【龔成問答信箱】（Q15261-Q15280）
Q15261：
現時環境，睇住自己身家縮水的確不好受
老師話心理因素好重要，我明
但我就係學唔到，仍然心裡好舒服，好怕股價再跌
龔成老師：
其實要克服心理因素，就要有「將來財富」的概念，我投資股票20年，久不久都會遇到一些大跌市，當時我都會持有有一定的股票，身家會縮水，當刻如果我好集中在「這刻的股價」「這刻的股價」，我都會唔開心。
不過，我每次都係著重「入貨的機會」，而唔理我原有的貨有無蝕錢。通常過一年後，身家都會大增。
當我經歷過幾次後，就會明白，如果我想之後的身家大升，就要這刻的身家縮水，這刻縮得愈勁，之後身家就會升得愈勁！
簡單來講，在大跌市，我唔理「之前入的股價蝕左」，只著重「這刻的入貨機會」，同時會心裡想，如何可以比我用更平的價入貨就好了（就算我已經持有這股並賬面上蝕緊），所以，我當刻反而希望跌更多！
----------------------------------------------
Q15262：
你好龔成老師：我是澳門初階股票班的學生，想問一下以下幾個問題：
（1）澳門進階股票班將會大約在什麼時間開班？
（2）想問一下既然買股票是買公司未來發展，那麼我們除了買收財務數據好的股票外，還要留意一下財務數據一般，但很有潛力的股票？
（3）承上，未來發展是否以5g為主？ 那麼財務數據一般的小米（物聯網），以及中移動（規模優勢）是否最好的選擇？
（4）5g時代最受惠的股票有什麼？（除小米 中移動 ASM 太平洋外，還有什麼？）
（5）我們除了配置一部分在未來有大發展的資產外（如電動車，醫療，人口老化，土地資產），是否配置更大部分（大約50%）在未來將會更快發展的資產，如5g行業的股份？ （正如 不同10年買不同的重倉股，如先是長實，再是匯豐，然後是中移動，再到騰。 現在可能的是小米？）
（6）現在博值率較高的5g相關的股份有那些？
（7）有那些非5g，但博值率高的較高的股票？
謝謝你
龔成老師：
1）可能會在1、2年後，這個未知，但坦白講，澳門進階班會遲少少先進行。
2）可以咁講。財務數據是助我地了解企業的情況，我地當然希望買到現時財務理想數據的企業，因為較易推斷到該企業將來的情況。
但如果是潛力股，我地會著重將來多過現時，因此，這刻財務數據的要求會較寬鬆（但都不能太差），而分析點會著重將來發展。
3）5G是其中一個潛力方向，小米（1810）可以考慮，其實這股業務不差的，只是以貴的價上市，令股價持續下跌，現時已在合理水平。
小米這刻的盈利未算明顯，財務數據仍未算很理想，整體質素屬中等。不過，企業的產品的確有理想增長，而且受消費者歡迎，加上小米的商業模式、前景，都成為這企業的亮點。只要不太大注，這股可以。
4）中國鐵塔（0788）是其一。另外，物聯網、手機遊戲都是正面的。
5）配置發展快行業是應該，但不能太多，50%是過高的比例。因為發展快是機遇，但在行業增長同時，會有相當的不確定性，以及新競爭的未知數，因此你要在這方面取平衡。
6）我相信小米（1810）是其一，而平安好醫生（1833）都會受惠科技發展，不過現價唔平，等回翻先。
7）除科技外，反而可留意翻一些近期好受肺炎影響的行業，例如收租類等。
------------------------------------------------
Q15263：
老師，請問吉利汽車適合月供嗎
如果每月只可以草5000蚊
將5000分開比盈富同吉利ok ma?
同埋騰訊
定係資金太少？
龔成老師：
上述的3隻股，都可以做月供的，有質素，長遠有增長能力，月供是不錯的做法。你可以月供盈富（2800）$2000、吉利（0175）$1500、騰訊（0700）$1500，保持長期進行就得。
如果可以，當然最好供多D金額，不過，都要睇翻你這刻的資金情況，如果現金足，可加。如本身現金及每月儲蓄不多，就一個月$5000好了。
------------------------------------------------
Q15264：
老師您好，自從聽完你建議之後，開始月供盈富基金，
但恰巧現在各行也受影響，
請問應該繼續長線月供，
還是也要留意住去到某個價位就要停?
現在只單一月供盈富基金，
建唔建議加醫藥類的股票，
有冇邊幾隻比較適合呢?
謝謝老師
龔成老師：
當然供啦！
月供是一個長期策略，最少3年，最好5年以上。
你假設你5年後有收成，你現時月供，你想現時的股價升完跌？當然是大跌！
因為你在大跌中，可以買到更多平貨，只要到你5年後，真正收成時升翻就得。
肺炎對經濟當然有影響，但不會5年，這反而是機會！保持月供，唔好睇過往的賺蝕，如果你想將來賺多D，就反而應「希望」這刻蝕多D，一定要長線呀！
你保持盈富（2800）是最好，如果加小小中生製藥（1177）都可以。
------------------------------------------------
Q15265：
Hello，我今年20歲，岩岩投身左醫療行業，月入3萬同埋銀行有9萬存款。
希望可以每個月供1萬
2800 3000
016 2000
011 2000
027 1000
066 2000
823 1000
以上既組合會唔會分太散？同埋應唔應該再買美債或者基金去增加收入？
龔成老師：
你上述投資的，都是有質素的股票，可以長期進行月供，無問題。
現時大市處合理區，以一邊投資，一邊留現金的模式進行，是較好的，因此，你持有的$9萬現金暫時不需動用，你保持月供就得。
如果之後現金不斷增加，而大市又未到貴的水平，你可以增加月供金額，加盈富（2800）就得。如果可承受風險，加少少潛力股都得。
至於美債，只是產品，增長有限，未必適合你年齡。至於基金，有好多種，你應該投資有增長力的。
因為，當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。
例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。
以你的年齡，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。
現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。
------------------------------------------------
Q15266：
龔成兄！現在 1876 百威亞太現價可入嗎？
另 823 現在可入嗎？
謝謝解答！
龔成老師：
百威亞太（1876）由上市開始已經唔平，不過，這股有業務質素，有品牌，有發展，但過往一直都貴。現價算是比高位回左，會定為少少貴，小注分注，月供，都可以，但未到大手時機。
至於領展（0823）現價合理區頂，分注入可以，這股有質素，有長遠的投資價值。
------------------------------------------------
Q15267：
龔sir 你好，我有個理財問題希望你有時間指導下。
我同女朋友計劃3年後結婚，開左聯名戶口每個月儲$10,000 for 結婚用, 預計儲4年會有 $480,000。
現時戶口已有 $55,000, 因唔想蝕俾通脹，我地傾左會用 4成儲蓄即每月$4,000 作月供股票，想請教你如果我地計劃幾年後會套現結婚，我地應該月供邊隻股票會比較穩陣？
另外我自己都會用額外$2,000 想供一隻比較有增長力既潛力股，請問你有咩建議？
多謝你既時間
龔成老師︰
如果你有4年時間，你可以投資在一些平穏增長股上，盈富（2800）、港鐵（0066）、金沙（1928）、煤氣（0003）、恆基（0012）、中銀香港（2388）、長建（1038）、粵海（0270）、領展（0823）、港交所（0388）、深高速（0548）都適合你。
而額外月供的$2000，你可以選潛力股︰比亞迪（1211）、中生（1177）或福壽園（1448），佢地增長潛力較強，但同時波動性風險也會較高。
但你要明白，我地投資股票就同投資在一間企業上，一定要長期先會見到回報。而4年是一個較中間的年期，中短期會較受外圍因素影響，因此回報不確定性也相對較高。
如果你想再穏陣D，你可以月供收息股，佢地價格波動會無咁大，但主要係收息，你唔好預會有太大股價增長。
優質收息股︰港燈（2638）、香港電訊（6823）、工行（1398）、匯豐（0005）、置富（0778）、陽光（0435）。
------------------------------------------------
Q15268：
龔sir，半年前偶然機會睇到你一篇關於教人理財和月供股票嘅文章就開始追看你Facebook
我今年35yrs，有一個2yrs小朋友，先生負責小朋友和生活開支，我先生思想比較保守，一直只買儲蓄保險嚟儲錢
因他是獨子，所以他爸媽已經為他安排了很好的現金流給他將來，所以他對投資方面不會進取，而我自己搵錢自己用
我人工最少有3萬，扣減自己開支加外家家用，如果用3萬人工計，每月最少自己可以儲$10000，而家我自己有30萬現金
已經供緊$5000 月供股票，$2000盈富，$1000 建行 ，$1000 比亞迪，$1000 中煤 ，想問呢個組合啱唔啱？
如果目標最少15年，15年後可否做到現金流？30萬現金可以點投資？我想買你的書看，我應該由邊本開始睇？thx!
龔成老師︰
由於你年青，而且家庭財政負擔基本上沒有，你可以在投資策略上以增長為主。
盈富（2800）和比亞迪（1211）都適合，但建行（939）只是收息股，無乜增長力，唔適合你。
中煤？你是指中華煤氣（0003）還是中煤能源（1898）？
中華煤氣無問題。
如果是中煤能源，佢主要從事煤炭開採及洗選、煤炭及煤化工產品的銷售、煤礦機械裝備的製造及銷售，以及金融服務。
煤炭部份為集團主要收入來源，而煤炭是商品類，產品沒有差異性，故只能賺取合理的利潤，不算是最高質的類別，唔建議你用佢做月供。
你可以用以下優質股代替，這些都適合你長線月供。現時大市只在合理區，你可以將30萬一半，用"分注"形式買入下面股票，餘下一半和每月所儲倒的資金，就等大市出現一定程度的下跌，才大力度掃貨。然後長線投資。
平穏增值股︰盈富（2800）、港鐵（0066）、金沙（1928）、煤氣（0003）、恆基（0012）、中銀香港（2388）、長建（1038）、粵海（0270）、領展（823）、港交所（388）、深高速（0548）
潛力股︰比亞迪（1211）、中生（1177）或福壽園（1448）
以恆指過去年平均回報10%計（連股息再投資），你每月投資$10000和本金30萬，15年後大約會增值至500萬。假設你將這筆錢投資在5%股息率的收息股上，你每月就會有$20,833的現金流可以收到。
書本上可以由<<80後百萬富翁>>和<<財務自由行>>開始。
------------------------------------------------
Q15269：
老師你好，請問我現有以下股票，大多數都回落不少，正迷惘中不知道應該怎樣安排.（以下是買入價）
3煤氣 @15.9
789中國鐵塔 @1. 885
8120國農金融 @0.25
1547IBI @0.88
8151寶申 @0.5
8101壹家壹品 @0.198
388港交所 @285.03
823領展 @68.55
6123圓通 @6.211
當中6123買入最多，不知道是否應該繼續,請你給些建議，謝謝
龔成老師︰
首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。
國農金融投資（8120）持續虧損的股票，加上有幾年被核數師給予"保留意見"評價，代表盤數有機會係有問題，你最好分注賣出這股。
IBI GROUP HLDGS（1547）主要於香港及澳門提供物業翻新服務，佢市值細、盈利唔高、股價十分波動，再加上負債不輕。質素只是中等，長遠建議你慢慢轉至其他優質股為佳。
寶申（8151）主要從事沖壓部件製造；以及噴塗部件及噴塑部件加工業務，白色家電指家用洗衣機及冰箱。此股市值細，上市不足2年，比較難以估值，建議你唔好持有太大比重。
壹家壹品（8101） 此股持續虧損的股票，加上有幾年被核數師給予"修定報告"，代表盤數可能有古怪，我會比較避開這些股票，故建議你最好賣出這股。
至於你投資最多的圓通速遞國際（6123）係一間以香港作為總部的國際貨運代理服務供應商，現時業務已擴展至16個國家，並在亞洲、荷蘭及北美設立了54個辦事處。業務有空運及海運貨運代理服務、總銷售代理、配套及合約物流服務等。
本質算是中等，生意雖然有增長，但並不明顯，而且盈利略有波動，而股價上落亦好大。雖然都有增長力，有投資價值，但就未必適合好大注，所以你最好將部份換至其他優質股。
其餘都是優質股，你可以長線持有。
------------------------------------------------
Q15270：
龔成老師，我係即將退休既人士，同時只係一個投資新手，最近先留意到你既facebook專頁，我手持600萬現金，有已供完既自住樓，宜家想將大部分現金投入股票市場
睇過唔少既投資書籍，研究過一段時間，覺得巴菲特既價值投資適合我，追蹤指數既股票似乎係比較好既選擇。
想問下83140同3140有咩分別，一樣都係追蹤標普500？成交量同市值都無盈富基金咁多，想問下你覺得投資追蹤標普既ETF好唔好呢？ 定係全部投資盈富基金？
唔該晒！
龔成老師︰
領航標普五百（3140）和領航標普五百－Ｒ（81340）都是追蹤標普500指數之表現，分別是3140用HKD，而83140用RMB作單位。
我地投資策略係會睇翻人生階段而定，由於你已是退休人士，投資應以創造穏定現金流為主。盈富（2800）、領航標普五百（3140）和領航標普五百－Ｒ（81340）都唔適合你。
策略上，你可以將這$600萬，分成4部分。
第一部分投資收息股，你可以建立一個收息股組合，你可考慮港燈（2638）、香港電訊（6823）、工行（1398）、建行（0939）、置富（0778）、陽光（0435）等，大多有5%股息或以上（你可睇下我本《50穩健收息股》當中仲有好多）。
你可以用"分注"形式，慢慢儲貨，平均地投資這些股。除了可以得到穩健的收息收，同時可有效的分散風險。這部分可佔你財富$200萬-$250萬。這些股票唔洗理佢股價波動，只要一直持有收息就可以。
第二，投資債券，你可以選擇A評級的債券，年期較長都可以，但利息卻不高。你可以到銀行問問。
第三，投資年金，你可以睇睇，這是適合你們的產品，零風險，可以有穩定回報。另外，你亦可投資銀行低風險類的產品，你可自行到銀行了解下，總之是「低風險，持續現金流」的。
第四，持有現金，這可以為你的後盾，以備不時之選。同時可以等投資機會。
你可以將$600萬資金，平衡地分配在上述的項目上，對你來說是最好平衡風險，同時有穩定的現金流。
------------------------------------------------
Q15271：
12.1 買左3918 金界，業績好，但跌左，點解?
我應該點處理
龔成老師︰
短期波動可以因為好多原因，但只要這些原因唔會影響到企業長線素質和前景，咁就無問題。
金界控股（3918）有質素的，唔好因為股價一時波動就覺得佢出大問題。佢是柬埔寨最大的酒店、博彩及娛樂運營商，旗艦NagaWorld是金邊市唯一的綜合式酒店及賭場娛樂城，持有為期達70年至2065年的賭場牌照，NagaWorld僱員人數超過5500人。
賭業本身是高毛利行業，而金界壟斷了金邊的業務，加上業務平穩，財務穩健，企業有一定的質素，暫時唔見佢質素有變。
但要留意，金界所發展的是較新興的市場，若然比較澳門的賭業股，金界的增長及潛力較大，但當中的風險同樣略高，因為業務難免存有不確定性，這點你要明白，亦因為這原因，若投資此股，在注碼上不能去得太盡。
------------------------------------------------
Q15272：
我係課程舊生，想問問對於2282 美高梅前景 你覺得值得持有嗎？
現在入貨係合理區嗎？
龔成老師︰
美高梅中國（2282）有質素的，澳門賭業中短期不利，但長期仍處於賺錢的狀態，因此唔需要擔心。
相信行業中短期會弱，對佢股價會較為不利，但不要理會，長遠會慢慢好轉的。現在價格算是合理區，你可以買入。
但長遠你睇好澳間博彩業的話，我建議你考慮金沙（1928）或銀娛（0027）會較好。這2隻股票質素明顯比美高梅優勝，現時2者股價在合理區較頂位置，可用月供形式買入。
------------------------------------------------
Q15273：
龔成老師你好，我今年26歲，月薪扣埋保險家用有12000 ，每個月都月供1000盈富，1000 匯豐，2000Apple
有現金14萬，現有1手匯豐，想問下點樣部署好，目標係30歲前可以將資產增值到100萬
龔成老師︰
你可以用月供去造一個平台，為你財富去增值。
現在你每月儲到的$12000，可以6成去做月供，其餘先儲起，用一邊月供一邊儲蓄的策略。月供方面，你可以選擇投資在平穏增長股︰
盈富（2800）、金沙（1928）、恆基（0012）、中銀（2388）、港鐵（0066）、煤氣（0003）、港交所（388）、長建（1038）、粵海（0270）、領展（823）、深高速（0548）或潛力股︰比亞迪（1211），中生（1177）或福壽園（1448）。
APPLE我無特別研究，但相信基本上都可以，是有質素的股票，仍有平穩增長能力。而匯豐（0005）只是收息股，無太大增長力，你應該將佢轉為我上述的股票會好。
由於現時大市只在合理區，你現有14萬資金可以先投入一半。餘下一半和每月所儲倒的資金，就等大市出現一定程度的下跌，才大力度掃貨。然後長線投資。
以恆指過去年平均回報10%計（連股息再投資），你每月投資$12000再加上14萬本金，4年後大約會增值至85萬。但你要明白4年時間唔係太長，最終回報有機會因中短期價格波動而造成影響，你要明白這風險。
------------------------------------------------
Q15274：
你好，龔成老師，好多謝你既慷慨分享同教導，啟蒙左我好多，眼界開闊左！甚至對生活都有多左憧憬！
小小背景資料: 我29歲，現時月入24k左右，每月可儲12k。
我以前從未接觸過投資，岩岩一月先開始左月供股票: 盈富$2000，恒地$2000，太古地產$1500。一月頭亦入左一手領展。之後月供會keep住，亦會係盈富市盈率同股息率吸引 （例如達3.5倍或4倍或以上）時，一手手入。
暫時目標係三至五年內股票平均每年有10%增長，就算少d都唔緊要，最緊要保本！因為自知無大興趣深入研究股票同財務知識，所以亦唔敢大貪！
請問老師覺得月供太地好嗎？除左驚太地唔夠穩陣，亦有d擔心自己股票太集中係地產類！同埋見到一手太地都係$5000左右，所以或者可以見到股價跌的話一手手入？
如果轉的話，轉港鐵（會以股代息，但驚太平穩） 定長建 （分散風險，唔洗集中係香港/地產，但怕要守四五年以上，驚自己會心情忐忑）好啲？
我亦有少少想供香港電訊，除左分散我集中係地產類既風險，亦貪佢夠穩定，高息，仲有d發展計劃（5G/虛擬銀行）
但因老師話過佢只係收息股，加上睇落現價多人月供同買，都好似唔平，所以唔敢供！
十分多謝老師給予建議！
龔成老師︰
太古地產（1972）是優質的股票。最近的社會運動對佢的香港商場會有影響，但這只是中短期，長遠來說，佢仍是有當中的價值。
而佢的優點，就是發展大型複合項目的能力，同時更在中國多個城市複製這模式。此股有投資價值，但相信中短期會弱，要長線先有收成。
但正如你所講，如果你月供加埋太古地產（1972），就會出現過於集中地產類別的風險。所以，你可以轉為港鐵（0066）或長建（1038），2者都會有平穏增長力，但港鐵會優質少少。
至於香港電訊（6823）只是收息股，而你很年青，應以增長力為主，所以唔適合你。
另外，我建議你唔好定下3至5年這個目標去限住自已。因為投資股票，就等同投資一間企業，再優質都要時間去發展，而且中短期難免會有波動。反而你買入優質股後"長線持有"，會令你回報波動風險減低。
最後，你如果想直接買入盈富（2800），你可以用恆指市盈率作參考。過往恆指市盈率主要在8-22倍間波動。現時已在合理區，你可以買首注。
當接近市盈率10倍，約24000點會進入初步平宜區，可以加大買入力度。
------------------------------------------------
Q15275：
老師~知你好忙,但都想問你一個問題:我有十萬蚊閒錢,2年後才需使用,想買股票。
請問系一次過買幾隻收息股好D定還是分成月供一萬（供一年）幾隻收息股好D?
龔成老師︰
投資股票就如等投資一間企業，就算優質企業都要時間去增長，一般我地持有一隻優質股係講緊5年，甚至更長時間。
2年只是一個較短的時期，中間難免會出現波動，影響最終回報。由於你很明確2年後要動用這筆資金，我建議你只可作很低風險投資。
你可以將一半做定期，另一半資金分2,3注，慢慢去買入一些優質的收息股。港燈（2638）、香港電訊（6823）、工行（1398）、匯豐（0005）、置富（0778）、陽光（0435）都是合適選擇。
------------------------------------------------
Q15276：
龔成你好，本人現年34歲，己婚，扣除開支，每月可自由運用金額大概2-3萬。
過往曾經散買股票，多出現虧損，現時持有3988 （4.92買入, 15000股） 939 （6.94買入, 5000股）、941 （77.3買入, 500股）。
另有大概70萬現金。明白投資不是散炒，請問應如何合理分配資金作投資？月供股票又應如何部署？
我希望起步時能穩健，待累積了一定資金再考慮進取一點，因過往已蝕了7,8萬元在投資上。謝謝！
龔成老師︰
我地投資會運用「先增值，後現金流」作方法，初期應投資較多增值類資產，較後期則應投資較多保守類項目。所以係放配投資項目時，會因應番你的人生階段。如果你年青，可以"平穏增長股"+"潛力股"，但你已近退休之年，就應集中在"收息股"去創造平穏現金流。
你現時持有3隻的股票雖然都優質，但只是收息型股票。以你年紀應以增值為主，所以佢地唔係咁適合你。但你唔洗賣出，只要唔好再加注就可以。
現在你每月儲到的資金，一半可以月供以下股票，而另一半先儲起，我地用一邊月供一邊儲蓄的策略。
平穏增值股︰盈富（2800）、港鐵（0066）、銀娛（0027）、煤氣（0003）、恆基（0012）、中銀香港（2388）、長建（1038）、粵海（0270）、領展（0823）、港交所（0388）
潛力股︰比亞迪（1211）、中生（1177）或福壽園（1448）
由於現時大市只在合理區，你現有70萬資金可以以"分注入貨"先投入一半。餘下一半和每月所儲倒的資金，就等大市出現一定程度的下跌，才大力度掃貨。然後長線投資。
------------------------------------------------
Q15277：
老師你好，我係澳門人，做左3年野，資金有50萬，月入25000，但從未試過投資
依家27歲，想開始學投資理財，請問你會建議我點樣分配第一次的投資較好？
龔成老師︰
由於你無投資知識，我建議你要做三樣野。
第一，增加知識，你要學理財及投資的知識，記住，投資並不是坊間的炒炒賣賣，你要從書本或課堂上認真學習。
第二，了解銀行及證券行，去開一個證券戶口，並準備做月供股票。其實兩者都可以，銀行就較方便，但手續費就較貴，證券行收費就較平。你可以先了解下不同的收費。
第三，將每月的部分資金，去做月供股票，供盈富（2800）。對初階投資者來說，月供股票是一個很好的累積財富方法，因為可避免你一次過在高位買入的風險。你可以月供$10000。
原理如同儲錢，不過就不是儲現金，而是儲股票。計劃要長期進行。另外，盈富是一個組合，適合絕大部分人投資，風險不高，長期儲貨可助你財富平穩增值，記住要長線持有。
當你在做上述三件事的同時，開始學下股票，了解下那些股票適合你自己。上述只同你簡單供盈富，當你有基本知識及少少經驗後，就可以利用你手上的50萬資金，其中一部分，去投資股票。
例如到時將$25萬，分注投資盈富（2800）、銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）等，你可以了解下這些股票，然後從中選股。
------------------------------------------------
Q15278：
老師：2013微盟你怎睇
值博嗎？
龔成老師︰
微盟集團（2013）集團主要在中國從事提供軟件即服務產品及營銷服務。
佢的產品分為「商業雲」解決方案、「營銷雲」解決方案及「銷售雲」解決方案三類。
「商業雲」可助商戶開設線上業務並助彼等提升顧客參與度、轉化率、收益及忠誠度。「營銷雲」通過大數據分析能力及ＡＩ技術為商戶提供智能營銷服務。
這些都是將來發展的大趨勢，從業務潛力上，的確是有的，見佢財務數據的增長都強勁。但在估值上都唔平，所以，如果投資，這刻小注好了。
------------------------------------------------
Q15279：
老師 最近恆生銀行和希慎都回落不少
那只比較建議入場？
龔成老師︰
恆生（0011）有質素，這股在《50穩健收息股》書中，已定義為一隻很不錯的股，有相當的優質度。這股可以長線投資，但就會以收息為主，而增長力都有，但就不算好強。
現價在合理區較上部，如果你目標是收息，長線持有是可以的。此股回到$150以下，股息率有5%時投資會較理想。如果要到平宜區，股價起碼要多跌20%至25%。
希慎（0014）有一定的質素，可以長線投資。佢係銅鑼灣商舖及寫字樓地區中，係其中一個最大商業大廈業主，投資組合擁有逾4百萬平方呎之樓面面積，希慎廣場、利園等，都是十分優質的商場。
佢過往出租率均多處於95%以上，商場及寫字樓很多時更處98%以上的高水平，係典型的收租股。近半年因大環境轉差，令佢回落不少。
這股可長線投資，這刻的股息率接近5%，加上股價都有平穩增值作用，現時估值都算合理，可買入首注。如果考慮現時的投資值博率，希慎較好。
------------------------------------------------
Q15280：
龔成你好阿，我係因緣際會而睇左你幾本書既讀者，覺得你寫d野好有point,好符合實際情況
我係一個20歲的青年，月入2萬，想財富齒輪盡早啟動，因為澳門月供每隻股都要收手續費50$，所以想主供3隻股 盈富（2800），比亞迪（1211），中銀（3988），每隻3000，呢個策略你覺得點？ 謝謝
龔成老師︰
多謝你的讚賞!
我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。
以你年紀計，應以增值為主。盈富（2800）是平穏增長股、比亞迪（1211）是潛力股，2者都適合需要增長力的你。但中銀（3988）增長力不強，是收息股類型，就唔係咁適合。
我建議你將中銀（3988）那$3000轉到另一隻平穏增長股上，以下的都適合你。
平穏增值股︰港鐵（0066）、金沙（1928）、煤氣（0003）、恆基（0012）、中銀香港（2388）、長建（1038）、粵海（0270）、領展（823）、港交所（0388）。
----------------------------------------------
多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。
另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。
金沙娛樂城評價 在 澳門金沙娛樂城 - 今彩539玩法PTT 的推薦與評價
澳門金沙娛樂城,皇璽會娛樂城,澳門娛樂城可以換現金嗎,TZ娛樂體驗金,元亨利娛樂,互聯金賺娛樂評價,金金金娛樂城,星博娛樂城賺錢,王者娛樂城app,金好運娛樂城官網, ... ... <看更多>