（雖然只係代節目，不過都想寫下嘢。呢排過緊不斷寫字寫字嘅生活，個腦停唔到落嚟，瞓覺都諗緊嘢，有時會眼瞓啲不過唔辛苦，做自己唔中意嘅事先會叫辛苦。希望大家都喜歡，喜歡可以支持一下。）
#不道德劇場
#壽命販賣列車
阿一係一個23歲嘅的男仔生，大學主修電機工程，啱啱畢業入咗間工程公司做嘢，開始意識到自己已經享受完人生最有樂趣嘅四年大學時光，慢慢踏入營營役役，重複又重複嘅人生之旅。
同好多人一樣，喺公司佢唔係最標青嘅同事，但係亦都未刺激到會比上司針對；怨氣又唔係話好多，亦都唔係話完全唔開心，但係就係「都係咁囉」，好似永無止境咁搭地鐵囉，有時少人有時多人，有時有得企有時有得企坐，悶咪出月台hea下囉，但係佢覺得，佢永遠都出唔到地鐵站外面。
直至有一日，佢好似平時咁六點收工返屋企，喺中環站上車，車門一開，只係得一個人坐咗係關愛座。佢只係眨咗一眼咋，前前後後本身排緊隊嘅人就唔見晒，地鐵仍然係地鐵，六點仍然係六點，但係佢就好似跌咗入另一個世界咁。
坐喺關愛座嘅果個人，係一個戴住高帽，留住兩撇鬚，著住踢死兔嘅紳士，佢望落去好高好高，唔知點解唔係好望得清楚佢個樣 －除咗鬼片你係唔會見到呢種人嘅。阿一覺得情況好奇怪，啱啱開始識驚，個紳士就行埋去同佢講嘢。
「阿一，你好。前提係你唔知自己幾多歲死，如果我以一萬蚊一年做單位嚟買你嘅壽命，你會賣幾多年比我呀？」
紳士問完呢個問題之後，阿一懷疑自己係咪死咗，佢懷疑地獄其實係咪就係地鐵咁嘅樣，因為平時佢都有啲覺得地鐵有啲似地獄，而家呢度無晒人，諗諗下又好似平時仲似。Anyway，如果呢度就係地獄，呢位紳士阿叔，咪就係地獄使者囉！但係阿一又諗，如果係已經死咗，咁乜鬼嘢賣壽命呢？都已經無晒貨賣啦。
「放心啦阿一，你未死。我只係聽到你既心願嘅地鐵之神啫。」
乜鬼嘢地鐵之神呀！阿一想即刻吐槽，但係一諗到情況可能好危險會就無出聲。紳士見佢唔出聲，就繼續講落去。
「如果你唔想賣俾我，就而家落車。如果你想賣一年比我，就下個站落車。如果你想賣兩年比我，就再過多個站落車，如此類推。請你作出你嘅選擇啦。」
呢個時候地鐵嘅門打開咗。
阿一下意識想即刻出去，但係又好想滿足自己嘅好奇心。況且，如果賣一年就有一萬蚊即刻到手，都好似幾高興吖，反正阿一其實唔想咁長命。於是，嘟嘟嘟嘟嘟嘟嘟嘟嘟！道門閂咗，阿一坐低，一分鐘之後架車停低，道門打開，阿一走咗落車。
一落車，阿一發現自己依然喺中環站。站入面好多好多人，佢依然等緊仲有兩分鐘先到站嘅下一班車。一切實在好莫名其妙，就喺佢懷疑自己發白日夢嘅一刻，佢部電話收到個message，有人入咗$10000入佢個戶口。
對一個啱啱出嚟社會做嘢嘅fresh grad嚟講，一萬蚊係一個月糧啦，戶口無啦啦多咗一萬蚊，阿一梗係好開心啦，嗰一晚佢想約班朋友出嚟食個大餐，但係班朋友個個開緊OT，無人得閒理佢。
於是阿一開始有啲灰，佢甚至覺得不停工作嘅生命真係毫無意義，一萬蚊喺漫長嘅人生有算啲乜喎，佢後悔自己無再賣多啲壽命比紳士阿叔。佢一路諗一路自己一個人喺尖沙嘴食咗個$800嘅一人晚餐，之後就搭地鐵返佢位於樂富嘅屋企。點知去到本身應該萬人空巷嘅尖沙嘴站，佢又再遇到一樣嘅情況。
紳士同阿一講，因為佢又再有咁嘅心願，所以佢又再咁樣出現。阿一今次唔驚啦，佢仲好理性咁一路計，就當自己有60歲命，其實活到差唔多40歲佢都好開心啦，所以佢一搭，今次搭咗十幾個站。佢滿懷期望咁坐係列車上面，大約半個鐘之後落車，點知一落車，佢見到嘅係唔係尖沙咀站，係完全唔同嘅風景。
阿一四圍望，呢個地方陰陰森森，個天紫色嘅，周圍零零落落有啲中式嘅殘舊建築，仲有啲目無表情嘅人。阿一佢有啲不知所措，直至個紳士又企喺佢面前。
「阿一，你本身淨係得40歲命，所以你已經賣走晒自己條命啦。呢度係陰間。」
阿一聽到即刻嚇咗一嚇，同時間亦都因為自己嘅冷靜嚇咗一嚇。
佢居然有一種解放嘅感覺，有一種真係落咗車，離開咗個地鐵站嘅感覺。離開咗咪幾好，唔駛再返工，唔使再營營役役，嚟到呢度應該自由啦掛。
「之後落嚟你要做嘅事就係等投胎。因為都有好多無主孤魂排緊隊，喺投胎之前你可以做嘅就係留係呢度生活。呢度同人間其實都有啲相似，你一樣要用金錢嚟買生活，一樣要工作。」
紳士向左邊望咗一望，阿一跟住望過去。係一班不斷搬緊石頭，來來回回不斷遊走嘅無主孤魂。阿一心諗，佢真係唔想好似呢班人咁搬石頭呀！佢覺得係紳士害咗佢，係紳士令佢冇咗條命。佢想盡快投胎，佢想再次經歷過無憂無慮，自由自在嘅童年。於是，佢好大膽向紳士提出一個方案。
「請問，我可唔可以將呢度嘅年份都賣比你呢？」
阿一覺得，如果可以賣走晒啲等待嘅時間即刻投胎都無壞吖，而掉返轉，如果賣唔晒，佢都有大把錢喺度生活，唔駛搬石頭，都叫百利而無一害。
「可以，你絕對可以咁做。我可以用錢同你交易啲年份。」
阿一又問，咁大概其實我要等幾耐先投到胎㗎？
「唔知㗎。可能五十年，可能一百年，可能耐啲都唔定。」
「咁五百年啦！」阿一諗都無諗就咁答，佢心諗，佢一係要即刻投胎，一係就要五百萬。人都死左，佢唔需要壽命。
「ok，成交。」
阿一冇諗過，紳士完全問都唔問就話成交。佢心入面好開心，即刻係咁同紳士講多謝。紳士之後微微一笑，咁樣同佢講。
「你而家有五百萬，另外喺五百年後就會開始排隊投胎。」
阿一呆咗一呆。咩呀，佢究竟講緊咩吖？
「呀，唔記得咗同你講呀，呢度嘅壽命交易係掉轉㗎。每一萬蚊，等待嘅年份就會加一年。以下落嚟嘅時間，請你慢慢等待，好好喺呢度過生活啦。」
講完呢句說話，個紳士就消失咗啦。阿一企咗喺度，五百萬，多過五百年，除番勻，一年仲少過一萬蚊... ...睇嚟，佢都要搬足五百年石頭啦... ...
