【龔成問答信箱】(Q21681-Q21700)
Q21681:
老師,上完你整個課程,雖然我仍有d唔明,但我想信每天一點一滴去溫習你既notes,我會一步一步進步
我最感恩就係,依加個市上上落落,我都可以放心。因為你教識我,只要持有優質股,不用驚短暫股價既波動
1) 其實之前教既市賬率,市盈率,現金流,折現率...要計數既部份,係咪知下就得喇?
最重要係學會第6,7課既企業評估表,對嗎?
2) 你功課590話每股盈利增長係負數,即是代表什麼?
3) 老師,恕我能力偏弱,我唔識你評估表某些指標的意思,即是搵咩資料:
-生意與盈利保障程度高
-管理層理性
-總負債÷股東權益<100%
-負債的增長不過快
4) 老師,除了590外,還做了669,1211,發覺自己做多了一點,開始知d數據去邊度搵,熟習了一點。
但係指標好多都唔識做,唔能夠理性去分析,只主觀地表示 ✅或❎,甚至唔識做
5) 老師,想問下英磅走勢,你有何意見?
6) 老師,你課堂的第7堂內容非常豐富,如果分2堂講會好d
想問功課
7) 行業市盈率,照網站所示的寫下答案,還是搵返相近市值的股票公司作比較
如六福網站show 行業市盈率是35.47。
而其中 1856依波路 的PE 是710。另外,5間市值最大的股票(周大福,六福,周生生,冠城,力世紀),
當中係無盈利的,即無shows PE,係咪只計頭3間的PE? 還是照抄網頁的數字?
龔成老師︰
1) 唔係,其實這幾個是一些較主要的分析方法。除左用企業評估表中,去判定一間企業長線質素外。
我地都需要詐透過這些方法,去幫助我地計算合理值出來。因此,你係要比時間去了解的。但現金流折現法,會係較為複雜。初學者,可以先掌握其他幾個先。
2) 這個負數,係代表每股盈利由2019年去到2020年,出現66.4%的倒退。
3) 生意與盈利保障程度高︰好似一些公用股,市民基本上經濟好與壞,都要持續消費,故保障性會視為高。(六福0590︰算係一般)
管理層理性︰這個你可以睇佢市場策略,和多年年報。例如公司已經負債累累,市道又不好,還盲發展,可視為不理性。
又或者佢數年前,有些大計。但最終無疾而終,甚至朝令夕改,當經常有咁架情況,就算是不理性。(六福0590︰開店速度理性)
總負債÷股東權益<100%︰主要睇長線償債能力,你可以係BOC網站,財務比率個頁,就可以找到。我地一般要求,少於100%為之好(第7堂SLIDE45)。
但你留意翻,近年由於國際財報標準更改左。一些有較多租舖的業務,例如零售,好似六福這這類企業,我地會將個指標,調升為<150$%都接受。(六福0590︰34%)
負債的增長不過快︰你可以用過去多年數據作比較,如果負債增長較快,而負債相關的指標又明顯變差的話,你就要留意。(六福0590︰負債不多)
4) 這些係需要經驗去慢慢磨鍊出來,你預分析頭幾間,都係會有咁架情況。當你唔明,就睇翻NOTE,自己要多溫書,推論,之後真的都唔明就INBOX問我。
開頭係會較困難,但當你累積到一定經驗,你就會知道面對不同企業時,分析應該係點做。
5) 我對英磅無研究,比唔到實質意見你。但建議你除非有實際用途,否則唔好似貨幣,作為增值渠道。
在投資的角度,外匯不是最好的投資項目,因為說到尾,這些都只是一些貨幣,即是「政府借據」,貨幣中期會以週期的模式運作,但長期來說,都是貶值收場,因為貨幣只有「交易價值」,並無真正的財富價值。
而我地進行財富增值時,應該集中將資金投放在真正的資產,如物業、車位、優質股等。
6)要研究下。
7) 行業市盈率,我建議你找同業,最好係產品、質素、規模都相近的公司。你現時分析六福(0590),你可以用周生生(0116)、謝瑞麟(0417)、周大福(1929)作參考。
依波路(1856)無論業務內容和規模,都不適合用作參考。加上過去幾年都虧損,令市盈率數據較異常,故不要將佢加入考慮之列。
你用水牛網,找到這幾間企業過去10年市盈率的4個中位數。再用這4間企業市盈率的上下限,去取出平均值,就是行業市盈率。
(即係4間企業的4個中位數,"最細"和"最大"的數字分別加起,再除以4,就是行業市盈率之上下限)
行業市盈率約為︰10 - 14倍
------------------------------------------------
Q21682:
你好,請問對退稅年金有咩評價?始終感覺上好似長時間鎖住舊錢 係唔係比較適合上左年紀而又無咩免稅額既人?
龔成老師︰
年金產品,主要係提供穏定現金流﹐較適合退休人士。
因為較年青人士,應先做好財富增值,這類產品就不太適合。
但同時,你都要睇翻佢節稅能力,同你將同一筆錢,去投資所得回報作比較。
因為投資回報始終有不確定性,而節稅金額和收取年金,係保證。若2者回報係接近,退稅年金就可以考慮。
------------------------------------------------
Q21683:
老師 你好,我手上現有1316 $13.7 有兩手, 1137 $16有1手 及圓通6123 $6.2有2手 請問可以繼續坐嗎?
龔成老師︰
持有一隻股票與否,唔好單單係睇中短期架帳面賺蝕,應從佢本質著手。就算而一刻帳面出現虧損,只要佢長線質素無變,照長線持有就可以。
你以上3隻股票,都係有質素,若你係年青至中年人士,係適合你長線持有。
耐世特(1316)本質中等,之前業績有點弱,但又唔算好差。你持貨唔算多,只係2手,照持有就可以。但因為質素始終不強,你預佢增長力之會係一般,不建議加。
香港電視(1137)業務有前景,但你要留意,佢有兩點都存有風險的。
第一,佢都會依靠人的因素,王維基成為了公司最值錢的資產,佢的想法好多,有生意頭腦。
第二,這企業現時搞網購,有增長力的,但同時存有一定的未知數。疫情過後的增長力會否減慢?故此股可投資,但不建議大注。
圓通速遞(6123)本身係一家以香港作為總部的國際貨運代理服務供應商,業務已擴展至多個國家,並在亞洲、荷蘭及北美設立了幾十個辦事處。
佢主要經營以下四項業務:空運及海運貨運代理服務、總銷售代理、配套及合約物流服務。
早前阿里巴巴(9988)入股增持,令股價大上大落,這的確會令企業有更多發展,前景正面,不過,估值方面已難。
因為這刻根本無法計算佢,之能賺多少錢,企業發展情況如果,只可以話好多不確定性,但股價就反映大部分利好因素。
因此,這股雖然有發展,但同樣股價上是有風險,相信之後的股價仍會波動。你現時只投資小注,係無問題,但要明白風險因素。
------------------------------------------------
Q21684:
Hello Sir, 我上年喺股市最旺盛嘅時間下入市, 本金80萬, 今年2月由賺20萬到今日我已經蝕咗本金30萬.
升唔識食糊, 倒跌至一個位係我覺得不能承受要止血我唯有放。而家我倉位得返50萬⋯⋯
9618 $330
1810 $25
992 $10
2269 $108
388 $515
1833 $135
請問以上股票係咪都係好股?我唔等呢筆錢用, 我其實可以長期持有, 但係長線持有係咪都要止蝕?
我知你比亞迪由$80跌落去你都冇放棄過...但係我冇這份信心
Sir, 我應唔應該放一些新經濟股轉買舊經濟股?例如1299, 5..etc
先謝謝你的解答
龔成老師︰
你同好多散戶一樣,都犯左個錯誤,就係覺得「買入價」﹐係一個神聖的指標。
記住,不要用自己的買入價作為何時沽出的指標,也不要以回本後沽貨作為策略,同時,更加不要抱著「賺了多少就沽貨」這心態去投資。
沽出是基於這股已偏貴,又或沒有前景,質素有問題,而絕非由買入價決定。
相反,若你分析該企業的係有前景,就算中短期股價波動,令你有賬面虧損,我地都唔應該沽。
你以上持股,都係有質素。但有個問題是,你太集中係潛力股類(除了聯想0992,其餘都係潛力股)。
佢雖然有增長潛力,同時風險都較高,不宜持有過多。
若你係較年青,潛力股可佔約5成,餘下應用以下平穏增長股。但若你投資經驗較淺,潛力股比重,要再調至3成以下。到你學到一定投資知識,才慢慢調高。
未來時間,你就要加大翻平穏增長股部份,令組合更平衡。
平穏增長股:盈富(2800)、金沙(1928)、恆基(0012)、港鐵(0066)、友邦(1299)、平安(2318)、粵海(0270)、領展(0823)、希慎(0014)、太古地產(1972)、長建(1038)
匯控(0005)只係收息股,無乜增長力,如果你係較年長或者好保守,都可以加入佢。
現貨要否沽出部份,去換碼至平穏增長股,要睇翻你組合大小。如果金額較多,你可以沽出部份換碼。
但若金額較細,可能每隻只有1,2手,咁你照持有就可以,用新資金去令組合慢慢回復平衡,就可以了。
------------------------------------------------
Q21685:
龔成老師你好,本人女性今年32歲, 穩定月入6萬3. 戶口僅保持10萬儲蓄應付不時之需.
以往旅遊購物月月清, 最近終想通生活目標, 學習緊斷捨離多儲錢增值自己
經朋友介紹認識你, 希望學習投資重新出發
背景:
資產:3年前8成按購入5M新樓
固定支出28k(供樓,家用,租金,保險)
日常支出希望維持7k
長遠目標:
希望可以5年內換樓
現在目標:
想學習穩定增加資本, 等待時機買dream house (10M)
本人BB班, 過往無投資經驗或概念, 完全唔識股票; 希望得到老師指點初部方向, 建立action plan 一步一步增加財富, 謝謝你。
龔成老師︰
首先,你要改變以往不好的理財習慣,你試下每日記低自己每項支出,再睇翻有無邊D係無必要,盡量空出多一點資金,去做投資增值。
你現時有明確目標,就係細屋換大屋。由於你已有一間物業,我地現在要做的,就是透過優質股,去幫你累積一筆資金,達成你換大屋目標。
你可以選擇一些「平穩增值股」+「潛力股」作投資目標。
以現時大市合理區狀況,你可以考慮用部份儲蓄,進行月供股票。你可以每月先用一半儲蓄,另一半就先儲起架策略。
由於你投資知識不高,因此可較集中在平穩增長類股,至於潛力股,只宜小小注。此期間,你最好是努力提高投資知識,才慢慢增加翻潛力股比例。
餘下現金就是等大跌市時出手,如果你能在這段時間學好選股等技巧,到大跌市時就能把握機會,財富增值會更明顯。
到5年後,你可以慢慢套現股票,去實行換屋大計。
但緊記,我地財富組合,唔好偏重係個別資產類別,要平衡,樓和股票都要有。因此你換樓時,唔好股票盡沽,要留有一定數量,可以用來持續增值,才算理想。
------------------------------------------------
Q21686:
老師好,我而家最主要係糾結好唔好買樓,如果買嘅話幾時買,買咩價位嘅單位好。
今年30歲,月入9萬,和父母住。每月支出1萬至2萬。
現金儲蓄 210萬左右,強積金27萬
投資方面︰
大部分2800,有82萬左右
最近加多咗啲水桶一,加埋大概50萬左右(不過好似有啲心急咗應該分細注啲注入)
2800 - 平均價 23.2, 29000股
3188 - 平均價 60.1, 1000股
1810 - 平均價 24.9, 5200 股
1177 - 平均價 8.31 , 13000 股
788 - 平均價 1.12 , 80000 股
0027 - 平均價 65.2, 1000股
388 - 平均價 451, 100 股
遲啲諗住加埋美股 台積電。
而家亦都開始做緊月供:銀河,港交所,小米,中生 每隻5000蚊
買樓方面,唔急住自住,可能都係當投資+- 收租
自己一兩年後亦都有機會想搬出嚟租屋住或者住返買咗嘅appartment, 不過我就係度諗,買樓咁麻煩又要交差餉管理費,可能仲要比錢裝修。
到底對我嚟講呢個係唔係一個合適嘅投資呢? 如果係嘅話我咁嘅情況應該買咩類型嘅單位好呢? 定係留返啲錢遲啲買股票好?
龔成老師︰
我地投資,除左要選擇一些適合自己的優質資產外,組合的平衡性,同樣都係好重要。
若你無實際需要,我建議你先同家人同住,節省更多資金用作投資。若你無自住急切性,可先從投資角度去考慮,現時股市值博率相對樓市較高,加上你己有一間appartment,我地應先從股市這裡入手。
以你30歲計,投資應以增長為主。你現時持有股票,和月供計劃,大致上係可以。
但月供上,有少少偏重係潛力股(1810, 0388, 1177),風險會稍高。未來可以加入一些好似盈富(2800)的平穏增長股,令組合更平衡。
另外,我建議你每月儲蓄最好可以做到,係收入一半,即係$45000。其中$25000作月供(加多一隻$5000平穏增長股),$20000儲起。
平穏增長股︰盈富(2800)、金沙(1928)、恆基(0012)、平安(2318)、中銀(2388)、港鐵(0066)、長建(1038)、領展(0823)、希慎(0014)、太古地產(1972)
現時大市只在合理區,現金和股票,最好各一半。你現有資金可以用多少少入市(美股、台積電、港股都可以。)。餘下的資金,就等大跌市才動用。
至於物業,現時香港樓市係合理區頂部,投資價值未算好高。但若你此期間,發現一些有質素,又平宜的旬盤,你都可以考慮用現有資金入貨,之後放租。
因為,我地長線財富組合,唔可以偏晒係股票類,都要加入物業類,令組合更平衡健康。
但由於現時物業值博率不高,你可以集中股票先。而買邊類物業,我會建議初階投資者,先從住宅開始。
若資金較少,可以先入手較細單位(但最好都有300呎以上),但必需要有質素和投資價值。你可以睇我本<5年買樓4步曲>,會對物業投資,有較完整解釋。
------------------------------------------------
Q21687:
龔老師你好,我30歲,剛在美股損失了很多,差不多70%身家!現持有︰
941*47蚊入
6618*160入
939*6蚊入
現打算月供2800 和6818
現金只餘下數萬元!
你覺得可以嗎?還有機會番身嗎
龔成老師︰
係而個時候,你唔好先諗翻身問題。你要先想清楚,美股出現重大損失的原因。
美股雖然近期係較波動,但不至於7成上落,所以你投資技巧和方法,一定係出左核心性的問題。
記住,我地買入一隻股票,就等同買入一間企業,一定要知道佢質素、行業前景、財務狀況等,才去考慮否投資。
當我地確認係值優質股後,我地會用平貴定入貨策略,並長線持有。而唔係做短炒,去賺差價。
更加唔好用衍生工具,或者槓桿,因為好難玩,個風險會好高。
你現時持有股票,都係質素。但中移動(0941)和建行(0939)只係收息股,增長力唔會太高,以你30歲計,有點保守,建議不要再加注。
至於月供方面,你可以投資「平穏增長股」和「潛力股」。你每月5成儲蓄,其餘先儲起,用一邊月供一邊儲蓄的策略。
你所選盈富(2800)係可以,但中國光大銀行(6818)都係收息股,唔係咁適合。
選股上,你可以投資在平穏增長股︰盈富(2800)、金沙(1928)、恆基(0012)、平安(2318)、中銀(2388)、港鐵(0066)、煤氣(0003)、長建(1038)、粵海(0270)、領展(0823)。
潛力股可選安碩恒生科技(3067)、比亞迪(1211)、阿里(9988)、騰訊(0700)、港交所(0388)、舜宇光學(2382)、小米(1810)、中生製藥(1177)、福壽園(1448)、GX中國電車基金(2845)。但佢地波動性和風險會較高,你要自己平衡。
你現時無太多投資經驗,潛力股這類風險較高的股票,你就不要持有過多,最多維持2-3成好了,甚至先集中係平穏增長股類。
到你有一定投資經驗﹐潛力股比重可以相應調高,佔組合約3-5成。
餘下的另一半現金,我地就等機會,當大市出現較大回調,就加大力度掃貨,然後作長線投資。
最重要係,你要努力學習正確投資知識。只要你能運用正確投資知識和技巧,長線回報一定會唔錯。
而一刻你可以先做月供,但你再加大投資前,要先了解過往失利原因所在,才好再投入更多資金入市。
------------------------------------------------
Q21688:
龔sir你好,我是一個新手,想試吓買少少投票賺少少外快。我聽別人介紹買"美團"但不知從何入手,求指引
龔成老師︰
首先,你要清晰一個好重要的投資概念。我地投資股票,其實等同投資一間企業。希望透過其自然增長,以達至財富增值的目的。
所以,我地投資一定係長線(3-5年,甚至更長),而唔係短期炒賣,去賺差價。
美團點評(3690)有潛力的,過往一直虧損,到近一年,開始有正現金流,這是一個實質的利好因素,因為之前一直在燒銀紙,現時初步見到成效,不過,估值的方法好虛無,因為現時的市盈率仍過百倍。
如果有利好消息,佢可以上好多,但如果估值修正,股價可太跌。
只可以話,潛力是有的,現價唔算平,之前明顯貴,之後回翻好少少,大約合理區頂,不過,一定不能大注。小小注,是較好的做法。
------------------------------------------------
Q21689:
龔成老師,你好,最近在facebook發現到你的專頁, 發現你回答讀者問題 提供的意見務實而有用, 非常欣賞 。希望你也可為我提供一些意見
本人32歲,未婚,與家人同住,沒有租樓壓力
月入22000, 擁有積蓄70萬。
一路以來都沒有意識到投資嘅重要,只係識儲錢擺銀行。 直至最近意識到錢擺銀行,遠追不到通脹。
直至上月開始學投資,由於好多嘢都唔識 同唔了解,所以暫時都係偏向保守 型投資。
1.)我放咗三十萬在銀行做咗個守約儲蓄保險計劃,年期8年
8年後可拎到38萬x,平均年利率3.6厘
請問老師你認為呢類型產品做得過嗎?定還是 只年期長回報少?
2.) 想放十萬 在股票市場,暫時手持:
中國移動一手
香港電訊一手
盈富基金一手
中國銀行3988一手
二南方納指500股
(啱啱投資就遇著跌市😅)
請問以上嘅組合可以嗎 或有冇更好的建議可供參考?
3.) 另外想投資15萬 到保險公司購買基金或 月供 盈富基金/voo
請問老師你會比較推薦哪一樣?
我希望呢15萬嘅投資係比作一個中長線嘅儲蓄
非常感激, 期待你回覆
龔成老師︰
1) 這類保險產品,係穏陣,但增長力好弱。持有太多,會拖慢左你財富增長力度。
你若真係想保守點,持有係可以,但金額上要作出平衡。
2) 當我地進行人生財富累積時,會運用「先增值,後現金流」方法。年輕人應著重於增值類資產,而較年長的,就應著重保守類別。因年輕人財富系統未成形,同時負擔較少,可以承受較高風險,所以應以增長為先。
例如初期投資較有潛力股票,令財富增值較快,到一定金額後,可轉較平穩增值的股票。最後有相當財富時,才換成收息股去為自已創造穏定現金流。
以你現時32歲去計,應以增值為主。中國移動(0941)、香港電訊(6823)、中行(3988)主要係收息,增長力唔高,不宜持有太多。現貨可持有,就不要再加注。
二南方納指(7266)係追蹤納指表現,納指升1%,佢會升2%。但相反,當納指回調,你架損失會係雙倍。這類槓桿ETF,我唔建你用,風險太高。
若你想投資納指,可以投資美股Invesco QQQ Trust(QQQ) ,是追蹤納斯達克100指數,會較適合你。
將來時間,你可以投資「平穏增長股」和「潛力股」。
如果你現時無太多投資經驗,潛力股這類風險較高的股票,你就不要持有過多,最多維持2-3成好了,甚至先集中係平穏增長股類。
若你有一定投資經驗﹐潛力股比重可以相應調高,佔組合約3-5成,視乎你投資經驗多寡和了解這些股票程度而定。
3) 3者都可以,但由於基金一般都有一定收費,長線拖低你回報。除非你肯定佢長線回報,會明顯優於大市,否則你投資盈富(2800)或VOO,會較為理想。
但留意,現時大市只係合理區,未到好平。資金一定唔可以盡用,而且係要分注咁,慢慢入貨。餘下資金,就等大跌市,才出手入平貨。
------------------------------------------------
Q21690:
Hello龔sir,我睇咗你本“股票勝經”,都成日睇你Facebook page嘅video同解答網友投資問題,穫益良多,多謝你!
我呢排都買咗少少“安碩恒生科技”3067嚟長線投資。想請教吓,你點睇“華夏恒生生科”3069,同3067相唔相似?係唔係長線投資嘅好選擇呢?
龔成老師︰
華夏恒生生科(3069)主要係追蹤恒生香港上市生物科技指數之表現,係一隻不錯的ETF,值得長線投資。
指數包含51隻成份股,當中有「藥品」、「⽣物技術」等公司。較為人熟識的,有藥明生物(2269)、京東健康(6618)、中生(1177)等等。
隨著人口老化和人均收入增加,對優質醫藥的需求只會有增無減。此股都有質素,可作長線投資。但你預佢會較波動,最好用月供模式儲貨,並長線。
但留意,華夏恒生生科(3069)和安碩恒生科技(3067)都係潛力股類,風險會較高。
假設你算係年青,佔5成左右好了。若你投資經驗較一般,比重就要再下調少少。如果你係接近退休之年,這類股票風險太高,就不太適合你了。
------------------------------------------------
Q21691:
龔成老師,我有個問題請教一下,我是澳門的,我打算一年半後結婚,現在和家人一起住,結婚後大機會和老婆家人住,
我比較偏向買鋪位,但可能要結婚後才夠錢,我是否應該在結婚前先用了青年首次置業先買個唐樓,到之後再用唐樓換鋪位?
結婚費用我工作一年半是完全足夠的,買唐樓首期現在是足夠,但鋪位就不足夠。
龔成老師︰
你都可以用這個方法,以資產追資產模式,去先買唐樓,再增值後轉買舖位。
至於澳門的青年首次置業計劃,其實我唔太清楚具體情況,細節位未必好清楚。
但首先,你要睇翻這唐樓是否有質素和投資價值,唔好純粹因為個價你可以承擔,就盲目出手,最緊要睇佢升值潛力和租金回報率,是否合理。
同時間,你要考慮你用左這個首置機會,你將來要自置自住居所時,就不能享受高成數優惠。
另外,投資舖位,對投資物業技巧要求較高。若你這方面經驗唔係太多,你就可能要提升這方面知識,才出手會較好。
若不買唐樓,你都可以考慮用優質股,去為置業資金增值,都係一個可行方法。
至於結婚資金,你就不要用來投資。因為只有1年半時間,用來投資增值,風險會太高,最多只宜作定期存款。
------------------------------------------------
Q21692:
龔成老師您好,今日想主要問問好多人心目中既股王 騰訊 (700HK)。
我有睇過有人問過700而龔成老師覺得依家係係合理區頂部。騰訊現時PE為29到,以historical 10年PE average 35到,我用個PE range 24.5-52.1黎睇,
依家已經俾過往既十年黎講相當較平而股價區會由500-1050所以覺得580已經相對比較便宜,所以想問問龔成老師咩睇法?
同埋龔成老師每次都基本上會叫人留有現金,係大跌市既市時候買入優質既股票。騰訊由高位770跌到依家580差唔多已經跌左25%。
想問下依家係唔係到龔成老師成日講既大跌市,而呢個係買入良機長線持有?
同時都想問下之前都係百度220蚊,姐係由高位跌左差唔多4成個陣買入打算長線持有。
因為百度仲下跌緊到依家差唔多175蚊,上次220蚊買入又合乎龔成老師” 大跌市”的睇法嗎?
謝謝回覆!
龔成老師︰
騰訊(0700)本身已經好大好大隻,要再高速增長並不容易,雖然手遊的長遠發展仍會不錯。
但要帶動這股倍升,相信並不容易。所以,我地唔可以完全參考過往數據,要因應現有情況,作出合理調節。
當你運用過往的市盈率作估值時,要留意翻環境與企業的情況有無改變,當一間企業有較高增長時,市場會比佢一個較高的市盈率,而騰訊5-10年前,仍處於好高增長狀態,到了今天,是中高增長狀態,估值當然會有調整。
此股相信依然有唔錯增長力,但唔會去到以前咁高。而價算係合理區頂,如果你去到平,你預跌多3-4成,才算平宜﹐故現時未稱得上係明顯買入良機。
百度(9888)有質素,有獨特性,長遠發展不差。
佢係全球最大的中文搜索引擎「百度」的營運商,係內地用家搜尋資訊主要對口,用戶規模突破10億,百度App日活潑用戶超過2億,多個指標都處中國第一。
百度在規模和質素上,一定係有。
但我地唔好單純用比較現價和上次高位距離,因為早前科網股被熱炒,不少相關股票,都因而被大幅推高。
我地應用翻企業本身價值,去衡量佢現時價格水平,是否合理。
佢雖然已跌到$18X,但唔算係平,只是合理區頂至略貴水平。但長線有增長力,若無貨,現價小注投資係可以。
------------------------------------------------
Q21693:
龔成老師,一直睇開你嘅理財資訊,本人34歲,持有現金50萬左右,偏向增長組合。因為最近股市比較波動,所以想問吓老師意見。現持有以下股票:
1810 200×23
6618 350×130
700 600×100
883 6000×9.3
1928 1200×32.9
請問咁嘅組合係唔係有啲雜亂無章?想再增持1810同700,亦想加入823、981同2382,但未知合理價位同時好似業務有重疊。多謝老師嘅時間
龔成老師︰
你組合唔算好亂,整體上都有質素,係合你長線持有。
中國海洋石油(0883),質素都算有,但不是最高質類別,佢對油價較為敏感,所以,如果長遠油價向上,佢都會增值的。
雖然佢都有一定的規模及質素,但卻不是最高質素的企業,這是由於佢地的產品自主力較弱。
石油是商品,當中沒有差異性,佢地要將石油賣出,只能跟國際油價,這令佢地處於被動狀態,沒有價格自主的能力,這令佢地的獨特性有限。
這類商品企業,都可投資,但就要明白不是最高質的企業,不宜持有太多。建議你沽少少,換至其他優質股。
中芯國際(0981)、舜宇光學科技(2382)、騰訊(0700)現價算係合理區頂部,小米(1810)則是合理區頂至略貴,領展(0823)算合理區中上部。
這些股票,若你無貨,而價可以首注。但有貨者,建議再等佢有明顯回調,才出手。
小米(1810)、舜宇光學科技(2382)和中芯國際(0981),行業性質上有重疊,加埋不要高於組合3成。
另外,你持股和目標股票,不少都係潛力股,佢雖然有增長潛力,同時風險都較高,不宜持有過多。
以你34歲計,潛力股可佔約5成,餘下應用以下平穏增長股。若你投資經驗較淺,潛力股比重,要再調至3成以下。到你學到一定投資知識,才慢慢調高。
未來時間,你就要加大翻平穏增長股部份,令組合更平衡。
現時大市在合理區,你50萬現金,可以用多10-20萬,以分注形式入市。餘下現金,我地就等大跌市機會,才出手掃平貨。
------------------------------------------------
Q21694:
龔成老師你好,我最近經常睇你fb專頁同書本,裡面學到唔少,宜家想付諸實行!
我宜家22.5歲,工作左兩年半,現時人工26k,每年大概會加1.5k,開支方面: 每月家用10k, 儲蓄保險每月供款2.5k (為期五年,已供了兩年),
還有每月日常消費大概3k,剩下用作儲蓄/投資,我目標係二十五歲時有一個穩建成長及帶來現金流的投資組合,
而帶來嘅現金流則可用作再投資、儲蓄或支付日常開支, 例如每月交通費。
我本身對股票幾有興趣,炒左股一年半,雖然會自己研究下圖表、聽下財經節目,但係暫時都係輸錢,加上工作關係唔可以經常睇實個市,而且有時心理壓力都大,
因為有時啲股票好波動,可能幾日已經輸一兩成,所以我想改變下我現有嘅投資方法,以下係我嘅方案:
1. 自行睇位分注吸納科技ETF 3067, 剛在16.5入了第一注,每跌10%加注
2. 月供股票,每月供款金額約$10000
從以下每個板塊挑選一至兩隻月供,每隻供款金額約$1000-2000
- 穩定增長+收息為主 (第二個水桶)
消費板塊:1044 上月已開始供, 想加914可以嗎?
內房板塊 : 813 or 2007 (二選一)
金融板塊:需要包含嗎?如需要,心儀2628 or 659
- 高增長 (第一個水桶)
生物醫藥板塊 :1833 + (醫藥ETF?)
可再生能源、環保板塊: 未有特別心水(916?6865? 586?可以嗎?)
物管板塊: 823 or 3319 or 1821 (三選一至二)
科技板塊:981,1810,2382,9988,9618 (五選二至三)
每隻股嘅供款金額應該會一樣(e.g大概每隻$1000)但係有些板塊會供多於一隻(例如科技、消費、醫療,因為我較睇好這些板塊或者裡頭潛力股較多)
所以7個板塊投資嘅金額唔會係平均14%(100÷7),反而有啲佔比會重啲,有啲則輕啲
想問這個投資方案可以嗎?
還有我現持有以下股票,打算將部分分批賣掉,套現出來的現金打算儲下來留在跌市時分注吸納或用在月供
6186 2000股 買入價 24
2318 1000股 買入價 50
6865 1000股 買入價 34.5
285 500股 買入價 43.85
7226 1000股 買入價 9.96
189 2000股 買入價 7.5
6601 1500股 買入價 9.2
6049 200股 買入價 69
6110 1000股 買入價 12.6
2333 500股 買入價 23
3319 250股 買入價 35.2
9888 50股 買入價210
想請教下你,謝謝
龔成老師︰
你過去的投資方法和理念,都唔係咁正確。
我地投資股票,其實等同投資一間企業。希望透過其自然增長,以達至財富增值的目的。
所以,我地投資一定係長線,而唔係短期炒賣,去賺差價。因此,我地唔會係用睇圖表,這類技術分析方法,更加唔需要成日睇住個市。
另外,當我地進行人生財富累積時,會運用「先增值,後現金流」方法。年輕人應著重於增值類資產,而較年長的,就應著重保守類別。因年輕人財富系統未成形,同時負擔較少,可以承受較高風險,所以應以增長為先。
例如初期投資較有潛力股票,令財富增值較快,到一定金額後,可轉較平穩增值的股票。最後有相當財富時,才換成收息股去為自已創造穏定現金流。
以你現時22.5歲去計,是財富增值的黃金時期。
你重點唔係要現金流去再投資,而係直接集中係一些較有增長力股票,去累積一筆財富。
"保險"只係理財中防守部份,買足夠保障就可以,增值可以留比優質資產(如優質股、物業等)去做。買太多,只會拖慢你財富增長力。
現時,你自行睇位分注吸納安碩恒生科技(3067) ,這方法可以。
月供策略上,你可以投資「平穏增長股」和「潛力股」。現時大市只在合理水平,除了月供外,每月都要留有一定資金,等大跌市才掃貨。
選股上,你上述板塊都可以。但內房負債較較高,不宜持有太多。而且一些不確定性較高的股票,都唔建議用來月供。
以下是一些較有質素的月供組合,你可以從中參考。
你可以投資在平穏增長股︰盈富(2800)、金沙(1928)、恆基(0012)、平安(2318)、中銀(2388)、港鐵(0066)、煤氣(0003)、長建(1038)、粵海(0270)、領展(0823)。
潛力股可選安碩恒生科技(3067)、比亞迪(1211)、阿里(9988)、騰訊(0700)、港交所(0388)、舜宇光學(2382)、小米(1810)、中生製藥(1177)、福壽園(1448)、GX中國電車基金(2845)。但佢地波動性和風險會較高,你要自己平衡。
如果你現時無太多投資經驗,潛力股這類風險較高的股票,你就不要持有過多,最多維持2-3成好了,甚至先集中係平穏增長股類。
若你有一定投資經驗﹐潛力股比重可以相應調高,佔組合約3-5成,視乎你投資經驗多寡和了解這些股票程度而定。
至於持股方面,如果有質素,我建議你長線持有。若你想留一些資金,捕捉大跌市機會,可以新資金來做。
怛留意,XL二南方恒科(7226)產品之投資目標為追踪恒生科技指數每日表現兩倍(2x)的投資業績。
雖然我長遠認為,恆生科技指數正面,但中短期可以較波動,由於這基金有槓杆,就會令價格更加波動,其實有風險。
我會較建議投資無槓杆的恆生科指ETF(3067),始終較好。
東岳集團(0189)、滔搏(6110)質素中等,唔建議持有太多。
朝雲集團(6601)不確定較高,不宜持有太多。若現時只佔你組合一小部份,可以持有。
------------------------------------------------
Q21695:
老師,我這次的置業目標,計畫的使用的方法會較為特別,我想和你分享一下。
我即將39歲,月入$29000, 已婚,有1小孩(即將6歲)。
我有1個物業(屯門兆康苑,已補地價),管理費$700, 做按揭時是自住的,現時已出租(月租$10500),按揭利率為H+1.23%, 2019年轉按了,轉按時銀行估價540萬,我借了6成,供款期為30年。此物業我在2010年買入,當時樓價115萬,做7成H按揭,一直收租至2015年結婚後自住。
我太太即將36歲,月入$36000, 2019年購入屯門新樓御半山自住,樓價666萬,做6成按揭,按揭利率為H+1.23%, 30年供款,管理費$1900.
現在我打算購置第3個物業作投資(名義上是我外父自住用途)。
我外父和外母現聯名持有1個私樓物業(深井碧堤半島)作自住(已完成供款),並持有1個該屋苑的私家車位(已完成供款)。
他們本身是舊制已退休的公務員,有長俸,外父(即將61歲)的長俸較多,有$30000, 我跟他們談過我的想法,但要他們將現聯名持有的物業改為獨名持有(外母持有),然後當我看中物業時,我外父便可用首置名義(投資)入市
若他能通過壓測的話便可做到9成按揭(樓價800萬或以下),30年供款,供樓戶口要用他名下的,直至按揭總額還款至低於6成方可改為我名義的戶口供樓,當然,所有相關費用,包括供樓會由我承擔。又假設我外父的長俸過不到壓測,也可加我做擔保人,但便只能做8成揭揭。
這樣,我便能合法地做到我想做的。這個物業會由我打理一切,雖然名義上不是我的,但我太太是獨女,就算當我外父、外母百年歸老後,物業仍會被視為遺產留給我太太。
這第3個的物業(嘉輝花園)我會出租,實行以租養樓。
龔sir, 對於我的計畫,不知你會有何評價。
而我和我太太預計會60歲退休
龔成老師:
方向不是不可,但有幾點要講翻。
第一,你地(我以整個大家庭作單位),將會持有4個物業(連同你外父外母聯名那物業的計),在整個財富配置中,其實出現了集中風險。因為我地投資,其中「平衡」都是好重要的,加上香港物業增長力最高的年代過往,我預期往後10年、20年,將會是平穩增長年代。
因此,如果從財富配置的角度,投資其他項目的回報,以及對整體財富的平衡度,將會是最好的。
第二,當涉及的人物愈多,就愈容易出現問題,始終大家都會有不同意見,每個人都是獨立個體,因此,如果日後有甚麼問題出現,會對你地的關係有所影響。
第三,壓力測試,我都唔能夠講得好清楚,佢是否能過關,你最好問清楚先好進行。
第四,買樓有一個好關鍵因素,就是「供得起」原則,如果樓市及租金下跌,你地的防守力如何,如果有一段時期租不出,你地的資金是否頂得住?
至於大方向,其實可以,但你地要明白上述的風險,大家都有共識後,先可以進行。
至於嘉輝花園,可以的,有質素。
------------------------------------------------
Q21696:
老師。其實968呢隻股似唔似資源股,價格比市場影響。因為記得上堂老師不太建議投資呢啲股。
龔成老師:
有少少影響,因此在價格自主能力方面,未能去到好強。不過,我地要睇翻佢本身有無技術,如果擁有技術的話,其實佢能否以較低成本生產到產品。
同時,能生產到較高質的產品,這就會產生了產品價格的差異性,反映企業有質素。就能跳出課堂所課,無法加價的問題。
因此,你在分析時,要小心分析佢的技術,是否行得較前,以及往後的技術發展如何,這是決定企業有無質素的關鍵位。
------------------------------------------------
Q21697:
老師,多謝你回覆。其實我由細接觸好多活動都揾唔到自己真正興趣,直到大學期間睇左富爸爸本書改寫左我人生同觀念,就瘋狂睇其他理財投資書,開始決定長遠目標和寫成功日記,我可以樂此不疲連續睇書,就諗呢個係未我興趣但又害怕(當時中係由窮人思維變緊富人思維中)。
直到網上遇到你,你完完全全教我地點樣實行,開始接觸股票,睇你著作,呢個時侯我已經好肯定咁揾到自己興趣(想成為專業投資家)同人生價值,生活習慣,思維幾年內睇到自己變化好大,亦同身邊人分享理財重要性同推薦你網站。
見到佢地有改變 自己好滿足同開心。我想激動分享既係你地好偉大!啟蒙左我,來來回回咁多年我終於揾到自己目標,好開心!
我亦知自己揾唔到全職一時既低落,調整心態,唔會花時間諗(曬時間),自己能力范圍亦會幫助其他人,相信你同其他作家都希望會見到呢個乘的效應!好啦!
知道阿SIR貴人時忙,我知我多野講,但太激動所以想同你分享,感謝你同其他作家,感恩遇到你地!
龔成老師:
其實你自己都好明白方向,只是一些短期問題。
你知唔知,決定一個人是否成功,不是睇佢順境,是睇佢逆境,如果一個人要對逆境,都能夠保持正確方向行,做出一些對自己長遠利好的決定,這類人成功,只是遲早的問題。
加油啦!
------------------------------------------------
Q21698:
呀sir 我現家重整左股票組合
9988@242 2手
285@47 3手
1810@26 5手
1211@178 1手
我草緊錢準備跌市加倉,但如果到時資金有限,我加倉次序應該點排好,比亞迪其實好想加先,因為得一手,唔該晒呀sir幫我解答
龔成老師:
你所持有的,都是有質素的股票,可以長線投資,無問題,最緊要唔好太著重短期股價上落。
另外,你出現了集中風險情況,同一系的公司,不能太多。
同埋,你整個組合都是潛力股,你應該加入平穩增長股,去平衡整個組合。
所以,你加倉時,應該加入其他。如果想加入上述的股,要跌更明顯下跌才出手。
------------------------------------------------
Q21699:
你好龔SIR,小弟剛睇完《股票勝經》,而家睇緊《50優質潛力股》,暫時只買了幾隻你比較常推薦的潛力股(2800, 0823, 0012, 1928, 3319, 3918)每隻目前都係入唔1-2手
部份都有輕微升幅,部份好似因為之前美國提及是否加息而出現跌市,所以有下跌,想請教一下點解只係討論美國加息與否,都會對股市咁大影響,小弟只了解過對樓宇按揭利息有影響,如果美國真係加息,是否會做成大跌市?
另外想問一隻股票,虎都(2399)早前見阿里巴巴同虎都旗下公司合作,這隻股票是否有潛力?但見最近股價一直大跌,這股值得投資嗎?
希望龔SIR可以提供意見,謝謝
龔成老師:
你上述持有的股票,都有質素的。
可能你會見到股價之前升,之後跌翻,但其實唔需要太過理會。
至於投資市場,一向是以一個「預期」的模式運作,即是說,不是發生了才反映,而是預期之後點發生。
美國加息,理論上會對樓價有影響,會下跌,因為供樓的成本增加左,但要睇到時加多少,如果加幅不大,根本無乜特別影響。
加上香港樓的供應不足,需求大,因此樓價下跌根本有限。
至於虎都(2399),擔心佢炒作多過實際,唔好比一D表面因素影響,要睇企業的實際發展。暫時唔太建議投資,風險高。
------------------------------------------------
Q21700:
龔sir, 你好,想請教一下我有2百萬想放入股市買入一些收息股來做被動收入,請問有什麼股票現在可買入/介紹?
而我會分開十期,每月買入二十萬元股票,這個方法好嗎,還是分開五期,每期四十萬較好?
我現年46歲,打銀行工,有供緊樓。想將這些被動收入補償供樓利息的支出和增值。
下列是而家月供股票
$2000 - 66 (平均價 42.77)
$4000 - 2800 (平均價 26.12)
$2000 - 1928 (平均價 32.59)
我仲想問吓,呢$2,000,000嘅投資應該買入幾多隻股票呢,五隻會唔會太多?我大概希望有 5% - 7% 嘅收入。謝謝
龔成老師:
你46歲,可投資平穩增長股,加收息股,你不用100%投資收息股,因為你這年齡仍有財富增長力。
我會建議你分10期,每次20萬,分12-18個月進行,慢慢分注投資,能將買入價平均,你可以投資5-10隻股票。
你可以建立一個收息股的組合,目標是5%、6%的股息率的收息股,例如港燈(2638)、深高速(0548)、香港電訊(6823)、工行(1398)、恆生(0011)、置富(0778)、陽光(0435)、高息基金(3110)都可以。
如果你能承受到風險,有些更有超過8%、10%的高息股,但股價就略有風險,要自己衡量,佐丹奴國際(0709)、中石化(0386)、互太紡織(1382)等(記住,股價略波動,只能小注)。
現時月供的,可以保持,長期進行就得。
要留意,你不能用盡所有現金,要同時留有部分資金,等機會投資。
----------------------------------------------
若你有問題想向本人發問,可在龔成的fb專頁中(www.facebook.com/80shing)inbox龔成,但要注意如無特別聲明,有可能將問答放上網,當然,會將發問者的身份,以及有關個人資料的部分刪去。
另外,我所給予的各種意見,只是供大家參考,當中無任何銷售及推介,不涉及任何利益,其實大家應該要有獨立分析的能力,我只是給予一些方向及純參考模式。
由於提問人數眾多,見諒無法即日回覆,如果是普通的提問,預起碼要7天以上才能回覆,若然是較複雜的提問,起碼要10天才能回覆,希望各位能諒解。
金 斯 瑞 生物科技 前景 在 龔成 Facebook 的最佳貼文
【龔成問答信箱】(Q20121-Q20140)
Q20121:
啊sir,幾年前剛大學畢業上你的股票班,當時用40蚊左右買比亞迪,$240時放左一半,賺左我人生第一桶金
由於我係文科生,一直以為股票要數學人先玩到,多謝你用簡單易明的理論教懂我價值投資
另外,我想分享我的夢想係做一個可以融合心理學、輔導學、專業塔羅諮詢師。因為我興趣係神秘學、身心靈,所以我好明白吸引力發則、秘密、財富金鑰呢幾本書係幾有用,好多謝啊sir你向我地推介呢幾本書,比更多人明白改變潛意識的威力
啊sir你係我心目中唔止係理財專家,都係發放正能量,叫人了解自己追夢的KOL!現在網絡負能量好多,KOL質素參差,呢幾年當我對自己有懷疑時,我睇你Facebook會鼓勵自己,心諗龔成做到自我實現,我都做到!
現在我正職做XXX,兼職做駐場塔羅師/線上塔羅諮詢,正職志在儲錢及吸收經驗,都在實現夢想的路途中,希望幾年後再inbox你,可以用一個非常專業的諮詢師身份與你分享!
龔成老師:
加油!
比亞迪(1211)呢個回報,你應得的!
現時你做好塔羅師/線上塔羅諮詢,我相信長遠有發展的,你要試不同的宣傳手法,要有人認識先產生更高價值。
加油!你已經行對了方向!
我要記住一點,你要幫人,要產生自己的價值,不要為講而講,為賣而賣。我一向的方向都是幫人,希望有正能量,我不會為宣傳而講一些誇張的野,這是大方向。
我都希望你明白這點,以「真心幫人」為中心。
------------------------------------------------
Q20122:
老師
感謝你的分享!
我都想跟你分享一下
原本我對投資幾乎完全沒有概念
最多只懂得跟風 月供股票
而我男朋友曾是「賭仔」
常期望一夜致富
以致常常「輸身家」
但自從他上過你的投資班
我發覺他的心態平實了很多
由以前「有錢就身痕」
到現在願意跟我一起慢慢累積財富
而我
亦透過他每次上完你的堂後的分享
對理財、投資概念提升了不少
以往,我常常很短視
會用生活費作投資
以致股價跌了一點點就會恐慌
最後手續費都蝕了
但現在
我聽你的話
投資應看公司的長遠發展
所以現在投資時
心裏踏實了很多
實在非常感謝你!
我在過去的一年
終於儲到人生的第一個六位數
由以往月月清
到現在變了儲錢是我其中一個主要嗜好
龔成老師:
太好了!
我地最好要學「理財」,不是「炒賣」,只要我地有正確的理財知識,知識與財富一定成正比的。
其實我自己,過往都有行錯路,之後就是輸得多,所以先慢慢學翻正確投資。
加上,我過往做銀行同證券行,都見到唔少人炒賣輸錢,與家人不和,所以我都想你地學正確的投資。
見到你財富增長,反映你已行在正確的路,理財是長期戰,加油!
------------------------------------------------
Q20123:
我現時的投資組合如下,有一些策略請龔sir比一點意見:
持有平穩增值股:
0066 有一手@$43.75
持有潛力股:
3067 有兩手@$18.19
1177 有一手@$6.99
1833 有兩手@$93
9988 有一手@$271
本人30歲,有家庭,一個小朋友,一直供緊樓,同埋有其他開支,不過可以儲到錢,打算之後嘅投資策略是:
1. 現金儲蓄有30萬會留4成現金不動用,咁有18萬分別是9萬在平穩增值、9萬在潛力股。
2. 0066 會每一季買一手(係用3個月出糧儲起的錢來買)
3. 加入0027 銀娛或其他平穩增值股,但我9萬在平穩增值股裡,如果買左0027銀娛之後我只剩下3萬左右,咁可以買咩入場費較低的平穩增值股好?或有其他建議?
4. 我持有的潛力股,打算3067是每三個月固定入幾手,慳返手續費,之後不斷儲貨長線持有
5.1177 再待跌8%就分注買(用金字塔式)
6. 1833 和9988 不知往後的策略如何?
7.其實我應唔應該買一些收息股如778/435、因我見有6%息率?點樣將啲錢再滾大啲,同平穩增長類一齊持有?不過我見股票勝經教嘅水桶投資法建議收息類都不適合我年紀。
謝謝。問題較長。
另外, 我自己&小朋友都有供緊3份保險.. 其實好想斷供….以前未識投資股票, 以為買保險一定好過放銀行, 但我由幾個月前認識龔SIR同埋睇你的書後, 我唔想再供以下3份保險了..每年開支都幾和味..同埋諗返個回報其實好少。
自己有一份人壽儲蓄保險,年供約$18,000,要供18年,已供5年,剩13年要供,
小朋友兩份: 一份年供約$18,000人壽儲蓄,要供18年,已供5年,剩13年要供,另一份是年供約$16,000,要供5年的純儲蓄,供左2年,剩3年要供,
8. 以上3份保險開支約$52,000/年, 龔SIR我想請教你的建議, 我現在斷供好嗎? (當然問過保險經紀人是一定沒可能攞返之前供的錢架啦), 如果我決心斷供,雖然會蝕左之前幾年的錢,但如果我用未來15年-20年時間將買保險的錢,用黎投資優質股更好吧?亦可幫財富增值, 建立平衡的財富組合, 請問我的方向咁樣正唔正確?
9. 接上題,敢問龔SIR如果我上述方向正確,真的斷供保險, 我用15年-20年時間投資優質股, 回報應該更加大,如果選股成功預計回報都想有10%-15%或以上,如果是, 我的方向應該投資哪幾隻平穩增值股是有這個回報?
我分注儲貨買入優質股既話,例如0066﹑0027這些優質股可以做到呢個回報嗎? 扣除供樓同其他開支可以每個月可到1萬蚊(但澳門月供手續費問題,我打算會分注投資,不會做月供股票)。
你是一個良師, 好希望獲得你的正確指導和意見支持, 感謝
龔成老師:
1)方向可以,你30歲,無問題。
2)可以。
3)如果可以,當然月供較好。你可以考慮領展(0823)。
4)可以,這是一個好方法。
5)得,但注意總投資金額不能過多。每入股上限15%好了。
6)最好月供,或慢慢分注入,潛力度是有的,但股價都波動,要慢慢分注投資,控制好總金額。
7)當我地進行人生財富累積,會運用「先增值,後現金流」作方法,年輕人應投資較多增值類資產,而較年長的,則應投資較多保守類項目,因為年輕人的財富系統未成形,同時負擔較少,可承受的風險度較高,所以會著重增值為先。
例如初期投資較有潛力的股票,令財富較快增值,當增值到一定金額後,可開始將財富分配至平穩增值型股票,然後到年紀漸長或已累積了相當財富後,才漸漸轉成收息型股票。
所以,你唔買收息股都無問題。
8)其實保險在理財中,都有一定的作用,我地理財最重要是「攻守兼備」,你要有防守(即是保險類),同時有增增值。
除非你現時的財富比例,過多在保險,否則,不用斷供。但之後要加強翻股票,保險比例不用太多。
股票增長力較強,但風險度都會較高,你要平衡。
9)其實你照之前的方向已得。
平穩增長股你可以考慮盈富(2800)、銀娛(0027)、恆基(0012)、港鐵(0066)、平安(2318)、粵海(0270)、領展(0823)、希慎(0014)、太古地產(1972)等,你可以了解下這些股票,然後從中選股。
如果想增長力高少少,可考慮:安碩恆生科技ETF(3067)、阿里(9988)、騰訊(0700)、港交所(0388)、舜宇光學(2382)、小米(1810)、中生製藥(1177),但就要明白波動性比上述會高左,同時風險大左,你要自己平衡。
如果你不月供,就分注買入。你單靠平穩增長股是較難有15%回報,同時要加入潛力股票。
------------------------------------------------
Q20124:
龔sir您好,我最近有需要套現大概HK$1m,正在煩惱應該賣出那些股份,希望你可以比d意見。如果係以下股票裡面賣出(全部有幾手),以股票質素同現價黎講
龔sir有無想法可以考慮先賣出邊d?
1)移卡(9923)
2)五礦資源(1208)
3)HKTV(1137)
4)Sands (1928)
5)1548
謝謝!
龔成老師:
最重要不是睇「賺蝕」,不是睇「買入價」,而是睇質素。
你要分析「之後的組合情況」,不是過去,是將來。應該持有那些優質股,比例如何,能為你帶來怎樣的長期財富。
你要分析你的投資目標,你想潛力股的比例多少?平穩股的比例多少?組合風險程度如果?
即是你想設計一個怎樣的投資組合?長期、優質、平衡、適合你。
五礦資源(1208)質素未算好強,金斯瑞生物科技(1548)近年業務增長力不算高。這兩股可以考慮較先賣出。
另外,你要分析你想建往後的組合,如果想增長,金沙(1928)就未算好適合。如果穩陣,移步(9923)、香港電視(1137)就未必適合。
------------------------------------------------
Q20125:
龔sir, 好想請教您,我對保費融資很有興趣,但我本身係穩陣派,見到介紹話係以槓桿形式進行保費融資的,有點怕……請問您覺得可取嗎?謝謝您!
龔成老師:
我講當中的風險。
如果保單的派息,唔能夠與你借貸部分的利息同步上升,你得到的息差就會減。
原理是你借錢,要比息,現時借錢利息低,你有著數,賺息差,但當利率向上,你就有機會蝕息,這是你最大的風險。
------------------------------------------------
Q20126:
老師,想再次謝謝你,我得到人生第1個60萬了!我朋友常常說買美股賺錢,講到好叻咁,知道佢原來放晒美股後先賺左幾千蚊
我想講我三年前follow左老師你fb同上你堂後,暫時賺左20萬了!我相信未來繼續保持這種投資方法會賺更多~
但我因為年尾想買大約400萬樓,所以現在暫停月供(2018 年2月開始友邦,比亞迪,銀娛,中電,中銀香港,領展,港鐵各$1000)同有3手吉利(均價$14.5)2手中生製藥(均價$7.61)。
因年尾要用錢同怕市波動,現在每月淨儲現金約17000蚊無作投資,再慢慢放以上股票(但其實捨不得放晒,全部有質素)到時應有78-80萬
買樓後希望留返約20萬股票,再努力月供同儲現金等機會買潛力股,想問呢個方向有無問題呀?謝謝
龔成老師:
恭喜你!
如果你一年內要買樓,要資金,就要開始準備,如果這刻現金不足,要賣股票,就要開始過程,在一年內賣出股票套出相對應資金,不要等到時先賣,因為無人知到市大市升跌。
所以,你停供,賣股,是需要的。
最好當然是留翻部分優質股,但就要睇你的實際情況。
到你買樓後,完成按揭,到時有資金再慢慢買翻股票。
------------------------------------------------
Q20127:
龔sir,可以點樣了解一隻股適合持有?
龔成老師:
我地買股票就是買企業,因此,一定要優質企業。
另外,偵要睇翻是否適合自己的風險度,潛力股/收息股?
要睇翻這股在財富組合的角色。因為你現時是建立一個組合,長期持有的。
------------------------------------------------
Q20128:
咁其實對潛力股的分析,係咪好靠自己眼光對佢企業前景點睇?
如果想買股票,可以上完基礎班已經慢慢買,定上完7月進階班先?(手上有12萬可投資)
龔成老師:
潛力股有佢的指標的,例如產品、行業、大環境的特點,同時,有些財務數據都能睇到。當然,眼光都是其蠱一個因素。
你要有延伸分析的能力,唔好只集中在當刻的市場消息,要推斷到將來,以及尋找企業本質較好的企業。
股票基礎班,你上完後,已經可以買股票,足夠的。只是進階班會更深入去研究企業。
------------------------------------------------
Q20129:
你好呀 龔sir, 2129 我係0.45買,甘我應賣定長揸?
龔成老師:
LEGION CONSO(2129)質素只是一般般。佢主要在新加坡從事提供以下物流服務:
(一)貨車運輸服務:指港口與指定提貨/交貨地點的貨物(主要為集裝箱)拖運;另亦聘請獨立分包商提供
若干貨車運輸服務。
(二)貨運代理服務:乃一站式解決方案,集團擔當代理並為客戶安排和協調運輸,最終客戶通常來自零售和
製造業等行業,其裝運的起點或目的地通常在國外。
(三)增值運輸服務:包括露天倉儲服務、裝箱與卸貨服務,以及物流堆場與指定提貨或交貨地點的集裝箱拖
運。
其實規模不算大,加上賺錢能力不算強,整體只是一般。
如果你多貨,宜減。如果貨不多,可守下,上翻較多先賣,不過長線投資價值唔算高。
------------------------------------------------
Q20130:
龔sir您好,我岩岩睇財務自由行其中一part(放棄現時現金流,獲取將來更大現金流)
其中有提及「而投資科技股的策略應投資在潛力企業身上,即是要發掘下一隻騰訊、下一隻阿里巴巴,而不是購買現時的騰訊或阿里巴巴」
但是我見龔sir係潛力股推介list有包含呢倆隻,何解呢?係咪因為當時佢哋重未程現真正潛力呢?可以了解一下嗎?感謝
龔成老師:
簡單來說,700、9988是不差的股票,適合大部分投資者,所以對「一般」的投資者,我建議
但如果有知識,有實力,就應該尋找「未被市場發現」的潛力股,這樣才可以更高回報,這是我書希望投資者能到達的境界。
------------------------------------------------
Q20131:
你好呀 龔老師 本人30頭 現在有10萬左右流動資金 早排買左0799升到頂位放左 之後33蚊入左吉利0175 3手
想問下新能源汽車中的吉利 還有在上升趨勢嗎
我還仲想投資多一隻潛力股 京東 美團 阿里巴巴 請問三隻 中邊隻最大潛力推薦入手?
龔成老師:
我地最重要是建立一個長期的「財富組合」,要優質,要平衡,要適合你的年齡與風險承受程度,新舊經濟各類股都要有。
同一行業不能太多,同一股不能太多。要平衡,建立後長期持有,不是買賣賺差價,而是成為你財富組合一部分。
你這年齡,可投資平穩增長股+潛力股。
你可以考慮阿里(9988),吉利(0175)可長線,另外應同時加入一些平穩增長股到組合。建立一個平衡的組合。
當然,同時要留有一定的現金在手。
------------------------------------------------
Q20132:
你好,老師,我只係新手,近月開始睇你既書同網頁,看到同樣出生基層的你有今天的成就,令我十分鼓舞,加上我真係學到好多野,後悔無早早向你學習,希望老師現時可以指點一下我既儲蓄同選股方向,萬分感激!
年約30歲,已婚,家庭月入6萬8-7萬,供緊一層自住物業,現時每月淨儲蓄現金$15000,想於未來三年內換樓和生小朋友,長遠希望財務自由(不過好難!)
現時已買股約50萬,全都是平均少注:20萬舊經濟股(1373、1113、823、778、11)、30萬新經濟股(1211、1177、1833、9988、1448、1810、2382、3088),未知老師對以上組合分配和選股睇法如何呢?
謝謝老師的無私分享和教導
龔成老師:
換樓,最重要是供款方面問題,你可以定這個為計劃,但就不用急。你可以好好把握這幾年,努力儲蓄投資,到時最好有足夠資金換樓,同時不要賣晒所有股票,令你可以有股樓平衡的配置
現時你持有的,基本上都是有質素的,比例方面亦可以,由於現時新經濟股開始貴,因此你加新經濟股的力度,宜減慢。舊經濟股則無問題。
我見你所選的都是有質素的,都問題,方向已經正確。
但都要由有一定的現金,去等機會入市。
------------------------------------------------
Q20133:
Hello 龔成,本人正是80後,今年36歲,係一位單親媽媽。
由2020年開始,平均月入48000左右,月儲20000左右。
有個已購入既公屋單位與爸媽及仔仔同住,要供養父母。
目前有55萬積蓄,另外有兩手匯豐股票由64蚊持有至今
之前有兩手騰訊敵不過你所講既長線同信心,得到薄利就放左,當時仲係420蚊咁上下。
(本人對股票全不在行,只靠自己直覺同電視走勢分析去做判斷,所以我已報名你初階課程,希望可以學習到正確既理念,再重新出發)
我係一個月前開始留意到你既分享,真心令到我都好熱血,我自問本身都係一個極不認命既人,相信自己去改變命運。
我買左你幾本書去睇,睇完都令我有重新思考,過往既自己有想改善命運既心態,但無行動既勇氣。
我係2020年有留意賣盤,心態係樓價只會一直升值,能夠買完收租,係我其一既長遠打算,為將來收入做好準備。
但之後留意你話「乘法」,我就希望策略應該先用股票買賣,令本金推高才作其他工具投資。
畢竟首期本身都係預一成,其實能夠選擇到優質單位可以話無乜可能,純粹係覺得要快D入市。
我知道最近市況都開始有點熱哄哄既情況出現,所以股票方面,我無諗住宜家哩個情況下入市,你話要睇準時機,咁我寧願等撈底,好過宜家去衝。
故此都特意來郵問下閣下對我哩種情況,有咩建議
本人的確唔知應該從何入手好....
另外好多謝你寫書去分享你既經歷,我會繼續支持..仲有三本寄梗黎,你本百萬富翁仲等左成個星期先有,你都要繼續打不死。只要有目標,就算最後唔成功,過程都好重要。我一定會記住。謝謝!
龔成老師:
不如我講少少香港樓市分析,你可以睇下點配合。相信中短期有可能向下(但不會大跌),長遠會向上。
首先要睇經濟基本面,如果經濟持續地差,失業率上升,樓市終會向下,這會對樓市有中期性的影響,不過,就算跌,都不會大跌,最多只是小跌,如果經濟差的情況不是太大,甚至不跌,這是由於背後的需求大。
在長遠計,我仍相信樓市在長遠計,因供求關係,仍是向上多。因為現時香港買樓的需求仍大,而長期供應不足,加上政府往後施政只會更加困難,好多所謂的大計劃都未必能夠實行,又或最後規模細左。
另一方面,需求大,我見唔少適婚年齡的朋友,都正等機會買樓,但未買樓,這些是「潛在需求」,過往每年不斷累積,只要樓市跌少少,就會有需求走出來,這令樓市不能大跌。
另外,樓市另一作用是「投資」,現時的租金無大跌情況,以投資回報率的角度分析,樓價都不會大跌,因此樓市平穩。
長遠計,租金及樓價會平穩,有少少向上,但不是倍升,不會好似過往般倍升,而是平穩向上。
買樓最重要是睇「供得起」原則,如果這方面無問題,你已經可以開始慢慢睇下樓。
最理想就是「股樓平衡」,即是你買完樓後,仍有股票及現金在手,這是最理想的。加上現時新經濟股有點熱,你投資舊經濟股較好。
如果你打算中短期買樓,投資股票的資金不要太多,等你買完樓先正式買更多股票。
而股票方面,你長遠應建立一個平衡的財富組合,優質股要長線。
股票班見!
------------------------------------------------
Q20134:
龔sir, 想問下內房股基本都有負債,如果要選擇內房股投資應該選擇少負債既投資,但我有發現有d股佢負債唔高,現金流足夠,但股票既價值唔高係咩原因?
同樣3333恆大佢既負債極高,仲要成日用折賣樓,但佢又有咁多人投資?
如果股東權益大於負債,咁該股是否暫時沒有負債或債務危機,但是公司的發展與潛力就未知,只是知道沒有財務問題? 是否這樣理解 ?
想問下你對新能源股有咩睇法? 其實睇呢d版塊洗唔洗了解下國策或者拜登對能源政策既方向?
如果現價將2333既股票賣出再轉去175會唔會建議? 因為現狀感覺175既發展潛力比2333大,但不知道為何2333會比炒得如此高。相對2333,175現價是否較平?
Thx
龔成老師:
中國恒大(3333)這是一個高負債的例子,其實佢業務本身不算差,但負債太高。負債高其實有好有壞,當好景時,佢只是少少資金就可以賺好多錢,股價的上升可以好勁。
不過,當樓市逆轉,又或中央有時會出打擊樓市政策,加上佢本身負債極高,對佢有一定的影響。如果樓市有大少少的逆轉,可以對佢造成巨大影響,只是過往中國,多年來樓市整體向上,因此無事,但我地作為投資者,都不能無風險概念。
相反,一些低負債的內房,賺錢能力就會相對較低,不過在樓市逆轉時,佢地會較強。
所以,你要平衡風險與企業的賺錢能力。恆大不是不可投資,而是要明白風險,控制注碼。
至於吉利(0175),我相信長遠潛力度較長城(2333)好。吉利本身的質素不差,擁有一定的銷售網絡及品牌,不錯的市場策略及定位,而又能把握中國汽車市場增長的機遇。
長遠來講,佢的品牌與發展在中國仍理想,2018年,吉利透過旗下海外企業,動用超過$500億人民幣收購戴姆勒股份公司9.69%股份。由于戴姆勒股權結構分散,所以吉利已經成為了戴姆勒集團最大單一股東。這不單有利佢有中國發展,同時長遠,可能加快了海外發展速度。
現時價位在合理區頂,甚至有少少貴,股價波動,有貨可長線。最好回少少,或這刻小注等跌再加。
------------------------------------------------
Q20135:
老師, 你好。以往年少無知,成日聽人講號碼就買,以至蟹貨好多年。
可以請老師就以下的股俾啲意見嗎?
繼續持有/止蝕? 謝謝
338 上海石油化工股份 $5 X 20000
939 建設銀行 $6.54 X 15000
945 宏利金融 $151.5 X 300
2628 中國人壽 $30 X 2000
484 雲遊$44.2 X 600
1359 中國信達 $4.08 X 7000
6 電能 $67 X 1000
1826 旭通控股 $2.2 X10000
龔成老師:
首先你要明白一個概念,我地持有一隻股票與否,關鍵位是企業質素、前景,不要被買入價影響。買為我地買股票就是買企業。
買入價,你的賺蝕,只是一個心理因素,該企業長遠的發展,才是我地是否值得持有的重點。
如果企業有質素,但股價短期下跌,就不用擔心。
如果企業無質素,但你現時蝕錢中,繼續持有只會令你財富繼續貶值,因此要賣出。
如果企業質素轉差,就有可能要減持,因為這股佔你組合的比例,未必值得太多。
上海石油化工(0338)、建行(0939)、中人壽(2628)、電能(0006)質素是有的,但增長力就唔算強,你要睇翻自己的投資目標,去決定這些股持有多少。
宏利金融(0945)有質素,可持有。
雲遊控股(0484)中國信達(1359)質素只是一般,增長力不強,宜減持。
旭通控股(1826)業務不太好,賣出較好。
------------------------------------------------
Q20136:
老師 想同你請教下
最近思考緊個問題
現時越來越多人知道價值投資 同時都越來越多人使用價值投資
咁嘅情況下 其實係唔係價值投資越來越難實現?
龔成老師:
如果愈來愈多人用價值投資法,的確我地賺錢會難左,因為好散再因為市場的無知而能夠買到平野。
不過,就算多人用,始終都是有限的,香港仍是短炒為主的市場,所以我地仍有一定的獲利機會。
睇翻巴菲特,同價值投資法70年,成為全球投資最賺錢人已經好多年,已經話比全世界聽,價值投資法最賺錢,不過,仍有好多人仍然是短炒,多年都是這樣,你打開電視就知,因此,只要仍有人短炒,我地憑價值投資法賺大錢的機會仍在。
------------------------------------------------
Q20137:
龔sir你覺得這樣的組合怎樣?
係潛力股中我想係組合樣樣有D,但銀碼唔會好大,這樣會不會散得滯,唔夠集中呢?
港鐵:$2000
領展:$2000
盈富:$2000(我見龔sir FB都經常比較建議月供呢隻)
安碩恒生科技:$1000
中生製藥:$1000
港交所:$1000
福壽園:$1000
月供總供1萬元
龔sir你覺得這樣的組合會唔會更好D嗎?感謝指點,非常感激,另外我已經報讀左基礎班, 期待期待
龔成老師:
你現時的股票,都是有質素的,投入金額及配置比例都適合,你可以進行。
由於ETF是一個組合,因此就算佔你股票組合比例較多,都無問題,例如盈富(2800)、恆生科技ETF(3067),當然,如果你有選股能力,就不用太多ETF。
現時你的組合無問題,配置正確,你保持進行就得,當然要同時留有一定的現金,等你在大跌市時可以把握到機會。
股票班見!
------------------------------------------------
Q20138:
Hello, 老師你好!本人43歳, 月入$33000, 單身, 與家人同住, 現持有以下股票:
0003 2000
0005 2000
823 500
1038 2500
2388 1000
2800 4000
1299 800
1177 10000
939 5000
現月供 0003 $1000, 1038 $1000, 2800 $2500, 2382 $2500
儲蓄互助社, 現月儲$7800
現持有30萬現金
1) 想問現在持有的股票和月供股票有需要調整嗎?有需要考慮其他類別的股票嗎
2)我本身沒有買保險及基金, 現考慮要不要參加自願性供款, 或自願醫保? 想問一問意見, 應該減少月供股票/月儲現金, 投放在自願性供款/醫保?
之前曾月供比亞迪, 在90元已經全部放了, 之後已經不能在低價買入, 很可惜!
感謝老師幫忙
龔成老師:
1)當我地進行人生財富累積,會運用「先增值,後現金流」作方法,年輕人應投資較多增值類資產,而較年長的,則應投資較多保守類項目,因為年輕人的財富系統未成形,同時負擔較少,可承受的風險度較高,所以會著重增值為先。
例如初期投資較有潛力的股票,令財富較快增值,當增值到一定金額後,可開始將財富分配至平穩增值型股票,然後到年紀漸長或已累積了相當財富後,才漸漸轉成收息型股票。
你現時較多在收息類股。
其實以你的年齡,並不是無增長力的,因此,你應該加強翻少少增長力(當然不是太進取)。
你可以考慮加入每月月供安碩恒生科技(3067),$1000-$1500。
這基金追蹤恆生科技指數之表現,而恆生科技指數,都是一些有質素的潛力股,例如阿里(9988)、騰訊(0700)、小米(1810)、美團(3690)等的新經濟類公司,長遠有潛力。所以有長線持有價值。由於基金有30隻股票,比起單一股票,風險能減低。
不過,現價都唔平,大約在合理區頂至略貴,因此,這刻不能大注投資。最好的策略,就是月供,或自行分注小注慢慢收貨(例如每月買一次、或2個月買可次),總之慢慢入,不能用盡現金,原理如同不斷儲貨,這樣就能平均買入價,減少風險。然後就長線持有。
2)我地理財,最重要是攻守兼備,你保險,是理財其中一部分,因此,是需要的。
不過,「足夠」就得,唔需要過多。所以,當你分析想買那些保險時,最重要是自己的需要,那些風險你不想承受,想轉嫁比保險公司?這就是你的思考方向。一般來說,危疾、人壽保險是需要的,而儲蓄成份,就不一定要。
------------------------------------------------
Q20139:
老師,因為股市高己放左手頭上大部新科技股, 現想買地產16,1997,1972 同14 請問如何選擇其一?
謝謝你
龔成老師:
其實幾隻都可考慮,都是有質素的,不過中短期未必強,但長遠會慢慢好轉。
如果較平穩,就新地(0016),如果增長力高少少,可考慮,希慎(0014),因為佢銅鑼灣較受影響,疫情過後好轉情況會較大。
------------------------------------------------
Q20140:
你好!想請問1971買唔買得過,見佢發盈喜 全年純利同比增長唔少過6成,又冇跌穿招股價,行緊三底上升軌
睇見公司兩位大股東12月以平均價4.8增持四次,可以嗎?
龔成老師:
無跌穿招股價、行緊三底上升軌,都不是分析因素,唔好信這些分析。
兩位大股東增持,只能說是一些加分位。
我地最重要是分析「企業的業務本質,長期發展」。
----------------------------------------------
若你有問題想向本人發問,可在龔成的fb專頁中(www.facebook.com/80shing)inbox龔成,但要注意如無特別聲明,有可能將問答放上網,當然,會將發問者的身份,以及有關個人資料的部分刪去。
另外,我所給予的各種意見,只是供大家參考,當中無任何銷售及推介,不涉及任何利益,其實大家應該要有獨立分析的能力,我只是給予一些方向及純參考模式。
由於提問人數眾多,見諒無法即日回覆,如果是普通的提問,預起碼要7天以上才能回覆,若然是較複雜的提問,起碼要10天才能回覆,希望各位能諒解。
金 斯 瑞 生物科技 前景 在 龔成 Facebook 的最佳貼文
【龔成問答信箱】(Q18821-Q18840)
Q18821:
你好龔Sir, 真係要讚下你。我而家睇緊年報勝經,開始去到財務報表嘅時候,真係有啲擔心會睇唔明。因為我係數學白痴,見到一堆數字就頭暈
但係你喺書中用不同嘅例子舉例說明,簡單易明,令我好有興趣一路睇落去,你真係一個好好嘅老師,勁啊
龔成老師:
我盡力用簡單方法等大家明白,其實這都是我的強項,我就算在股票班,都盡量用最簡單的說話去講比大家聽。
因為財務報表、投資,其實是一些較沉悶,同深的知識,一般人一聽就怕,所以我的作用,就是盡量用大家能夠明白的語言比表述。
書雖然較為入門,但內裡的知識其實唔簡單,你要慢慢消化,而我就盡量用圖、例子,這些較易明的方法,去教大家。
------------------------------------------------
Q18822:
你好呀,最近先認識你,見到40 歲100 萬呢個post ,
想請教,我係無橫財命的,多次證實,所以一直無作任何投資,2800 真的穩陣?
如果想投資物業,只係目標幾十萬首期,買到的應該租出定放租,現時都只是租住
龔成老師:
你可以用以下方法,唔需要靠運,靠自己,一步步累積財富。
首先,我地投資不是炒賣,是配置,買入優質股、優質資產,長線投資。
如果你資金多,可以進行「股樓並行」的配置,同時持有兩類資產。
如果你現時的資金都可買到樓,就了解下樓市,買樓收租是可以的,香港樓長期仍向上,不過中短期可能較弱。
如果資金不多,可以集中累積股票先,你要做三樣野,第一,增加知識,你要學理財及投資的知識,記住,投資並不是坊間的炒炒賣賣,你要從書本或課堂上認真學習。《股票勝經》適合初階者的。
第二,了解銀行及證券行,去開一個證券戶口,並準備做月供股票。
其實兩者都可以,銀行就較方便,但手續費就較貴,證券行收費就較平,香港的監管不差的,風險不大。你可以先了解下不同的收費。
第三,將每月的部分資金,去做月供股票,供盈富(2800),又或自行分注投資。對初階投資者來說,月供股票是一個很好的累積財富方法,因為可避免你一次過在高位買入的風險。
原理如同儲錢,不過就不是儲現金,而是儲股票。計劃要長期進行。
另外,盈富是一個組合,適合絕大部分人投資,風險不高,長期儲貨可助你財富平穩增值,記住要長線持有。
當你在做上述三件事的同時,開始學下股票,了解下那些股票適合你自己。上述只同你簡單供盈富,當你過幾個月,有知識及少少經驗後,就可以利用你手上的資金,其中一部分,去投資股票。
------------------------------------------------
Q18823:
老師 想問下 點樣先知道個股價合唔合理呀?有時睇d股價 都唔知從何入手
同埋想聽你建議去做月供股票 盈富基金個價而家做月供合理嗎?
我嘗試左第一次投資股票 雖然未放得出 不過已經係蝕緊錢 有d失望覺得自己好咋
龔成老師:
要計企業的價值,過程比較複雜,好難三言兩語就講到,就算在我的股票班,都要講5小時,裡面會講3種估值方法,有難有易,但同學都用到的。
簡單來說,你要考慮企業的生意、盈利、現金流、資產、負債等財務數據,同時要比較行業,考慮這企業的經營情況,之後的環境又會如何。這都是計算的基礎。
如果要深入計算,基本上要好仔細的研究企業,要分析好多財務數據用比率,先至有較完整的答案。
另外,你買入股票後,出現短期賬面虧損,其實唔需要擔心,因為中短期股價上上落落,好正常,這個與實力無關,你要學習的,就是「平常心面對」。
我會建議你長期供盈富(2800),現價合理,你以持續儲貨的模式進行,就得。
------------------------------------------------
Q18824:
老師,你好,本人股票輸多贏少,近期有留意老師專頁,亦有買老師書學習。
我今年29歲,月入3萬5,即將供樓用18000。我想將10000開始月供股票,並長揸唔放。
能否對以下組合給予意見?
港鐵 (0066) $4000
恒基 (0012)$3000
盈富 (2800)$3000
謝謝
龔成老師:
由於你要供樓,在負擔上增加左,因此要先留有一定的現金,餘下的才投資,這會比例較陣。
上述所選的月供,都是有質素的股票,可進行,如果想優化,最好加大盈富(2800)的金額,減少另外兩隻的金額。月供保持長期進行就得。
------------------------------------------------
Q18825:
龔老師,想請教你,我現在係悉尼一間西餐飲食集團做office 剛3月入職
主要負責團餐 但因肺炎沒有旅遊 有感職位不安全 有機會被炒
同時我係公司唯一中國人 覺得埋唔到堆 沒有朋友 想自己同朋友做小生意
朋友是土生土長的華裔澳洲人 任職marketing specialist 我地想做一d唔洗開鋪 利用網絡既生意 你有提議嗎?
我們位於悉尼市中心 但見好多鋪頭已經因肺炎倒閉 所以不知道從何入手
龔成老師:
你可以從需求去想想,現時疫情,市民都有不同的需求,除了醫療方面外,有些市民減少外出,但這不一定不想消費,你可以從這方面著手。
當然,這些可能只是中短期的生意,如果要長遠發展,就要想一些長期需求的生意。例如你可以定目標客戶是當地的華人,佢地其實與你一樣,面對一些華人的需求,你就嘗試解決這些需求。
利用網上銷售是方向,你可以從這些方向去想想。
------------------------------------------------
Q18826:
想請問龔 sir ,如果我現在買樓,1700 萬的,稅項255 萬。你會替我開心或替我擔心?
自己名下有一物業,是早年,2003 年買下給長輩用,自己租樓近十年,
之前經歷過97,2003, 2008 買樓,唯97&2008 買的已經賣咗,落錯了車。
由2011 年租樓到現在,希望等吓樓價跌,事實大家都知,今次疫情,經濟結構同2003不同,感覺樓價仍然是歷史高位....
想亞sir 你比啲意見。謝謝
龔成老師:
從你過往的經歷,已睇得出你的問題所在,因為你「估高低」,你一定要明白一點,無人能預測走勢,無人能捉到最高最低位。
因此,你錯過一些低位,根本不是問題,另外你2011年賣樓,正正是估當時已到高位,樓市會跌,賣出等跌打算再買。
唔好再試估高低,從你的需求著手就得。買入後只要你「供得起」就得,不用擔心樓價之後的上落。
不過,你要比15%的重稅去買樓,就未必值得,這個成本太高,你最好想一些方法,能以一些節省稅務的方式買樓。
------------------------------------------------
Q18827:
你好, 想請教一下老師覺得係澳門投資地鋪好還是住宅好? 謝謝 !!
龔成老師:
兩類是不同的投資項目,住宅會較入門,同時金額一般較細,至於地舖,要求你的投資與法律知識較多,同時金額一般較大。
另外,地舖會較易經濟影響,敏感度較高,而澳門住宅有一定的需求,因此樓價相對大跌機會較少。
現時疫情,有危有機,如果一些地舖價格有明顯的下跌,而你分析該地點長遠不差的,都有投資價值。
------------------------------------------------
Q18828:
龔成老師,兩夫婦40歲左右,有600萬現金,沒有任何投資,每月使費約6萬。 請問應該如何配置才可以做到財務自由?
謝謝你的時間及解答!
龔成老師:
當我地進行人生財富累積,會運用「先增值,後現金流」作方法,年輕人應投資較多增值類資產,而較年長的,則應投資較多保守類項目,因為年輕人的財富系統未成形,同時負擔較少,可承受的風險度較高,所以會著重增值為先。
例如初期投資較有潛力的股票,令財富較快增值,當增值到一定金額後,可開始將財富分配至平穩增值型股票,然後到年紀漸長或已累積了相當財富後,才漸漸轉成收息型股票。
你這年齡,其實仍是財富增值的時間,因此,我會較建議你仍投資有增長力的項目,不用太早追求財務自由及現金流。
不過,如果這刻好想財務自己,都可以用以下方法:
你可以將這$600萬,分成5部分。
第一部分投資收息股,你可以建立一個收息股組合,你可考慮港燈(2638)、香港電訊(6823)、恆生(0011)、工行(1398)、置富(0778)、陽光(0435)、深高速(0548)等,大多有5%股息
你平衡的投資這些股,除了可以得到穩健的收息收,同時可有效的分散風險。
第二,投資債券,你可以選擇A評級的債券,年期較長都可以,但利息卻不高。你可以到銀行問問。
第三,投資年金,你可以睇睇,這是適合你們的產品,零風險,可以有穩定回報。
第四,你亦可投資銀行低風險類的產品,你可自行到銀行了解下,總之是「低風險,持續現金流」的。
第五,持有現金,除了可做定期外,現金亦可以為你的後盾,以備不時之選。同時,若投資市場大跌,你可以在這時買到更多的收息股,股息率會進一步上升。
你可以將$600萬資金,平衡地分配在上述的項目上,對你來說是最好平衡風險,同時有穩定的現金流。
------------------------------------------------
Q18829:
龔成老師你好,上年大約2019年7月嘅時候開始做月供股票
分別係 2800 0066 1211
因為我仲係一個學生 每月最多供到4000 最少1000
加上疫症 返唔到part time 就冇供到
宜家有大約$42000嘅港股
而我嘅1211 只係買左大概150股
而平均買入價都係$40-45左右
見到佢近期都升得好多
但是恒生戶口中 賣買碎股 好像都要500股才可以做交易
我知道升一倍賣一半 但是現在股數不足以賣出,以現在買入價亦是高位,應該怎樣做?
1. 如何買賣碎股?
2. 該怎樣做?1211繼續做月供? 還是先不理會,等待便宜價再月供?
3. 現在再購入1211的話 就會令醉均買入價升高太多,該怎樣做?
龔成老師:
1)如果要賣出碎股,部分銀行的網上系統都有提供,你可以照賣,有些則要打電話去先賣到。其實同賣正股原理一樣,不過股價就會低少少。
不過,上述都是優質股,你不用賣出,持有就得。
2)比亞迪(1211)$100以上就停一停先,唔好供住,原有貨就持有。
3)等待。
同時,你可以儲下現金先,以及留意下其他股票。
------------------------------------------------
Q18830:
老師請教一下 關於你對澳門銀河0027的睇法,我是一位澳門人,知道銀河是香港公司,並正在發展中,遲點佢可能會開銀河第3/4期
再加上有一個輕軌站一落車就到銀河
我想買銀河 但入門好高,差唔多要4-5萬,請問一下你認為銀河的合理價/便宜價是什麼?
龔成老師:
銀娛(0027)有質素,可以長線投資,但你預佢中短期較一般,長遠仍無問題,有質素,有發展。
最好的方法當然月供,但好似澳門月供手續費較貴,你可了解下先。
如果要一手手入,你可以等佢回多5%-10%先,如果月供就可以開始。
------------------------------------------------
Q18831:
龔sir 你好, 我留意你的Facebook 一段日子,謝謝你一直以來用心的分享。
我早年買落很多股票,但很多都蝕住等返家鄉,現共有大約100萬嘅股票組合,分配如下:
11 恒生 500股
1 長和 1000股
3311 中國建築 30,000股
3383 雅居樂 20,000股
1378 中國宏橋 19,500股
1548 金斯瑞生物科技 12,000股
1612 永勝醫療 36,000股
1810 小米 14,600股
2382 舜宇 300股
3377 遠洋集團 10,000股
1726 HKE HOLDINGS 225,000股
1800 中交建 2,000股
1337 雷蛇 7,000股
144 招商局 4,000股
945 宏利 500股
想問吓, 應該點樣重組?
謝謝你解答
龔成老師:
首先你要明白一個概念,我地持有一隻股票與否,關鍵位是企業質素、前景,不要被買入價影響。買為我地買股票就是買企業。
買入價,你的賺蝕,只是一個心理因素,該企業長遠的發展,才是我地是否值得持有的重點。
如果企業有質素,但股價短期下跌,就不用擔心。
如果企業無質素,但你現時蝕錢中,繼續持有只會令你財富繼續貶值,因此要賣出。
如果企業質素轉差,就有可能要減持,因為這股佔你組合的比例,未必值得太多。
整體來說,持有都不是劣質,但質素都不是好強,同時無乜增長力,你要慢慢調整翻。
中國建築國際(3311)、中國宏橋(1378)、金斯瑞生物科技(1548)、遠洋集團(3377)、中國交通建設(1800),質素較一般。不是劣質,但不是高質,可以等反彈賣出,但不用立刻賣,等時機先。
永勝醫療(1612)、雷蛇(1337)是較為風險類,唔建議持有太多。
HKE HOLDINGS(1726),質素則較弱,要等機會賣出。
至於其他,都可以守有的,但不少的增長力都唔強。
之後,就慢慢建立翻一個更有質素及有增長力的組合。
------------------------------------------------
Q18832:
Hi 我想問我岩岩開始投資
應該睇咩書先?
而家休息緊
手上持有中銀 地鐵 建設 煤氣
每隻大約幾萬
而家手上有d 現金
應該買邊隻?
龔成老師:
你要做二樣野,第一,增加知識,你要學理財及投資的知識,記住,投資並不是坊間的炒炒賣賣,你要從書本或課堂上認真學習。《股票勝經》適合初階者的。
第二,將每月的部分資金,去做月供股票,供盈富(2800)。對初階投資者來說,月供股票是一個很好的累積財富方法,因為可避免你一次過在高位買入的風險。
原理如同儲錢,不過就不是儲現金,而是儲股票。計劃要長期進行。
另外,盈富是一個組合,適合絕大部分人投資,風險不高,長期儲貨可助你財富平穩增值,記住要長線持有。
你現時持有的,都是有質素的股票,不過增長力不強,建議你暫時慢慢入(即是以月供模式)去投資盈富,同時,你要增加知識,之後,就可以開始投資較有增長力的股票。
------------------------------------------------
Q18833:
您好啊!我想請教一下你,現在手頭上有130萬,冇樓,租住一個251呎的單位,月租7000。
我看了一下樓價,現時住緊的樓賣緊380萬,53年樓齡,要比4成首期,再月供一萬。咁其實我係咪租划算過買啊。
龔成老師:
可以用「租金回報率」去計下就得。
$7000X12,一年的租金就是$84000,而現時樓價$380萬,即是租金回報率為2.2%。
這個回報率,比起現時一般的單位較低,反映有兩個可能性,第一,佢收你的租較平,第二,物業唔值$380萬,可能只值較低。
當然,$380萬可能包了其他的因素,因為被收購的可能性,但這個可能性高還是低,則要真正睇先知。
你可以話現時租好過供,不過,所有事情都是睇長遠的。
------------------------------------------------
Q18834:
老師你好, 我今年30歲, 做左2,3年正職之後就一直做freelance 4,5年, 收入唔穩定, 疫情手停口停, 無乜正職經驗好難搵工, 好傍偟, 如果想40歲有100萬, 可行嗎?
龔成老師:
你要從「收入」方面著手,疫情只是中短期,你只要之後做好理財就得。
你freelance要盡量做到填滿時間,如果有時間剩,就要多增值自己,睇書、發展一些專業技能、小生意,都是一些方向。
收入時多時少唔緊要,但我希望你能定出一些儲蓄計劃,例如每月平均儲到$6000-$10000。當疫情過後,回到正常時,你就要開始這計劃。
同時,要適當投資,如果無投資知識就月供股票。
相信要40歲有$100萬,並不難,你肯定目標就做到!
------------------------------------------------
Q18835:
龔sir你好。我今年三十歲出頭,月入五萬多,扣除家庭開支,月儲約三萬,因為性格保守,我一直唔敢投資
每次有朋友游說我置業/買月供股票/保險儲蓄,我都會將「可能會蝕」呢個風險睇得好重,擔心萬一有急事拎唔到現金出嚟,以致財富一直未能增值。
最近因為同伴侶租屋住,開支大了,而另一半收入唔穩定,同時有幸朋友介紹你的專頁俾我
先明白到再只揸現金係件唔理想嘅事情,所以好希望得到你賜教,使財富可以持續增值,萬一另一半失業/退休,都唔使咁閉翳。
直到現在,我儲了約一百七十萬現金,當中有部分係美金。同時無持有過任何股票。
另外,好多謝你常常無私分享你嘅知識,令好多無相關知識經驗嘅人有好大得著,多謝你
龔成老師:
你要做三樣野,第一,增加知識,你之前怕投資,原因是你不知道真正的投資方法。你要學理財及投資的知識,記住,投資並不是坊間的炒炒賣賣,你要從書本或課堂上認真學習。《股票勝經》適合初階者的。
當你愈了解投資,你理財就會愈做得穩健,同時能有一定的回報。
第二,了解銀行及證券行,去開一個證券戶口,並準備做月供股票。
其實兩者都可以,銀行就較方便,但手續費就較貴,證券行收費就較平,香港的監管不差的,風險不大。你可以先了解下不同的收費。
你現時有一定的現金,點都要將部分現金轉為股票。
第三,分注投資優質股,暫時你可以動用$30萬,開始投資先,唔好太急用$140萬。暫時分注用$30萬先。
你的年齡,其實可以投資「平穩增值股」+「潛力股」,不過,由於潛力股要求你有一定的投資知識,因此這刻不用急著投資,你可以集中在平穩增值股先,潛力股小注好了。
你可以考慮盈富(2800)、銀娛(0027)、恆基(0012)、港鐵(0066)、平安(2318)、粵海(0270)、領展(0823)、希慎(0014)、太古地產(1972)等,你可以了解下這些股票,然後從中選股。
如果想增長力高少少,可考慮:安碩恆生科技ETF(3067)、阿里(9988)、騰訊(0700)、港交所(0388)、舜宇光學(2382)、小米(1810)、比亞迪(1211)、中生製藥(1177),但就要明白波動性比上述會高左,同時風險大左,你要自己平衡。部分要等回少少先入。
現時大市處合理區,可以一邊投資一邊留現金,而餘下現金的運用,就是等大跌市時出手,如果你能在這段時間學好選股等技巧,到大跌市時就能把握機會,財富增值會更明顯。
------------------------------------------------
Q18836:
你好,龔老師,本人有以現時飾金價格計算約30萬飾金,同當年買入價平手,想對回現金投資,請問建議投資什麼?thanks!
龔成老師:
其實可以係整個財富組合裡,持有一定的貴金屬,所以你不一定要賣晒。加上現時股票市場,又不是特別平,因此又不用好急要投資。
假設你賣出,可以部分持有現金等機會,部分套現,部分則可分注投資優質股。
你可以考慮盈富(2800)、銀娛(0027)、恆基(0012)、港鐵(0066)、平安(2318)、粵海(0270)、領展(0823)、希慎(0014)、太古地產(1972)等,你可以了解下這些股票,然後從中選股。
如果想增長力高少少,可考慮:安碩恆生科技ETF(3067)、阿里(9988)、騰訊(0700)、港交所(0388)、舜宇光學(2382)、小米(1810)、比亞迪(1211)、中生製藥(1177),但就要明白波動性比上述會高左,同時風險大左,你要自己平衡。部分要等回少少先入。
如果你不懂股,就集中供盈富$5000。
現時大市處合理區,可以一邊投資一邊留現金,而餘下現金的運用,就是等大跌市時出手,如果你能在這段時間學好選股等技巧,到大跌市時就能把握機會,財富增值會更明顯。
------------------------------------------------
Q18837:
龔sir,過去8月上左初階班,真係令我投資知識增加左不少,嚟近有個大目標,想問下你意見,可能有小小煩,希望你唔好介意。
1.先講背景,我同先生36歲,有1個小朋友,家庭月入$4萬,一路都想置業,明白手上資金不足,但最近有個念頭,想移居台灣,約用10年時間去完成,現在先訂立一個小目標,3年可擁有100萬資產,再用錢搵錢,加快資產增值速度,請你指教一下
2.我本身有股票如下:
金沙 400 股@29
福壽園 1000股@6.6
小米 200股@ 21
蘋果 200股 (約總值20萬,只會一直持有,暫不會再增加)
VOO 2 股(剛開始買,主要想平衡風險)
盈富基金 $3000(月供已有1年)
中生製藥 $2000 (今個月開始月供)
現金$10萬
3. 我每月可儲現金5千,再加月供上述股票,由於上堂後已基本概念,會打算邊儲現金邊留意持有股票,當合理價時便會分批吸納爭持,你覺得可行嗎?
4. 另外有一份長達20年月供基金,大概於47歲時便有百多萬可取回,由於小時候不懂,所以選擇這投資法,但眼見只剩下10年完成,又不想白白浪費
5. 分析過舜宇光學科技,金界控股及楓葉教育,但眼見舜宇光學值博率高,另外2隻比較高風險,如果價格合理時會打算買入,你覺得如何呢?
龔成老師:
3)可以,你整個方向的正確,上述持有的都是有質素的股票,你只要保持進行就得,現金$10萬就留現金,到有大跌市出現先動用。
要3年有$100萬,機會一半半,因為單靠上述的方法,仍未必得,你要提握到機遇先得,但大跌市無人知會否出現。
4)這類產品在理財中都有質用的,你現時保持進行就得。
5)這3隻都是有質素的,舜宇光學(2382)的確較好,這股可以長線投資,現價在合理區中上部,都可以分注投資。
------------------------------------------------
Q18838:
龔成老師你好,想請教你
(1)其實參加股東大會有用嗎?老師有否參加過?
(2) 想問環保股3718同1257應如何取捨?邊隻值博率較高?
(3)788可以長遠月供,還是有其他更好既選擇?
(4)如果稅貸做到低息同拉長還款期,用於投資同清還信用卡數,借唔借得過?
(5) 25歲,做左4年,月入$20000,工作穩定,福利銀行假雙糧花紅都有,公司唔會炒人,但辛苦工而且冇咩前景,最多再晉升多一次
本身入職時都幾開心,但過左4年到今日,都有少少麻木,呢排疫情比較難搵工,老師有咩建議或者心得可以提供?我必定虛心學習
龔成老師:
1)我都有參加過,你都可以試下去,不過,作用不算好大。
2)北控城市資源(3718)會較好,這股有質素的。
佢主要在中國從事環境衛生服務;危險廢物處理業務;以及廢棄電器及電子產品處理業務。
環境衛生服務方面,佢的服務涵蓋綜合道路清潔、垃圾分類、垃圾收運、垃圾轉運站管理、公廁管理、糞便收運、綠道養護、河道保潔服務。
同時自2019年起開始,佢有係北京的若干商住區域提供物業管理服務。
過往財務數據不差,有一定的增長力,有長線投資價值。
3)這股都可月供的,盈富(2800)或安碩恒生科技(3067)都可月供。
4)如果你本身的卡數多及要比高息,就可考慮用這方法處理,不過,你都要明白這是消費性負債,始終不建議太多。
至於借錢投資,除非你的投資實力較高,以及現時大市好平,否則不太建議,這而這刻大市未算平。
5)你要用長期的角度分析,10年後,你想做甚麼?事業發展如何?收入如何?過怎樣的生活?
你先想清楚這些問題,之後就想想,現時的工作,是否能幫到你向這目標進發?如果要做到這目標,應該轉工還是怎樣?
------------------------------------------------
Q18839:
我睇"年報勝經" 既速度比起"股票勝經"慢得多, 是正常的嗎?
因為我覺得年報勝經入面既知識, 對於初階的我, 比較難消化, 我要不斷重覆閱讀才明白老師所說的概念...
龔成老師:
正常,因為《年報勝經》較深的,你最好慢慢睇,同時睇兩次。
如果你未能掌握,可以睇多幾次《股票勝經》,打好基礎先。
------------------------------------------------
Q18840:
Voo/qqq比2800更有投資價值嗎?
龔成老師
voo/qqq,有投資價值,VOO與盈富(2800)類似,都是平穩增長型,各有各好,無話邊個更有價值。因為VOO是美國地區企業,盈富則較多是中國地區,而這兩個國家長遠的發展都是正面。
至於QQQ,增長力強,但風險會高D,都可以長線持有。
----------------------------------------------
若你有問題想向本人發問,可在龔成的fb專頁中(www.facebook.com/80shing)inbox龔成,但要注意如無特別聲明,有可能將問答放上網,當然,會將發問者的身份,以及有關個人資料的部分刪去。
另外,我所給予的各種意見,只是供大家參考,當中無任何銷售及推介,不涉及任何利益,其實大家應該要有獨立分析的能力,我只是給予一些方向及純參考模式。
由於提問人數眾多,見諒無法即日回覆,如果是普通的提問,預起碼要7天以上才能回覆,若然是較複雜的提問,起碼要10天才能回覆,希望各位能諒解。