因為Wikipedia話佢同Airbnb一樣係好撚勁，亦係漠視(鄙視)人類。
CC 黃秋生Anthony Perry
