《無二之初》深夜無人小巴（五）
「呢度……係邊到嚟？」
張開雙眼，我驚愕咁發現自己企咗喺一間荒廢小屋隔離。小屋周圍雜草叢生、了無生機、仲不時有陰風細雨拍落樹葉發出淅淅沙沙嘅聲音。
我先檢查一下身體，唔單止冇傷口，連衫褲都係完好無缺。明明係喺高速小巴上面跳落嚟，冇死到都算，點可能會一啲傷都冇？
＝＝＝＝＝＝＝＝＝＝＝＝＝
第一集：http://bit.ly/2VWhOOB
第二集：http://bit.ly/2FCBbaG
第三集：http://bit.ly/2W3yPXa
第四集：http://bit.ly/2R1r1BG
＝＝＝＝＝＝＝＝＝＝＝＝＝
雖然覺得不可思議，但我隨即諗返起無二講過：只要我肯跳車，就可以離阿聰近一步……
「阿聰！」所以我開始大聲呼喊，「你喺唔喺度啊！？」
碰！
而回應我嘅，係身後嘅一下拍門聲。雖然有少少嚇親，但反應過嚟後我都係選擇行過去，最後嚟到一道殘舊嘅木門前。
「係……」我戰戰兢兢咁開口問：「……係唔係阿聰？」
「阿聰？」一把虛弱嘅女聲隔住木門回應：「我唔係阿聰……」
一知道唔係我固然好失望，正想追問對方呢度係邊度嘅時候……
「奇怪啊……」對方率先開口：「呢度明明已經好多年冇人出現過……」
「好多年……」我茫然咁重複：「冇人……？」
莫非，呢度係死後嘅世界……？
「除非……」講到呢度，對方突然無晒聲氣。
「小姐……除非啲咩？」再過多幾秒後，我忍唔住開聲：「Hello，妳仲喺唔喺度啊？」
雖然唔知對方係咩年紀，但憑住聲音我判斷佢應該同我差唔多大，所以我先稱呼佢做「小姐」。
「我喺度。」未幾，對方終於回應了：「小姐，妳話想搵一個叫做阿聰嘅人，我諗我幫到妳……」
「真係嘅！？」我相當激動。
「嗯。我記得……應該係幾個鐘之前，好似有個男人曾經喺附近經過，佢仲沿住湖嘅方向行過去。」
「湖？」一聽到呢個字，我即刻勾起返尋晚嗰場夢，內心嘅雀躍旋即被不安感所淹沒。
「如果妳係外面入嚟嘅人，可能唔清楚湖喺邊度。我可以帶妳去見佢，但首先……」講到呢度，門柄嗰邊突然傳嚟聲音，「我想妳幫我開一開道門。」
「吓？」我愕然了。
「係咁嘅，我雙手早幾年整傷過，所以發唔到力……可以嗎？」
「當然……冇問題。」為咗可以盡快搵返阿聰，當刻嘅我並冇深思熟慮過就照做。
但就喺我右手掂到門柄嘅一瞬間，突然有股強大嘅力量將我成個人吸去大門前。呢種感覺就好似將手擺喺吸塵機吸頭前面咁，最後全身撞落門發出一聲悶響。
「到底……」雖然嘗試掙扎，但無論點樣都擺脫唔到，「點解……」
唔知係事有湊巧，抑或始作俑者一早計算好。呢一瞬間，我雙眼正好對正木門嘅一處缺口，可以望入小屋裡面……
「……唔好……」
本來眼前仲係一片漆黑，但突然就被一雙深邃嘅眼睛所取代，用直刺刺嘅目光盯實我。
「哈……哈哈哈……」雙眼嘅主人興奮咁笑咗兩聲，「我果然冇估錯……」
佢嘅雙眼彷彿帶住魔力一樣，我完全冇辦法逃避，連合埋眼都做唔到，只能任由佢魚肉……
「我等咗咁耐、苦苦掙扎咗咁多年……終於就快等到呢一日……」
有一瞬間，我見到佢雙瞳慢慢變得混沌起嚟，就好似將墨水滴落一杯清水上面咁……最後，變成最純粹嘅深黑，猶如深淵一樣……
「雖然仲要等多一陣，但好快我哋就會正式見面。」
「好辛──苦──啊啊啊──」
講到呢度，引力變得更加強烈，壓迫感開始轉化為痛苦，我終於忍唔住痛喊出聲。
「我會期待嗰一日，我最親愛嘅……」
「啊啊啊啊啊啊─────」
*
*
*
「吖！？」成功掙脫引力嘅一刻，我激動到成個人彈起身。
腦海都未可以順利運作返，旁邊就突然傳嚟一把男聲：「咦，妳終於返到嚟。」
我即刻擰轉頭望過去，赫然見到無二居然坐咗喺我附近，一臉優哉游哉嘅樣子。再望一望周圍，呢度唔再係陰森恐怖嘅荒廢小屋，而係……無二嘅辦公室？
見我冇回應，無二繼續講落去：「我諗妳應該有試過發夢成個人跌一跌然後扎醒， 頭先妳就係用呢個方法返嚟呢度……」
「夢……？」我聲音相當沙啞，「你意思……即係頭先發生嘅事全部都係夢嚟？」
雖然好似已經脫險，但我全身仲係咁不斷顫抖、不停冒出冷汗。
「錯嘞。」無二馬上否定，「妳經歷嘅所有嘢都係真……」
「但……但點解我跳完車仲係咩事都冇？」
「咁係因為妳係處於『離魂』嘅狀態。」無二解釋：「俗啲嚟講──即係靈魂出竅。」
「但好地地我點會……」講到呢度我終於意識到，原來自己起身之前一直瞓喺佢辦公室張梳化上面。然後，我將目光放落茶几上面嘅嗰一杯茶度，「係杯茶……你喺杯茶上面做咗手腳？跟住……唔知用咩方法誤導我上架小巴……」
「哈，睇嚟妳比我想像中聰明得多。但絕對唔係誤導，妳要搞清楚呢點。」
「你……你到底點解要咁做！？」我咬牙切齒咁問，雖然已經坐返直個人，但雙腿依然係軟弱無力，冇辦法企返起身。
係藥物嘅後遺症？抑或只係我仲未完全擺脫恐懼？呢刻我真係分唔清楚。
「咁係因為妳想搵返阿聰，所以我先幫妳一把。」無二理直氣壯咁講。
「但我根本就見唔到阿聰！只係見到三個已經死咗嘅人，同埋……一個女人。」
「女人？」聞言佢即刻皺起眉頭，「小巴上面除咗妳之外仲有第四個人咩？」
「唔係小巴，係一間荒廢小屋！」我心有餘悸咁講：「你唔好扮唔知喇，明明所有嘢都係你安排！」
「唔係。妳指嗰個女人……同埋荒廢小屋，完全係我意料之外嘅事。」呢刻，無二嘅表情又變得嚴肅起嚟，「如果我冇估錯，妳應該係跳車之後先見到個女人？」
見佢表現到好似真係唔清楚咁，我最後點咗下頭回應。
「我原本係預妳跳完車就會返嚟呢度。」無二托住腮思考咗一陣，「算喇，呢單嘢都係暫時放埋一邊先……」
「吓？但係……」
「因為我哋有更重要嘅嘢要做。」無二先企起身，放低佢手上面杯茶再繼續講：「妳想盡快搵返阿聰，抑或喺度浪費時間諗個女人嘅事？」
「呢層當然係……」
「既然妳已經有答案，就好似頭先喺小巴上面咁，放低恐懼企起身啦。」
猶豫咗幾秒後，我用力全力撐起身，同時講：「但我點知……你會唔會再喺背後搞小動作？」
「妳唔會知，只可以相信。」說罷，無二率先行出走廊，「我哋邊行邊講喇。」
雖然始終都係有啲不安，但我最後都係選擇跟上去。同時心中暗暗發誓，下次一定唔會亂咁飲陌生人斟嘅茶。
（待續）
第五集，開始覺得順利嘅話，呢個故事寫落去會好精彩😂
為咗對抗 FB 嘅打壓，睇完故事嘅朋友，不妨喺留言留句「留名派嬲」同幫手 SHARE 出去呀～有留言有分享就有速度 😂
我哋 100 SHARES 繼續，暫定星期六／日。
＝＝＝＝＝＝＝＝＝＝＝＝＝＝＝＝＝＝＝
【非呃嬲植入式廣告時間】《絕命上映》《絕望走廊》《絕無轉機》《無限次告白》《醉後的藍》已經登錄各大書局。
IG: echoofheart
陰森之子巴哈 在 隔了一年，《陰森The Forest》續作《陰森之子》有新影片！！... 的推薦與評價
巴哈 姆特電玩資訊站, profile picture. Join ... 生存恐怖遊戲《陰森The Forest》續作《陰森之子》曝光新遊玩展示影片. 《陰森（暫譯，原名：The Forest）》開發 ... ... <看更多>