【好似係回望2017/展望2018】
#長文無人睇系列
#我其實唔知自己up乜
仲有兩日就過完2017，
細個總係會訂啲無完成過嘅新年目標，
例如早啲起身啦，變靚啲咁，
所以好多年都無講過新一年有乜嘢目標。
自從無工返，我會訂好晒每日要做啲乜，
好驚自己懶，好驚自己會嘥時間。
其實過咗幾個月我都唔知自己做緊乜同埋嚟緊要做啲乜，
我只係知，如果我乜都唔做，我就真係乜都無做到出嚟。
但排到個月曆咁色彩繽紛，換嚟係個腦實晒、對眼乾晒、人中仲未爆機、未睇過嘅書都係無睇過。
我唔係話我好努力，只不過我覺得自己有啲蠢，應該要用啲時間用得有效率少少。
做人，全部嘢都係有quota㗎。
活幾耐啦、食幾多嘢啦、笑幾多次啦…
好似食buffet咁，你明知你唔會食得落全部嘢，
你一定會揀你最想食、最感興趣嘅嘢嚟食咗先㗎，
你覺得榴槤臭嘅話，無理由仲去拎舊榴槤塞飽自己嘥quota㗎嘛。
所以我成日覺得，而家想做啲乜嘢，負擔到後果嘅話就做咗先算啦。
希望2018年，除咗努力，可以學叻啲、做得開心啲、起身起得早啲同變靚啲。
認真，最想要嘅都係身邊嘅人同狗都身體健康、平平安安。
BTW 成波之路Facebook Page 開咗三年喇！三年嚟其實我做咗啲乜我都唔係好知…
