《絕無轉機》我坐上咗一架盛載住絕望嘅航班。（２０）上集
殘舊、生銹、周圍全部都係「無臉人」、充滿住死亡嘅氣息……原來呢個就係「目的地」嘅真面目，我哋之前所見到嘅純粹係美麗嘅「假象」。
「我見到我死咗嘅阿媽……」老陶解釋，然後擰返轉身，「……你哋係咪都係一樣，見到自己屋企人？」
我冇回應，仍然係盯住嗰班無臉人。雖然而家成個感覺都唔同哂，但佢哋嘅行動模式都係同之前一樣，活著就好似行屍走肉一樣……無方向、無目的。
「我唔係。」羽姬搖搖頭，再望向我度，「我……我見到一副骷髏骨。Rex，同我哋喺機上面見到嘅係一模一樣……但佢識講嘢，亦都識行……」
雖然同我諗法一樣，但當刻要關心嘅並唔係呢樣……有樣嘢明顯更加古怪。
＝＝＝＝＝＝＝＝＝＝＝＝＝
《絕無轉機》連載中：
１至１９集：http://bit.ly/2ijVEEd
【植入式廣告】《西營盤》及《絕命上映》已經登錄各大書局！
＝＝＝＝＝＝＝＝＝＝＝＝＝
「……佢仲俾咗把槍我。」羽姬繼續講，向我哋展示腰間嘅一把手槍，「話我將來一定會用到……」
「槍？」老陶好意外。
「Kathy小心呀，如果俾周圍嘅人見到就麻煩！」阿琪提醒佢。
「咪住，」聽到呢度我終於忍唔住出聲，「你哋……係咪見唔到周圍嘅情況？」
「……咩情況？」羽姬問。
見到佢哋幾個聽完即刻皺起眉頭，呢個表情已經係非常好嘅答案。
「果然係咁……聽住，無論你哋頭先係見到嘅熟人定係骷髏骨，佢哋其實都係同一個人……同一個『意識』，去幫我哋去搵出個病毒。」我嘗試解釋。
「係……」阿琪點頭，「的確係咁。」
「我見到我嘅仇人，」我繼續講，「佢令我可以睇清楚呢個地方嘅真實情況。原來所有嘢都係假象，而家喺我哋身邊嘅通通都唔係人類……而係『無臉人』，同喺機上面見到嗰班係一模一樣。」
「咩話？」聞言，老陶即刻忍唔住抹一抹雙眼，「但點解得你會見到……我哋又唔會？」
「佢希望我哋合作……」阿琪比我搶先一步回應，「我見到嘅嗰個人同我講，我哋五個人得到同知道嘅嘢都唔同。只要合作……相信對方，就可以搵到個病毒。」
「同Fiona講嘅嘢一樣……所以我而家可以見到周圍嘅情況，羽姬多咗把槍，咁你哋呢？」我問。
「我阿媽，」老陶搖搖頭，「其實聽完你咁講我都唔知佢算唔算係我阿媽，點都好……佢叫我一定要跟住你哋，死命咁跟住，唔可以離開半步……佢話去到某個時候一定會發揮作用。」
「我見到嗰個人戴住黑色面罩，我睇唔到佢個樣……佢叫我要順著自己想法行動，」阿琪接著講，「Lincoln你呢？」
「我……」Lincoln正想回答嘅一刻，突然有嘢吸引到佢注意，「好似有人行緊嚟！」
「係阿彤同阿飛……」羽姬接著講。
我即刻轉身望過去。喺我眼中，佢哋當然唔再係人類，而係兩個無臉人，一路行一路發出刺耳嘅聲音……唔通佢哋係講緊嘢？
「佢哋係無臉人……」我壓低聲同佢哋講嘢，「你哋要小心……」
下一瞬間『阿飛』同『阿彤』已經嚟到我哋面前。阿琪反應好快第一時間開聲講：
「啊，我仲以為你哋過咗關添！」
接著佢哋又發出刺耳嘅怪聲，臉容就好似波浪咁會隨著聲音起伏。果然冇錯……我見到佢哋嘅「真象」同時，變相係失去咗聽佢哋講嘢嘅能力……
「佢哋兩個？」阿琪望向我同老陶身上，「係頭先喺機上面識，都係美藉華人嚟……見幾好傾埋一齊行囉，係咪呀Kathy？」
「嗯，」羽姬強擠出一個微笑，「我哋一陣諗住帶埋佢哋去搭車。」
「Yeah！」老陶即刻扮到好美國人咁，「They are very nice！」
雖然成個畫面睇落真係好荒誕，但我完全唔會覺得有趣，只係有種心寒嘅感覺……回想返頭先喺機艙入面逃難嘅情況，總覺得佢哋會隨時發難，用沾滿鮮血嘅手拉走我哋……
「啊……」阿琪突然張大嘴巴，「好……咁我哋一齊行。」
說罷，兩個無臉人就轉身望住入境方向行。
「我哋要同埋佢哋一齊過關。」羽姬細細聲同我講。
「過就過……」阿琪接著講，一樣係好細聲，「反正我哋都仲未諗都點做。我有種感覺，跟過去應該係冇錯……」
「妳果然係諗住順著感覺。」Lincoln顯得有少少無奈，「但記住有唔對路一定要走……」
講完全係輕描淡寫，因為越行就越見到更多無臉人，真係發生狀況嗰陣係咪真係有可能走得甩……？
就係咁，我哋開始跟住兩個無臉人行，因為距離太近所以途中並冇點講到嘢。直至行到去某個洗手間旁邊嘅時候。無臉人停咗腳步，之後轉過身同阿琪佢哋「講嘢」。
「我哋頭先喺機上面去咗……」阿琪笑著講。
「係呀……你哋去啦。」羽姬跟住回應，佢同阿琪唔同，始終係表現得有啲生硬。
睇住佢哋兩個分別行入男女廁之後，我哋幾個總算暫時鬆口氣。
「係喇，」阿琪望向去Lincoln度，好奇地問：「你頭先都未講完，到底見到啲咩同知道啲咩？」
「我……」Lincoln抬起頭望住天花，顯得有少少尷尬，「見到我自己。」
「你自己？」
「嗯，佢叫我……」佢停咗一停，「叫我一定要保護好妳……」
「……如果唔係，等待我哋嘅將會係最壞嘅情況。」
（待續）
《走廊》實體書執到去尾聲，容許我繼續玩住半集先～聽日出埋全集！睇完鍾意就記住俾個 Like 同 share 啦！
＝＝＝＝＝＝＝＝＝＝＝＝＝＝＝＝＝＝＝＝＝＝
FB： 有心無默
個人ac：（歡迎 follow ～）
https://www.facebook.com/myechoofheart
IG：echoofheart
【解悶良伴】
《絕命上映》
http://bit.ly/1XWiVud
《絕望走廊》
http://bit.ly/25qf91O
《西營盤》
http://bit.ly/27ZWrwN
《醉後的藍》
http://bit.ly/1Pekb4K
《無限次告白》
http://bit.ly/25PaQxi
《正負人生》
http://bit.ly/290huFB
《時間守衡者》
http://bit.ly/29l7aIZ
《同居貓物語》
http://bit.ly/29B6JL1
【情人節中伏系列】《飄浮的眼淚》
http://bit.ly/29E6mmx
【情人節中伏系列】《心的謊言》
http://bit.ly/29UiOd3
《最近距離的來信》
http://bit.ly/2bxNXtI
