尋秦記之「四叔的天體盤」
秦始皇帝，嬴姓，名政，時稱秦王政，畢生欲求長生不老。派人四處打探下，秦始皇帝早就修煉得道。今日的他，生於香港，惜時移易轉，再多的財富亦敵不過通脹。昔日一代帝王，英武銳氣；數千年後的今日，卻被小人困辱，打工捱騾仔，氣焰已消。對秦始皇帝來說，生活的小確幸，是數千年前的愛人阿房女一同得道，兩人生死相許。今日，兩人為保持長生不老，必須覓出練功寶地，即係換樓；但前提是…要近北角返工。
嬴政：阿房，此盤有何著數？聽聞單位奇細！
阿房女：啟稟殿下，細就細啲，你今時唔同往日呀，將就吓啦。之但係你睇5樓啲單位，真係各有特色，絕對係適合潛深修練嘅好地方。
嬴政：願聞其詳。
阿房女：啟稟殿下，先講E室，實用面積164方呎……
嬴政：164呎？人住的嗎？
阿房女：反正你千年道行，早已練成縮骨功！怕甚麼？最重要嘅係，單位有540呎平台，比單位大2.3倍！冇瓦摭頭，餐風飲露，風味絕佳！
嬴政：540呎！好！地方闊落，不單可以大量曬陳皮煉丹，曬多了更可拿出去賣，妙絕！
阿房女：更重要嘅係，你睇，平台打正對面就係明月大廈！單此一點，就說明此乃吸收「日月精華」的絕佳之地！
嬴政：不過阿房，有平台，豈非會貴…我們現在國庫空虛……
阿房女：殿下你放心，仲有選擇！D室就太細，扣埋露台單位內籠得141呎；至於C室唔單止細，廁所洗手盆仲要同廚房洗手盆共用，我就怕我哋長生不老之術再勁，亦會因為呢個充滿大腸桿菌嘅洗手盆而死，所以我會考慮埋A室或B室。
嬴政：此兩單位看來不俗，平台50多呎，佔單位實用面積近三成，仍然可以曬陳皮！
阿房女：殿下，你睇漏一個賣點啦！你睇下個廁所加浴室！
嬴政：何如？阿房…阿房（驚訝），此乃何事？
阿房女：冇錯呀，喺正廁所隔離，就可以開門出去平台。我哋食丹為生，如廁臭氣熏天在所難免，但此門一開，即時心曠神怡，最多係臭親對面樓；至於廁所另一訪嘅企缸旁邊，同樣可以推門出去工作平台！沖沖吓涼時要吹吹風，散一散悶氣，一流！
嬴政：豈有此盤！竟然會有奇人異士，想到有人會沖涼時走出工作平台！妙絕妙絕！且慢，A室工作平台對面是樓，B室對面是商廈，朕豈非一不小心，就要裸露於人前，工作平台變「天體平台」？
阿房女：殿下呀殿下，你唔記得咗，「欲練神功，必先自宮」嗎？反正都自宮了，冇相干啦。
嬴政：你說的也是。對了，這個「天體盤」叫甚麼？
阿房女：恒地（012）嘅尚譽，英文one Prestige。
嬴政：Prestige，好名好名，絕對是「帝王級天體盤」。相信入住此盤後，我們修練成精，指日可待。
完
by千頌C@堆填區
【收市閒情】尋秦記之「四叔的天體盤」（千頌C）
http://bit.ly/2c88nEV
